Bíblia temi ho klaru katak Jeová iha kbiit atu hatene nanis kona-ba futuru. (Isa 45:21) Bíblia la esplika kona-ba oinsá ka bainhira mak Maromak uza ninia kbiit neʼe, ka dala hira mak nia hili atu hatene kona-ba futuru. Tan neʼe ita la hatene buat hotu kona-ba Jeová nia kbiit neʼe. Maibé, iha buat balu neʼebé ita bele komprende.

Jeová bele halo buat oioin tuir ninia hakarak, maibé dala ruma nia hili atu la halo ida-neʼe. Tanba Jeová mak matenek liu hotu, nia bele hatene nanis kona-ba buat naran deʼit neʼebé nia hili atu hatene. (Rom 11:33) Jeová hatudu hahalok kontrola an iha dalan neʼebé perfeitu, tan neʼe nia mós bele hili atu la hatene nanis kona-ba buat neʼebé sei akontese iha futuru.—Kompara Isaias 42:14.

Jeová halo buat oioin atu kumpre ninia hakarak. Oinsá mak neʼe liga ho Jeová nia kbiit atu hatene nanis kona-ba futuru? Isaias 46:10 esplika: “Husi uluk kedas haʼu fó-hatene nanis buat neʼebé sei mosu, no husi tempu uluk haʼu fó sai buat sira neʼebé seidauk akontese. Haʼu hatete: ‘Haʼu-nia desizaun sei metin nafatin, no haʼu sei halo buat naran deʼit neʼebé haʼu hakarak.’”

Razaun ida tanbasá Jeová bele hatene nanis kona-ba futuru mak tanba nia iha kbiit neʼebé boot atu kumpre buat neʼebé nia hakarak. Dala ruma ita gosta lee uluk istória ida nia parte ikus hodi bele hatene saida mak akontese iha istória neʼe nia rohan. Jeová la presiza halo hanesan neʼe kona-ba ita-nia futuru. Maibé, Jeová bele deside kona-ba saida mak sei akontese iha tempu ida-idak no halo ida-neʼe sai loos duni kuandu tempu neʼe toʼo mai.—Éx 9:​5, 6; Mt 24:36; Após 17:31.

Tan neʼe, Bíblia uza liafuan sira hanesan “prepara”, “forma”, no “hakarak” atu fó sai saida mak Jeová halo atu kumpre buat balu iha futuru. (2 Reis 19:25; nota; Isa 46:11) Liafuan sira-neʼe tradús husi liafuan orijinál neʼebé refere ba “badaen rai-mean”. (Jer 18:​3, 4) Hanesan badaen rai-mean neʼebé matenek halo rai-mean sai vazu neʼebé furak, Jeová mós bele halo buat oioin atu kumpre ninia hakarak.—Éf 1:11.

Jeová fó ba ema liberdade atu hili. Nia la deside nanis saida mak tenke akontese ba ema ida-idak. Nia mós la halo ema laran-loos sira atu halo buat neʼebé sei lori rezultadu aat ba sira. Nia husik ema hotu atu hili sira ida-idak nia dalan no hanorin sira oinsá atu moris tuir dalan neʼebé loos.

Haree toʼok ezemplu rua. Ezemplu primeiru kona-ba ema iha sidade Nínive antigu. Jeová fó-hatene nanis katak sidade neʼe sei naksobu tanba ema nia hahalok aat. Maibé kuandu sira arrepende an, Jeová “troka ninia hanoin kona-ba sira-nia kastigu neʼebé nia fó sai ona, no nia la halo ida-neʼe”. (Jonas 3:​1-10) Jeová troka ninia hanoin tanba ema Nínive deside atu arrepende an kuandu rona tiha Jeová nia avizu.

Ezemplu segundu mak profesia kona-ba Ciro neʼebé halo ema Judeu livre husi dadur no fó sai mandamentu atu harii fali Jeová nia templu. (Isa 44:26–45:4) Liurai Ciro husi Pérsia mak kumpre profesia neʼe. (Ezras 1:​1-4) Maibé, Ciro la adora Maromak loos. Jeová uza Ciro atu kumpre profesia maibé la obriga nia atu hili sé mak nia tenke adora.—Prov 21:1.

Klaru katak, iha mós buat seluk neʼebé liga ho dalan neʼebé Jeová uza ninia kbiit atu hatene nanis kona-ba futuru. La iha ema ida mak bele komprende buat hotu kona-ba Jeová nia dalan sira. (Isa 55:​8, 9) Maibé, buat neʼebé ita komprende kona-ba Jeová hametin duni ita-nia fiar katak nia sempre halo buat neʼebé diʼak, inklui tempu neʼebé nia uza ninia kbiit neʼe.