1. Saida mak desizaun diʼak liu neʼebé ema ida bele halo?

BAIBAIN desizaun sira neʼebé inan-aman halo bele afeta oan nia moris durante tempu kleur. Se inan-aman halo desizaun neʼebé la diʼak, neʼe bele lori problema ba sira-nia oan. Maibé se sira halo desizaun neʼebé matenek, sira bele ajuda sira-nia oan atu moris kontente. Maibé oan sira mós presiza halo desizaun neʼebé matenek. Desizaun diʼak liu neʼebé ema ida bele halo mak atu serbí ita-nia Aman iha lalehan Jeová.​—Sal 73:28.

2. Jesus no ninia inan-aman halo desizaun diʼak saida?

² Jesus nia inan-aman hakarak ajuda sira-nia oan atu serbí Jeová. Tan neʼe sira halo desizaun neʼebé hatudu katak serbí Jeová mak buat neʼebé importante liu iha sira-nia moris. (Lc 2:40, 41, 52) Jesus mós halo desizaun neʼebé diʼak no neʼe ajuda nia atu halo tuir Jeová nia hakarak. (Mt 4:1-10) Jesus sai mane neʼebé laran-diʼak, laran-metin no aten-brani. Inan-aman hotu neʼebé hadomi Jeová sei orgullu no kontente tebes atu iha oan neʼebé hatudu hahalok hanesan Jesus.

3. Iha lisaun neʼe, ita sei hatán ba pergunta saida deʼit?

³ Iha lisaun neʼe, ita sei hatán ba pergunta sira tuirmai neʼe: Jeová halo desizaun diʼak saida kona-ba Jesus? Inan-aman Kristaun bele aprende saida husi José no Maria nia desizaun sira? No joven Kristaun bele aprende saida husi Jesus nia desizaun sira?

4. Jeová halo desizaun importante saida kona-ba ninia Oan-Mane?

⁴ Jeová hili inan-aman neʼebé diʼak atu tau matan ba Jesus. (Mt 1:18-23; Lc 1:26-38) Maria nia liafuan neʼebé hakerek  iha Bíblia hatudu sai ninia domin boot ba Jeová no ba Jeová nia Liafuan. (Lc 1:46-55) José halo tuir Jeová nia matadalan no neʼe hatudu katak nia hamtaʼuk Jeová no hakarak halo Jeová kontente.​—Mt 1:24.

5-6. Jeová la proteje ninia Oan-Mane husi susar saida deʼit?

⁵ Bainhira Jeová hili inan-aman ba Jesus, nia la hili ema neʼebé riku. Sakrifísiu neʼebé José no Maria hasaʼe depois Jesus moris hatudu katak sira mak ema kiak. (Lc 2:24) Karik José iha fatin kiʼik besik ninia uma iha Nazaré atu halo ninia serbisu nuʼudar karpinteiru. Ita bele fiar katak sira moris simples deʼit, liuliu tanba ikusmai sira iha oan naʼin-hitu ka liu.​—Mt 13:55, 56.

⁶ Jeová proteje Jesus husi perigu balu, maibé Jeová la proteje Ninia Oan-Mane husi susar hotu. (Mt 2:13-15) Porezemplu, Jesus iha família neʼebé la fiar nia. Ita bele fiar katak Jesus sente triste tanba foufoun ninia família balu la fiar katak nia mak Mesias. (Mc 3:21; João 7:5) No mós, karik José mate bainhira Jesus sei joven no neʼe susar ba Jesus. Karik bainhira José mate, Jesus presiza halo fali serbisu nuʼudar karpinteiru. (Mc 6:3) Bainhira Jesus sai boot, nia aprende oinsá atu tau matan ba ninia família. Karik nia presiza serbisu atu tau matan ba sira-nia presiza. Tan neʼe nia mós komprende sentimentu kole.

7. (a) Atu ajuda inan-aman haboot sira-nia oan, sira bele husu pergunta saida deʼit? (b) Tuir Provérbios 2:1-6, inan-aman presiza hanorin sira-nia oan atu halo saida?

⁷ Se imi mak feen-laʼen no hakarak iha oan, husu ba imi-nia an: ‘Ami mak ema haraik an, hadomi Jeová no hafolin ninia Liafuan ka lae? Tuir Jeová nia haree ami bele tau matan ba bebé ida neʼebé folin-boot ka lae?’ (Sal 127:3, 4) Se Ita mak inan ka aman, husu ba Ita-nia an: ‘Haʼu hanorin haʼu-nia oan katak importante atu serbisu makaʼas ka lae?’ (Ecle 3:12, 13) ‘Haʼu hakaʼas an atu proteje haʼu-nia oan husi perigu sira iha Satanás nia mundu ka lae?’ (Prov 22:3) Ita labele proteje Ita-nia oan husi susar hotu neʼebé sira sei hasoru. Maibé Ita bele prepara Ita-nia oan atu hasoru problema sira-neʼe liuhusi kontinua  hanorin sira ho domin kona-ba oinsá atu buka matadalan husi Maromak nia Liafuan. (Lee Provérbios 2:1-6.) Porezemplu, se Ita-nia família ruma para atu serbí Jeová, ajuda Ita-nia oan atu aprende husi Maromak nia Liafuan tanbasá importante atu laran-metin nafatin ba Jeová. (Sal 31:23) Ka se ema neʼebé Ita hadomi mate, hatudu ba Ita-nia oan eskritura sira neʼebé bele ajuda nia atu tahan hasoru laran-triste no bele sente dame.​—2 Kor 1:3, 4; 2 Tim 3:16.

8. Tuir Deuteronómio 6:6, 7, José no Maria presiza halo saida?

⁸ José no Maria haboot Jesus iha dalan neʼebé ajuda nia atu halo Jeová kontente tanba sira halo tuir Jeová nia matadalan ba inan-aman. (Lee Deuteronómio 6:6, 7.) José no Maria hadomi tebes Jeová, no sira sente katak importante atu ajuda sira-nia oan atu hadomi Jeová.

9. José no Maria halo desizaun importante saida?

⁹ José no Maria deside atu adora Jeová beibeik hamutuk ho sira-nia oan. Sira tuir reuniaun semana-semana iha sinagoga iha Nazaré no mós tinan-tinan tuir Festa Páskua iha Jeruzalein. (Lc 2:41; 4:16) Karik José no Maria aproveita viajen ba Jeruzalein atu hanorin Jesus no ninia alin sira istória kona-ba Jeová nia povu iha tempu uluk. Karik kuandu sira halo viajen, sira vizita fatin sira neʼebé temi iha Eskritura sira. Bainhira José no Maria iha oan tan, karik la fasil ba sira atu kontinua adora Jeová beibeik. Maibé sira hetan bensaun tanba nafatin halo ida-neʼe. Sira tau uluk adorasaun ba Jeová iha sira-nia moris, tan neʼe sira-nia família nafatin besik ba Jeová.

10. Saida mak inan-aman bele aprende husi José no Maria?

¹⁰ Saida mak Ita bele aprende husi José no Maria? Buat neʼebé importante liu mak hanorin Ita-nia oan liuhusi Ita-nia liafuan no hahalok katak Ita hadomi tebes Jeová. Prezente furak liu neʼebé Ita bele fó ba Ita-nia oan mak atu ajuda sira hadomi Jeová. No lisaun importante neʼebé Ita bele hanorin ba Ita-nia oan mak oinsá atu estuda Bíblia, halo orasaun, tuir reuniaun no hola parte iha  serbisu haklaken. (1 Tim 6:6) Klaru katak Ita tenke tau matan ba Ita-nia oan nia presiza isin nian. (1 Tim 5:8) No hanoin-hetan katak laʼós rikusoin, maibé oan sira-nia relasaun besik ho Jeová mak sei ajuda sira atu hetan salvasaun kuandu Satanás nia mundu remata no sira bele tama mundu foun. *​—Eze 7:19; 1 Tim 4:8.

11. (a) Oinsá 1 Timóteo 6:17-19 bele ajuda inan-aman atu halo desizaun diʼak? (b) Família sira bele halo planu saida? No sira sei simu bensaun saida deʼit? (Haree kaixa “ Ita sei halo planu saida?”)

¹¹ Ita kontente tebes tanba haree inan-aman Kristaun barak neʼebé halo desizaun diʼak atu ajuda sira-nia oan hakbesik ba Jeová. Sira sempre adora Jeová hamutuk. Sira tuir reuniaun no reuniaun boot sira. Sira hola parte iha serbisu haklaken. Família balu mós haklaken iha área neʼebé kongregasaun labele haklaken beibeik. Família seluk vizita Betel ka ajuda harii fatin adorasaun nian. Família sira neʼebé hili atu hola parte iha atividade sira-neʼe uza sira-nia osan rasik no karik neʼe susar ba sira. Maibé Jeová sei haraik bensaun ba sira. (Lee 1 Timóteo 6:17-19.) Oan sira neʼebé sai boot iha família hanesan neʼe, baibain kontinua halo buat diʼak kuandu sai boot no sira la arrepende sira-nia desizaun. *​—Prov 10:22.

12. Bainhira Jesus sai boot, nia presiza halo saida?

¹² Jesus nia Aman iha lalehan sempre halo desizaun neʼebé diʼak, no José no Maria mós halo desizaun neʼebé diʼak. Maibé bainhira Jesus sai boot nia presiza halo desizaun rasik. (Gal 6:5) Hanesan ita hotu, Jesus iha liberdade atu halo desizaun rasik. Nia bele hili atu hanoin an deʼit no la halo tuir Maromak nia hakarak. Maibé duké halo nuneʼe, Jesus hili atu kontinua iha relasaun diʼak ho Jeová. (João 8:29) Oinsá Jesus nia ezemplu bele ajuda joven sira ohin loron?

13. Bainhira Jesus sei labarik, nia halo desizaun importante saida?

¹³ Bainhira Jesus sei labarik, nia hili atu halo tuir ninia inan-aman. Nia nunka hanoin katak nia hatene liu ninia inan-aman no kontra sira. Duké halo nuneʼe, “nia kontinua halo tuir sira”. (Lc 2:51) Ita bele fiar katak Jesus hakaʼas an atu kumpre didiʼak ninia responsabilidade nuʼudar oan-mane boot. Jesus hakaʼas an atu aprende husi ninia aman-hakiak oinsá atu sai karpinteiru hodi nuneʼe nia  bele ajuda atu tau matan ninia família nia presiza.

14. Oinsá ita hatene katak Jesus estuda didiʼak Maromak nia Liafuan?

¹⁴ Karik José no Maria fó-hatene Jesus kona-ba milagre neʼebé Jeová halo hodi Maria bele sai isin-rua no mós buat neʼebé Maromak nia anju hatete kona-ba Jesus. (Lc 2:8-19, 25-38) Maibé tanba hakarak hatene liután, Jesus rasik mós estuda didiʼak Eskritura sira. Oinsá ita hatene ida-neʼe? Kuandu nia sei labarik, mestre sira iha Jeruzalein “admira tebes kona-ba ninia matenek no ninia resposta sira”. (Lc 2:46, 47) No bainhira Jesus tinan 12, nia fiar metin ona katak Jeová mak ninia Aman tanba nia estuda didiʼak Eskritura sira.​—Lc 2:42, 43, 49.

15. Oinsá Jesus hatudu katak nia hili atu halo tuir Jeová nia hakarak?

¹⁵ Bainhira Jesus komprende ona Jeová nia hakarak ba nia, Jesus hili atu halo tuir Jeová nia hakarak. (João 6:38) Jesus hatene katak ema barak sei odi nia. Maski nia lakohi ida-neʼe atu akontese, maibé nia nafatin hili atu halo tuir Jeová. Bainhira Jesus hetan batizmu iha tinan 29 EC, nia tau fokus liu atu halo tuir Jeová nia hakarak. (Ebr 10:5-7) Bainhira Jesus besik atu mate iha ai-riin terus nian, nia nafatin halo tuir ninia Aman nia hakarak.​—João 19:30.

16. Saida mak lisaun ida neʼebé oan sira bele aprende husi Jesus?

¹⁶ Halo tuir imi-nia inan-aman. Hanesan ho José no Maria, imi-nia inan-aman la perfeitu. Maski nuneʼe, Jeová fó sira knaar atu proteje, treinu no tau matan ba imi. Se imi rona ba sira-nia matadalan no respeitu sira-nia podér, “imi bele hetan buat diʼak”.​—Éf 6:1-4.

17. Tuir Josué 24:15, joven sira presiza halo desizaun saida?

¹⁷ Deside imi sei serbí sé. Imi presiza komprende didiʼak kona-ba Jeová, ninia hakarak, no oinsá imi bele halo tuir ninia hakarak iha imi-nia moris. (Rom 12:2) Hodi halo nuneʼe, imi bele halo desizaun neʼebé importante liu iha imi-nia moris, neʼe mak atu serbí Jeová. (Lee Josué 24:15; Ecle 12:1) Bainhira imi lee no estuda Bíblia beibeik, imi-nia domin ba Jeová sei sai boot liután no imi-nia fiar sei sai metin liután.

18. Desizaun saida mak joven sira presiza halo? No ida-neʼe sei lori rezultadu saida?

 ¹⁸ Hili atu tau uluk Jeová nia hakarak iha imi-nia moris. Ema iha Satanás nia mundu promete katak imi sei moris kontente bainhira imi uza imi-nia abilidade atu lori benefísiu ba imi-nia an. Maibé tuir loloos, ema neʼebé tau fokus ba planu sira hanesan neʼe, “hakanek sira-nia an ho terus barak”. (1 Tim 6:9, 10) Maibé, bainhira imi rona ba Jeová no hili atu tau uluk ninia hakarak iha imi-nia moris, imi sei susesu no imi “sei hatudu hahalok neʼebé matenek”.​—Jos 1:8.

19. Saida mak inan-aman presiza hanoin-hetan?

¹⁹ Inan-aman, hakaʼas an atu ajuda Ita-nia oan atu serbí Jeová. Sadere ba Jeová no nia sei ajuda Ita halo desizaun neʼebé matenek. (Prov 3:5, 6) Hanoin-hetan katak Ita-nia hahalok fó influénsia boot liu duké Ita-nia liafuan. Tan neʼe, halo desizaun neʼebé bele ajuda oan sira atu halo Jeová kontente.

20. Joven sira sei simu bensaun saida bainhira sira deside atu serbí Jeová?

²⁰ Joven sira, imi-nia inan-aman bele ajuda imi halo desizaun neʼebé matenek. Maibé imi presiza halo rasik desizaun neʼebé halo Maromak kontente. Banati-tuir Jesus no hili atu serbí Jeová. Se imi halo nuneʼe, imi-nia moris sei kontente no iha objetivu. (1 Tim 4:16) No iha futuru, imi sei iha moris neʼebé kontente tebetebes.