1. Tanbasá ita presiza hatene kona-ba Maromak atu bele sente kontente?

 KSOLOK neʼebé loos laʼós deʼit sentimentu kontente neʼebé mosu no lakon. Ema bele sente ksolok neʼebé loos durante ninia moris tomak. Tanbasá? Iha Jesus nia diskursu iha foho, nia dehan: “Ksolok ba sira neʼebé hatene katak sira presiza Maromak nia matadalan.” (Mt 5:3) Jesus hatene katak Maromak kria ema ho hakarak neʼebé makaʼas atu hatene no adora sira-nia Kriadór, Maromak Jeová. No tanba Jeová mak “Maromak neʼebé kontente”, sira neʼebé adora nia mós bele sente kontente.—1 Tim 1:11.

2-3. (a) Tuir Jesus, sé mak bele hetan ksolok? (b) Iha lisaun neʼe, ita sei aprende saida, no tanbasá ita presiza aprende ida-neʼe?

² Ita bele sente kontente só deʼit se ita la iha problema ka lae? Lae. Iha Jesus nia diskursu iha foho, nia fó sai buat ida neʼebé karik halo ita hakfodak. Nia dehan katak “sira neʼebé triste” bele sente ksolok. Karik ema sira-neʼe triste tanba fó-sala ba sira-nia an ka tanba hasoru problema. Jesus mós koʼalia buat neʼebé hanesan kona-ba “sira neʼebé hetan terus bainhira halo hahalok loos” ka sira neʼebé hetan terus tanba “ema koʼalia aat” sira tanba sai Kristu nia dixípulu. (Mt 5:4, 10, 11) Maibé oinsá mak ema bele sente kontente iha situasaun sira-neʼe?

³ Jesus hanorin katak ema bele sente ksolok neʼebé loos laʼós tanba sira la hasoru tan problema, maibé tanba sira hatene katak sira presiza Maromak no hakbesik ba nia.  (Tgo 4:8) Oinsá ita bele halo ida-neʼe? Iha lisaun neʼe, ita sei aprende hakat tolu neʼebé bele ajuda ita atu hetan ksolok neʼebé loos.

4. Saida mak hakat primeiru atu hetan ksolok neʼebé loos? (Salmo 1:1-3)

⁴ HAKAT 1: Atu bele sente kontente neʼebé loos, ita tenke lee no estuda Bíblia. Jesus kompara Maromak nia Liafuan ho ai-han. Ema no animál presiza ai-han atu bele kontinua moris. Maibé só ema deʼit mak presiza ai-han espirituál. Entaun ita presiza lee no estuda Bíblia. Jesus dehan: “Ema labele moris deʼit ho paun, maibé ho liafuan hotu neʼebé sai husi Jeová nia ibun.” (Mt 4:4) Tan neʼe, ita tenke lee no estuda Bíblia loroloron. Ema neʼebé hakerek Salmo ida dehan: ‘Ksolok ba ema neʼebé gosta tebes Jeová nia ukun-fuan. Nia lee no medita Jeová nia ukun-fuan loron no kalan.’—Lee Salmo 1:1-3.

5-6. (a) Ita bele aprende saida deʼit husi Bíblia? (b) Iha dalan oinsá mak lee Bíblia bele ajuda ita?

⁵ Iha Bíblia, Jeová fó sai informasaun importante oioin kona-ba oinsá ita bele moris kontente. Porezemplu, ita bele aprende kona-ba objetivu ba ita-nia moris, oinsá atu hakbesik ba Jeová no hetan perdua ba ita-nia sala, no mós esperansa furak neʼebé Jeová promete ona kona-ba futuru. (Jer 29:11) Bainhira ita aprende lia-loos sira-neʼe husi Bíblia, neʼe halo ita-nia laran haksolok.

⁶ Ita hotu hatene katak Bíblia fó konsellu diʼak barak neʼebé bele ajuda ita  loroloron. Bainhira ita halo tuir konsellu sira-neʼe, ita sei hetan ksolok. Bainhira ita sente laran-kraik tanba problema ruma, diʼak atu uza tempu barak liután atu lee Bíblia no medita kona-ba neʼe. Jesus hatete: “Ksolok ba sira neʼebé rona Maromak nia liafuan no halo tuir!”—Lc 11:28.

7. Saida mak bele ajuda Ita atu hetan benefísiu bainhira lee Bíblia?

⁷ Bainhira Ita lee Bíblia, uza tempu atu sente sabór husi buat neʼebé Ita lee. Hanoin toʼok, ema ida teʼin Ita-nia hahán favoritu. Maibé Ita han lalais deʼit no la uza tempu atu sente ai-han nia sabór tanba ansi ka okupadu. Ikusmai, Ita arrepende an tanba han ho ansi. Nuneʼe mós ho lee Bíblia. Dala ruma Ita lee ho ansi, tan neʼe Ita ladún sente sabór husi Bíblia nia mensajen. Diʼak atu uza tempu atu hafolin buat neʼebé Ita lee husi Bíblia. Porezemplu, imajina buat neʼebé akontese, imajina katak Ita rona lian oioin, no hanoin kona-ba buat neʼebé Ita lee. Bainhira Ita halo ida-neʼe, Ita sei sente kontente liu.

8. Oinsá mak “atan laran-metin no matenek” kumpre ninia knaar? (Haree mós nota-rodapé.)

⁸ Jesus hili “atan laran-metin no matenek” atu fó ai-han espirituál iha tempu neʼebé loos, no ita simu ai-han espirituál barak. * (Mt 24:45) Ai-han espirituál hotu neʼebé atan neʼe prepara bazeia ba Bíblia. (1 Tes 2:13) Ai-han espirituál neʼebé ita simu ajuda ita hatene Jeová nia hanoin neʼebé fó sai iha Bíblia. Tanba razaun neʼe mak ita lee Livru Haklaken, Matan-moris bá! no mós informasaun sira iha jw.org. Ita mós prepara ba reuniaun loron baileet no findesemana. Ita nonton programa JW Broadcasting^® fulan-fulan. Se ita kontinua han ai-han espirituál, neʼe sei ajuda ita halo hakat segundu neʼebé lori ksolok mai ita.

9. Saida mak hakat segundu atu hetan ksolok neʼebé loos?

⁹ HAKAT 2: Atu bele hetan ksolok neʼebé loos, ita presiza moris tuir Jeová nia matadalan. Ema neʼebé hakerek Salmo ida dehan: “Ksolok ba ema hotu neʼebé hamtaʼuk Jeová, neʼebé laʼo iha Ninia dalan sira.” (Sal 128:1) Hamtaʼuk Jeová katak ita la halo buat ruma neʼebé bele hakanek ninia laran tanba ita respeitu tebes nia. (Prov 16:6) Tan neʼe, ita kontinua hakaʼas an atu halo tuir Jeová nia matadalan kona-ba buat neʼebé loos no sala, hanesan fó sai iha Bíblia. (2 Kor 7:1) Ita sei sente kontente se ita halo buat neʼebé Jeová gosta no hasees an husi buat neʼebé nia odi.—Sal 37:27; 97:10; Rom 12:9.

10. Tuir Roma 12:2, ita presiza halo saida?

¹⁰ Lee Roma 12:2. Ita hatene katak Jeová iha direitu atu deside saida mak loos no sala, maibé ita mós presiza halo tuir Maromak nia matadalan. Porezemplu, ita hatene katak governu iha direitu atu deside velosidade ba karreta ka motór. Maibé karik ita rasik lakohi halo tuir governu nia lei no ita halai makaʼas liu. Bainhira ita halo tuir Jeová nia matadalan, ita hatudu liuhusi ita-nia hahalok katak ita fiar Jeová nia matadalan mak diʼak liu ba ita-nia moris. (Prov 12:28) David sente hanesan neʼe, tan neʼe mak nia koʼalia kona-ba  Jeová hodi dehan: “Ita halo haʼu hatene dalan moris nian. Haʼu sente haksolok tebes iha Ita-nia oin; hamriik iha Ita-nia liman-loos mak lori ksolok ba nafatin.”—Sal 16:11.

11-12. (a) Bainhira ita triste ka laran-kraik, ita presiza kuidadu kona-ba saida? (b) Oinsá mak Filipe 4:8 bele ajuda ita bainhira hili atividade halimar nian?

¹¹ Bainhira triste ka laran-kraik, karik ita sei halo buat ruma neʼebé bele ajuda ita atu la hanoin barak tan kona-ba ita-nia problema. Neʼe la sala, maibé ita tenke kuidadu atu la halo buat ruma neʼebé Jeová odi.—Éf 5:10-12, 15-17.

¹² Iha apóstolu Paulo nia karta ba kongregasaun Filipe, nia anima sira atu kontinua hanoin kona-ba buat neʼebé “diʼak tuir Maromak nia haree, . . . moos, . . . haburas domin, [no] santu.” (Lee Filipe 4:8.) Maski Paulo la koʼalia kona-ba atividade halimar nian bainhira hakerek ida-neʼe, maibé ninia liafuan bele ajuda ita bainhira ita hili atividade ruma. Koko toʼok ida-neʼe: Bainhira Ita lee eskritura neʼe, koko atu troka liafuan “buat” ho liafuan “knananuk”, “filme”, “livru”, ka “vídeo game”. Neʼe sei ajuda Ita hatene saida mak Maromak gosta no la gosta. Ita hakarak halo tuir Maromak nia matadalan neʼebé aas. (Sal 119:1-3) Hodi halo nuneʼe, ita sei iha konxiénsia neʼebé moos, no ita bele halo hakat tuirmai atu hetan ksolok neʼebé loos.—Após 23:1.

13. Saida mak hakat terseiru atu hetan ksolok neʼebé loos? (João 4:23, 24)

¹³ HAKAT 3: Hakaʼas an atu tau uluk adorasaun ba Jeová iha Ita-nia moris. Jeová mak ita-nia Kriadór, tan neʼe ita tenke adora nia. (Apok 4:11; 14:6, 7) Buat importante liu iha ita-nia moris mak adora Jeová iha dalan neʼebé nia simu katak adora nia “tuir espíritu no lia-loos”. (Lee João 4:23, 24.) Ita hakarak Maromak nia espíritu santu dirije ita atu nuneʼe ita-nia adorasaun bele tuir lia-loos husi Bíblia. Ita tenke tau uluk ita-nia adorasaun ba Jeová, maski ita hela iha rai neʼebé governu bandu ita-nia atividade sira. Agora daudaun, irmaun-irmán naʼin-100 liu mak iha komarka laran tanba sira mak Testemuña ba Jeová. * Maski nuneʼe, sira hakaʼas an atu halo orasaun, estuda, no haklaken kona-ba Maromak no ninia Ukun. Bainhira ema koʼalia aat ita ka kontra ita, ita bele sente kontente tanba hatene katak Jeová hamutuk ho ita no nia sei haraik bensaun ba ita.—Tgo 1:12; 1 Ped 4:14.

14. Saida mak akontese ba irmaun joven ida iha rai-Tajikistaun, no tanbasá?

¹⁴ Irmaun-irmán balu hasoru ona susar boot, maibé sira sente kontente neʼebé loos tanba sira halo tuir hakat tolu neʼebé ita foin aprende hamutuk. Hanoin toʼok buat neʼebé akontese ba irmaun Jovidon Bobojonov, husi rai-Tajikistaun. Nia idade 19 no nia lakohi tama militár. Iha loron 4 Outubru 2019, militár sira kaer nia iha ninia uma, hatama nia ba komarka, no trata nia hanesan kriminozu ida. Notísias husi rai oioin fó sai kona-ba hahalok la justu neʼe. Notísias sira fó sai katak militár sira baku nia atu obriga nia halo juramentu atu tama militár no hatais farda. Tuirmai tribunál dehan katak nia sala no hatama nia ba komarka.  Ikusmai prezidente perdua nia no hasai nia husi komarka. Bainhira Jovidon hasoru susar sira-neʼe, nia kontinua laran-metin no kontente. Oinsá? Nia kontinua halo atividade espirituál.

15. Oinsá mak Jovidon kontinua aprende kona-ba Jeová bainhira nia iha komarka?

¹⁵ Bainhira tama komarka, Jovidon kontinua lee no estuda Bíblia maski nia la iha Bíblia ka ita-nia publikasaun sira. Oinsá nia bele halo nuneʼe? Baibain irmaun-irmán sira lori hahán ba nia no hakerek eskritura loroloron iha saku hahán nian. Tan neʼe, nia bele lee Bíblia no medita kona-ba neʼe loroloron. Depois sai tiha husi komarka, nia fó sujestaun ba ema hotu neʼebé seidauk hasoru susar hodi dehan: “Importante tebes atu uza didiʼak ita-nia liberdade hodi aumenta ita-nia koñesimentu kona-ba Jeová liuhusi lee Bíblia no ita-nia publikasaun sira.”

16. Jovidon tau fokus ba saida?

¹⁶ Irmaun Jovidon moris tuir Jeová nia matadalan. Nia la kontinua hanoin kona-ba hakarak neʼebé sala no la halo hahalok aat. Nia tau fokus ba Jeová no ninia matadalan. Jovidon hafolin  Jeová nia kriasaun sira. Dadeer-dadeer nia rona manu nia lian. Iha kalan nia hateke ba fulan no fitun sira. Nia hatete: “Buat sira-neʼe mak prezente husi Jeová no halo haʼu kontente no mós fó aten-brani mai haʼu.” Bainhira ita hatudu agradese ba ai-han espirituál no mós ai-han fíziku neʼebé Jeová fó mai ita, ita sei sente laran-kontente, no neʼe sei hametin ita atu kontinua tahan.

17. Oinsá mak 1 Pedro 1:6, 7 bele aplika ba ema neʼebé karik hasoru situasaun hanesan ho Jovidon?

¹⁷ Jovidon mós tau uluk adorasaun ba Jeová. Nia hatene katak importante atu kontinua laran-metin ba Maromak neʼebé loos. Jesus hatete: “Imi tenke adora Jeová, imi-nia Maromak, no ba nia deʼit mak imi tenke halo serbisu sagradu.” (Lc 4:8) Komandante no soldadu sira hakarak Jovidon nega ninia relijiaun. Jovidon halo orasaun ho laran loron no kalan, hodi husu Jeová atu ajuda nia la rende an no laran-metin nafatin. Maski ema trata aat nia, nia nunka nega ninia fiar. Maski ema kaer nia, baku nia no hatama nia ba komarka, maibé nia sente haksolok tanba ninia fiar hetan ona koko no agora nia iha fiar neʼebé metin liután.—Lee 1 Pedro 1:6, 7.

18. Oinsá ita bele mantein ita-nia ksolok?

¹⁸ Jeová hatene saida mak ita presiza atu bele hetan ksolok neʼebé loos. Se Ita halo tuir hakat tolu kona-ba oinsá atu hetan ksolok, Ita bele mantein Ita-nia ksolok maski hasoru susar. Ita mós bele dehan: “Ksolok ba povu neʼebé adora Jeová nuʼudar sira-nia Maromak!”—Sal 144:15.