EMA BALU DEHAN LAE. Doutór ida hatete katak uza Bíblia nia matadalan iha tempu modernu, mak hanesan deʼit ho uza livru kímiku husi tinan 1920 atu hanorin fali ohin loron. Ema neʼebé la respeitu Bíblia mós karik sei husu: “Ita sei nunka uza livru kona-ba komputadór modelu tuan nian atu ajuda ita uza komputadór neʼebé modernu, loos ka lae?” Neʼe katak ba ema balu, Bíblia mak livru neʼebé antigu tebes no la vale ona.

Ohin loron ita bele hetan informasaun barak. Porezemplu, sítiu internét barak sempre fó sai informasaun oioin neʼebé foun liu. Programa televizaun balu mós aprezenta matenek-naʼin sira, no hakerek-naʼin sira neʼebé fó sai informasaun oioin. No iha livru barak neʼebé fó sai matadalan oioin kona-ba oinsá atu halaʼo moris.

Entaun, tansá mak ita presiza buka informasaun husi Bíblia, neʼebé hakerek tinan 2.000 liubá? Ema barak hanoin katak uza livru tuan hanesan Bíblia mak hanesan deʼit ho uza informasaun husi livru kímiku neʼebé tuan ona. Maibé tuir loloos, hanoin hanesan neʼe mak sala. Siénsia no teknolojia troka ba beibeik, maibé ema nia presiza nunka troka, loos ka lae? Ema nafatin buka-hatene kona-ba moris nia objetivu, oinsá atu bele moris ho seguru, iha moris família neʼebé kontente no iha belun neʼebé diʼak.

Maski Bíblia mak livru neʼebé tuan, maibé bele fó resposta ba pergunta hotu kona-ba moris. Ema fiar katak Maromak mak book ema atu hakerek Bíblia. No katak Bíblia mós iha matadalan kona-ba moris loron-loron nian no bele ajuda ita atu hasoru situasaun oioin. (2 Timóteo 3:16, 17) Ema mós hatete katak konsellu husi Bíblia nunka sai tuan. Bíblia hatete: “Maromak nia liafuan mak moris.”​—Ebreu 4:12.

Se nuneʼe buat neʼebé ema hatete mak loos ka lae? Bíblia mak livru neʼebé tuan ka Bíblia nia matadalan bele ajuda ita ohin loron? Livru Haklaken neʼe bele ajuda Ita atu hetan resposta ba pergunta sira-neʼe, no livru neʼe mak livru primeiru husi série espesiál.