Depois tinan 1920, haʼu-nia inan-aman aprende lia-loos antes sira kaben. Haʼu moris iha tinan 1939. Bainhira haʼu sei labarik, ami hela iha rai-Inglaterra no haʼu tuir reuniaun hamutuk ho haʼu-nia inan-aman. Tuirmai haʼu tuir Eskola Serbisu Kristaun. Haʼu sei hanoin-hetan haʼu-nia diskursu primeiru. Haʼu presiza hamriik iha kaixa leten atu bele aas liu pódiu. Iha tempu neʼebá haʼu tinan neen. Haʼu laran-taridu tebes tanba rona-naʼin barak mak idade boot liu haʼu.

Dala primeiru neʼebé haʼu haklaken mesak mak kuandu haʼu tinan ualu. Haʼu-nia apá ketik esplikasaun simples iha kartaun neʼebé haʼu bele uza bainhira haklaken. Haʼu kontente tebes bainhira uma-naʼin lee kartaun neʼe no simu kedas livru “Karena Allah Itu Benar Adanya”. Haʼu halai ba haʼu-nia apá atu konta kona-ba neʼe. Haklaken no reuniaun lori ksolok mai haʼu no ajuda haʼu atu aumenta liután haʼu-nia hakarak atu serbí Jeová tempu-tomak.

Haʼu hafolin liután lia-loos bainhira haʼu-nia apá hameno Livru Haklaken mai haʼu. Haʼu lee didiʼak Livru Haklaken ida-idak neʼebé haʼu simu. Haʼu-nia fiar sai metin liután no ikusmai haʼu dedika an ba Jeová.

Iha tinan 1950, haʼu no haʼu-nia família tuir reuniaun boot ida ho títulu Theocracy’s Increase iha Novaiorke. Tema ba loron-kinta, 3 Agostu mak “Loron misionáriu nian”. Iha loron neʼe, irmaun Carey Barber neʼebé ikusmai sai membru ba Grupu Administradór mak hatoʼo diskursu batizmu nian. Bainhira irmaun Carey remata ninia diskursu, nia husu pergunta rua ba ema neʼebé hakarak atu hetan batizmu, haʼu hamriik no  hatán: “Sin.” Iha tempu neʼebá haʼu tinan 11, maibé haʼu komprende katak haʼu halo ona desizaun neʼebé importante. Maski nuneʼe, haʼu taʼuk atu tama ba pixina tanba haʼu seidauk hatene atu nani. Haʼu-nia tiu akompaña haʼu ba pixina no nia hatete katak haʼu la presiza hanoin barak. Buat hotu akontese lalais deʼit. Sira pasa haʼu husi irmaun ida ba irmaun seluk no haʼu-nia ain mós la kona rai. Irmaun ida fó batizmu ba haʼu no irmaun seluk mak hiʼit haʼu husi pixina laran. Husi loron importante neʼe, Jeová kontinua halo loos haʼu-nia dalan.

Haʼu hakarak foti pioneiru bainhira haʼu remata eskola. Maibé mestre sira anima haʼu atu hetan edukasaun boot liután. Ikusmai haʼu halo tuir sira-nia hakarak no bá universidade. Lakleur haʼu rekoñese katak haʼu labele metin nafatin iha lia-loos no iha tempu hanesan tau fokus ba haʼu-nia estudu, tan neʼe haʼu deside atu para. Haʼu halo orasaun ba Jeová kona-ba neʼe no haʼu hakerek karta ba mestre sira atu esplika katak haʼu sei para eskola. Haʼu tau fiar ba Jeová no komesa kedas foti pioneiru.

Haʼu komesa serbí nuʼudar pioneiru iha fulun-Jullu tinan 1957 iha sidade Wellingborough. Haʼu husu ba irmaun sira iha sukursál Londres atu rekomenda irmaun pioneiru ida neʼebé iha esperiénsia atu akompaña haʼu haklaken. Irmaun Bert Vaisey mai atu ajuda haʼu. Nia hanorin haʼu buat barak. Nia mak haklaken-naʼin neʼebé badinas no nia ajuda haʼu atu arranja haʼu-nia oráriu haklaken nian. Kongregasaun neʼe iha irmaun Bert, haʼu no irmán ferik naʼin-neen. Hodi prepara no hola parte iha reuniaun ajuda haʼu atu tau fiar ba Jeová no fó sai haʼu-nia fiar.

Haʼu tama komarka ba tempu balu tanba lakohi hola parte iha serbisu militár. Depois neʼe, haʼu hasoru irmán Barbara neʼebé serbí nuʼudar pioneiru tempu-tomak. Ami kaben iha tinan 1959 no ami prontu atu serbí iha fatin naran deʼit. Primeiru ami serbí iha Lancashire iha Inglaterra parte norueste. Iha fulan-Janeiru tinan 1961, haʼu tuir Eskola ba Katuas no Atan ba Kongregasaun iha sukursál Londres durante fulan ida. Haʼu hakfodak tanba bainhira eskola remata haʼu simu knaar nuʼudar katuas área. Durante semana rua, katuas área neʼebé iha esperiénsia barak iha sidade Birmingham mak fó treinu mai haʼu, no Barbara mós tuir treinamentu neʼe. Tuirmai mak ami serbí iha Lancashire no Cheshire.

Bainhira ami bá feriadu iha fulan-Agostu tinan 1962, ami simu karta ida husi sukursál. Ami mós simu formuláriu atu tuir Eskola Gilead. Haʼu no Barbara halo orasaun kona-ba neʼe, no tuirmai ami prenxe formuláriu no haruka kedas ba sukursál. Fulan lima liutiha ami bá Brooklyn, Novaiorke, atu tuir Eskola Gilead klase 38 durante fulan sanulu.

 Mestre sira iha Eskola Gilead hanorin ami kona-ba Bíblia, Jeová nia organizasaun, no mós irmaun-irmán sira iha mundu tomak. Haʼu tinan 24 no Barbara tinan 23, no ami aprende buat barak husi estudante seluk iha ami-nia klase. Durante eskola neʼe, haʼu kontente atu halo serbisu Betel nian hamutuk ho ami-nia mestre ida naran Fred Rusk. Lisaun ida neʼebé haʼu aprende husi nia mak sempre fó konsellu neʼebé bazeia ba Bíblia. Irmaun sira neʼebé hatoʼo diskursu durante ami-nia eskola mak irmaun Nathan Knorr, Frederick Franz, no Karl Klein. Ami mós aprende husi irmaun Alexander Hugh Macmillan nia diskursu neʼebé ajuda ami komprende kona-ba oinsá Jeová ajuda ninia povu durante tempu susar iha tinan 1914 toʼo 1919.

Bainhira eskola atu besik remata, irmaun Nathan Knorr hatete mai haʼu no Barbara katak ami simu knaar atu serbí iha rai-Burundí iha Áfrika. Ami bá kedas biblioteka iha Betel atu buka-hatene iha Buku Tahunan kona-ba haklaken-naʼin hira mak serbí iha rai-Burundí. Maibé ami la hetan informasaun kona-ba haklaken-naʼin hira mak iha rai-Burundí. Ami atu bá fatin neʼebé ema seidauk haklaken. No ami mós seidauk hatene didiʼak fatin neʼe. Ami laran-taridu loos. Maibé ami halo orasaun kona-ba neʼe no sente kalma.

Buat hotu iha rai-Burundí, inklui klima, kultura, no mós língua, la hanesan ho ami-nia fatin. Ami mós presiza aprende lian Fransés no presiza buka hela-fatin. Loron rua depois ami toʼo iha rai-Burundí, ami-nia kolega Eskola Gilead naran Harry Arnott, vizita ami antes nia fila fali ba rai-Zámbia. Nia ajuda ami buka hela-fatin, no ikusmai fatin neʼe sai nuʼudar uma misionáriu primeiru. Maibé lakleur, imigrasaun kontra hasoru ami. Sira la hatene buat ida kona-ba Testemuña ba Jeová. Maski ami komesa sai toman ho ami-nia knaar, maibé imigrasaun fó sai katak ami labele hela iha rai-Burundí se ami la iha vistu serbisu nian. Triste mak ami presiza sai husi rai-Burundí no hela fali iha rai-Uganda.

Ami hanoin barak kona-ba muda ba rai-Uganda tanba ami la iha vistu, maibé ami  tau fiar ba Jeová. Irmaun ida husi rai-Kanadá neʼebé serbí iha rai-Uganda ajuda atu esplika ami-nia situasaun ba polísia imigrasaun. Polísia neʼe fó lisensa ba ami atu hela fulan balu iha rai-Uganda toʼo ami hetan ami-nia vistu. Neʼe hatudu mai ami katak Jeová ajuda ami.

Situasaun iha rai-Uganda la hanesan ho rai-Burundí. Ema haklaken ona iha rai-Uganda. Maski nuneʼe, iha haklaken-naʼin 28 deʼit iha neʼebá. Bainhira ami haklaken, ami hasoru ema barak neʼebé hatene koʼalia lian Inglés. Maibé lakleur ami komprende katak atu bele ajuda ema neʼebé interese laʼo ba oin, ami presiza aprende língua lokál ida. Ami komesa haklaken iha área ida naran Kampala, iha neʼebá ema barak koʼalia lian Luganda. Tan neʼe ami deside atu aprende língua neʼe. Presiza tinan barak atu bele koʼalia língua neʼe ho moos. Maibé hodi aprende língua neʼe, ami bele haklaken ho didiʼak. Ami komesa komprende saida mak ami-nia estudante Bíblia presiza aprende. Bainhira sira haree katak ami hatudu interese ba sira, sira komesa fó sai sira-nia sentimentu kona-ba buat neʼebé sira aprende.

Ami hetan ksolok boot hodi ajuda ema aprende lia-loos. Ami mós sente kontente liután bainhira simu knaar atu serbí nuʼudar katuas área iha rai-Uganda. Ami simu matadalan husi sukursál Kénia atu halo viajen iha rai-Uganda hodi buka área neʼebé presiza pioneiru tempu-tomak. Dala barak ema hatudu laran-luak mai ami maski sira seidauk hasoru Testemuña ba Jeová. Sira simu ami ho laran-diʼak no prepara ai-han ba ami.

Ami mós halo viajen seluk tan. Husi Kampala, haʼu saʼe komboiu durante loron rua atu bá ponte-kais Mombasa iha rai-Kénia. Tuirmai saʼe ró ba Illa Seixeles iha Oseanu Indianu. Husi tinan 1965 toʼo 1972, Barbara akompaña haʼu atu vizita beibeik Illa Seixeles. Foufoun haklaken-naʼin rua deʼit mak hela iha neʼebá. Maibé tuirmai, sai grupu ida no ikusmai sai kongregasaun ida. Haʼu mós halo viajen atu vizita irmaun sira iha rai-Eritreia, rai-Etiópia, no rai-Sudaun.

Situasaun polítiku iha rai-Uganda troka bainhira grupu militár mak kontrola governu. Tinan sira tuirmai mak susar tebes no hanorin haʼu katak matenek atu halo tuir Bíblia nia konsellu hodi halo tuir governu. (Mc 12:17) Iha tempu neʼebá, ema estranjeiru hotu neʼebé hela iha rai-Uganda presiza rejistu sira-nia naran iha postu-polísia neʼebé besik sira-nia uma. Ami halo tuir kedas ida-neʼe. Loron balu liutiha, bainhira ami lori karreta liu Kampala, polísia sira hakbesik haʼu no misionáriu seluk. Ami-nia fuan tuku-tuku makaʼas. Sira duun katak ami mak espiaun no sira lori ami ba sede-polísia. Iha neʼebá ami esplika katak ami mak misionáriu. Ami hatete ba sira katak ami rejistu ona ami-nia naran iha postu-polísia maibé sira lakohi rona. Polísia sira neʼebé kaer kilat lori ami ba postu-polísia neʼebé besik uma misionáriu. Ami kontente bainhira polísia ida iha postu neʼe, neʼebé hatene katak ami rejistu ona, rekoñese ami no haruka polísia sira atu husik ami.

 Iha tempu neʼebá ami sempre hasoru problema iha fatin sira neʼebé militár pasa-revista, liuliu bainhira soldadu neʼebé hapara ami mak lanu todan. No iha tempu ida-idak ami halo orasaun no Jeová ajuda ami sente kalma bainhira sira husik ami liu ho seguru. Maibé triste mak iha tinan 1973 governu haruka misionáriu hotu atu sai husi rai-Uganda.

Tuirmai ami simu knaar foun atu serbí iha rai-Kosta Marfín, iha Áfrika Oeste. Neʼe mudansa boot ba ami. Ami presiza sai toman ho kultura foun no ami presiza koʼalia lian Fransés iha tempu hotu no presiza sai toman atu hela hamutuk ho misionáriu sira husi rai oioin. Bainhira ami haree ema laran-loos neʼebé haraik an lalais atu simu lia-loos, neʼe halo ami fiar katak Jeová mak dirije ami. Haʼu no Barbara bele haree oinsá Jeová halo ami-nia dalan sai loos.

Maibé derrepente deʼit doutór hatete katak Barbara iha moras kankru. Ami bá-mai Europa dala barak atu nia bele hetan tratamentu. Iha tinan 1983, ami rekoñese katak ami labele tan serbí iha Áfrika. Neʼe halo ami sente triste tebes.

Bainhira ami serbí iha sukursál Londres, Barbara nia moras kankru sai aat liután no ikusmai nia mate. Família Betel fó kmaan mai haʼu durante tempu triste neʼe. Feen-laʼen ida ajuda haʼu atu sai toman ho situasaun foun neʼe no kontinua tau fiar ba Jeová. Tuirmai haʼu hasoru irmán ida neʼebé serbí part-time iha Betel no uluk serbí nuʼudar pioneiru tempu-tomak. Nia hadomi tebes Jeová. Ninia naran mak Ann. Ami kaben iha tinan 1989 no ami serbí hamutuk iha sukursál Londres toʼo agora.

Husi tinan 1995 toʼo 2018, haʼu serbí nuʼudar reprezentante sede-jerál. Haʼu vizita nasaun hamutuk 60. Iha nasaun ida-idak, haʼu haree oinsá Jeová tau matan ba ninia povu iha situasaun oioin.

Iha tinan 2017, ami vizita Áfrika. Haʼu kontente atu lori Ann ba rai-Burundí ba dala primeiru. Ami admira tanba iha ema barak neʼebé tama lia-loos. Iha fatin neʼebé uluk haʼu haklaken beibeik iha tinan 1964, irmaun sira harii Betel. Ohin loron iha haklaken-naʼin hamutuk 15.500 liu.

Haʼu kontente bainhira simu oráriu kona-ba fatin neʼebé haʼu sei vizita iha tinan 2018. Fatin ida neʼebé haʼu sei vizita mak rai-Kosta Marfín. Bainhira ami toʼo iha sidade kapitál Abidjan, haʼu sente hanesan fila fali ba uma. Husi lista númeru telefone iha Betel, haʼu haree katak irmaun neʼebé hela iha ami-nia kuartu sorin mak irmaun Sossou neʼebé haʼu koñese. Haʼu hanoin-hetan nia serbí nuʼudar koordenadór ba sidade bainhira haʼu iha Abidjan. Maibé haʼu sala. Nia mak Sossou nia oan-mane.

Jeová kumpre ninia promesa sira. Susar neʼebé haʼu hasoru hanorin haʼu katak bainhira ita tau fiar ba Jeová, nia sei halo loos ita-nia dalan sira. Ami hein namanas atu laʼo iha dalan loos ba nafatin iha mundu foun.​—Prov 4:18.