1-2. (a) Paulo nia situasaun mak oinsá bainhira nia hakerek karta ba ema Kristaun iha Éfeso, no tanbasá nia hakerek ida-neʼe? (b) Ita sei hatán ba pergunta saida deʼit?

 BAINHIRA Paulo sai dadur iha uma ida iha Roma, nia hakarak fó laran-manas ba ninia maluk fiar-naʼin sira. Nia labele vizita sira, tan neʼe nia hakerek karta ba sira. Maizumenus iha tinan 60 ka 61 EC, nia hakerek karta ida ba ema Kristaun iha Éfeso.—Éf 1:1; 4:1.

² Maizumenus tinan sanulu antes neʼe, Paulo hela ba tempu balu iha Éfeso atu haklaken no hanorin kona-ba liafuan diʼak. (Após 19:​1, 8-10; 20:​20, 21) Nia hadomi tebes maluk fiar-naʼin sira no hakarak ajuda sira atu laran-metin ba Jeová. Maibé tanbasá iha ninia karta ba ema Kristaun neʼebé iha esperansa atu bá lalehan, nia hakerek kona-ba nakukun no naroman? No lisaun saida mak ema Kristaun hotu bele aprende husi ninia karta neʼe? Mai ita haree resposta ba pergunta rua neʼe.

HUSI NAKUKUN BA NAROMAN

3. Paulo uza komparasaun saida iha ninia karta?

³ Paulo hakerek ba ema Kristaun iha Éfeso: “Uluk imi iha nakukun laran, maibé agora imi iha naroman.” (Éf 5:8) Paulo uza liafuan nakukun no naroman atu esplika kona-ba mudansa boot neʼebé ema Éfeso halo ona. Mai  ita haree tanbasá Paulo dehan katak ema Kristaun iha Éfeso ‘uluk iha nakukun laran’.

4. Oinsá mak ema Éfeso iha nakukun laran tanba relijiaun falsu?

⁴ Relijiaun falsu. Antes aprende lia-loos no sai ema Kristaun, ema Éfeso fiar ba hanorin falsu no masonik. Iha sidade Éfeso, iha templu ba maromak-feto Ártemis, no ema barak iha tempu neʼebá haree templu neʼe mak furak tebes. Ema neʼebé halaʼo adorasaun iha templu neʼe adora estátua. No ema neʼebé halo oratóriu ba maromak-feto Ártemis hetan osan barak hodi faʼan buat sira-neʼe. (Após 19:​23-27) Ema barak iha sidade Éfeso mós halo masonik.—Após 19:19.

5. Oinsá mak ema Éfeso iha nakukun laran tanba hahalok la morál?

⁵ Hahalok la morál. Ema barak iha Éfeso halo hahalok neʼebé la morál no hahalok aat toʼo la sente moe. Porezemplu, iha teatru no mós iha relijiaun nia serimónia sira, baibain sira koʼalia kona-ba buat neʼebé la morál. (Éf 5:3) Ema Éfeso barak “la hatene morál neʼebé loos”, no fraze neʼe iha lian orijinál signifika “la sente tan moras” iha laran bainhira sira halo sala ruma. (Éf 4:​17-19) Antes aprende Jeová nia matadalan kona-ba buat neʼebé loos no sala, sira-nia konxiénsia la fó-sala ba sira, no sira mós la interese ba Jeová nia sentimentu kona-ba sira-nia hahalok. Tan neʼe Paulo hatete katak “sira-nia neon iha nakukun laran, [no] sira dook husi moris neʼebé mai husi Maromak”.

6. Tanbasá Paulo dehan katak agora ema Éfeso “iha naroman”?

⁶ Maibé ema Éfeso balu sai husi nakukun laran. Paulo hakerek katak ‘agora sira iha naroman tanba sira mak Naʼi nian’. (Éf 5:8) Sira moris tuir Jeová nia matadalan neʼebé hanesan naroman neʼebé dirije sira. (Sal 119:105) Ema Éfeso sira-neʼe husik ona relijiaun falsu no la halo tan hahalok la morál. Sira “halo tuir Maromak” no halo buat neʼebé sira  bele atu adora Maromak no halo nia kontente.—Éf 5:1.

7. Oinsá mak ita-nia situasaun atu hanesan ho ema Kristaun barak iha Éfeso?

⁷ Nuneʼe mós ho ita, antes aprende lia-loos, ita mós iha nakukun laran tanba relijiaun falsu no hahalok la morál. Ita balu selebra relijiaun falsu nia loron-boot sira, no balu tan uluk halo hahalok la morál. Maibé kuandu ita aprende tiha kona-ba Jeová nia matadalan sira kona-ba saida mak loos no sala, ita halo mudansa. Ita komesa moris tuir Maromak nia hakarak. No rezultadu mak ita hetan benefísiu oioin. (Isa 48:17) Maibé dala ruma la fasil atu hasees an nafatin husi nakukun neʼebé ita husik ona no “kontinua laʼo nuʼudar naroman nia oan sira”. Oinsá ita bele halo ida-neʼe?

HASEES AN HUSI NAKUKUN

8. Tuir Éfeso 5:​3-5, ema Kristaun iha Éfeso presiza hasees an husi saida?

⁸ Lee Éfeso 5:​3-5. Atu bele hasees an husi nakukun, ema Kristaun iha Éfeso presiza hakaʼas an nafatin atu la simu hahalok neʼebé halo Jeová la kontente. Neʼe laʼós deʼit kona-ba sala seksuál maibé mós labele temi liafuan neʼebé la morál. Paulo fó-hanoin ema Kristaun iha Éfeso katak sira presiza hasees an husi buat sira-neʼe se sira hakarak “simu liman-rohan iha Kristu no Maromak nia Ukun”.

9. Tanbasá ita presiza hasees an husi buat naran deʼit neʼebé bele halo ita monu ba sala seksuál?

⁹ Ita mós presiza kontinua hakaʼas an atu la halo “hahalok folin-laek neʼebé mai husi nakukun”. (Éf 5:11) Dala barak se ema ida hateke, rona, no koʼalia kona-ba buat neʼebé foʼer no la morál, neʼe halo fasil ba nia atu monu ba sala. (Gén 3:6; Tgo 1:​14, 15) Iha nasaun ida, irmaun-irmán barak halo grupu iha média sosiál atu mensajen malu. Foufoun sira barak koʼalia kona-ba buat espirituál. Maibé neineik-neineik sira komesa koʼalia kona-ba buat neʼebé Jeová odi. Sira barak koʼalia kona-ba buat seksuál nian. Ikusmai, irmaun-irmán sira-neʼe barak hatete katak hodi koʼalia kona-ba buat neʼebé la morál halo sira monu ba sala seksuál.

10. Oinsá Satanás koko atu lohi ita? (Éfeso 5:6)

¹⁰ Satanás nia mundu koko lohi ita hodi halo ita fiar katak Jeová nia matadalan kona-ba hahalok la morál mak la loos. (2 Ped 2:19) Neʼe la halo ita hakfodak! Diabu uza lasu neʼe ba tempu kleur ona atu halo ema la hatene saida mak loos no saida mak sala. (Isa 5:20; 2 Kor 4:4) Tan neʼe filme, programa televizaun, no website barak fó sai ideia neʼebé kontra Jeová nia matadalan neʼebé loos! Satanás hakarak ita atu hanoin katak hahalok sira neʼebé la moos no la morál neʼebé mundu simu mak la sala, no lori kontente, no mós la lori susar.—Lee Éfeso 5:6.

11. Oinsá mak Angela nia esperiénsia hatudu katak ita presiza halo tuir konsellu iha Éfeso 5:7? (Haree mós foto.)

¹¹ Satanás hakarak ita atu ransu ho ema neʼebé la apoia ita atu halo tuir Jeová nia matadalan. Tan neʼe Paulo anima ema Kristaun iha Éfeso: “Keta hola parte hamutuk ho sira”, neʼe katak sira neʼebé halo hahalok neʼebé la diʼak tuir Maromak nia haree. (Éf 5:7) Ita presiza kuidadu liután se kompara ho ema Kristaun sira iha Éfeso antigu, tanba ohin loron ita bele gasta tempu barak laʼós deʼit ho ema neʼebé ita hasoru oin ba oin,  maibé mós liuhusi média sosiál. Angela a neʼebé hela iha Ázia rekoñese katak perigu tebes atu ransu iha média sosiál. Nia hatete: “Média sosiál mak hanesan lasu ida neʼebé neineik-neineik bele troka ita-nia hanoin. Lakleur deʼit haʼu habelun ho ema neʼebé la halo tuir Bíblia nia prinsípiu sira. Ikusmai, haʼu komesa hanoin katak la sala atu halaʼo moris iha dalan neʼebé Jeová la simu.” Maibé katuas sira ajuda Angela atu halo mudansa. Nia hatete: “Agora haʼu halo nakonu haʼu-nia neon ho buat espirituál duké ho buat neʼebé iha média sosiál.”

12. Saida mak sei ajuda ita atu kaer metin ba Jeová nia matadalan kona-ba buat neʼebé loos no sala?

¹² Ita presiza luta hasoru mundu nia hanoin katak la sala atu halo hahalok la morál. Ita hatene katak neʼe la loos. (Éf 4:​19, 20) Diʼak atu husu ba ita-nia an: ‘Haʼu kuidadu atu la ransu ho kolega serbisu, kolega eskola, ka ema seluk neʼebé la respeitu Jeová nia matadalan ka lae? Haʼu kaer metin ba Jeová nia matadalan sira, maski karik ema ruma dehan katak haʼu la hatudu toleránsia ba ema seluk ka lae?’ Hanesan temi iha 2 Timóteo 2:​20-22, karik ita mós presiza kuidadu kuandu hili belun iha kongregasaun. Ita presiza hanoin-hetan katak laʼós ema hotu bele ajuda ita atu nafatin laran-metin ba Jeová.

“LAʼO NUʼUDAR NAROMAN NIA OAN SIRA”

13. “Kontinua laʼo nuʼudar naroman nia oan sira” katak sá? (Éfeso 5:​7-9)

¹³ Paulo anima ema Kristaun iha Éfeso laʼós deʼit atu hasees an husi nakukun, maibé mós atu “kontinua laʼo nuʼudar naroman nia oan sira”. (Lee Éfeso 5:​7-9.) Neʼe katak sá? Neʼe katak ita hatudu hahalok nuʼudar ema Kristaun neʼebé loos iha tempu hotu. Dalan ida atu kumpre ida-neʼe mak hodi lee no estuda beibeik Bíblia no mós ita-nia publikasaun sira. Importante liu mak hodi halo tuir Jesus nia hanorin no ezemplu, tanba Jesus  mak “naroman ba mundu”.—João 8:12; Prov 6:23.

14. Oinsá espíritu santu bele ajuda ita?

¹⁴ Ita mós presiza Maromak nia espíritu santu atu bele “kontinua laʼo nuʼudar naroman nia oan sira”. Tanbasá? Tanba la fasil atu moos nafatin iha mundu neʼebé nakonu ho hahalok la morál. (1 Tes 4:​3-5, 7, 8) Espíritu santu bele ajuda ita atu luta hasoru mundu neʼe nia hanoin, inklui ema nia hanorin no hanoin neʼebé kontra malu ho Maromak nia hanoin. Espíritu santu mós bele ajuda ita atu hatudu sai “hahalok diʼak oioin, [no] hahalok loos”.—Éf 5:9.

15. Oinsá mak ita bele simu espíritu santu? (Éfeso 5:​19, 20)

¹⁵ Dalan ida atu simu espíritu santu mak liuhusi orasaun hodi husu ida-neʼe. Jesus hatete katak Jeová sei “fó duni espíritu santu ba ema neʼebé husu ba nia”. (Lc 11:13) No bainhira ita adora Jeová hamutuk iha reuniaun, ita mós simu espíritu santu. (Lee Éfeso 5:​19, 20.) Ho espíritu santu nia ajuda, ita bele moris iha dalan neʼebé halo Maromak kontente.

16. Saida mak bele ajuda ita atu halo desizaun neʼebé matenek? (Éfeso 5:​10, 17)

¹⁶ Bainhira atu halo desizaun importante ruma, ita presiza ‘buka-hatene saida mak Jeová hakarak ita atu halo’ no tuirmai halo tuir ida-neʼe. (Lee Éfeso 5:​10, 17.) Ita bele buka-hatene Maromak nia hanoin kona-ba situasaun ruma hodi buka Bíblia nia prinsípiu neʼebé kona ita-nia situasaun. Tuirmai kuandu ita aplika prinsípiu sira-neʼe, ita sei halo desizaun neʼebé matenek.

17. Oinsá mak ita bele uza didiʼak ita-nia tempu? (Éfeso 5:​15, 16) (Haree mós dezeñu.)

¹⁷ Paulo mós fó konsellu ba ema Kristaun iha Éfeso atu uza didiʼak sira-nia tempu. (Lee Éfeso 5:​15, 16.) “Aat-naʼin”, katak ita-nia inimigu Satanás hakarak halo ita okupadu toʼo ita la iha  tempu atu serbí Maromak. (1 João 5:19) Se la kuidadu, ita bele deʼit tau fokus ba osan, edukasaun, ka serbisu, duké serbí Jeová. Se neʼe akontese, neʼe hatudu katak mundu komesa fó influénsia ba ita. Klaru katak buat sira-neʼe la sala, maibé ita labele tau uluk buat sira-neʼe iha ita-nia moris. Atu “laʼo nuʼudar naroman nia oan”, ita presiza ‘uza didiʼak ita-nia tempu’ hodi tau fokus ba buat neʼebé importante liu.

18. Saida mak irmaun ida halo atu bele uza didiʼak ninia tempu?

¹⁸ Buka dalan atu serbí Jeová liután. Neʼe mak buat neʼebé irmaun ida husi rai-Áfrika Súl halo. Nia hatete: “Haʼu hanoin kona-ba haʼu-nia moris no halo orasaun ba Jeová atu ajuda haʼu hodi bele serbí nia liután. Haʼu halo orasaun atu hetan serbisu neʼebé bele ajuda haʼu atu iha tempu barak atu haklaken. Ho Jeová nia ajuda, haʼu hetan serbisu neʼebé haʼu hakarak. Ikusmai, haʼu no haʼu-nia feen komesa serbí nuʼudar pioneiru hamutuk.”

19. Oinsá mak ita bele “kontinua laʼo nuʼudar naroman nia oan sira”?

¹⁹ Paulo nia karta ba ema Kristaun iha Éfeso ajuda sira atu laran-metin nafatin ba Jeová. No konsellu neʼe mós bele ajuda ita. Hanesan ita aprende ona, neʼe bele ajuda ita atu hili ho didiʼak atividade halimar nian no ita-nia ransu. Neʼe bele motiva ita atu kontinua estuda beibeik Bíblia hodi nuneʼe lia-loos naroman nian bele kontinua dirije ita. Paulo nia konsellu mós bele ajuda ita komprende katak espíritu santu mak importante atu ita bele hatudu hahalok diʼak. Hodi aplika buat neʼebé Paulo hakerek bele ajuda ita atu halo desizaun ho matenek neʼebé tuir Jeová nia hanoin. Hodi halo nuneʼe, ita sei hasees an husi nakukun no hela nafatin iha naroman!