“Tanbasá Maromak la halo buat ida?”
“HAʼU HUSU BEIBEIK: TANBASÁ MAROMAK LA HALO BUAT IDA?”—Amu-Papa Bento XVI, kuandu nia vizita governu Nazi nia komarka tuan iha Auschwitz, rai-Polónia.
KUANDU DEZASTRE AKONTESE, KARIK ITA HANOIN: ‘TANBASÁ MAROMAK LA HALO BUAT IDA?’ KA BAINHIRA HASORU SUSAR, ITA DUVIDA KATAK MAROMAK HANOIN DUNI ITA KA LAE?
Karik Ita sente hanesan Sheila, neʼebé hela iha Estadus Unidus. Nia boot iha família neʼebé relijiozu tebes, nia hatete: “Husi kiʼik kedas haʼu hakarak atu hakbesik ba Maromak tanba nia mak ita-nia Kriadór. Maski nuneʼe, haʼu nunka sente besik ba nia. Haʼu hanoin nia bele haree haʼu, maibé nia la interese ba haʼu. Haʼu la hanoin Maromak odi haʼu, maibé haʼu mós la fiar katak nia hadomi haʼu.” Tanbasá Sheila duvida hanesan neʼe? Nia esplika: “Haʼu-nia família hasoru susar oioin tuituir malu. Tuir haʼu-nia haree, Maromak la ajuda ami.”
Hanesan ho Sheila, karik Ita mós fiar katak Maromak iha duni. Maski nuneʼe, karik Ita duvida katak nia hanoin Ita. Mane ida husi Bíblia naran Job mós duvida maski nia fiar katak Kriadór iha kbiit no matenek. (Job 2:3; 9:4) Bainhira Job hasoru susar tuituir malu no la hetan ajuda, nia husu ba Maromak: “Tanbasá mak Ita subar Ita-nia oin no haree haʼu hanesan Ita-nia inimigu?”—Job 13:24.
Saida mak Bíblia hanorin? Dezastre mak kastigu husi Maromak ka lae? Iha evidénsia katak Maromak hanoin ita ida-idak ka lae? Oinsá mak ita bele hatene katak Maromak haree, komprende, hanoin ita no mós hakarak atu ajuda ita bainhira hasoru susar?
Informasaun tuirmai, ita sei haree oinsá mak kriasaun hatudu katak Maromak hanoin ita. (Roma 1:20) Ita mós sei haree oinsá mak Bíblia hatudu katak Maromak hanoin ita. Hodi aprende liután kona-ba Maromak liuhusi ninia kriasaun no ninia Liafuan, neʼe sei hametin ita-nia fiar katak nia hanoin ita.—1 João 2:3; 1 Pedro 5:7.
Karik Ita sei gosta
LIVRU HAKLAKEN
Maromak haree Ita ka lae?
Tanbasá mak Ita bele fiar katak Maromak hatudu interese ba Ita-nia moris?
