Kuandu Ita hakarak koñese ema ida diʼak liután, Ita presiza aprende kona-ba buat neʼebé nia halo ona no susar saida deʼit mak nia hasoru. Nuneʼe mós, se Ita hakarak atu hatene diʼak liután Maromak, Ita presiza aprende buat neʼebé nia halo ona. Se Ita halo nuneʼe, Ita sei hakfodak tanba buat barak neʼebé nia halo ona uluk bele lori benefísiu ba ita agora no iha ita-nia futuru.

Maromak Jeová mak Kriadór Boot, no ita “bele haree ninia hahalok sira ho klaru hahú husi tempu neʼebé nia kria mundu”. (Roma 1:20) “Nia mak Kriadór neʼebé halo mundu ho ninia kbiit, Ida neʼebé hametin rai ho ninia matenek no Ida neʼebé nahe lalehan hanesan hena ho ninia kbiit atu komprende.” (Jeremias 10:12) Kriasaun sira neʼebé furak mós hatudu sai katak Maromak hanoin ita.

Hanoin toʼok, Jeová kria ema iha dalan neʼebé úniku tanba nia kria ita “tuir ninia ilas”. (Génesis 1:27) Neʼe katak ita bele haleno ninia hahalok sira. Nia mós kria ita ho abilidade atu hanoin kona-ba buat espirituál no komprende ninia hanoin no morál. Kuandu ita moris tuir ida-neʼe, ita sei iha moris neʼebé kontente. Laʼós neʼe deʼit, nia mós fó oportunidade mai ita atu haburas relasaun diʼak ho nia.

Ita bele haree Maromak nia domin husi buat hotu neʼebé nia kria iha mundu. Apóstolu Paulo hatete katak Maromak “fó sasin kona-ba nia an liuhusi buat diʼak neʼebé nia halo. Nia fó udan husi lalehan no fó ai-fuan tuir ninia tempu, hodi fó ai-han barak ba [ita] no halo nakonu [ita-nia] laran ho ksolok”. (Apóstolu 14:17) Maromak fó buat neʼebé ita presiza atu moris, maibé liután neʼe, Nia fó buat barak tan atu ita bele goza no hafolin moris. Tuir loloos, Maromak nia hakarak ba ema mak furak liu fali buat neʼebé ita iha ona ohin loron.

Jeová kria mundu nuʼudar hela-fatin permanente ba ema. Bíblia hatete: “Nia fó ona rai ba ema” no “nia kria rai laʼós saugati deʼit, maibé nia kria rai atu ema bele hela bá”. (Salmo 115:16;  Isaias 45:18) Sé mak hela iha neʼebá no toʼo bainhira? “Ema laran-loos sira sei simu rai nuʼudar sira-nian, no sira sei moris ba nafatin iha rai.”​—Salmo 37:29.

Bíblia esplika katak Jeová kria mane no feto primeiru, Adão no Eva, no nia tau sira iha mundu paraízu atu “tau matan ba jardín neʼe no halo toʼos iha neʼebá”. (Génesis 2:8, 15) Maromak fó ba sira knaar rua: “Iha oan no sai barak bá, halo nakonu no domina rai”. (Génesis 1:28) Adão no Eva mós iha esperansa atu moris ba nafatin iha mundu. Triste mak sira hili atu la halo tuir Maromak, tan neʼe mak sira lakon sira-nia oportunidade atu moris ba nafatin iha rai hamutuk ho “ema laran-loos sira”. Maski nuneʼe, hanesan ita sei haree, sira-nia desizaun labele troka Jeová nia hakarak ba ema no rai. Antes neʼe, mai ita haree uluk buat seluk neʼebé Maromak halo ona.

Bíblia mak Maromak nia Liafuan. Tanbasá mak Jeová fó Bíblia ba ita? Razaun primeiru mak atu ita aprende kona-ba nia. (Provérbios 2:1-5) Loloos Bíblia labele hatán pergunta hotu neʼebé ita iha kona-ba Maromak, tanba la iha livru ida neʼebé bele halo ida-neʼe. (Eclesiastes 3:11) Maibé Bíblia bele ajuda ita atu hatene didiʼak Maromak. Ita hatene liután Maromak husi ninia hahalok neʼebé nia hatudu ba ema. No aprende kona-ba ema hanesan saida mak Maromak gosta no la gosta. (Salmo 15:1-5) Ita aprende ninia matadalan kona-ba morál, adorasaun no mós rikusoin. Liuhusi Jesus nia liafuan no hahalok sira neʼebé hakerek iha Bíblia, ita bele hatene didiʼak kona-ba Jeová nia hahalok sira.​—João 14:9.

Razaun seluk mak Jeová hakarak ita atu aprende oinsá bele moris ho kontente. Liuhusi Bíblia, Jeová fó-hatene ba ita oinsá atu iha moris família nian neʼebé kontente, oinsá atu sente kontente ho buat neʼebé ita iha ona no oinsá atu tahan hasoru laran-taridu. Livru neʼe sei esplika liután Bíblia nia resposta ba pergunta importante sira kona-ba moris, hanesan: Tanbasá mak iha susar barak tebes? Ita-nia futuru sei sai oinsá? Bíblia mós esplika buat neʼebé Maromak halo ona atu bele kumpre ninia hakarak uluk nian.

Bíblia mak livru neʼebé úniku duni. Maizumenus mane naʼin-40 mak hakerek Bíblia durante tinan 1.600 liu, maski nuneʼe Bíblia nia tema mak ida deʼit, tanba Eskritura hotu mai husi Maromak. (2 Timóteo 3:16) La hanesan ho livru antigu seluk, Bíblia nia informasaun no mensajen orijinál ema kopia ho loloos toʼo ohin loron no manuskritu antigu sira konfirma ida-neʼe. Maski susar barak mosu, maibé neʼe la hanetik ema atu kontinua tradús, fahe no lee Bíblia. Só Bíblia deʼit mak livru neʼebé ema halo no fahe barak liu ohin loron. Tanba Bíblia sei iha toʼo ohin loron, prova katak “Maromak nia liafuan sei hela ba nafatin”.​—Isaias 40:8.

Laʼós neʼe deʼit, Maromak mós garantia katak nia sei kumpre ninia promesa sira ba ita. Hanesan temi ona, Maromak nia hakarak mak atu ema moris ba nafatin iha mundu. Maibé kuandu Adão hili atu la halo tuir Maromak no sai sala-naʼin, nia no ninia jerasaun sira lakon oportunidade atu moris ba nafatin. “Sala tama iha mundu liuhusi ema ida, no mate tanba sala. Nuneʼe ema hotu mate tanba ema hotu halo ona sala.” (Roma 5:12) Tanba sala neʼebé Adão halo, neʼe hatudu katak Maromak nia hakarak ba ema no mundu sei la susesu ka lae? Oinsá ho Jeová nia reasaun?

Buat neʼebé Jeová halo apoia malu ho ninia hahalok sira. Maski nia tesi-lia ho justisa ba Adão no Eva nia hahalok, maibé ho domin nia fó oportunidade ba sira-nia jerasaun. Ho matenek, Jeová fó sai dalan atu hadiʼa situasaun neʼe, no nia lalais atu fó solusaun. (Génesis 3:15) Dalan ida atu salva sira-nia jerasaun husi sala no mate mak liuhusi Maromak nia Oan-Mane, Jesus Kristu. Neʼe envolve saida deʼit?

Jeová haruka Jesus mai toʼo mundu atu hanorin ema kona-ba dalan ba moris no atu “fó ninia  moris hodi sosa fali ema barak”. a (Mateus 20:28; João 14:6) Jesus bele fó ninia moris nuʼudar sakrifísiu tanba nia perfeitu hanesan Adão. Maibé la hanesan Adão, Jesus kontinua halo tuir Maromak toʼo nia mate. Tanba Jesus la merese atu mate, Jeová halo nia moris fila fali ba lalehan. Tan neʼe, Jesus bele halo buat neʼebé Adão la konsege halo, nia fó ba ema esperansa atu moris ba nafatin. “Tanba liuhusi ema ida deʼit neʼebé lakohi halo tuir, ema hotu sai sala-naʼin, nuneʼe mós liuhusi ema ida deʼit neʼebé halo tuir, Maromak sei haree ema barak nuʼudar ema laran-loos.” (Roma 5:19) Liuhusi Jesus nia sakrifísiu, Maromak sei kumpre ninia promesa ba ema atu moris ba nafatin iha mundu.

Ita aprende kona-ba Jeová husi dalan neʼebé nia rezolve problema neʼebé mosu tanba Adão la halo tuir. Ita mós aprende katak la iha buat ida neʼebé bele hanetik Maromak atu kumpre ninia hakarak, tanba ninia liafuan sei “hetan duni susesu”. (Isaias 55:11) Ita mós hafolin Jeová nia domin neʼebé boot ba ita. “Maromak hatudu ninia domin mai ita iha dalan tuirmai neʼe: Maromak haruka ninia Oan-Mane mesak mai mundu atu ita bele hetan moris liuhusi nia. Maromak nia domin hanesan neʼe: Nia haruka ninia Oan-Mane nuʼudar sakrifísiu neʼebé hasaʼe ona ba ita-nia sala hodi nuneʼe ita bele hadame malu ho nia. Maromak halo nuneʼe laʼós tanba ita hadomi ona Maromak, maibé tanba nia hadomi ita.”​—1 João 4:9, 10.

Maromak “husik nia Oan-Mane atu hetan terus hodi entrega nia ba mate tanba ita hotu”, entaun ita bele fiar metin katak Maromak sei “fó ba ita buat seluk hotu” neʼebé nia promete ona. (Roma 8:32) Promesa saida mak Maromak sei kumpre ba ita? Kontinua lee informasaun tuirmai.