1-2. Oinsá ita bele halo tuir Provérbios 4:25? Fó toʼok ezemplu.

HANOIN TOʼOK kona-ba ezemplu sira tuirmai. Irmán ida neʼebé idade ona hanoin kona-ba esperiénsia diʼak neʼebé uluk nia hetan. Maski agora nia hasoru susar, maibé nia hakaʼas an atu kontinua serbí Jeová ho ninia kbiit tomak. (1 Kor 15:58) Loroloron nia imajina kona-ba ninia moris iha mundu foun hamutuk ho ninia família no belun sira. Irmán ida seluk hanoin-hetan katak uluk maluk Kristaun ida hakanek ninia laran, maibé nia hili atu la rai hirus. (Kol 3:13) Irmaun ida hatene katak uluk nia halo sala, maibé agora nia tau fokus no hakaʼas an atu laran-metin nafatin ba Jeová.—Sal 51:10.

² Saida mak hanesan entre sira naʼin-tolu? Sira hotu hanoin-hetan buat neʼebé akontese iha pasadu, maibé sira la hanoin beibeik kona-ba neʼe. Sira “hateke deʼit ba oin” no hanoin kona-ba futuru.—Lee Provérbios 4:25.

3. Tanbasá ita presiza hanoin kona-ba futuru?

³ Tanbasá importante atu hanoin kona-ba futuru? Ita labele laʼo loos se ita hateke beibeik ba kotuk. Nuneʼe mós ho ita-nia serbisu ba Jeová. Ita labele serbí Jeová ho laran tomak se ita sempre hanoin kona-ba pasadu.—Lc 9:62.

4. Iha lisaun neʼe, ita sei koʼalia kona-ba saida?

⁴ Iha lisaun neʼe, ita sei koʼalia kona-ba lasu tolu neʼebé bele book ita atu tau fokus demais ba pasadu. * Lasu sira-neʼe mak (1) sente katak moris iha pasadu mak diʼak liu, (2) rai hirus, no (3) fó-sala demais ba ita-nia an. Iha situasaun ida-idak, ita sei haree oinsá Bíblia nia prinsípiu bele ajuda ita atu la tau fokus ba “buat sira neʼebé iha kotuk” maibé tau fokus ba “buat sira neʼebé iha oin”.—Flp 3:13.

5. Eclesiastes 7:10 fó avizu kona-ba lasu saida?

⁵ Lee Eclesiastes 7:10. Versíkulu neʼe la dehan katak sala atu husu: “Tanbasá loron uluk nian mak diʼak?” Memória neʼebé diʼak mak prezente husi Jeová. Maibé versíkulu neʼe hatete: “Keta dehan: ‘Tanbasá mak loron uluk nian diʼak liu fali agora?’” Entaun ita presiza kuidadu atu la kompara ita-nia moris uluk nian ho ita-nia moris agora no hanoin katak agora buat hotu mak aat liu. La matenek atu halo ida-neʼe.

6. Tanbasá la matenek atu hanoin beibeik katak moris uluk nian mak diʼak liu? Fó toʼok ezemplu.

⁶ Tanbasá la matenek atu hanoin beibeik katak ita-nia moris uluk nian mak diʼak liu? Karik ida-neʼe bele halo ita hanoin-hetan deʼit buat diʼak husi ita-nia pasadu no la hanoin kona-ba susar sira neʼebé uluk ita hasoru. Porezemplu, hanoin toʼok kona-ba ema Izraél. Depois sai tiha husi rai-Ejitu, sira haluha lalais kona-ba susar neʼebé sira hasoru. Sira tau fokus deʼit ba hahán diʼak neʼebé uluk sira han. Sira hatete: “Ami hanoin-hetan ikan neʼebé uluk ami han beibeik hodi la selu iha rai-Ejitu, no mós pepinu, pateka, liis-tahan, liis-mean no liis-mutin!” (Núm 11:5) Maibé tuir loloos, sira “la selu” ka lae? Lae. Ema Ejitu trata aat ema Izraél. Iha tempu neʼebá, ema Izraél mak atan. (Éx 1:13, 14; 3:6-9) Maibé sira haluha kona-ba susar sira-neʼe, no hakarak atu moris hanesan uluk. Sira hili atu tau fokus ba buat diʼak deʼit husi sira-nia pasadu duké tau fokus ba buat diʼak neʼebé Jeová halo ona ba sira. Jeová la kontente ho sira-nia hahalok.—Núm 11:10.

7. Saida mak ajuda irmán ida atu la hanoin demais kona-ba pasadu?

⁷ Oinsá ita bele hasees an husi lasu neʼe? Hanoin toʼok kona-ba irmán ida nia ezemplu. Nia komesa serbí iha Betel iha Brooklyn iha tinan 1945. Liutiha tinan balu, nia kaben ho irmaun ida neʼebé mós serbí iha Betel. Durante tinan barak  sira serbí hamutuk iha Betel. Maibé iha tinan 1976, ninia laʼen moras. Bainhira ninia laʼen besik atu mate, ninia laʼen fó konsellu diʼak atu ajuda nia tahan susar sira nuʼudar feto-faluk. Ninia laʼen hatete: “Ita iha moris kaben nian neʼebé kontente. Ema barak nia moris kaben nian la hanesan neʼe.” Ninia laʼen mós hatete: “Maski Ita labele haluha buat diʼak neʼebé ita halo hamutuk, maibé keta tau fokus demais ba pasadu. Nuʼudar tempu liu daudaun, Ita-nia laran-triste sei menus. Keta sai laran-kraik no triste. Kontente bá tanba uluk Ita bele serbí Jeová hamutuk ho haksolok. . . . Memória sira-neʼe mak prezente husi Maromak.” Neʼe mak konsellu diʼak.

8. Irmán neʼe hetan benefísiu saida tanba halo tuir ninia laʼen nia konsellu?

⁸ Irmán neʼe halo tuir ninia laʼen nia konsellu. Nia serbí Jeová toʼo nia mate. Nia mate ho idade 92. Tinan balu antes nia mate, nia hatete: “Haʼu serbí Jeová tempu-tomak durante tinan 63. No haʼu moris kontente.” Tanbasá? Nia esplika: “Buat neʼebé halo ita-nia moris kontente mak ita-nia maluk Kristaun iha mundu tomak no ita-nia esperansa atu hela ho irmaun-irmán iha mundu paraízu no kontinua serbí ita-nia Kriadór Boot, Maromak mesak ida deʼit, Jeová.” * Nia hatudu ezemplu diʼak kona-ba tau fokus ba Jeová nia promesa sira.

9. Tuir Levítico 19:18, iha situasaun saida mak susar atu fó perdua ba ema neʼebé hakanek ita-nia laran?

⁹ Lee Levítico 19:18. Se ita-nia maluk Kristaun, belun diʼak ka família hakanek ita-nia laran, dala ruma susar atu la rai hirus. Porezemplu, maluk Kristaun ida duun irmán ida naʼok osan husi nia. Tuirmai, maluk Kristaun neʼe rekoñese katak nia halo sala no husu deskulpa ba irmán  neʼe. Maibé irmán neʼe sente laran-kanek tebes no kontinua tau fokus ba buat neʼebé akontese. Ita mós sente ona hanesan neʼe ka lae? Maski ita seidauk hasoru situasaun hanesan neʼe, maibé ita barak sente ona laran-kanek no rai hirus no mós sente katak ita nunka bele fó perdua ba ema neʼebé hakanek ita-nia laran.

10. Saida mak bele ajuda ita kuandu ita sente laran-kanek no rai hirus?

¹⁰ Saida mak bele ajuda ita kuandu ita sente laran-kanek no rai hirus? Hanoin-hetan katak Jeová haree buat hotu. Nia hatene kona-ba buat hotu neʼebé akontese ba ita, inklui mós se ema trata aat ita. (Ebr 4:13) Bainhira ita hasoru susar, nia mós sente laran-susar. (Isa 63:9) No nia promete katak iha futuru, nia sei halakon laran-kanek neʼebé ita sente tanba ema trata aat ita.—Apok 21:3, 4.

11. Ita bele hetan benefísiu saida kuandu ita la rai hirus no fó perdua ba ema seluk?

¹¹ Hanoin-hetan katak kuandu ita la rai hirus no fó perdua ba ema seluk, ida-neʼe sei ajuda ita atu sente kontente. Irmán neʼebé temi iha parágrafu 9 rekoñese ida-neʼe. Ikusmai, nia fó perdua ba maluk Kristaun neʼebé duun nia no nia la rai tan hirus. Irmán neʼe rekoñese katak kuandu ita fó perdua ba ema seluk, Jeová mós fó perdua ba ita. (Mt 6:14) Nia hatene katak buat neʼebé ninia maluk Kristaun neʼe halo mak sala, maski nuneʼe nia hili atu la rai tan hirus no fó perdua ba nia. Rezultadu mak irmán neʼe sente kontente liu no bele tau fokus atu serbí Jeová.

12. Saida mak ita aprende husi 1 João 3:19, 20?

¹² Lee 1 João 3:19, 20. Dala ruma ita hotu fó-sala ba ita-nia an. Porezemplu, irmaun-irmán balu fó-sala ba sira-nia an kona-ba buat neʼebé sira halo antes sira aprende lia-loos. Irmaun-irmán seluk fó-sala ba sira-nia an tanba sala neʼebé sira halo depois hetan batizmu. Ema barak halo hanesan neʼe. (Rom 3:23) Ita hotu hakarak halo buat neʼebé loos. Maibé “ita hotu halo sala dala barak”. (Tgo 3:2; Rom 7:21-23) Baibain kuandu ita fó-sala ba ita-nia an, neʼe halo ita la kontente, maibé ida-neʼe bele ajuda ita. Oinsá? Bainhira ita fó-sala ba ita-nia an neʼe bele book ita atu halo mudansa no ajuda ita hakaʼas an atu la halo tan sala neʼebé hanesan.—Ebr 12:12, 13.

13. Tanbasá ita presiza kuidadu atu la kontinua fó-sala demais ba ita-nia an?

¹³ Maibé dala ruma ita bele fó-sala demais ba ita-nia an. Karik ita kontinua fó-sala ba ita-nia an maski ita arrepende an ona no Jeová perdua ona ita. Ida-neʼe perigu ba ita. (Sal 31:10; 38:3, 4) Oinsá? Hanoin toʼok kona-ba irmán ida nia ezemplu. Nia kontinua fó-sala ba ninia an kona-ba ninia sala uluk nian. Nia hatete: “Haʼu sente katak haʼu la presiza hakaʼas an atu serbí Jeová tanba ikusmai haʼu sei la hetan salvasaun.” Karik ita barak mós sente hanesan neʼe. Tan neʼe ita presiza kuidadu atu la fó-sala demais ba ita-nia an. Tanbasá? Satanás sei kontente tebes se ita para atu serbí Jeová maski Jeová perdua ona ita.—Kompara ho 2 Korinto 2:5-7, 11.

14. Oinsá ita bele hatene katak Jeová hakarak fó perdua ba ita?

¹⁴ Maski nuneʼe, karik ita hanoin: ‘Jeová bele duni fó perdua ba haʼu ka lae?’ Hodi husu pergunta neʼe, neʼe hatudu katak Jeová bele perdua ita. Tinan barak liubá, Livru Haklaken ida hatete: “Karik  ita halo beibeik sala neʼebé hanesan. Karik ita seidauk konsege manán hasoru ita-nia fraku ida neʼebé ita iha antes ita komesa serbí Maromak. . . . Keta rende an. Keta hanoin katak ita halo sala neʼebé Jeová sei nunka perdua. Satanás hakarak ita atu hanoin hanesan neʼe. Maibé tuir loloos, tanba Ita sente triste no fó-sala ba Ita-nia an, ida-neʼe hatudu katak Ita laʼós ema aat no Jeová bele perdua Ita. Kontinua hatudu haraik an no harohan ba Jeová atu perdua Ita. Husu Jeová atu ajuda Ita iha konxiénsia neʼebé moos no ajuda Ita atu la halo tan sala neʼebé hanesan. Hakbesik ba Jeová hanesan labarik ida hakbesik ba ninia aman kuandu hasoru problema. Maski Ita presiza husu ajuda beibeik, Jeová sei ajuda Ita tanba nia laran-diʼak.”

15-16. Irmaun-irmán balu sente oinsá kuandu sira rekoñese katak Jeová hakarak fó perdua ba sira?

¹⁵ Jeová nia povu barak hetan kmaan hodi rekoñese katak Jeová hakarak fó perdua ba sira. Porezemplu, tinan balu liubá, esperiénsia iha série “Bíblia troka ema nia moris” book duni irmaun ida nia laran. Iha esperiénsia neʼe, irmán ida fó sai katak buat neʼebé akontese iha ninia moris, halo nia sente susar atu fiar katak Jeová bele hadomi nia. Irmán neʼe sente hanesan neʼe ba tinan barak, maski nia batizmu ona. Maibé bainhira nia medita kona-ba Jesus nia sakrifísiu, neʼe ajuda nia atu fiar katak Jeová hadomi nia. *

¹⁶ Oinsá irmán neʼe nia esperiénsia ajuda irmaun neʼe? Nia hakerek: “Kuandu haʼu joven, haʼu haree beibeik pornografia no susar tebes ba haʼu atu para. Foin lalais, haʼu halo fali ida-neʼe. Haʼu buka ajuda husi katuas sira no haʼu konsege para toman neʼe. Katuas sira ajuda haʼu atu fiar katak Maromak hadomi haʼu no nia hakarak fó perdua ba haʼu. Maski nuneʼe, dala ruma haʼu nafatin sente folin-laek no sente katak Jeová labele hadomi haʼu. Kuandu haʼu lee irmán neʼe nia esperiénsia, neʼe ajuda tebes haʼu. Agora haʼu rekoñese katak bainhira haʼu hanoin katak Maromak labele perdua haʼu, neʼe  hanesan haʼu hanoin katak Jesus nia sakrifísiu la toʼo atu taka haʼu-nia sala. Haʼu rai irmán neʼe nia esperiénsia atu haʼu bele lee fali no medita kuandu haʼu sente katak Jeová la hadomi haʼu.”

17. Oinsá apóstolu Paulo hasees an husi lasu atu fó-sala demais ba ninia an?

¹⁷ Esperiénsia sira-neʼe halo ita hanoin kona-ba apóstolu Paulo. Antes nia sai ema Kristaun, nia halo sala balu neʼebé sériu tebes. Maski Paulo la haluha buat neʼebé nia halo, maibé nia mós la hanoin beibeik kona-ba neʼe. (1 Tim 1:12-15) Nia haree Jesus nia sakrifísiu nuʼudar Maromak nia prezente ba nia. (Gal 2:20) Tan neʼe, Paulo bele hasees an husi lasu atu fó-sala demais ba ninia an no nia tau fokus atu serbí Jeová ho ninia kbiit tomak.

18. Saida mak ita aprende iha lisaun neʼe?

¹⁸ Saida mak ita aprende iha lisaun neʼe? (1) Memória diʼak mak prezente husi Jeová. Maski uluk ita-nia moris mak diʼak tebes, maibé ita-nia moris iha mundu foun sei diʼak liu fali ida-neʼe. (2) Karik ema seluk sei hakanek ita-nia laran, maibé kuandu ita hili atu perdua sira, neʼe ajuda ita atu tau fokus atu serbí Jeová. (3) Se ita fó-sala demais ba ita-nia an, neʼe bele hanetik ita atu serbí Jeová ho haksolok. Tan neʼe, banati-tuir Paulo no fiar katak Jeová perdua ona ita.

19. Tanbasá iha mundu foun ita sei la hanoin-hetan buat neʼebé uluk halo ita sente triste?

¹⁹ Ita iha esperansa atu moris ba nafatin. Iha mundu foun, ita sei la hanoin-hetan buat neʼebé uluk halo ita sente triste. Kona-ba mundu foun, Bíblia hatete: “Ema sei la hanoin tan buat uluk nian.” (Isa 65:17) Ita balu serbí Jeová toʼo ferik-katuas, maibé iha mundu foun ita sei sai joven fali. (Job 33:25) Tan neʼe, mai ita hakaʼas an atu la tau fokus demais ba pasadu. Duké halo nuneʼe, mai ita tau fokus ba futuru no hakaʼas an atu tama iha mundu foun.