Feto ida naran Ester dehan: “Haʼu sempre hanoin barak kona-ba buat oioin neʼebé seidauk akontese ka loloos sei nunka akontese.” Eskritura neʼebé ajuda nia mak Mateus 6:34, neʼebé dehan: “Keta hanoin barak kona-ba loron tuirmai, basá loron tuirmai iha ninia susar rasik. Tanba loron ida-idak iha ninia problema rasik.” Ester esplika katak Jesus nia liafuan neʼe ajuda nia atu la hanoin barak kona-ba saida mak sei akontese aban. Nia hatutan tan: “Diʼak liu haʼu hanoin deʼit kona-ba problema ohin nian, duké hanoin barak kona-ba buat neʼebé seidauk akontese ka sei nunka akontese.”

Feto ida seluk naran Joana mós sente katak ninia laran-susar domina ninia moris. Nia esplika: “Haʼu sempre tanis, no dala ruma haʼu mós la toba-dukur iha kalan. Hanoin negativu domina haʼu-nia neon.” Eskritura neʼebé ajuda nia mak 1 Pedro 5:7, neʼebé dehan: “Entrega imi-nia laran-susar hotu ba [Maromak], tanba nia hanoin imi.” Joana hatete: “Haʼu kontinua halo orasaun ba Jeová, no nia hatán haʼu-nia orasaun. Ikusmai haʼu bele sente kmaan fali. Maski dala ruma hanoin negativu sei mosu, maibé agora haʼu hatene oinsá atu kontrola ida-neʼe.”

Feto ida naran Isabella hatete: “Haʼu toman atu demora tempu tanba haʼu-nia apá mós hanesan neʼe. Duké hakaʼas an atu halo serbisu neʼebé importante, haʼu gasta haʼu-nia tempu atu toba deʼit ka haree televizaun. Toman neʼe ladiʼak tanba bele halo ita sente estrese liután, no ikusmai buat neʼebé ita halo la lori rezultadu diʼak.” Matadalan neʼebé ajuda nia mak iha 2 Timóteo 2:15, neʼebé dehan: “Hakaʼas an hodi sai nuʼudar ema neʼebé Maromak simu, no nuʼudar serbisu-naʼin neʼebé la moe kona-ba buat ida.” Isabella esplika: “Haʼu lakohi halo Jeová sente moe ho haʼu-nia serbisu, tan deʼit haʼu demora tempu.” Ikusmai, Isabella komesa halo mudansa.

Feto ida seluk naran Daniela mós iha toman neʼebé hanesan, nia hatete: “Duké halo kedas haʼu-nia serbisu, baibain haʼu demora toʼo tempu besik loos ona mak haʼu foin halo. Tuir loloos, toman neʼe ladiʼak, neʼe halo haʼu hanoin barak, tanis no toba la dukur.” Daniela hetan ajuda husi Provérbios (Amsal) 13:16, neʼebé dehan: “Ema neʼebé matenek hatudu hahalok tuir ninia koñesimentu, maibé ema beik hatudu sai ninia hahalok beik.” Daniela hanoin kleʼan kona-ba eskritura neʼe no nia hatete katak: “Matenek atu halo planu nanis. Tan neʼe, agora haʼu iha toman atu hakerek lista kona-ba serbisu hotu neʼebé haʼu presiza halo, hodi haʼu bele uza didiʼak haʼu-nia tempu.”

Feto ida naran Cristina hatete: “Haʼu-nia laʼen husik hela haʼu ho oan naʼin-haat.” Matadalan neʼebé ajuda nia mak Provérbios (Amsal) 17:17, neʼebé dehan: “Belun neʼebé loos hatudu domin iha tempu hotu, no nia sai hanesan maun ka alin ida iha tempu susar.” Cristina sai belun ho ema sira neʼebé serbí Jeová. Oinsá sira ajuda nia? Cristina esplika: “Haʼu-nia belun sira ajuda haʼu iha dalan oioin! Balu fó hahán ba ami. . . . Ami muda uma dala tolu ona no ema barak mai ajuda. Laʼós neʼe deʼit, haʼu-nia belun ida mós ajuda haʼu atu hetan serbisu. Sira sempre prontu atu ajuda haʼu.”

Delfina, neʼebé temi ona mós sente mesamesak. Nia esplika: “Bainhira haʼu haree família seluk moris kontente, neʼe halo haʼu sente mesamesak tebes no la kontente.” Eskritura ida neʼebé ajuda nia mak Salmo (Mazmur) 68:6, neʼebé dehan: “Maromak fó uma ba ema neʼebé mesak deʼit hodi nia bele hela bá.” Nia esplika: “Haʼu aprende katak eskritura neʼe la koʼalia deʼit kona-ba hela-fatin. Maibé eskritura neʼe mós koʼalia kona-ba belun diʼak sira neʼebé ita bele hetan kuandu ita serbí Maromak Jeová. No atu hakbesik ba ema seluk no hetan belun diʼak, ulukliu haʼu presiza hakbesik ba Jeová. No Salmo (Mazmur) 37:4 ajuda haʼu atu halo nuneʼe. Eskritura neʼe dehan: ‘Haksolok bá tanba Jeová, no nia sei fó ba ó buat neʼebé ó-nia laran hakarak.’”

Delfina hatutan tan: “Haʼu rekoñese katak haʼu presiza hametin haʼu-nia relasaun ho Jeová, nia mak belun neʼebé diʼak liu hotu. No atu bele habelun ho ema seluk neʼebé mós hadomi Jeová, haʼu halo lista kona-ba atividade sira neʼebé ami bele halo hamutuk. Haʼu mós aprende atu tau fokus deʼit ba ema nia hahalok diʼak duké hanoin kona-ba sira-nia sala.”

Klaru katak ita-nia belun sira mak sala-naʼin maski sira serbí Maromak. Testemuña ba Jeová mós luta hasoru problema oioin. Maski nuneʼe, diʼak se ita kontinua habelun ho ema neʼebé halo tuir Bíblia nia matadalan no prontu atu ajuda ema seluk. Maibé oinsá ho problema sira hanesan moras todan ka sentimentu triste tanba ema neʼebé ita hadomi mate. Bíblia nia matadalan bele ajuda ita atu tahan hasoru problema sira-neʼe ka lae?