1. Tanbasá Jeová nia povu iha unidade?

ITA kontente tanba sai parte ba Jeová nia família. Tanbasá ita iha dame no unidade? Razaun ida mak ita hotu hakaʼas an atu halo tuir Jeová nia arranju ulun nian. Bainhira ita komprende liután kona-ba arranju ulun nian, neʼe ajuda ita atu iha unidade liután.

2. Pergunta saida deʼit mak ita sei hatán iha lisaun neʼe?

² Iha lisaun neʼe, ita sei aprende kona-ba arranju ulun nian iha kongregasaun. Ita mós sei hatán ba pergunta sira tuirmai neʼe: Irmán sira iha knaar saida? Irmaun hotu iha kongregasaun mak ulun ba irmán sira ka lae? Katuas sira no ulun ba família iha podér neʼebé hanesan ka lae? Ulukliu, mai ita koʼalia kona-ba oinsá ita haree irmán sira.

3. Oinsá ita bele hafolin liután irmán sira neʼebé serbisu makaʼas?

³ Ita hafolin irmán sira neʼebé serbisu makaʼas atu tau matan sira-nia família, haklaken no mós apoia kongregasaun. Ita sei hafolin sira liután se ita hanoin kleʼan kona-ba dalan neʼebé Jeová no Jesus haree sira. Ita mós sei aprende husi apóstolu Paulo nia ezemplu kona-ba oinsá nia haree irmán sira.

4. Oinsá mak Bíblia hatudu katak Jeová hafolin mane no mós feto?

⁴ Bíblia hatudu katak Jeová hafolin mane no mós feto. Porezemplu, Bíblia fó sai katak iha apóstolu sira-nia tempu, Jeová fó espíritu santu ba mane no mós feto  atu sira bele halo buat kmanek oioin hanesan koʼalia língua oioin. (Após 2:1-4, 15-18) Liuhusi espíritu santu, Jeová hili mane no feto atu ukun hamutuk ho Jesus Kristu. (Gal 3:26-29) Mane no feto mós iha oportunidade atu moris ba nafatin iha rai. (Apok 7:9, 10, 13-15) Mane no feto mós iha knaar atu haklaken no hanorin liafuan diʼak. (Mt 28:19, 20) Porezemplu, livru Apóstolu konta kona-ba irmán ida naran Priscila no ninia laʼen Áquila neʼebé esplika lia-loos ho didiʼak ba mane matenek ida naran Apolo.​—Após 18:24-26.

5. Oinsá Lucas 10:38, 39, 42 hatudu katak Jesus hafolin feto sira?

⁵ Jesus hafolin no respeitu feto sira. Jesus la halo tuir ema Farizeu sira-nia toman. Iha tempu neʼebá, ema Farizeu sira la hafolin feto sira, la koʼalia ho feto sira iha fatin públiku, no nunka koʼalia ba sira kona-ba Eskritura. Maibé, Jesus koʼalia kona-ba lia-loos importante sira ba mane no mós feto. * (Lee Lucas 10:38, 39, 42.) Nia mós fó oportunidade ba feto sira atu akompaña nia iha serbisu haklaken. (Lc 8:1-3) Jesus mós fó priviléjiu ba feto sira atu fó sai ba apóstolu sira katak Jesus moris-hiʼas ona.—João 20:16-18.

6. Oinsá Paulo hatudu respeitu ba feto sira?

⁶ Apóstolu Paulo fó-hanoin Timóteo atu hafolin feto sira. Paulo haruka Timóteo atu haree ‘feto sira neʼebé idade liu hanesan inan’ no ‘haree feto joven sira hanesan feton’. (1 Tim 5:1, 2) Maski Paulo ajuda Timóteo atu sai ema Kristaun neʼebé maduru, maibé Paulo rekoñese katak Timóteo nia inan no avó-feto mak ema primeiru neʼebé hanorin Timóteo kona-ba Maromak nia Liafuan. (2 Tim 1:5; 3:14, 15) Iha Paulo nia karta ba kongregasaun iha Roma, nia fó kumprimentus no temi irmán sira-nia naran. Paulo haree katak irmán sira-neʼe serbisu makaʼas no nia fó sai katak nia hafolin irmán sira-neʼe nia serbisu.​—Rom 16:1-4, 6, 12; Flp 4:3.

7. Ita sei buka resposta ba pergunta saida deʼit?

⁷ Parágrafu sira antes neʼe hatudu katak Bíblia la apoia ideia kona-ba irmaun sira mak importante liu fali irmán sira. Ita-nia irmán sira neʼebé hatudu domin no laran-luak mak folin-boot ba kongregasaun, no katuas sira kontente tanba irmán sira-neʼe ajuda kongregasaun atu iha dame no unidade. Maibé ita presiza buka resposta ba pergunta sira tuirmai neʼe: Tanbasá Jeová husu irmán sira atu taka sira-nia ulun iha situasaun balu? No tanba irmaun sira deʼit mak simu knaar atu serbí nuʼudar katuas no atan ba kongregasaun, neʼe katak irmaun hotu iha kongregasaun mak ulun ba irmán sira ka lae?

8. Tuir Éfeso 5:23, irmaun hotu iha kongregasaun mak ulun ba irmán sira ka lae? Esplika toʼok.

⁸ Resposta simples mak lae. Irmaun ida laʼós ulun ba irmán hotu iha kongregasaun. Jesus mak ulun ba irmán sira. (Lee Éfeso 5:23.) Iha família laran, laʼen mak ulun ba ninia feen. Oan-mane neʼebé hetan ona batizmu la sai ulun ba ninia inan. (Éf 6:1, 2) Iha kongregasaun, katuas sira-nia podér mak limitadu. (1 Tes 5:12; Ebr 13:17) Irmán klosan sira neʼebé hela ketak husi sira-nia inan-aman  presiza kontinua hatudu respeitu ba sira-nia inan-aman no mós ba katuas sira. Maibé hanesan irmaun sira iha kongregasaun, irmán sira-neʼe nia ulun mak Jesus.

9. Tanbasá dala ruma irmán sira presiza taka sira-nia ulun?

⁹ Jeová hili mane sira atu hanorin no dirije adorasaun iha kongregasaun, no nia la fó podér neʼe ba feto sira. (1 Tim 2:12) Jeová hili Jesus atu sai ulun ba mane sira no hili mane sira atu dirije adorasaun iha kongregasaun atu nuneʼe kongregasaun la runguranga. Dala ruma iha situasaun balu, irmán ida halaʼo knaar neʼebé baibain irmaun sira mak halo. Se nuneʼe, irmán neʼe presiza taka ninia ulun. * (1 Kor 11:4-7) Jeová husu irmán sira atu halo nuneʼe laʼós atu hatún sira-nia dignidade, maibé atu nuneʼe sira bele hatudu respeitu ba Jeová nia arranju ulun nian. Agora mai ita hatán ba pergunta: Ulun ba família no katuas sira iha podér saida deʼit?

10. Dala ruma tanbasá katuas sira halo regra iha kongregasaun?

¹⁰ Katuas sira hadomi Kristu, no sira hadomi “bibi” sira neʼebé Jeová no Jesus entrega ona ba sira atu tau matan. (João 21:15-17) Tanba hadomi kongregasaun, karik katuas ida hanoin katak nia mak hanesan aman ba kongregasaun. Karik nia hanoin katak se ulun ba família iha direitu atu halo regra ba ninia família, entaun nia mós iha direitu atu halo regra hodi proteje Jeová nia bibi sira. Irmaun-irmán  balu husu katuas sira atu halo desizaun ba sira, no neʼe bele book katuas sira atu hanoin katak sira mak ulun. Maibé katuas sira no ulun ba família iha podér neʼebé hanesan ka lae?

11. Oinsá mak knaar nuʼudar ulun ba família no katuas mak atu besik hanesan?

¹¹ Apóstolu Paulo esplika katak knaar nuʼudar ulun ba família no katuas mak atu besik hanesan. (1 Tim 3:4, 5) Porezemplu, Jeová hakarak ema iha família laran atu halo tuir ulun ba família. (Kol 3:20) No Jeová hakarak irmaun-irmán sira atu halo tuir katuas sira. Jeová hakarak ulun ba família no katuas sira atu ajuda ema neʼebé sira tau matan atu hadomi Jeová no mós sente domin. Hanesan ulun ba família neʼebé diʼak, katuas sira presiza ajuda ema iha kongregasaun bainhira sira hasoru problema. (Tgo 2:15-17) Jeová mós hakarak ulun ba família no katuas sira ajuda ema seluk atu halo tuir ninia ukun-fuan sira, no la “halo liu fali buat neʼebé hakerek tiha ona” iha Bíblia.​—1 Kor 4:6.

12-13. Tuir Roma 7:2, oinsá mak ulun ba família no katuas nia knaar la hanesan?

¹² Maibé iha mós buat balu neʼebé la hanesan entre katuas sira-nia knaar no mós ulun ba família nian. Porezemplu,  Jeová fó knaar ba katuas sira atu tesi-lia, no nia fó responsabilidade ba sira atu hasai ema sira neʼebé la arrepende an husi kongregasaun.​—1 Kor 5:11-13.

¹³ Maibé Jeová fó podér balu ba ulun ba família neʼebé nia la fó ba katuas sira. Porezemplu, Jeová fó podér ba ulun ba família atu halo regra no haruka ninia família atu halo tuir. (Lee Roma 7:2.) Ulun ba família iha direitu atu deside tuku hira mak ninia oan sira fila ba uma iha kalan. Nia mós iha podér atu fó dixiplina ba ninia oan sira se sira la halo tuir ninia regra. (Éf 6:1) Klaru katak, ulun ba família neʼebé diʼak sei koʼalia uluk ho ninia feen antes halo regra ba ninia família tanba sira rua mak “isin ida deʼit”. *​—Mt 19:6.

14. (a) Tuir Marcos 10:45, tanbasá Jeová hili Jesus atu sai nuʼudar ulun ba kongregasaun? (b) Grupu Administradór iha responsabilidade saida? (Haree kaixa “Grupu Administradór nia responsabilidade sira”.)

¹⁴ Liuhusi Jesus nia sakrifísiu, Jeová sosa ema ida-idak iha kongregasaun. (Lee Marcos 10:45; Após 20:28; 1 Kor 15:21, 22) Tan neʼe Jeová hili Jesus nuʼudar ulun ba kongregasaun. Nuʼudar ulun, Jesus iha podér atu halo regra kona-ba buat neʼebé ema ida-idak, família sira, no kongregasaun tomak presiza halo. Nia iha direitu atu haruka ita hotu halo tuir regra sira-neʼe. (Gal 6:2) Maibé Jesus la halo deʼit regra. Nia mós tau matan no hadomi ita ida-idak.​—Éf 5:29.

15-16. Saida mak Ita aprende husi irmán Marley no irmaun Benjamin?

 ¹⁵ Kristu hili irmaun sira atu tau matan ba kongregasaun. Irmán sira hatudu respeitu ba Kristu hodi halo tuir irmaun sira-neʼe nia matadalan. Irmán barak sente hanesan irmán Marley neʼebé hela iha Estadus Unidus. Nia hatete: “Haʼu hafolin tebes haʼu-nia knaar nuʼudar feen no irmán ida iha kongregasaun. Haʼu presiza hakaʼas an atu kontinua iha hanoin neʼebé loos kona-ba Jeová nia arranju ulun nian. Haʼu-nia laʼen no irmaun sira iha kongregasaun respeitu haʼu no hatudu katak sira hafolin serbisu neʼebé haʼu halo. No neʼe ajuda haʼu atu respeitu sira.”

¹⁶ Irmaun sira hatudu katak sira komprende arranju ulun nian hodi hafolin no respeitu irmán sira. Irmaun Benjamin neʼebé hela iha rai-Inglaterra hatete: “Haʼu aprende buat barak husi irmán sira-nia komentáriu iha reuniaun no sira-nia sujestaun kona-ba oinsá atu estuda mesak no haklaken ho diʼak liután. Haʼu hafolin tebes serbisu neʼebé sira halo.”

17. Tanbasá ita presiza respeitu arranju ulun nian?

¹⁷ Bainhira ema hotu iha kongregasaun, inklui mane, feto, ulun ba família, no katuas sira komprende no respeitu arranju ulun nian, kongregasaun sei iha dame. No importante mak ita sei fó glória ba ita-nia Aman iha lalehan, Jeová.​—Sal 150:6.