1-2. Ema balu sente oinsá kona-ba tempu namora?

 TEMPU namora bele lori kontente. Se Ita mak namora hela, klaru katak Ita hakarak buat hotu laʼo ho diʼak. No ba ema barak neʼebé namora, neʼe mak tempu neʼebé lori kontente. Irmán Tsion a husi rai-Etiópia hatete: “Tempu ida neʼebé lori kontente tebes iha haʼu-nia moris mak bainhira haʼu no haʼu-nia laʼen namora. Ami koʼalia kona-ba buat neʼebé sériu, no mós goza tempu hamutuk. Haʼu kontente bainhira haʼu rekoñese katak haʼu hetan ona ema ida neʼebé haʼu hadomi no nia mós hadomi haʼu.”

² Maibé irmaun ida husi rai-Olanda naran Alessio hatete: “Tempu neʼebé haʼu no haʼu-nia feen namora mak lori kontente, maibé ami mós hasoru dezafiu oioin.” Iha lisaun neʼe, ita sei koʼalia kona-ba dezafiu balu neʼebé karik bele mosu, no mós Bíblia nia prinsípiu neʼebé bele ajuda ema neʼebé namora atu foti desizaun matenek durante tempu namora. Ita mós sei haree oinsá mak ema seluk iha kongregasaun bele apoia ema neʼebé namora.

OBJETIVU HUSI TEMPU NAMORA

3. Saida mak objetivu husi tempu namora? (Provérbios 20:25)

³ Maski tempu namora bele lori kontente, maibé neʼe mós hakat importante tanba bele ajuda ita foti desizaun kona-ba kaben. Bainhira noivu no noiva kaben, sira halo juramentu ida iha Jeová nia oin atu hadomi no respeitu malu durante sira-nia moris tomak. Halo juramentu mak buat neʼebé sériu, tan neʼe antes atu halo juramentu, inklui juramentu kaben nian, Ita presiza hanoin didiʼak. (Lee Provérbios 20:25.) Bainhira ema naʼin-rua namora, neʼe fó tempu ba sira atu koñese malu no atu halo desizaun neʼebé  diʼak. Dala ruma sira bele deside atu kaben, maibé dala ruma sira bele deside atu hapara sira-nia relasaun. Loloos, la sala se ema neʼebé namora deside atu para, tanba objetivu husi tempu namora mak atu ajuda sira deside kaben ka lae.

4. Tanbasá ita presiza iha hanoin neʼebé loos kona-ba tempu namora?

⁴ Tanbasá mak importante atu iha hanoin neʼebé loos kona-ba tempu namora? Bainhira ema klosan ida iha hanoin neʼebé loos kona-ba tempu namora, nia sei la hahú namora ho ema ruma se nia la iha hanoin atu kaben. Laʼós deʼit ema klosan, maibé ema hotu presiza iha hanoin neʼebé loos kona-ba neʼe. Porezemplu, ema balu hanoin katak se ema namora, sira tenke kaben. Oinsá mak hanoin hanesan neʼe bele kona ema Kristaun neʼebé klosan? Irmán klosan ida naran Melissa neʼebé hela iha Estadus Unidus hatete: “Bainhira irmaun no irmán ida namora, Testemuña balu hanoin katak sira tenke kaben. Tan neʼe ema balu kontinua namora maski sira-nia relasaun la laʼo ho diʼak. No balu tan deside atu la namora. Situasaun hanesan neʼe bele lori estrese.”

KOÑESE MALU DIDIʼAK

5-6. Ema neʼebé namora presiza aprende saida deʼit kona-ba sira-nia pár? (1 Pedro 3:4; nota-rodapé)

⁵ Se Ita mak namora hela, saida mak bele ajuda Ita deside atu kaben ka lae? Neʼe mak koñese malu didiʼak. Karik Ita bele aprende buat balu kona-ba ema ruma antes hahú namora. Maibé tempu namora mak oportunidade atu Ita hatene kona-ba buat neʼebé iha ema neʼe nia laran. (Lee 1 Pedro 3:4; nota-rodapé.) Buka-hatene liután buat neʼebé subar hela iha ema nia laran envolve aprende kona-ba ninia planu espirituál, hahalok, no hanoin. Nuʼudar tempu liu daudaun, Ita presiza hatán ba pergunta sira hanesan: ‘Ema neʼe diʼak atu sai haʼu-nia kaben ka lae?’ (Prov 31:​26, 27, 30; Éf 5:33; 1 Tim 5:8) ‘Ami bele apoia malu iha dalan emosaun ka lae? Haʼu bele tahan ninia fraku sira ka lae?’ b (Rom 3:23) Bainhira Ita koñese malu, hanoin-hetan katak buat neʼebé importante liu mak laʼós kona-ba buat neʼebé hanesan entre Ita ho ema neʼe, maibé oinsá mak imi bele komprende malu kona-ba buat neʼebé diferente.

⁶ Saida tan mak Ita presiza aprende kona-ba Ita-nia pár durante tempu namora? Antes Ita-nia sentimentu romántiku sai makaʼas liután, diʼak atu koʼalia uluk  kona-ba tópiku importante balu, hanesan ema neʼe nia planu. Maibé oinsá ho tópiku neʼebé sensitivu hanesan problema saúde, ekonomia, ka Ita-nia trauma? Ita la presiza koʼalia hamutuk kona-ba tópiku hotu bainhira Ita foin hahú namora. (Kompara ho João 16:12.) Se Ita sente katak Ita seidauk prontu atu hatán ba Ita-nia pár nia pergunta balu, fó-hatene ba nia. Maibé nuʼudar tempu liu daudaun, nia presiza hatene kona-ba neʼe atu nia bele foti desizaun neʼebé diʼak. Tan neʼe, Ita presiza koʼalia nakloke kona-ba buat sira-neʼe.

7. Oinsá ema neʼebé namora bele koñese malu didiʼak? (Haree mós kaixa “ Bainhira Ita namora ho ema neʼebé hela iha fatin seluk”.) (Haree mós foto.)

⁷ Oinsá mak Ita bele hatene didiʼak ema nia laran? Dalan ida neʼebé diʼak mak hodi koʼalia nakloke no onestu ba malu, husu pergunta no rona ho didiʼak. (Prov 20:5; Tgo 1:19) Karik imi bele halo atividade ruma neʼebé halo fasil atu koʼalia ba malu hanesan han hamutuk, laʼo halimar iha fatin públiku, no haklaken hamutuk. Imi mós bele koñese malu bainhira gasta tempu hamutuk ho família no kolega sira. Diʼak mós atu halo atividade seluk hamutuk neʼebé sei hatudu sai Ita-nia pár nia hahalok kuandu nia hamutuk ho ema oioin no iha situasaun oioin. Haree toʼok buat neʼebé irmaun Aschwin husi rai-Olanda halo durante nia namora ho Alicia. Nia hatete: “Ami halaʼo atividade neʼebé bele ajuda ami atu koñese malu liután. Ami halo buat neʼebé simples, hanesan prepara ai-han ka halo serbisu seluk hamutuk. Neʼe ajuda ami atu hatene ami ida-idak nia hahalok diʼak no fraku sira.”

8. Ema neʼebé namora hetan benefísiu saida hodi estuda Bíblia hamutuk?

⁸ Ita no Ita-nia pár mós bele koñese malu hodi estuda Bíblia hamutuk. Ikusmai, se imi kaben, imi sei presiza uza tempu atu halaʼo adorasaun família nian, atu nuneʼe Maromak bele sai parte importante iha imi-nia moris kaben nian. (Ecle 4:12) Tan neʼe, diʼak atu uza tempu hodi estuda hamutuk durante tempu namora. Klaru katak ema neʼebé namora seidauk sai família ida, no irmaun neʼe seidauk sai irmán neʼe nia ulun. Maski nuneʼe, hodi estuda hamutuk beibeik Ita bele hatene kona-ba Ita-nia pár nia relasaun ho Jeová. Max no Laysa neʼebé hela iha Estadus Unidus hetan benefísiu seluk tan. Max hatete: “Bainhira ami foin namora,  ami hahú estuda hamutuk tópiku kona-ba namora, moris kaben, no moris família nian. Neʼe loke dalan ba ami atu koʼalia hamutuk kona-ba tópiku importante neʼebé karik baibain susar atu koʼalia hamutuk.”

PERGUNTA NEʼEBÉ BELE AJUDA ITA

9. Ema neʼebé namora presiza hanoin kona-ba saida kuandu deside atu fó-hatene ba ema katak sira namora?

⁹ Ita presiza fó-hatene ba sé katak Ita namora? Neʼe mak Ita no Ita-nia pár nia desizaun. Bainhira imi foin hahú namora, karik imi deside atu fó-hatene ba ema uitoan deʼit. (Prov 17:27) Hodi halo nuneʼe, karik ema barak sei la husu pergunta oioin ka obriga imi atu halo desizaun. Maibé se imi la fó-hatene, karik imi sei haketak an husi ema seluk tanba taʼuk ema hatene katak imi namora. Neʼe bele lori perigu. Tan neʼe, matenek se imi fó-hatene ba ema neʼebé bele fó matadalan diʼak no mós ajuda imi. (Prov 15:22) Porezemplu, imi bele fó-hatene ba imi-nia família, belun neʼebé maduru, ka katuas kongregasaun.

10. Saida mak ema neʼebé namora bele halo atu kontinua moos tuir Jeová nia haree? (Provérbios 22:3)

¹⁰ Oinsá mak Ita bele namora iha dalan neʼebé moos tuir Jeová nia haree? Nuʼudar imi-nia sentimentu sai buras, neʼe bele halo imi sai besik liután ba malu. Saida mak bele ajuda imi atu kontinua moos iha dalan morál? (1 Kor 6:18) Labele koʼalia kona-ba buat seksuál, labele mesamesak, no labele hemu tua barak. (Éf 5:3) Buat sira-neʼe bele hamosu hakarak seksuál no halo susar ba imi atu halo buat neʼebé loos. Diʼak atu koʼalia hamutuk beibeik kona-ba buat neʼebé imi presiza halo atu hatudu respeitu ba malu no mós ba Jeová nia matadalan sira. (Lee Provérbios 22:3.) Haree toʼok saida mak ajuda irmaun Dawit no irmán Almaz husi rai-Etiópia. Sira hatete: “Ami gasta tempu hamutuk iha fatin neʼebé iha ema barak ka hamutuk ho belun sira. Ami nunka mesak iha karreta laran ka iha uma. Hodi halo nuneʼe, ami bele hasees an husi situasaun neʼebé tenta ami.”

11. Ema neʼebé namora presiza hanoin kona-ba saida kuandu deside dalan neʼebé sira sei hatudu domin ba malu?

¹¹ Ema neʼebé namora bele hatudu domin ba malu ka lae? Nuʼudar imi-nia domin sai buras, karik imi deside atu hatudu domin ba malu tuir dalan neʼebé loos. Maibé, se Ita-nia hakarak seksuál sai makaʼas, neʼe bele halo susar ba Ita atu halo desizaun neʼebé matenek kona-ba Ita-nia pár. (Kna 1:2; 2:6) No se imi hatudu domin iha dalan neʼebé la loos, neʼe bele halo fasil ba imi atu la kontrola an no halo buat neʼebé kontra Jeová nia matadalan. (Prov 6:27) Tan neʼe, kuandu foin hahú namora, koʼalia hamutuk kona-ba Bíblia nia prinsípiu no saida mak imi bele halo no labele halo. c (1 Tes 4:​3-7) Karik imi bele koʼalia hamutuk pergunta hanesan: ‘Oinsá ema seluk nia haree kona-ba dalan neʼebé ita hatudu domin ba malu? Ita-nia hahalok bele hamosu hakarak seksuál nian ka lae?’

12. Ema neʼebé namora presiza hanoin kona-ba saida se mosu problema durante tempu namora?

¹² Ita bele halo saida se mosu problema entre Ita ho Ita-nia pár? Oinsá se dala ruma imi la konkorda malu kona-ba  buat ruma? Neʼe hatudu katak imi la cocok ka lae? Laʼós sempre hanesan neʼe, dala ruma ema neʼebé namora no mós kaben-naʼin la konkorda malu. Moris kaben nian bele metin se feen no laʼen apoia malu atu rezolve problema neʼebé mosu entre sira. Entaun dalan neʼebé imi rezolve problema kuandu imi namora bele hatudu se imi-nia moris kaben nian sei susesu ka lae. Karik imi bele koʼalia hamutuk pergunta hanesan: ‘Bainhira iha problema ruma, ita ida-idak bele koʼalia ba malu ho kalma no respeitu ka lae? Ita rekoñese ita ida-idak nia fraku no koko atu hadiʼa ida-neʼe ka lae? Ita lalais husu deskulpa no fó perdua ka lae?’ (Éf 4:​31, 32) Maibé, se durante tempu namora mak imi diskute malu beibeik no sempre mosu problema, situasaun neʼe sei la troka kuandu imi kaben. Se Ita rekoñese katak ema neʼe la diʼak atu sai Ita-nia pár, desizaun neʼebé diʼak liu ba imi naʼin-rua mak hapara imi-nia relasaun. d

13. Ema neʼebé namora presiza hanoin kona-ba saida bainhira deside tempu hira mak sira namora?

¹³ Presiza namora ba tempu hira? Bainhira ita halo desizaun ho ansi, neʼe bele lori konsekuénsia neʼebé la diʼak. (Prov 21:5) Tan neʼe, bainhira Ita namora, Ita presiza uza tempu neʼebé natoon atu koñese didiʼak Ita-nia pár. Maibé Ita mós lakohi namora ba tempu neʼebé kleur liu. Bíblia hatete: “Ema sei laran-kanek se nia hein kleur atu ninia esperansa sai loos.” (Prov 13:12) Liután neʼe, se Ita namora ba tempu kleur liu, neʼe bele halo fasil ba Ita atu monu ba sala seksuál. (1 Kor 7:9) Duké fokus ba tempu hira mak Ita namora, diʼak atu husu ba Ita-nia an: ‘Saida tan mak haʼu presiza aprende kona-ba haʼu-nia pár atu nuneʼe haʼu bele foti desizaun neʼebé diʼak?’

OINSÁ ATU APOIA EMA NEʼEBÉ NAMORA?

14. Oinsá mak ita bele ajuda ema neʼebé namora? (Haree mós foto.)

¹⁴ Se ita mak hatene ema neʼebé namora daudaun, oinsá mak ita bele ajuda sira? Ita bele konvida sira atu han hamutuk, halaʼo adorasaun família nian hamutuk, ka halo atividade seluk. (Rom 12:13) Iha situasaun sira hanesan neʼe, sira bele koñese malu diʼak liután. Se presiza, ita bele akompaña sira, laʼo pasiar ho sira, ka konvida sira ba ita-nia uma atu sira bele koʼalia hamutuk. (Gal 6:10) Alicia neʼebé  temi ona, konta kona-ba buat neʼebé nia no Aschwin hafolin tebes. Alicia hatete: “Ami kontente tebes bainhira irmaun-irmán balu fó-hatene ami katak ami bele vizita sira se ami presiza fatin atu koʼalia hamutuk.” Se ema husu Ita atu akompaña sira kuandu namora, haree ida-neʼe nuʼudar oportunidade atu ajuda sira. Kuidadu atu la husik sira naʼin-rua mesamesak, maibé presiza rekoñese katak sira mós presiza tempu atu koʼalia hamutuk.—Flp 2:4.

15. Saida tan mak belun sira bele halo atu ajuda ema neʼebé namora? (Provérbios 12:18)

¹⁵ Ita mós bele ajuda ema neʼebé namora liuhusi ita-nia liafuan. Dala ruma ita presiza kontrola ita-nia liafuan. (Lee Provérbios 12:18.) Porezemplu, karik ita hakarak tebes atu fó-hatene ema seluk kona-ba ema neʼebé foin namora, maibé karik ema neʼebé namora hakarak fó sai rasik ba ema seluk. Ita lakohi gosip kona-ba ema neʼebé namora ka kritika sira. (Prov 20:19; Rom 14:10; 1 Tes 4:11) No mós ita labele koʼalia liafuan ka husu pergunta neʼebé halo sira sente presaun atu kaben. Irmán ida naran Elise no nia laʼen hatete: “Uluk ami sente moe bainhira ema husu ami kona-ba ami-nia planu atu kaben bainhira ami rasik seidauk koʼalia kona-ba neʼe.”

16. Saida mak ita bele halo se ema neʼebé namora hapara sira-nia relasaun?

¹⁶ Oinsá se ema neʼebé namora deside atu hapara sira-nia relasaun? Keta husu pergunta privadu no labele fó-sala ba sira. (1 Ped 4:15) Irmán Lea hatete: “Haʼu rona katak ema seluk koko siʼik kona-ba tanbasá haʼu no irmaun ida para atu namora. Haʼu sente laran-kanek tebes.” Hanesan temi tiha ona, bainhira ema deside atu para namora, neʼe la dehan katak sira foti desizaun neʼebé sala. Tuir loloos, namora nia objetivu mak atu ajuda mane no feto atu foti desizaun kona-ba atu kaben ka lae. Maski nuneʼe, karik desizaun neʼe sei halo sira laran-kanek no sente mesamesak. Tan neʼe, ita bele buka dalan atu ajuda sira.—Prov 17:17.

17. Saida mak ema neʼebé namora presiza kontinua halo?

¹⁷ Hanesan ita aprende ona, dala ruma tempu namora la fasil, maibé mós bele lori kontente. Jessica konta: “Tuir loloos, tempu namora mak envolve buat oioin. Maibé haʼu kontente tanba ami uza tempu no enerjia atu koñese malu diʼak liután.” Se Ita mak namora daudaun, kontinua atu koñese malu diʼak liután. Se Ita halo nuneʼe, Ita-nia tempu namora sei ajuda Ita no Ita-nia pár atu foti desizaun neʼebé diʼak kona-ba atu kaben ka lae.