1. Pergunta saida deʼit mak irmán klosan ida presiza husu ba ninia an?

EMA hotu tenke hakruʼuk an ba Jesus nuʼudar ulun neʼebé perfeitu. Bainhira feto ida kaben, nia presiza hakruʼuk ba ninia laʼen nuʼudar ulun maski la perfeitu. No dala ruma neʼe la fasil. Se irmán ida hanoin atu kaben, nia presiza husu ba ninia an: ‘Irmaun neʼe nia hahalok hatudu katak nia sei sai ulun ba família neʼebé diʼak ka lae? Atividade espirituál mak importante iha ninia moris ka lae? Se lae, tanbasá haʼu hanoin katak nia sei sai ulun ba família neʼebé diʼak depois ami kaben?’ No irmán neʼe mós presiza husu pergunta sira tuirmai: ‘Haʼu hatudu hahalok diʼak neʼebé sei lori benefísiu ba ami-nia moris kaben nian ka lae? Haʼu hatudu pasiénsia no laran-luak ka lae? Haʼu iha relasaun metin ho Jeová ka lae?’ (Ecle 4:9, 12) Se feto ida halo desizaun diʼak antes nia kaben, neʼe bele ajuda nia atu iha moris kaben nian neʼebé susesu no kontente.

2. Iha lisaun neʼe, ita sei aprende saida?

² Feen Kristaun barak hatudu ezemplu diʼak kona-ba respeitu sira-nia laʼen nuʼudar ulun. Ita presiza gaba sira. Ita kontente atu serbí Jeová hamutuk ho irmán laran-metin sira-neʼe. Iha lisaun neʼe, ita sei buka resposta ba pergunta tolu tuirmai: (1) Susar saida mak karik feen sira hasoru? (2) Tanbasá feen ida deside atu halo tuir ninia laʼen nuʼudar ulun? (3) Saida mak feen-laʼen Kristaun bele aprende kona-ba arranju ulun nian husi Jesus, Abigail, no Jesus nia inan Maria?

3. Tanbasá kaben-naʼin hotu hasoru susar?

³ Moris kaben nian mak prezente neʼebé perfeitu husi Maromak, maibé feen no laʼen mak la perfeitu. (1 João 1:8)  Tan neʼe Bíblia hatete katak kaben-naʼin sira “sei hetan susar iha sira-nia moris”. (1 Kor 7:28) Mai ita koʼalia kona-ba susar balu neʼebé karik feen ida hasoru.

4. Tanbasá feen balu hanoin katak hakruʼuk ba laʼen mak hatún sira-nia dignidade?

⁴ Dala ruma feen balu sente katak hakruʼuk ba laʼen mak hatún sira-nia dignidade tanba dalan neʼebé família haboot sira. Irmán Marisol neʼebé hela iha Estadus Unidus hatete: “Iha haʼu-nia moris-fatin, ema sempre hatete ba feto sira katak mane no feto iha direitu hanesan kona-ba buat hotu. Haʼu hatene katak Jeová hili laʼen sira atu sai nuʼudar ulun no nia deside katak feen sira tenke halo tuir laʼen no laʼen sira mós tenke respeitu sira-nia feen. Maibé dala ruma susar ba haʼu atu iha hanoin neʼebé loos kona-ba arranju ulun nian.”

5. Ema balu iha ideia sala saida kona-ba feto nia knaar?

⁵ Ka karik feto ida kaben ho mane neʼebé hanoin katak mane mak importante liu fali feto. Irmán ida naran Ivon neʼebé hela iha Amérika Súl hatete: “Iha ami-nia fatin, mane sira han uluk no tuirmai mak feto sira. Labarik-feto sira tenke teʼin no hamoos uma no labarik-mane sira hein sira-nia inan no feton atu serbí sira. No labarik-mane sira toman atu rona katak sira mak liurai iha uma.” Irmán ida neʼebé hela iha Ázia hatete: “Iha haʼu-nia língua, iha lia-dadolin neʼebé signifika feto sira la presiza iha matenek ka abilidade. Sira-nia knaar mak atu halo serbisu uma-laran nian. No sira labele fó sai sira-nia opiniaun ba sira-nia laʼen.” Ideia sira-neʼe la hatudu domin no la tuir Bíblia nia matadalan. Se laʼen ida hetan influénsia husi ideia sira-neʼe, neʼe sei lori susar ba ninia feen, nia la banati-tuir Jesus no la halo Jeová kontente.​—Éf 5:28, 29; 1 Ped 3:7.

6. Feen sira presiza halo saida atu hametin sira-nia relasaun diʼak ho Jeová?

⁶ Hanesan temi ona iha lisaun antes neʼe, Jeová hakarak laʼen Kristaun sira atu ajuda sira-nia família atu iha relasaun diʼak ho Jeová, sustenta sira-nia família no halo família sente seguru. (1 Tim 5:8) Maski nuneʼe, feen Kristaun presiza uza tempu loroloron atu lee Bíblia, hanoin kleʼan no mós halo orasaun ba Jeová. Dala ruma neʼe la fasil. Feen sira mak okupadu, tan neʼe karik sira sente la iha tempu no forsa atu halo buat sira-neʼe. Maibé importante atu uza tempu hodi halo buat sira-neʼe. Tanbasá? Tanba Jeová hakarak ema ida-idak atu haburas no mantein sira-nia relasaun diʼak ho nia.​—Após 17:27.

7. Saida mak bele ajuda feen atu kumpre ninia knaar?

⁷ Klaru katak feen ida presiza hakaʼas an atu hatudu respeitu ba ninia laʼen nuʼudar ulun maski la perfeitu. Maibé se feen komprende no halo tuir Bíblia nia matadalan kona-ba arranju ulun nian, neʼe sei ajuda nia atu kumpre ninia knaar nuʼudar feen tuir Jeová nia hakarak.

8. Tuir Éfeso 5:22-24, tanbasá feen ida deside atu halo tuir ninia laʼen nuʼudar ulun?

⁸ Feen Kristaun ida deside atu halo tuir ninia laʼen nuʼudar ulun tanba Jeová mak haruka nia atu halo nuneʼe. (Lee Éfeso 5:22-24.) Nia tau fiar ba ninia Aman iha lalehan tanba hatene katak ninia Aman hadomi nia no hanoin kona-ba ninia diʼak.​—Deut 6:24; 1 João 5:3.

9. Bainhira feen ida hatudu respeitu ba ninia laʼen, neʼe sei lori rezultadu saida?

 ⁹ Ema iha mundu nia hanoin bele book feto sira atu la halo tuir Jeová nia matadalan no hanoin katak arranju ulun nian hatún feto sira-nia dignidade. Ema sira neʼebé habelar hanoin sira-neʼe, la hatene didiʼak Maromak Jeová. Jeová nunka fó mandamentu neʼebé hatún feto sira-nia dignidade tanba nia hadomi sira. Feen neʼebé hakaʼas an atu halo tuir Jeová hodi hakruʼuk ba ninia laʼen nuʼudar ulun sei haburas dame iha família laran. (Sal 119:165) Ida-neʼe sei lori benefísiu ba ninia laʼen, ninia oan no mós ninia an rasik.

10. Saida mak ita bele aprende husi irmán Carol?

¹⁰ Bainhira feen ida halo tuir ninia laʼen nuʼudar ulun maski la perfeitu, neʼe hatudu katak nia hadomi no respeitu Jeová neʼebé halo arranju ulun nian. Irmán Carol neʼebé hela iha Amérika Súl hatete: “Haʼu hatene katak dala ruma haʼu-nia laʼen bele halo sala. Haʼu mós hatene katak buat neʼebé haʼu halo kuandu nia halo sala, neʼe sei hatudu sai katak haʼu hafolin haʼu-nia relasaun diʼak ho Jeová. Tan neʼe haʼu hakaʼas an atu nafatin halo tuir haʼu-nia laʼen tanba haʼu hakarak halo Jeová kontente.”

11. Saida mak ajuda irmán Aneese atu fó perdua? Saida mak ita bele aprende husi nia?

¹¹ Se feen ida sente katak ninia laʼen la interese ba ninia sentimentu, neʼe bele hanetik nia atu la hatudu respeitu no la hakruʼuk ba ninia laʼen nuʼudar ulun. Haree toʼok buat neʼebé irmán Aneese halo. Nia hatete: “Haʼu hakaʼas an atu la hirus. Haʼu hanoin-hetan katak ita hotu halo sala. Haʼu hakarak fó perdua ho laran hanesan Maromak Jeová. Bainhira haʼu fó perdua, haʼu sente kalma fali.” (Sal 86:5) Se feen ida prontu atu fó perdua, neʼe halo fasil liu ba nia atu hatudu respeitu ba ninia laʼen.

12. Bíblia fó sai ezemplu saida?

¹² Ema balu hanoin katak ema neʼebé hakruʼuk ba ema seluk mak fraku. Maibé neʼe la loos. Bíblia fó sai ezemplu kona-ba ema barak neʼebé hakruʼuk ba ema seluk maski sira forte no aten-brani. Mai  ita haree saida mak ita bele aprende husi Jesus, Abigail no Maria.

13. Tanbasá Jesus hakruʼuk ba Jeová? Esplika toʼok.

¹³ Jesus hakruʼuk ba Jeová, maibé nia halo nuneʼe laʼós tanba nia la iha matenek ka abilidade. Jesus hanorin iha dalan neʼebé simples no klaru, ida-neʼe hatudu katak nia matenek tebes. (João 7:45, 46) Jeová hatene katak Jesus mak matenek no iha abilidade, tan neʼe nia konvida Jesus atu serbisu hamutuk ho nia hodi kria buat hotu iha lalehan no mós rai. (Prov 8:30; Ebr 1:2-4) Depois Jesus moris hiʼas, Jeová fó ba Jesus “kbiit tomak iha lalehan no rai”. (Mt 28:18) Maski Jesus iha matenek oioin, maibé nia nafatin buka matadalan husi Jeová. Tanbasá? Tanba nia hadomi ninia Aman.​—João 14:31.

14. Saida mak laʼen bele aprende husi (a) dalan neʼebé Jeová haree kona-ba feto sira? (b) husi Provérbios kapítulu 31?

¹⁴ Laʼen sira bele aprende saida? Jeová haruka feen sira atu halo tuir sira-nia laʼen, laʼós tanba laʼen sira mak importante liu. Ita bele hatene ida-neʼe tanba Jeová hili feto sira no mós mane sira atu ukun hamutuk ho Jesus. (Gal 3:26-29) Jeová hatudu katak nia tau fiar ba ninia Oan-Mane hodi fó kbiit ba Jesus. Nuneʼe mós ho laʼen sira neʼebé diʼak, sira sei fó kbiit balu ba sira-nia feen. Bíblia esplika kona-ba buat neʼebé feen neʼebé matenek bele halo. Porezemplu, nia bele tau matan ba ninia umakain, faʼan no sosa rai no mós halo negósiu. (Lee Provérbios 31:15, 16, 18.) Nia laʼós atan neʼebé la iha direitu atu fó sai ninia opiniaun. Maibé ninia laʼen tau fiar ba nia no rona ba ninia ideia. (Lee Provérbios 31:11, 26, 27.) Bainhira laʼen ida hatudu respeitu ba ninia feen, ninia feen sei kontente atu hakruʼuk ba nia nuʼudar ulun.

15. Feen sira bele aprende saida husi Jesus?

¹⁵ Feen sira bele aprende saida? Maski Jesus halo buat kmanek oioin, maibé nia la sente katak hakruʼuk ba Jeová nuʼudar ulun sei hatún ninia dignidade. (1 Kor 15:28; Flp 2:5, 6) Feen neʼebé banati-tuir Jesus nia ezemplu sei la hanoin katak nia la iha folin tanba halo tuir ninia laʼen nuʼudar ulun. Nia sei apoia ninia laʼen tanba nia hadomi ninia laʼen no mós hadomi no respeitu Jeová.

16. Tuir 1 Samuel 25:3, 23-28, susar saida deʼit mak Abigail hasoru? (Haree dezeñu iha livru oin.)

¹⁶ Abigail nia laʼen naran Nabal. Nabal hanoin an deʼit, foti an no la hatene atu hatudu agradese. Se Abigail hakarak atu hakotu ninia moris kaben nian, karik nia bele husik deʼit David no David nia ema sira atu oho ninia laʼen. Maibé nia la halo nuneʼe. Nia halo buat neʼebé nia bele atu proteje ninia laʼen no mós ninia umakain. Ita hatene katak Abigail mak ema neʼebé aten-brani tanba nia bá hasoru mane naʼin-400 neʼebé kaer armas. No nia koʼalia ho respeitu ba David kona-ba problema neʼe no nia mós prontu atu husu deskulpa ba ninia laʼen nia hahalok. (Lee 1 Samuel 25:3, 23-28.) David rekoñese katak Jeová uza Abigail atu fó konsellu no hanetik nia atu la halo sala.

17. Saida mak laʼen sira bele aprende husi David no Abigail?

¹⁷ Laʼen sira bele aprende saida? Abigail mak feto neʼebé matenek. David mós hatudu matenek hodi rona ba Abigail nia konsellu. Rezultadu mak David la oho ema neʼebé la halo sala. Laʼen neʼebé matenek mós sei hanoin didiʼak  kona-ba ninia feen nia opiniaun antes foti desizaun neʼebé importante. Karik feen nia opiniaun bele ajuda laʼen atu la halo desizaun neʼebé la diʼak.

18. Saida mak feen sira bele aprende husi Abigail?

¹⁸ Feen sira bele aprende saida? Feen neʼebé hadomi no respeitu Jeová sei lori benefísiu ba ninia família, maski ninia laʼen la serbí Jeová ka la moris tuir Jeová nia matadalan. Nia sei la buka dalan atu hakotu ninia moris kaben nian. Se nia hatudu respeitu no halo tuir ninia laʼen, neʼe bele book ninia laʼen atu aprende kona-ba Jeová. (1 Ped 3:1, 2) No maski ninia laʼen lakohi serbí Jeová, maibé Jeová sei kontente tanba nia halo tuir ninia laʼen no laran-metin ba Jeová.

19. Iha situasaun saida deʼit mak feen ida la presiza halo tuir ninia laʼen?

¹⁹ Feen Kristaun la presiza apoia ninia laʼen, se ninia laʼen husu nia atu kontra Bíblia nia ukun-fuan ka prinsípiu sira. Porezemplu, imajina se irmán ida nia laʼen neʼebé laʼós Testemuña haruka nia atu bosok, naʼok ka halo hahalok neʼebé Jeová bandu. Ema Kristaun hotu, inklui irmán sira neʼebé kaben ona tenke hatudu laran-metin ba Jeová duké ba ema. Se irmán ida nia laʼen husu nia atu kontra Bíblia nia prinsípiu, nia labele halo tuir ninia laʼen no presiza esplika ninia desizaun ho laran-diʼak.​—Após 5:29.

20. Oinsá ita hatene katak Maria iha relasaun diʼak ho Jeová?

²⁰ Maria iha relasaun neʼebé diʼak ho Jeová. Nia hatene didiʼak Eskritura sira. Bainhira Maria koʼalia ho Isabel, João Batista nia inan, Maria temi Eskritura Lian Ebraiku maizumenus 20. (Lc 1:46-55) Hanoin toʼok, maski Maria promete ona atu kaben ho José, Jeová nia anju la mosu ba José. Anju neʼe koʼalia uluk ba Maria no fó sai katak Maria sei tuur-ahi Maromak nia Oan-Mane. (Lc 1:26-33) Jeová koñese didiʼak Maria no fiar katak Maria sei hadomi no tau matan ba ninia Oan-Mane. Ita bele fiar katak depois Jesus mate no moris hiʼas ba lalehan, Maria kontinua iha relasaun diʼak ho Jeová.​—Após 1:14.

21. Saida mak laʼen sira bele aprende husi Maria?

 ²¹ Laʼen sira bele aprende saida? Laʼen neʼebé matenek sei kontente bainhira ninia feen hatene didiʼak Eskritura. Nia la hirus ka hanoin katak ninia feen hakarak atu troka ninia pozisaun nuʼudar ulun. Nia rekoñese katak se ninia feen hatene didiʼak Bíblia no Bíblia nia prinsípiu sira, neʼe bele ajuda ninia família. Maski feen matenek liu fali laʼen, maibé laʼen mak iha responsabilidade atu ajuda ninia família atu adora Jeová, hanesan halo adorasaun família.​—Éf 6:4.

22. Saida mak feen sira bele aprende husi Maria?

²² Feen sira bele aprende saida? Maski feen ida presiza hakruʼuk ba ninia laʼen nuʼudar ulun, maibé nia nafatin presiza hametin ninia fiar rasik. (Gal 6:5) Tan neʼe, nia presiza uza tempu atu estuda mesak no hanoin kleʼan. Neʼe sei ajuda nia atu kontinua hadomi no respeitu Jeová no sente kontente atu hakruʼuk ba ninia laʼen nuʼudar ulun.

23. Feen neʼebé hakruʼuk ba laʼen bele lori benefísiu saida ba ninia família, kongregasaun no ninia an rasik?

²³ Feen sira neʼebé kontinua halo tuir sira-nia laʼen tanba hadomi Jeová sei sente kontente liu se kompara ho feen neʼebé la halo tuir Jeová nia arranju ulun nian. Feen sira-neʼe hatudu ezemplu diʼak ba joven sira. Sira haburas domin no dame iha família no mós iha kongregasaun laran. (Tito 2:3-5) Ohin loron Jeová nia atan barak mak feto. (Sal 68:11) Ita hotu iha knaar importante iha kongregasaun. Iha lisaun tuirmai, ita sei aprende oinsá atu kumpre ita-nia knaar iha kongregasaun.