1. Oinsá mak 2 Korinto 3:1-3 hatudu katak ita iha priviléjiu atu ajuda estudante Bíblia hetan batizmu? (Haree foto iha livru oin.)

ITA sente oinsá bainhira haree estudante Bíblia ida hetan batizmu? Ita sente kontente, loos ka lae? (Mt 28:19) No se Ita rasik mak estuda ho ema neʼe, Ita sente kontente tebes atu haree nia hetan batizmu. (1 Tes 2:19, 20) Ema neʼebé foin hetan batizmu mak hanesan “karta rekomendasaun” ba ema neʼebé estuda ho nia no mós ba kongregasaun tomak.​—Lee 2 Korinto 3:1-3.

2. (a) Ita presiza hanoin kona-ba pergunta importante saida no tanbasá? (b) Halaʼo estuda Bíblia katak sá? (Haree nota-rodapé.)

² Ita kontente tanba iha tinan haat nia laran, ema maizumenus naʼin-10.000.000 iha mundu tomak estuda Bíblia * ho Testemuña fulan-fulan. No durante tinan hirak-neʼe, ema naʼin-280.000 liu mak hetan batizmu tinan-tinan. Maibé sei iha tan estudante millaun ba millaun neʼebé seidauk hetan batizmu. Oinsá ita bele ajuda sira? Jeová nafatin fó oportunidade ba ema atu sai ninia Testemuña. Tan neʼe, ita hakarak hakaʼas an atu ajuda sira laʼo ba oin no hetan batizmu. Tempu hela uitoan deʼit.​—1 Kor 7:29a; 1 Ped 4:7.

3. Iha lisaun neʼe, ita sei aprende saida kona-ba halaʼo estuda Bíblia?

 ³ Importante tebes atu hanorin ema sai dixípulu, tan neʼe Grupu Administradór husu sujestaun husi sukursál sira kona-ba oinsá ita bele ajuda estudante Bíblia atu laʼo ba oin no hetan batizmu. Iha lisaun neʼe no iha lisaun tuirmai, ita sei haree saida mak ita bele aprende husi pioneiru, misionáriu no katuas área neʼebé iha esperiénsia. * (Prov 11:14; 15:22) Sira esplika kona-ba buat neʼebé mestre Bíblia no estudante Bíblia bele halo atu estudante bele hetan benefísiu husi ninia estuda. Iha lisaun neʼe, ita sei koʼalia kona-ba ba buat lima neʼebé estudante Bíblia hotu presiza halo atu bele laʼo ba oin no hetan batizmu.

4. Ita presiza rekoñese saida kona-ba estudante neʼebé la uza tempu barak atu estuda?

⁴ Irmaun-irmán barak halaʼo estuda Bíblia ho ema lalais deʼit, dala ruma iha uma oin no hamriik deʼit. Maski neʼe mak dalan diʼak atu haburas ema nia interese ba Bíblia, maibé baibain sira la uza tempu kleur atu koʼalia ho ema neʼe no la halo neʼe semana-semana. Atu haburas liután ema nia interese, irmaun-irmán balu husu ema nia númeru kontaktu no tuirmai telefone sira ka mensajen sira hodi temi buat ruma husi Bíblia. Karik irmaun-irmán balu koʼalia ho ema iha dalan sira-neʼe durante fulan barak. Se estudante neʼe la uza tempu barak no la hakaʼas an atu estuda Bíblia, nia sei la laʼo ba oin hodi dedika an ba Maromak no la hetan batizmu.

5. Tuir Lucas 14:27-33, Jesus nia liafuan saida mak bele ajuda ita atu estuda ho ema?

⁵ Jesus uza ai-knanoik atu esplika kona-ba buat neʼebé ema ida tenke halo se nia hakarak sai Jesus nia dixípulu. Nia koʼalia kona-ba ema ida neʼebé hakarak harii uma-andár no liurai ida neʼebé hakarak halo funu. Jesus dehan katak ema neʼebé hakarak harii uma tenke “tuur uluklai hodi sura ninia osan” atu nuneʼe nia hatene se ninia osan toʼo atu halo hotu uma neʼe. No liurai tenke “tuur uluklai no husu konsellu husi ema seluk” atu nia bele hatene se ninia tropa bele manán. (Lee Lucas 14:27-33.) Nuneʼe mós, ema neʼebé hakarak sai Jesus nia dixípulu tenke buka-hatene uluk buat neʼebé nia presiza halo atu laʼo tuir  Jesus. Tan neʼe, anima ita-nia estudante Bíblia atu estuda semana-semana. Oinsá ita bele halo ida-neʼe?

6. Ita bele koko atu halo saida atu ita-nia estudante laʼo ba oin?

⁶ Ita bele komesa hodi aumenta tempu neʼebé ita uza atu estuda ho ita-nia estudante. Karik duké koʼalia kona-ba eskritura ida deʼit, ita bele koʼalia kona-ba eskritura rua bainhira ita vizita nia. Se estudante sai toman ho ida-neʼe, husu nia se ita bele uza tempu barak liután atu koʼalia hamutuk. Ita sei hatene se ita-nia estudante hafolin duni ninia estuda liuhusi dalan neʼebé nia hatán. Ikusmai, atu ajuda nia laʼo ba oin lalais, karik ita bele husu se nia hakarak estuda semana ida dala rua. Maibé presiza mós buat seluk tan.

7. Oinsá mak mestre Bíblia bele prepara didiʼak ba estuda ida-idak?

⁷ Nuʼudar mestre Bíblia, Ita presiza prepara didiʼak ba estuda ida-idak. Ita bele halo nuneʼe hodi lee informasaun neʼebé Ita sei estuda hamutuk no mós lee eskritura sira. Komprende didiʼak pontu importante sira. Hanoin kona-ba lisaun nia títulu, subtítulu, pergunta sira, eskritura neʼebé hakerek “lee”, dezeñu no vídeo sira neʼebé Ita bele uza atu esplika tópiku neʼe. Tuirmai, hanoin kona-ba oinsá Ita bele esplika informasaun neʼe iha dalan neʼebé simples no klaru atu Ita-nia estudante bele komprende lalais no halo tuir.​—Neem 8:8; Prov 15:28a.

8. Koloso 1:9, 10 hanorin saida mai ita kona-ba halo orasaun ba ita-nia estudante Bíblia?

⁸ Kuandu Ita prepara, halo orasaun ba Jeová kona-ba Ita-nia estudante no ninia presiza. Husu Jeová ajuda Ita atu hanorin Ita-nia estudante iha dalan neʼebé sei book ninia laran. (Lee Koloso 1:9, 10.) Hanoin kona-ba tópiku neʼebé karik susar ba nia atu komprende ka simu. Hanoin-hetan, Ita-nia objetivu mak atu ajuda nia laʼo ba oin no hetan batizmu.

9. Oinsá mak mestre Bíblia bele ajuda ninia estudante atu prepara ba estuda? Esplika toʼok.

⁹ Ita espera katak hodi estuda Bíblia beibeik, Ita-nia estudante sei hafolin buat neʼebé Jeová no Jesus halo ona ba ema no nia hakarak aprende liután. (Mt 5:3, 6) Estudante Bíblia presiza tau atensaun didiʼak ba buat neʼebé nia aprende, atu nuneʼe nia bele hetan benefísiu.  Atu ajuda nia halo ida-neʼe, esplika katak importante ba nia atu prepara nanis ba estuda ida-idak no nia presiza hanoin kona-ba oinsá nia bele aplika buat neʼebé nia aprende. Oinsá mak mestre Bíblia bele ajuda? Prepara lisaun ida hamutuk atu hatudu oinsá estudante halo ida-neʼe. * Esplika ba nia oinsá atu hetan resposta ba pergunta, no hatudu ba nia katak hodi riska liafuan importante deʼit, neʼe bele ajuda nia hanoin-hetan resposta. Tuirmai, husu nia atu hatán ho ninia liafuan rasik. Bainhira nia halo ida-neʼe, neʼe sei ajuda Ita hatene se nia komprende informasaun ka lae. Iha mós buat seluk neʼebé Ita presiza anima Ita-nia estudante atu halo.

10. Tanbasá importante atu lee Bíblia loroloron? Oinsá atu hetan benefísiu husi lee Bíblia?

¹⁰ Estudante Bíblia mós presiza halo buat balu mesak loroloron. Nia presiza komunika ho Jeová. Oinsá? Liuhusi rona no koʼalia ba Jeová. Estudante bele rona ba Maromak hodi lee Bíblia loroloron. (Jos 1:8; Sal 1:1-3) Hatudu ba nia oinsá atu print no uza “Programa atu lee Bíblia” neʼebé bele download husi jw.org. * Atu nia bele hetan benefísiu husi lee Bíblia, anima nia atu medita buat neʼebé Bíblia hanorin ba nia kona-ba Jeová no oinsá nia bele aplika buat neʼebé nia aprende.​—Após 17:11; Tgo 1:25.

11. Oinsá estudante ida bele aprende atu halo orasaun? Tanbasá importante ba nia atu halo orasaun ba Jeová beibeik?

¹¹ Anima Ita-nia estudante atu koʼalia ba Jeová hodi halo orasaun loroloron. Halo orasaun husi laran kuandu Ita hahú no remata Ita-nia estuda, no temi kona-ba Ita-nia estudante iha orasaun sira-neʼe. Bainhira nia rona Ita-nia orasaun, nia sei aprende oinsá atu halo orasaun husi laran. Nia mós sei aprende katak nia presiza halo orasaun ba Maromak Jeová liuhusi Jesus Kristu nia naran. (Mt 6:9; João 15:16) Bainhira ita-nia estudante lee Bíblia loroloron, neʼe katak nia rona ba Jeová. No bainhira nia halo orasaun, neʼe katak nia koʼalia ba Jeová. Buat sira-neʼe sei ajuda nia atu hakbesik liután ba Jeová. (Tgo 4:8) Se  nia halo ida-neʼe loroloron, neʼe sei ajuda nia atu laʼo ba oin hodi dedika an no hetan batizmu. Saida tan mak sei ajuda nia?

12. Oinsá ita bele ajuda ita-nia estudante atu haburas relasaun besik ho Jeová?

¹² Buat neʼebé Ita-nia estudante aprende tenke book ninia hanoin no mós ninia laran. Tanbasá? Ita hakarak nia atu aprende kona-ba Jeová. Maibé buat neʼebé nia aprende mós presiza book ninia laran atu nuneʼe nia hakarak aplika ida-neʼe. Jesus hanorin buat oioin ba ema no sira gosta aprende husi nia. Maibé ema hakarak laʼo tuir Jesus tanba ninia hanorin book sira-nia laran. (Lc 24:15, 27, 32) Ita-nia estudante presiza aprende katak nia bele haburas relasaun besik ho Jeová no nia bele haree Jeová nuʼudar ninia Aman, Maromak no mós Belun. (Sal 25:4, 5) Bainhira estuda kona-ba tópiku oioin, tau fokus ba Jeová nia hahalok furak sira. (Éx 34:5, 6; 1 Ped 5:6, 7) Ajuda Ita-nia estudante atu hafolin Jeová nia hahalok furak sira, hanesan domin, laran-diʼak no laran-sadiʼa. Jesus hatete katak “mandamentu neʼebé boot liu no uluk liu” mak “hadomi Jeová” ita-nia Maromak. (Mt 22:37, 38) Koko ajuda Ita-nia estudante atu hadomi Jeová.

13. Fó toʼok ezemplu kona-ba oinsá ita bele ajuda ita-nia estudante aprende kona-ba Jeová nia hahalok furak sira.

¹³ Esplika ba Ita-nia estudante tanbasá Ita hadomi Jeová. Karik neʼe bele ajuda nia atu komprende katak nia rasik presiza haburas relasaun besik ho Jeová. (Sal 73:28) Porezemplu, bainhira Ita hetan fraze ruma iha ita-nia publikasaun ka eskritura ruma kona-ba Jeová nia domin, matenek, justisa ka kbiit no ida-neʼe book Ita-nia laran, koʼalia ba Ita-nia estudante kona-ba neʼe. Esplika katak neʼe mak razaun ida tanbasá Ita hadomi Jeová. Maibé iha buat seluk tan neʼebé Ita-nia estudante presiza halo atu bele laʼo ba oin no hetan batizmu.

14. Saida mak Ebreu 10:24, 25 hatete kona-ba reuniaun sira?

¹⁴ Ita hotu hakarak Ita-nia estudante atu hetan batizmu. Dalan importante ida atu ajuda nia mak hodi anima nia atu tuir reuniaun sira. Mestre Bíblia sira neʼebé iha esperiénsia dehan katak estudante sira neʼebé tuir kedas reuniaun  laʼo ba oin lalais liu. (Sal 111:1) Mestre balu esplika ba sira-nia estudante katak durante reuniaun iha buat barak neʼebé estudante bele aprende neʼebé sira la aprende durante estuda hamutuk. Lee Ebreu 10:24, 25 hamutuk ho Ita-nia estudante, no esplika ba nia benefísiu neʼebé nia bele hetan kuandu nia tuir reuniaun. Hatudu vídeo ho títulu Oinsá mak ami halaʼo reuniaun sira? * Ajuda Ita-nia estudante atu haree reuniaun sira nuʼudar parte importante ba ninia moris.

15. Oinsá ita bele anima estudante Bíblia atu tuir reuniaun?

¹⁵ Ita bele halo saida se Ita-nia estudante seidauk tuir reuniaun ka la tuir reuniaun beibeik? Ho laran-manas, konta kona-ba buat balu neʼebé Ita foin aprende husi reuniaun. Karik Ita-nia laran-manas sei book nia atu tuir. Fó ba nia Livru Haklaken no livru Moris Kristaun no Haklaken neʼebé uza daudaun iha reuniaun. Hatudu ba nia buat neʼebé ita sei aprende iha reuniaun tuirmai, no husu nia kona-ba parte saida mak nia hakarak rona. Buat neʼebé Ita-nia estudante rona no haree iha ninia reuniaun primeiru mak diʼak liu fali buat seluk neʼebé nia rona no haree iha relijiaun seluk. (1 Kor 14:24, 25) Nia sei hasoru ema seluk neʼebé bele sai ezemplu diʼak ba nia no nia bele banati-tuir sira no laʼo ba oin hodi hetan batizmu.

16. Oinsá ita bele ajuda ita-nia estudante Bíblia laʼo ba oin no hetan batizmu? Iha lisaun tuirmai ita sei aprende kona-ba saida?

¹⁶ Oinsá ita bele ajuda ita-nia estudante Bíblia atu laʼo ba oin no hetan batizmu? Ita bele ajuda nia atu hafolin ninia estuda liuhusi anima nia atu estuda semana-semana no prepara nanis. Ita mós hakarak anima nia atu komunika ho Jeová loroloron no haburas relasaun besik ho Jeová. Ita hakarak anima nia atu tuir reuniaun. (Haree kaixa “ Buat neʼebé estudante Bíblia presiza halo”.) Lisaun tuirmai sei esplika buat lima tan neʼebé mestre Bíblia bele halo atu ajuda sira-nia estudante laʼo ba oin no hetan batizmu.