1-2. (a) Ita sei sente oinsá bainhira hanoin kleʼan kona-ba Jesus nia moris no haklaken? (b) Iha lisaun neʼe, ita sei aprende saida?

 BAINHIRA ema neʼebé ita hadomi mate, ita saudades loos nia. Foufoun, karik ita sente laran-kanek loos bainhira hanoin fali kona-ba loron balu antes nia mate, liuliu se nia terus tebes antes mate. Maibé nuʼudar tempu liu daudaun, ita komesa sente kontente fali bainhira hanoin kona-ba buat neʼebé nia hanorin, halo ka hatete atu anima ita ka atu halo ita hamnasa.

² Iha dalan neʼebé hanesan, ita mós sente triste bainhira lee kona-ba Jesus nia terus no mate. Durante tempu Memoriál, ita uza tempu atu hanoin kona-ba Jesus nia sakrifísiu neʼebé folin-boot. (1 Kor 11:24, 25) Maibé ita mós bele hetan ksolok bainhira hanoin kleʼan kona-ba buat hotu neʼebé Jesus halo no hatete kuandu nia iha mundu. Ita mós bele hetan laran-manas bainhira hanoin kona-ba buat neʼebé nia halo agora daudaun no sei halo iha futuru. Se ita hanoin kleʼan kona-ba buat sira-neʼe no ninia domin ba ita, neʼe bele book ita atu hatudu agradese, hanesan ita sei haree iha lisaun neʼe.

3. Tanbasá ita sente agradese ba Jesus nia sakrifísiu?

³ Ita sente agradese bainhira ita hanoin kleʼan kona-ba Jesus nia moris no mate. Bainhira Jesus haklaken iha mundu, nia hanorin ema kona-ba bensaun sira neʼebé Maromak nia Ukun sei haraik mai mundu. Ita hafolin tebes lia-loos sira-neʼe. Ita sente agradese ba Jesus nia sakrifísiu  tanba neʼe loke dalan mai ita atu iha relasaun diʼak ho Jeová no Jesus. Ema sira neʼebé hatudu fiar ba Jesus iha esperansa atu moris ba nafatin no hasoru fali sira-nia família no belun neʼebé mate ona. (João 5:28, 29; Rom 6:23) Tuir loloos, ita la merese atu simu bensaun sira-neʼe, no ita mós nunka bele selu fali buat neʼebé Maromak no Kristu halo ona mai ita. (Rom 5:8, 20, 21) Maibé ita bele hatudu katak ita hafolin tebes ida-neʼe. Oinsá?

4. Oinsá Maria Madalena hatudu agradese ba buat neʼebé Jesus halo ona ba nia? (Haree dezeñu.)

⁴ Hanoin toʼok ezemplu husi feto Judeu naran Maria Madalena. Nia hasoru susar barak tanba anju aat hitu fó-terus ba nia. Karik nia hanoin katak la iha ema ida mak bele ajuda nia. Klaru katak nia sente agradese tebes bainhira Jesus halo nia livre husi anju aat sira-neʼe. Tanba sente agradese, nia deside atu sai Jesus nia dixípulu no uza ninia tempu, enerjia no rikusoin atu apoia Jesus iha serbisu haklaken. (Lc 8:1-3) Maria agradese tebes ba buat neʼebé Jesus halo ona ba nia. Karik Maria la hatene katak Jesus mós sei fó prezente furak hodi fó ninia moris ba ita ema, “atu nuneʼe ema hotu neʼebé hatudu fiar ba nia” bele moris ba nafatin. (João 3:16) Maski nuneʼe, Maria hatudu agradese ba Jesus liuhusi hatudu laran-metin. Bainhira Jesus terus iha ai-riin, Maria hamriik besik tanba nia hanoin Jesus no hakarak fó kmaan ba ema seluk iha neʼebá. (João 19:25) Depois Jesus mate, Maria no feto naʼin-rua seluk lori buat morin oioin atu tau iha Jesus nia mate-isin. (Mc 16:1, 2) Jeová haraik bensaun boot ba Maria tanba laran-metin ba Jesus. Maria hetan oportunidade atu hasoru no koʼalia ho Jesus neʼebé moris-hiʼas. Só dixípulu uitoan deʼit mak hetan oportunidade neʼe.​—João 20:11-18.

5. Oinsá ita bele hatudu agradese ba buat hotu neʼebé Jeová no Jesus halo ona mai ita?

 ⁵ Ita mós bele hatudu agradese ba buat hotu neʼebé Jeová no Jesus halo ona mai ita liuhusi uza ita-nia tempu, enerjia no rikusoin atu serbí Jeová. Porezemplu, ita bele ajuda harii no halo manutensaun ba fatin adorasaun sira.

6. Tanbasá ita bele dehan katak Jesus nia sakrifísiu mak prezente ba ita ida-idak?

⁶ Bainhira ita hanoin kona-ba oinsá Jeová no Jesus hadomi ita, neʼe book ita atu hadomi fali sira. (1 João 4:10, 19) Ita hadomi liután sira bainhira ita hatene katak Jesus mate ba ita rasik. Apóstolu Paulo rekoñese ida-neʼe no nia fó sai agradese iha ninia karta ba ema Kristaun iha Galásia hodi dehan: “Maromak nia Oan-Mane . . . hadomi haʼu no fó nia moris ba haʼu-nia diʼak.” (Gal 2:20) Tanba Jesus mate ba Ita, Jeová bele dada Ita ba nia atu nuneʼe Ita bele sai ninia belun. (João 6:44) Tanba Ita hatene katak Jeová haree buat diʼak husi Ita no nia selu folin neʼebé boot tebes atu Ita bele sai ninia belun, neʼe book tebes Ita-nia laran. No neʼe mós book Ita atu hadomi liután Jeová no Jesus. Ita presiza husu ba Ita-nia an: ‘Domin book haʼu atu halo saida?’

7. Hanesan hatudu iha foto, oinsá ita hotu bele hatudu domin ba Jeová no Jesus? (2 Korinto 5:14, 15; 6:1, 2)

⁷ Ita-nia domin ba Maromak no Kristu book ita atu hatudu domin ba ema seluk. (Lee 2 Korinto 5:14, 15; 6:1, 2.) Dalan ida atu hatudu domin mak liuhusi haklaken ho laran-manas. Ita hakarak haklaken ba ema hotu neʼebé ita hasoru. Ita lakohi diskrimina ema tanba sira riku ka kiak, iha edukasaun aas ka  la eskola, ka mai husi rasa no suku neʼebé la hanesan ho ita. Bainhira ita halo nuneʼe, ita halo tuir Jeová nia hakarak atu “ema hotu hetan salvasaun no hetan koñesimentu neʼebé loos kona-ba lia-loos”.​—1 Tim 2:4.

8. Oinsá ita bele hatudu katak ita hadomi irmaun-irmán sira?

⁸ Ita mós prova katak ita hadomi Maromak no Kristu liuhusi hatudu domin ba irmaun-irmán sira. (1 João 4:21) Hatudu interese no ajuda sira kuandu sira hasoru susar. Fó kmaan ba sira bainhira ema neʼebé sira hadomi mate, vizita sira bainhira sira moras, no hakaʼas an atu anima sira bainhira sira laran-kraik. (2 Kor 1:3-7; 1 Tes 5:11, 14) Kontinua halo orasaun ba sira tanba ita hatene katak “ema laran-loos nia harohan iha forsa boot tebes”.​—Tgo 5:16.

9. Iha dalan oinsá mak ita bele hatudu domin ba irmaun-irmán sira?

⁹ Ita mós hatudu domin ba irmaun-irmán sira liuhusi hakaʼas an atu buka dame ho sira. Ita hakarak banati-tuir dalan neʼebé Jeová fó perdua ba ema seluk. Jeová prontu atu husik ninia Oan-Mane mate ba ita-nia sala. Entaun ita mós presiza prontu atu fó perdua ba irmaun-irmán sira neʼebé halo sala hasoru ita. Ita lakohi sai hanesan atan laran-aat neʼebé Jesus temi iha ninia ai-knanoik. Maski atan neʼe nia naʼi halo nia livre husi debe boot, maibé nia la halo livre atan seluk neʼebé debe osan uitoan deʼit husi nia. (Mt 18:23-35) Se mosu problema entre Ita no ema ruma iha kongregasaun, Ita iha inisiativu atu buka dame antes tuir Memoriál ka lae? (Mt 5:23, 24) Se Ita halo nuneʼe, Ita hatudu katak Ita hadomi Jeová no Jesus.

10-11. Oinsá katuas sira hatudu domin ba Jeová no Jesus? (1 Pedro 5:1, 2)

¹⁰ Oinsá katuas sira hatudu katak sira hadomi Jeová no Jesus? Dalan importante ida mak hodi tau matan ba bibi sira-nia presiza. (Lee 1 Pedro 5:1, 2.) Jesus fó sai ida-neʼe ho klaru ba apóstolu Pedro. Depois nega tiha Jesus ba dala tolu, Pedro hakarak tebes atu prova katak nia hadomi Jesus. Depois Jesus moris-hiʼas, Jesus husu ba Pedro: “Simão, João nia oan, ó hadomi haʼu ka lae?” Ita bele fiar katak Pedro prontu atu halo buat naran deʼit hodi prova katak nia hadomi ninia Naʼi. Jesus hatete ba Pedro: “Tau matan ba haʼu-nia bibi-oan sira.” (João 21:15-17) Husi tempu neʼebá, Pedro tau matan ba Naʼi nia bibi ho laran-diʼak, no neʼe hatudu katak nia hadomi Jesus.

¹¹ Durante tempu Memoriál, se Ita mak katuas ida, oinsá Ita bele hatudu katak Jesus nia liafuan ba Pedro mak importante ba Ita? Ita bele hatudu katak Ita hadomi Jeová no Jesus liuhusi uza tempu beibeik atu anima irmaun-irmán sira no mós hakaʼas an atu ajuda ema neʼebé la ativu atu fila fali ba Jeová. (Eze 34:11, 12) Ita mós bele anima estudante Bíblia no mós ema neʼebé foin tuir Memoriál. Ita hakarak halo sira sente kmaan hodi simu sira ho laran-diʼak no Ita hein katak sira mós sei sai Jesus nia dixípulu.

12. Tanbasá ita bele sai aten-brani bainhira hanoin kona-ba Jesus nia liafuan iha kalan antes nia mate? (João 16:32, 33)

¹² Kalan antes Jesus mate, Jesus hatete ba ninia dixípulu: “Iha mundu imi sei hasoru susar, maibé aten-brani bá!  Tanba haʼu manán tiha ona mundu.” (Lee João 16:32, 33.) Saida mak ajuda Jesus atu hatudu aten-brani no kontinua laran-metin toʼo mate maski inimigu ameasa nia? Nia sadere ba Jeová. Jesus hatene katak ninia dixípulu sira mós sei hasoru susar neʼebé hanesan. Tan neʼe Jesus husu ba Jeová atu tau matan ba sira. (João 17:11) Tanbasá neʼe fó ita aten-brani? Tanba Jeová forsa boot liu fali ita-nia inimigu hotu. (1 João 4:4) Jeová haree buat hotu. Ita fiar katak se ita sadere ba Jeová, nia bele ajuda ita atu la taʼuk no sai aten-brani.

13. Oinsá José husi Arimateia hatudu aten-brani?

¹³ Hanoin toʼok kona-ba José husi Arimateia. Ema Judeu respeitu loos nia. Nia mak membru ba ema Judeu nia tribunál aas naran Sinédriu. Durante Jesus haklaken iha mundu, José la hatudu aten-brani. João hatete katak José mak “Jesus nia dixípulu ida, maibé nia la fó sai kona-ba neʼe tanba taʼuk ema Judeu sira”. (João 19:38) Maski José hatudu interese ba mensajen kona-ba Maromak nia Ukun, maibé nia subar husi ema seluk katak nia fiar Jesus. Karik nia taʼuk katak ema sei la respeitu tan nia. Maibé Bíblia hatete katak depois Jesus mate, José “ho aten-brani bá hasoru Pilatos hodi husu Jesus nia mate-isin”. (Mc 15:42, 43) José la subar tan katak nia mak Jesus nia dixípulu.

14. Ita presiza halo saida se Ita sente taʼuk ba ema?

¹⁴ Hanesan José, Ita mós sente taʼuk ba ema ka lae? Iha eskola ka serbisu-fatin, dala ruma Ita sente moe atu fó sai katak Ita mak Testemuña ba Jeová ka lae? Ita dada an atu sai haklaken-naʼin ka hetan batizmu tanba taʼuk buat neʼebé ema sei hanoin kona-ba Ita ka lae? Keta husik sentimentu sira-neʼe hanetik Ita atu halo buat neʼebé Ita hatene mak loos. Halo orasaun ho laran ba Jeová. Husu nia fó Ita aten-brani atu halo ninia hakarak. Bainhira Ita haree rasik oinsá Jeová hatán ba Ita-nia orasaun, neʼe sei ajuda Ita atu sai forsa liután no aten-brani liután.​—Isa 41:10, 13.

15. Depois Jesus mosu ba dixípulu sira, ksolok book sira atu halo saida? (Lucas 24:52, 53)

¹⁵ Dixípulu sira sente triste bainhira Jesus mate. Imajina katak Ita mak iha sira-nia situasaun. Sira lakon ema neʼebé sira hadomi no mós sente katak sira  lakon sira-nia esperansa. (Lc 24:17-21) Maski nuneʼe, bainhira Jesus mosu ba sira, nia uza tempu atu ajuda sira komprende oinsá nia kumpre Bíblia nia profesia. Nia mós fó ba sira serbisu neʼebé importante. (Lc 24:26, 27, 45-48) Loron 40 liutiha bainhira Jesus saʼe ba lalehan, dixípulu sira la sente triste tan, maibé sira kontente tebes. Sira sente kontente tanba hatene katak Jesus moris-hiʼas no sei ajuda sira atu halo serbisu neʼebé nia entrega ba sira. Sira-nia ksolok book sira atu kontinua fó ba hahiʼi ba Jeová.​—Lee Lucas 24:52, 53; Após 5:42.

16. Oinsá ita bele banati-tuir Jesus nia dixípulu?

¹⁶ Oinsá ita bele banati-tuir Jesus nia dixípulu? Ita bele hetan ksolok hodi adora Jeová, laʼós deʼit durante tempu Memoriál, maibé iha tempu hotu. Neʼe katak ita presiza tau uluk Maromak nia Ukun iha ita-nia moris. Porezemplu, ema barak troka sira-nia oráriu serbisu atu bele haklaken, tuir reuniaun no halaʼo adorasaun família beibeik. Ema seluk deside atu la buka osan no sasán barak liu fali buat neʼebé sira presiza hodi bele ajuda liután iha kongregasaun ka serbí iha fatin neʼebé presiza liután haklaken-naʼin. Maski ita presiza kontinua tahan atu bele nafatin serbí Jeová, maibé Jeová promete atu haraik bensaun barak se ita tau uluk ninia Ukun iha ita-nia moris.​—Prov 10:22; Mt 6:32, 33.

17. Saida mak Ita sei halo durante tempu Memoriál neʼe? (Haree foto.)

¹⁷ Ita hein namanas atu tuir Memoriál iha loron-tersa 4 Abríl. Maibé keta hein toʼo loron neʼe mak foin hanoin kleʼan kona-ba Jesus nia moris no mate no mós kona-ba Jeová no Jesus nia domin mai ita. Hanoin beibeik buat sira-neʼe durante tempu Memoriál. Porezemplu, buka tempu atu lee no hanoin kleʼan kona-ba akontesimentu sira husi Apéndise B12 iha Bíblia Tradusaun Mundu Foun kona-ba “Jesus nia semana ikus iha mundu”. Bainhira Ita lee kona-ba Jesus, buka eskritura sira neʼebé bele book Ita atu hatudu agradese, hametin Ita-nia domin, aten-brani no mós ksolok. Tuirmai hanoin dalan balu neʼebé Ita bele hatudu agradese. Ita bele fiar katak Jesus hafolin buat neʼebé Ita halo atu hanoin-hetan nia durante tempu Memoriál.​—Apok 2:19.