Iha tempu Bíblia, ema judeu sira taʼuk tebes ba moras-lepra neʼebé bele daʼet. Moras neʼe ataka ema nia isin-lolon tomak toʼo estraga inus, ain-tutun ka liman-fuan, no sira-nia isin nunka bele sai fali hanesan uluk. Iha tempu neʼebá, la iha dalan atu kura moras neʼe. Ema moras-lepra sira tenke hadook an husi ema seluk no fó avizu kona-ba sira-nia moras.—Levítico (Imamat) 13:45, 46.

Maski ema judeu sira iha ona Moisés nia Ukun-Fuan kona-ba moras-lepra, maibé ulun-naʼin relijiaun sira halo susar liután ba ema moras-lepra sira hodi inventa lei oioin. Porezemplu, ema moras-lepra sira labele hakbesik ba ema seluk maizumenus metru 2, no se anin huu, sira tenke hadook an husi ema seluk ba metru 45. Liután neʼe, tuir mestre relijiaun balu, Moisés nia Ukun-Fuan neʼebé haruka ema moras-lepra atu hela iha “povu nia hela-fatin nia liʼur”, neʼe katak sira labele tama ba sidade laran. Tan neʼe, bainhira mestre judeu ida haree ema moras-lepra iha sidade laran, nia sei tuda ema neʼe hodi dehan: “Bá fali ó-nia fatin, no keta hafoʼer ema seluk.”

Neʼe la hanesan duni ho Jesus! Duké duni sai ema moras-lepra sira, nia lolo ninia liman hodi kona sira no kura sira-nia moras.—Mateus 8:3.

Iha Jesus nia tempu, ulun-naʼin relijiaun sira debate beibeik kona-ba soe-malu. Tan neʼe, loron ida, ema farizeu balu koko Jesus hodi husu: “Tuir lei mane ida bele soe malu ho nia feen tan razaun naran deʼit ka lae?”—Mateus 19:3.

Moisés nia Ukun-Fuan dehan katak, se mane ida haree “buat ruma neʼebé la loos” kona-ba ninia feen, nia bele soe ninia feen. (Deuteronômio [Ulangan] 24:1) Iha Jesus nia tempu, iha grupu rua husi mestre relijiaun sira neʼebé iha hanoin la hanesan kona-ba dalan atu komprende ukun-fuan neʼe. Tuir mestre sira husi grupu Samai, neʼebé kaer metin tebes ba ukun-fuan sira, só sala-foʼer deʼit mak bele sai razaun atu soe malu. Maibé mestre sira husi grupu Hilel dehan katak mane ida bele soe ninia feen ho problema naran deʼit neʼebé mosu entre feen-laʼen. Porezemplu, mane ida bele soe ninia feen se feen neʼe teʼin ladiʼak, ka se nia hetan ona feto seluk neʼebé bonita liu.

Entaun, saida mak Jesus nia resposta ba ema farizeu sira-nia pergunta? Jesus dehan: “Ema naran deʼit neʼebé soe nia feen maski nia feen la halo sala-foʼer, no ema neʼe kaben fali, nia halo sala-foʼer.”—Mateus 19:6, 9.