LISAUN ESTUDU 23
Ita la mesak, Jeová hamutuk ita
“Jeová besik ba ema hotu neʼebé bolu nia.”—SAL 145:18.
KNANANUK 28 Habelun ho Jeová
IHA LISAUN NEʼE *
1. Tanbasá dala ruma Jeová nia atan balu sente mesamesak?
DALA ruma ita hotu sente mesamesak. Irmaun-irmán balu sente mesamesak ba tempu uitoan. Irmaun-irmán seluk sente mesamesak ba tempu kleur. Karik ita sente mesamesak maski ita hamutuk ho irmaun-irmán barak. Dala ruma susar ba irmaun-irmán balu atu habelun ho ema iha kongregasaun foun. Irmaun-irmán seluk sente besik loos ho sira-nia família, tan neʼe bainhira sira muda dook husi sira-nia família, sira sente mesamesak. Irmaun-irmán seluk tan sente mesamesak no hanoin tebes sira-nia família neʼebé mate ona. Ema Kristaun balu, liuliu sira neʼebé foin aprende lia-loos sente mesamesak bainhira sira-nia família ka belun neʼebé laʼós Testemuña kontra sira.
2. Ita sei buka resposta ba pergunta saida deʼit?
2 Jeová hatene no komprende buat hotu kona-ba ita. Nia hatene bainhira ita sente mesamesak, no nia hakarak ajuda ita. Oinsá Jeová ajuda ita? Saida mak ita bele halo atu la sente mesamesak? Oinsá ita bele ajuda irmaun-irmán sira neʼebé sente mesamesak? Mai ita buka resposta ba pergunta sira-neʼe.
JEOVÁ HANOIN ITA
Jeová haruka anju ida ba Elias atu fó-hanoin nia katak nia la mesak (Haree parágrafu 3)
3. Oinsá Jeová hatudu katak nia hanoin Elias?
3 Jeová hakarak ninia atan hotu atu sente kontente. Nia besik ba ita ida-idak, no nia haree bainhira ita sente triste ka laran-kraik. (Sal 145:18, 19) Haree toʼok oinsá Jeová hanoin profeta Elias nia sentimentu no mós ajuda Elias. Elias moris durante tempu neʼebé susar iha Izraél. Ema neʼebé iha podér boot iha Izraél no la hadomi Jeová, kontra Jeová nia atan no hakarak atu oho Elias. (1 Reis 19:1, 2) Elias mós hanoin katak nia mesak deʼit mak profeta neʼebé serbí Jeová no neʼe halo nia sente laran-kraik liután. (1 Reis 19:10) Maromak halo kedas buat ruma atu ajuda Elias. Jeová haruka ninia anju ida atu fó-hanoin ba profeta Elias katak nia la mesak. Anju neʼe dehan katak sei iha ema Izraél barak neʼebé serbí Jeová ho laran-metin.—1 Reis 19:5, 18.
4. Oinsá Marcos 10:29, 30 hatudu katak Jeová hanoin tebes ninia atan sira?
4 Jeová hatene katak bainhira ita deside atu serbí nia, ita balu presiza halo sakrifísiu oioin. Sakrifísiu ida mak karik família no belun sira neʼebé la hadomi Jeová lakohi tan ajuda ita. Karik apóstolu Pedro hanoin barak, no husu Jesus: “Ami husik ona buat hotu atu laʼo tuir Ita. Entaun, ami sei hetan saida?” (Mt 19:27) Jesus ho laran-diʼak hatete ba ninia dixípulu sira katak maluk fiar-naʼin sei sai hanesan sira-nia família. (Lee Marcos 10:29, 30.) No ita-nia Aman Jeová iha lalehan, promete atu apoia ema sira neʼebé hakarak serbí nia. (Sal 9:10) Hanoin toʼok buat balu neʼebé ita bele halo atu simu Jeová nia ajuda bainhira ita sente mesamesak.
ITA BELE HALO SAIDA SE ITA SENTE MESAMESAK?
5. Tanbasá diʼak atu tau fokus ba oinsá Jeová ajuda Ita?
5 Tau fokus ba oinsá Jeová ajuda Ita. (Sal 55:22) Hodi halo nuneʼe, Ita bele iha hanoin neʼebé loos kona-ba Ita-nia situasaun. Irmán klosan ida naran Carol, * neʼebé ninia família laʼós Testemuña, hatete: “Bainhira haʼu hanoin fali kona-ba oinsá Jeová ajuda haʼu tahan susar oioin, neʼe ajuda haʼu atu la sente mesamesak. Neʼe hametin haʼu-nia fiar katak Jeová sei ajuda haʼu iha futuru.”
6. Oinsá 1 Pedro 5:9, 10 anima ema neʼebé sente mesamesak?
6 Hanoin kona-ba oinsá Jeová ajuda maluk Kristaun sira neʼebé sente mesamesak. (Lee 1 Pedro 5:9, 10.) Irmaun Hiroshi adora Jeová durante tinan barak no ninia família laʼós Testemuña. Nia hatete: “Iha kongregasaun, ita bele haree katak ema hotu hasoru problema oioin. Bainhira ita hatene katak ita hotu hakaʼas an atu serbí Jeová, neʼe bele anima irmaun-irmán neʼebé ninia família laʼós Testemuña.”
7. Oinsá orasaun ajuda Ita?
7 Halo orasaun, lee Bíblia, no tuir reuniaun beibeik. Neʼe inklui fó sai Ita-nia sentimentu ba Jeová. (1 Ped 5:7) Bainhira irmán klosan ida naran Massiel deside atu serbí Jeová, nia sente mesamesak tanba ninia família la serbí Jeová. Nia hatete: “Buat importante ida neʼebé ajuda haʼu bainhira haʼu sente mesamesak mak halo orasaun ho laran ba Jeová. Nia sai hanesan haʼu-nia Aman. Haʼu halo orasaun ba nia dala barak loroloron atu fó sai haʼu sentimentu.”
Rona ba gravasaun áudio kona-ba Bíblia no publikasaun sira bele ajuda ita atu la sente mesamesak (Haree parágrafu 8) *
8. Oinsá lee no medita kona-ba Bíblia ajuda Ita?
8 Lee Bíblia beibeik, no medita kona-ba istória sira neʼebé hatudu katak Jeová hadomi Ita. Irmán Bianca sente laran-kraik tanba ninia família hatún nia. Nia hatete: “Buat neʼebé ajuda tebes haʼu mak lee no medita istória husi Bíblia no mós esperiénsia husi Jeová nia atan sira neʼebé hasoru situasaun hanesan haʼu-nian.” Ema Kristaun balu dekór eskritura sira neʼebé bele fó kmaan ba sira, hanesan Salmo 27:10 no Isaias 41:10. Irmaun-irmán seluk rona ba gravasaun áudio bainhira prepara ba reuniaun ka lee Bíblia. Sira hatete katak neʼe ajuda sira atu la sente mesamesak.
9. Oinsá tuir reuniaun sira ajuda Ita?
9 Hakaʼas an atu tuir reuniaun beibeik. Ita sei hetan laran-manas husi informasaun neʼebé hatoʼo iha reuniaun, no Ita mós bele koñese liután irmaun-irmán sira. (Ebr 10:24, 25) Irmán Massiel neʼebé temi ohin, hatete: “Maski haʼu moedór, maibé haʼu deside atu tuir reuniaun hotu no fó komentáriu. Neʼe ajuda haʼu atu sente besik ba irmaun-irmán sira.”
10. Tanbasá importante atu habelun ho irmaun-irmán sira neʼebé laran-metin?
10 Habelun ho maluk Kristaun sira neʼebé laran-metin. Habelun ho irmaun-irmán sira neʼebé hatudu ezemplu diʼak. Ita bele habelun ho irmaun-irmán sira neʼebé idade no kultura la hanesan ho Ita. Bíblia hatete katak “matenek mak iha ferik-katuas sira-nia leet”. (Job 12:12) Ema neʼebé idade mós bele aprende buat barak husi joven sira. David idade kiʼik liu Jonatan, maibé neʼe la hanetik sira atu sai belun diʼak. (1 Sam 18:1) David no Jonatan ajuda malu atu serbí Jeová maski hasoru susar oioin. (1 Sam 23:16-18) Irmán Irina neʼebé ninia família laʼós Testemuña, hatete: “Irmaun-irmán sira bele sai hanesan ita-nia inan-aman ka maun-alin. Jeová bele uza sira atu apoia ita.”
11. Ita presiza halo saida atu hametin ita-nia relasaun belun ho irmaun-irmán sira?
11 Dala ruma la fasil atu habelun ho ema, liuliu se ita mak moedór. Irmán Ratna mak moedór no aprende lia-loos maski ema kontra. Nia hatete: “Haʼu rekoñese katak haʼu presiza irmaun-irmán sira-nia ajuda.” Dala ruma susar atu fó sai ita-nia sentimentu ba ema, maibé se ita halo nuneʼe, ita-nia relasaun belun sei sai metin liután. Ita-nia belun hakarak anima no apoia ita. Maibé ita presiza fó sai ita-nia sentimentu atu sira bele ajuda ita.
12. Oinsá haklaken hamutuk bele ajuda Ita habelun ho irmaun-irmán sira?
12 Dalan diʼak ida atu habelun ho irmaun-irmán sira mak hodi haklaken hamutuk. Irmán Carol neʼebé temi ohin, hatete: “Haʼu hetan belun diʼak barak bainhira haʼu haklaken no halo atividade espirituál seluk ho irmán sira. Durante tinan barak, Jeová uza belun sira-neʼe atu ajuda haʼu.” Ita hetan benefísiu hodi habelun ho irmaun-irmán sira neʼebé laran-metin. Jeová uza belun sira-neʼe atu ajuda Ita bainhira Ita sente laran-kraik no mesamesak.—Prov 17:17.
AJUDA IRMAUN-IRMÁN ATU LA SENTE MESAK
13. Ema hotu iha kongregasaun iha responsabilidade saida?
13 Ita hotu iha kongregasaun iha responsabilidade atu halo ema sente dame no domin hodi ema ida la sente mesamesak. (João 13:35) Ita-nia liafuan no hahalok bele anima duni ema seluk. Irmán ida hatete: “Bainhira haʼu aprende lia-loos, kongregasaun sai haʼu-nia família. Se sira la ajuda haʼu, haʼu sei nunka bele sai Testemuña ba Jeová.” Ita bele halo saida atu ajuda ema neʼebé mesak iha lia-loos atu sente katak nia mak parte ba kongregasaun?
14. Ita bele halo saida atu habelun ho ema foun?
14 Hakaʼas an atu habelun ho ema foun iha kongregasaun. Ita bele ho laran-diʼak hasé ema foun neʼebé tuir reuniaun. (Rom 15:7) Maibé hasé deʼit la toʼo. Ita mós hakarak atu habelun ho sira. Tan neʼe, hatudu laran-diʼak no hatudu katak Ita hanoin sira. Hakaʼas an atu komprende problema neʼebé sira hasoru, maibé kuidadu atu la husu pergunta neʼebé hamoe sira. Ema balu sente susar atu fó sai sira-nia sentimentu, tan neʼe keta obriga sira atu koʼalia. Duké halo nuneʼe, ho laran-diʼak husu pergunta neʼebé matenek atu ajuda sira fó sai sira-nia sentimentu no rona ho pasiénsia ba sira. Porezemplu, Ita bele husu kona-ba oinsá sira aprende lia-loos.
15. Oinsá mak irmaun-irmán neʼebé maduru ajuda ema seluk iha kongregasaun?
15 Irmaun-irmán hotu sei laʼo ba oin bainhira ita hanoin malu, liuliu se katuas kongregasaun no irmaun-irmán sira neʼebé maduru mak halo ida-neʼe. Irmán Melissa nia inan haboot nia mesak iha lia-loos. Irmán Melissa hatete: “Haʼu agradese tebes ba irmaun sira neʼebé sai hanesan aman ba haʼu. Sira uza tempu hamutuk ho haʼu no hatudu katak sira hanoin haʼu. Sempre iha ema neʼebé prontu atu rona ba haʼu bainhira haʼu presiza.” Irmaun joven ida naran Mauricio sente mesamesak bainhira ninia mestre Bíblia husik lia-loos. Nia hatete: “Katuas sira hatudu katak sira hanoin haʼu no neʼe ajuda tebes haʼu. Sira koʼalia beibeik ho haʼu, haklaken hamutuk ho haʼu, fahe pontu furak neʼebé sira hetan kuandu estuda Bíblia, no halo desportu hamutuk ho haʼu.” Agora irmán Melissa no mós irmaun Mauricio serbí Jeová tempu-tomak iha Betel.
Karik iha ita-nia kongregasaun, iha irmaun-irmán balu neʼebé sei kontente se ita hatudu laran-diʼak ba sira no gasta tempu ho sira (Haree parágrafu 16-19) *
16-17. Saida mak ita bele halo atu ajuda irmaun-irmán seluk?
16 Fó ajuda tuir ema nia presiza. (Gal 6:10) Irmaun Leo neʼebé serbí nuʼudar misionáriu no hela dook husi família, hatete: “Dala barak buat neʼebé ita presiza mak ema hatudu laran-diʼak iha tempu neʼebé loos. Haʼu hanoin-hetan loron ida haʼu hetan asidente ho karreta. Kuandu haʼu toʼo iha uma, haʼu sente estrese loos. Maibé feen-laʼen ida konvida haʼu atu han ai-han simples hamutuk. Haʼu la hanoin-hetan ami han saida, maibé haʼu hanoin-hetan sira rona didiʼak mai haʼu. Haʼu sente kmaan fali.”
17 Ita hotu gosta atu tuir reuniaun boot tanba ita bele ransu ho irmaun-irmán sira no koʼalia kona-ba programa neʼe. Maibé irmán Carol neʼebé temi ohin hatete: “Haʼu sente mesamesak kuandu tuir reuniaun boot.” Tanbasá? Nia hatete: “Maski iha irmaun-irmán barak iha haʼu-nia sorin-sorin, maibé dala barak sira hotu tuur hamutuk ho sira-nia família. Neʼe halo haʼu sente mesamesak liután.” Ema seluk sente susar atu tuir reuniaun boot depois sira-nia kaben mate. Ita koñese ema ruma neʼebé hasoru susar sira-neʼe ka lae? Diʼak atu konvida sira tuur hamutuk ho Ita-nia família iha reuniaun boot tuirmai.
18. Oinsá ita bele aplika 2 Korinto 6:11-13 bainhira ita hatudu laran-diʼak?
18 Uza tempu atu ransu hamutuk. Diʼak atu konvida irmaun-irmán oioin atu ransu hamutuk, liuliu irmaun-irmán sira neʼebé sente mesamesak. Ita hakarak ‘loke luan ita-nia laran’ ba sira. (Lee 2 Korinto 6:11-13.) Irmán Melissa neʼebé temi ohin, hatete: “Haʼu no haʼu-nia amá sempre kontente bainhira irmaun-irmán sira konvida ami ba sira-nia uma ka laʼo halimar hamutuk.” Karik iha Ita-nia kongregasaun iha irmaun-irmán balu neʼebé sei kontente se Ita hatudu laran-diʼak ba sira.
19. Iha situasaun saida deʼit mak irmaun-irmán sira sei kontente se ita gasta tempu ho sira?
19 Hanoin toʼok situasaun balu neʼebé irmaun-irmán sira sei sente kontente se ita gasta tempu ho sira. Irmaun-irmán balu sente susar atu hamutuk ho família neʼebé laʼós Testemuña durante loron-boot sira. Irmaun-irmán seluk sente triste iha data neʼebé sira-nia família mate. Bainhira ita gasta tempu hamutuk ho irmaun-irmán sira hanesan neʼe, ita hatudu katak ita ‘tau matan ba sira ho laran’.—Flp 2:20.
20. Oinsá Jesus nia liafuan iha Mateus 12:48-50 ajuda ita bainhira ita sente mesamesak?
20 Iha razaun oioin tanbasá ema Kristaun bele sente mesamesak. Maibé, ita labele haluha katak Jeová hatene bainhira ita sente hanesan neʼe. Dala barak nia uza irmaun-irmán sira atu apoia ita. (Lee Mateus 12:48-50.) Ita hatudu katak ita hafolin kongregasaun bainhira ita hakaʼas an atu ajuda irmaun-irmán sira. Maski dala ruma ita sente mesamesak, maibé tuir loloos ita la mesak tanba Jeová sempre hamutuk ho ita.
KNANANUK 46 Agradese ba Jeová
^ par. 5 Dala ruma Ita sente mesamesak ka lae? Se nuneʼe, Ita bele fiar katak Jeová hatene Ita-nia sentimentu no nia hakarak ajuda Ita. Ita sei aprende saida mak Ita bele halo bainhira Ita sente mesamesak. Ita mós sei aprende oinsá Ita bele anima maluk Kristaun sira neʼebé sente mesamesak.
^ par. 5 Naran balu laʼós naran neʼebé loos.
