1-2. Katuas sira-nia knaar mak saida deʼit?

 SE ITA serbí ona nuʼudar atan kongregasaun ba tempu balu, karik Ita haburas ona hahalok diʼak balu neʼebé katuas kongregasaun presiza hatudu. Se nuneʼe, Ita hakarak halo ‘serbisu diʼak’ neʼe ka lae?—1 Tim 3:1.

² Katuas sira-nia knaar mak saida deʼit? Neʼe mak atu hatudu ezemplu diʼak kona-ba haklaken, tau matan no hanorin bibi sira, no hametin kongregasaun liuhusi liafuan no hahalok. Tan neʼe, Bíblia temi katuas sira nuʼudar “prezente”.—Éf 4:8.

3. Oinsá irmaun ida bele kumpre kritéria atu serbí nuʼudar katuas? (1 Timóteo 3:​1-7; Tito 1:​5-9)

³ Oinsá Ita bele kumpre kritéria atu serbí nuʼudar katuas? Kritéria atu sai katuas la hanesan ho kritéria atu hetan serbisu iha kompañia ruma. Se Ita atu hetan serbisu, Ita presiza iha abilidade neʼebé patraun sira buka. Maibé atu serbí nuʼudar katuas, la toʼo atu iha deʼit matenek atu haklaken no hanorin. Ita presiza kumpre kritéria neʼebé temi iha 1 Timóteo 3:​1-7 no Tito 1:​5-9. (Lee.) Iha lisaun neʼe, ita sei koʼalia kona-ba pontu importante tolu neʼebé irmaun ida presiza kumpre, neʼe mak iha reputasaun diʼak, sai família nia ulun neʼebé diʼak, no prontu serbí kongregasaun.

IHA REPUTASAUN DIʼAK

4. “Moris ho didiʼak atu ema la hetan razaun atu duun nia” katak sá?

⁴ Irmaun neʼebé serbí nuʼudar katuas tenke “moris ho  didiʼak atu ema la hetan razaun atu duun nia”, neʼe katak iha reputasaun diʼak iha kongregasaun. Ita mós presiza “iha naran diʼak ho ema neʼebé laʼós parte ba kongregasaun”. Karik ema neʼebé la adora Jeová koʼalia aat kona-ba Ita-nia fiar. Maibé sira sei la iha razaun atu duvida katak Ita mak ema neʼebé laran-moos no hatudu hahalok diʼak. (Dan 6:​4, 5) Husu Ita-nia an: ‘Haʼu iha reputasaun diʼak ho irmaun-irmán sira no ema neʼebé la serbí Jeová ka lae?’

5. “Hadomi buat diʼak” katak sá?

⁵ Se Ita “hadomi buat diʼak”, Ita sei fokus ba ema seluk nia hahalok diʼak no gaba sira. Ita mós kontente atu halo buat diʼak ba ema seluk maski neʼe laʼós buat neʼebé ita tenke halo. (1 Tes 2:8) Tanbasá importante atu katuas sira hadomi buat diʼak? Tanba sira uza sira-nia tempu barak atu tau matan sira-nia knaar no mós irmaun-irmán sira. (1 Ped 5:​1-3) Maski sira okupadu, sira nafatin haksolok tanba bele ajuda ema seluk.—Após 20:35.

6. “Simu ema ho laran diʼak” katak sá? (Ebr 13:​2, 16; haree mós foto.)

⁶ “Simu ema ho laran-diʼak” katak halo buat diʼak ba ema seluk, inklui ema neʼebé laʼós Ita-nia belun. (1 Ped 4:9) Referénsia ida kona-ba Bíblia hatete katak ema neʼebé iha hahalok neʼe hatudu laran-diʼak ba ema neʼebé sira la koñese, no kontente atu simu ema iha sira-nia uma. Husu Ita-nia an: ‘Ema koñese haʼu nuʼudar ema neʼebé hatudu laran-diʼak ba bainaka sira ka lae?’ (Lee Ebreu 13:​2, 16.) Ema neʼebé iha hahalok neʼe fahe buat neʼebé sira iha ba bainaka sira, inklui ba ema neʼebé presiza ajuda, no irmaun sira neʼebé serbisu makaʼas hanesan katuas área no sira neʼebé mai atu hatoʼo diskursu.—Gén 18:​2-8; Prov 3:27; Lc 14:​13, 14; Após 16:15; Rom 12:13.

7. “La hadomi osan” katak sá?

⁷ “La hadomi osan.” Neʼe katak Ita la fokus liu ba osan ka rikusoin. Maski Ita mak riku ka kiak, Ita tau uluk Maromak nia Ukun iha Ita-nia moris. (Mt 6:33) Ita uza Ita-nia tempu, enerjia, no  buat neʼebé Ita iha atu adora Jeová, tau matan Ita-nia família, no serbí kongregasaun. (Mt 6:24; 1 João 2:​15-17) Husu Ita-nia an: ‘Haʼu hanoin oinsá kona-ba osan? Haʼu kontente ho buat neʼebé haʼu iha ka lae? Ka haʼu fokus atu buka osan no sasán barak liután?’—1 Tim 6:​6, 17-19.

8. Iha dalan saida deʼit mak Ita hatudu katak Ita “kontrola an”?

⁸ Se Ita ‘kontrola Ita-nia hahalok’ no “kontrola an”, Ita sei halaʼo moris ho balansu. Neʼe inklui la han demais, la hemu demais, hatais no hadiʼa an iha dalan neʼebé respeitu, no hili didiʼak atividade halimar nian. Ita la moris tuir mundu neʼe nia hanoin. (Lc 21:34; Tgo 4:4) Ita nafatin kalma bainhira ema provoka Ita. Ita “la lanu-teen” no ema la koñese Ita nuʼudar ema neʼebé hemu tua barak. Husu Ita-nia an: ‘Ema koñese haʼu nuʼudar ema neʼebé kontrola an ka lae?’

9. Oinsá Ita bele “iha hanoin neʼebé loos” no “moris iha dalan neʼebé loos”?

⁹ Se Ita “iha hanoin neʼebé loos”, Ita sei hanoin didiʼak kona-ba Bíblia nia prinsípiu neʼebé liga ho situasaun ida-idak neʼebé Ita hasoru. Hodi halo nuneʼe, Ita sei komprende situasaun no tetu didiʼak. Ita la ansi atu foti konkluzaun, maibé buka faktu sira ho kompletu. (Prov 18:13) Rezultadu mak Ita sei halo desizaun neʼebé tuir Jeová nia hanoin. Se Ita “moris iha dalan neʼebé loos”, Ita sei organiza an ho didiʼak no tuir tempu. Ema sei koñese Ita nuʼudar ema neʼebé sempre halo tuir matadalan no bele tau fiar. Hahalok sira-neʼe sei ajuda Ita atu iha reputasaun diʼak. Mai ita koʼalia kona-ba kritéria neʼebé katuas sira presiza kumpre nuʼudar ulun ba família.

SAI FAMÍLIA NIA ULUN NEʼEBÉ DIʼAK

10. Oinsá mak irmaun ida “tau matan ba ninia família iha dalan neʼebé diʼak”?

¹⁰ Se Ita mak laʼen no hakarak serbí nuʼudar katuas, Ita-nia família presiza iha reputasaun diʼak. Tan neʼe, Ita presiza ‘tau matan ba Ita-nia família iha dalan neʼebé diʼak’. Neʼe katak Ita tau matan ba família ho domin no halo desizaun neʼebé diʼak ba sira. Neʼe inklui halaʼo adorasaun família, ajuda sira tuir reuniaun, no haklaken. Tanbasá neʼe importante tebes? Apóstolu Paulo hatete: “Se mane ida la hatene tau matan ba ninia umakain rasik, oinsá mak nia sei tau matan ba Maromak nia kongregasaun?”—1 Tim 3:5.

11-12. Se irmaun ida hakarak sai katuas, tanbasá ninia oan nia hahalok mak importante? (Haree mós foto.)

¹¹ Se Ita mak aman ida, Ita-nia oan neʼebé menór idade tenke “halo tuir no hatudu hahalok diʼak”. Ita presiza hanorin no treinu sira ho domin. Klaru katak Ita hakarak sira kontente no halimar hanesan labarik seluk. Maibé Ita presiza hanorin sira atu halo tuir Ita, hatudu respeitu, no iha hahalok diʼak. Ita presiza hakaʼas an atu ajuda sira iha relasaun diʼak ho Jeová, moris tuir Bíblia nia prinsípiu, no laʼo ba oin toʼo hetan batizmu.

¹² “Ninia oan sira mak fiar-naʼin neʼebé ema la duun katak sira moris arbiru ka kontradór.” Se oan neʼebé Testemuña hela ho inan-aman no halo sala sériu, oinsá neʼe afeta ninia aman? Se aman neʼe la badinas atu treinu ninia oan no fó dixiplina, karik nia la kumpre kritéria atu serbí nuʼudar katuas.—Haree Menara Pengawal 15 Outubru 1996, p. 21, par. 6-7.

 SERBÍ KONGREGASAUN

13. Oinsá Ita bele hatudu katak Ita “la ulun-toos” no ‘la halo tuir deʼit Ita-nia hakarak rasik’?

¹³ Irmaun neʼebé hatudu hahalok diʼak lori benefísiu ba kongregasaun. Irmaun neʼebé “la ulun-toos” haburas dame. Se Ita hakarak ema koñese Ita nuʼudar ema neʼebé la ulun-toos, Ita presiza rona ba ema seluk no koko komprende sira-nia hanoin. Imajina toʼok Ita tuir enkontru katuas nian. Se katuas barak konkorda ho desizaun neʼebé bazeia ba Bíblia, Ita sei apoia ka lae maski Ita iha ideia seluk? Ita ‘la halo tuir deʼit Ita-nia hakarak rasik’, neʼe katak Ita la obriga ema atu tuir deʼit Ita. Ita hafolin ema seluk nia opiniaun. (Gén 13:​8, 9; Prov 15:22) Ita “la istori malu” ka “la hirus lalais”, neʼe katak Ita la diskute malu, maibé hatudu laran-diʼak no respeitu. Nuʼudar ema neʼebé “buka dame”, Ita hakaʼas an atu haburas dame maski iha situasaun susar. (Tgo 3:​17, 18) Se Ita koʼalia ho laran-diʼak, neʼe sei halo ema sente kalma, inklui sira neʼebé kontra Ita-nia fiar.—Juís 8:​1-3; Prov 20:3; 25:15; Mt 5:​23, 24.

14. “Laʼós ema neʼebé foin sai fiar-naʼin” no “laran-metin” katak sá?

¹⁴ Irmaun neʼebé serbí nuʼudar katuas kongregasaun mak “laʼós ema neʼebé foin sai fiar-naʼin”. Neʼe la dehan katak Ita presiza batizmu ba tinan barak, maibé Ita presiza tempu atu sai ema Kristaun neʼebé maduru. Antes serbí nuʼudar katuas, Ita presiza halo tuir Jesus nia ezemplu kona-ba haraik an no hein atu simu knaar naran deʼit husi Jeová ho kontente. (Mt 20:23; Flp 2:​5-8) Ita bele hatudu katak Ita “laran-metin” ba Jeová hodi moris tuir ninia matadalan sira no ninia organizasaun.—1 Tim 4:15.

15. Katuas sira tenke matenek atu hatoʼo diskursu ka lae? Esplika toʼok.

¹⁵ Bíblia dehan katak katuas sira presiza  “iha kbiit atu hanorin”. Neʼe katak Ita tenke matenek atu hatoʼo diskursu ka lae? Lae. Laʼós katuas hotu mak matenek atu hatoʼo diskursu, maibé sira hatene oinsá atu haklaken no hanorin irmaun-irmán sira hodi uza Bíblia ho didiʼak. (Kompara ho 1 Korinto 12:​28, 29; Éfeso 4:11) Maski nuneʼe, katuas hotu presiza hakaʼas an atu kontinua aumenta sira-nia matenek atu hanorin. Oinsá bele halo nuneʼe?

16. Oinsá Ita bele hanorin ho diʼak liután? (Haree mós foto.)

¹⁶ “Kaer metin ba Maromak nia liafuan.” Atu bele hanorin ho matenek, Ita-nia hanorin no konsellu tenke bazeia ba Bíblia. Tan neʼe, Ita presiza estuda Bíblia no publikasaun sira ho badinas. (Prov 15:28; 16:23) Kuandu estuda, buka-hatene oinsá atu aplika eskritura sira iha dalan neʼebé loos. Bainhira Ita hanorin, hakaʼas an atu book ema nia laran. Ita bele aumenta Ita-nia matenek atu hanorin hodi husu sujestaun husi katuas neʼebé iha esperiénsia, no aplika ida-neʼe. (1 Tim 5:17) Katuas sira presiza “anima” irmaun-irmán sira no dala ruma presiza fó konsellu ka “korrije” sira. Iha situasaun hotu, katuas sira presiza hatudu laran-diʼak. Se Ita laran-diʼak, hatudu domin, no hanorin buat neʼebé bazeia ba Bíblia, Ita sei sai mestre neʼebé diʼak tanba banati-tuir Mestre Boot Jesus.—Mt 11:​28-30; 2 Tim 2:24.

KONTINUA HAKAʼAS AN ATU KUMPRE KRITÉRIA

17. (a) Saida mak bele ajuda atan ba kongregasaun atu kontinua hakaʼas an kumpre kritéria? (b) Saida mak katuas sira presiza hanoin antes rekomenda irmaun ida? (Haree kaixa “ Hatudu haraik an kuandu atu rekomenda irmaun ida”.)

¹⁷ Atan ba kongregasaun balu sente katak sira sei nunka bele kumpre kritéria atu serbí nuʼudar katuas kongregasaun. Maibé hanoin-hetan katak Jeová no ninia  organizasaun sei la espera Ita atu kumpre ida-neʼe ho perfeitu. (1 Ped 2:21) Jeová nia espíritu bele ajuda Ita atu haburas hahalok neʼebé katuas sira presiza hatudu. (Flp 2:13) Iha ka lae hahalok ruma neʼebé Ita hakarak hadiʼa? Se nuneʼe, halo orasaun ba Jeová. Halo peskiza kona-ba pontu neʼe, no husu katuas ida atu fó sujestaun kona-ba oinsá atu hadiʼa hahalok neʼe.

18. Atan ba kongregasaun presiza halo saida?

¹⁸ Ita hotu, inklui sira neʼebé serbí ona nuʼudar katuas, presiza kontinua haburas hahalok sira neʼebé temi iha lisaun neʼe. (Flp 3:16) Ita mak atan ba kongregasaun ka lae? Se nuneʼe, kontinua laʼo ba oin! Husu Jeová treinu Ita hodi bele serbí nia liután no ninia kongregasaun. (Isa 64:8) Jeová sei haraik bensaun ba Ita-nia hakaʼas an atu kumpre kritéria hodi serbí nuʼudar katuas kongregasaun.