1-2. (a) Tuir Provérbios 16:31, ita presiza haree ferik-katuas sira oinsá? (b) Iha lisaun neʼe, ita sei hatán ba pergunta saida deʼit?

IHA Estadus Unidus iha Parke Nasionál neʼebé ita bele hetan fatuk diamante iha rai leten deʼit. Fatuk diamante sira-neʼe la nabilan. Tan neʼe, ema barak la hatene katak fatuk sira-neʼe mak folin-boot no sira laʼo liu deʼit.

² Hanesan diamante sira-neʼe, ita-nia irmaun-irmán sira neʼebé ferik-katuas mak folin-boot. Bíblia kompara sira-nia fuuk mutin ho koroa. (Lee Provérbios 16:31; 20:29) Maibé, dala ruma ita haluha katak sira mak folin-boot. Se joven sira rekoñese katak ferik-katuas sira mak folin-boot, sira bele hetan buat neʼebé folin-boot liu fali rikusoin. Iha lisaun neʼe, ita sei hatán ba pergunta tolu: Tanbasá Jeová hafolin ferik-katuas sira neʼebé laran-metin? Tanbasá ferik-katuas sira mak importante iha Jeová nia organizasaun? No saida mak ita bele halo atu hetan benefísiu husi sira-nia ezemplu?

3. Tuir Salmo 92:12-15, tanbasá ferik-katuas sira mak folin-boot ba Jeová?

³ Ferik-katuas sira neʼebé laran-metin mak folin-boot ba Jeová. Nia hatene sira mak ema oinsá. Nia mós hatene no hafolin sira-nia hahalok diʼak. Nia hafolin tebes ferik-katuas sira neʼebé fahe sira-nia matenek ba joven sira. (Job 12:12; Prov 1:1-4) Jeová mós hafolin sira tanba sira tahan susar oioin. (Mal 3:16) Maski sira hasoru problema, maibé sira-nia fiar ba Jeová metin nafatin. Sira-nia esperansa ba futuru mak metin liu fali duké tempu  neʼebé sira foin aprende lia-loos. No Jeová hadomi sira tanba sira kontinua fó sai ninia naran “maski sira fuuk mutin ona”.—Lee Salmo 92:12-15.

4. Saida mak bele anima ferik-katuas sira?

⁴ Se Ita sai ferik-katuas ba daudaun, fiar metin katak Jeová hanoin-hetan serbisu hotu neʼebé uluk Ita halo ba nia. (Ebr 6:10) Ita apoia ona serbisu haklaken ho laran-manas no ida-neʼe halo Aman Jeová kontente. Ita tahan ona problema oioin, inklui situasaun neʼebé halo Ita sente triste tebes. Ita halo tuir no defende Bíblia nia matadalan sira, halaʼo didiʼak responsabilidade sira husi Jeová nia organizasaun no mós treinu ona ema seluk. Ita halo tuir mudansa barak husi Jeová nia organizasaun. Ita apoia no anima irmaun-irmán seluk neʼebé serbí Maromak tempu-tomak. Maromak Jeová hadomi tebes Ita tanba Ita hatudu laran-metin. Nia promete katak “nia sei nunka husik hela ninia ema sira neʼebé laran-metin”. (Sal 37:28) Nia mós promete: “Haʼu sei kontinua apoia imi toʼo imi-nia fuuk mutin.” (Isa 46:4) Maibé keta hanoin katak tanba Ita idade ona, Ita la iha tan folin iha Jeová nia organizasaun. Ita mak folin-boot.

5. Ferik-katuas sira presiza hanoin-hetan saida?

⁵ Ferik-katuas sira bele ajuda Jeová nia organizasaun iha dalan oioin. Maski karik sira la iha kbiit hanesan uluk, maibé sira iha esperiénsia barak tanba serbí Jeová durante tempu kleur. Jeová bele kontinua uza sira iha dalan oioin. Haree toʼok ezemplu sira tuirmai husi tempu uluk no mós ohin loron.

6-7. Fó toʼok ezemplu husi Bíblia kona-ba ferik-katuas neʼebé simu bensaun tanba serbí Jeová ho laran-metin.

⁶ Iha Bíblia laran, iha ezemplu barak kona-ba ema neʼebé serbí Jeová toʼo sira idade. Porezemplu, Moisés maizumenus tinan 80 bainhira nia komesa serbí nuʼudar profeta no dirije nasaun Izraél. Jeová nafatin uza Daniel nuʼudar profeta maski nia tinan 90 liu. No Maromak mós  dirije apóstolu João atu hakerek livru Apokalipse kuandu nia maizumenus tinan 90 liu.

⁷ Iha Jeová nia atan seluk neʼebé la koñesidu no karik ema barak la hafolin sira. Maski nuneʼe, Jeová haree sira no fó kolen ba sira-nia laran-metin. Porezemplu, mane ida naran Simeão mak “laran-loos no hamtaʼuk Maromak” no Bíblia temi lalais deʼit kona-ba nia. Maibé Jeová hatene didiʼak nia no fó nia priviléjiu atu haree bebé Jesus no nia fó sai profesia kona-ba Jesus no Maria. (Lc 2:22, 25-35) Hanoin mós kona-ba profeta Ana neʼebé faluk ona. Nia tinan 84, maski nuneʼe “loron-kalan nia sempre bá templu”. Tan neʼe Jeová haraik bensaun ba Ana no Ana mós haree bebé Jesus. Simeão no Ana mak folin-boot ba Jeová.—Lc 2:36-38.

8-9. Oinsá feto-faluk sira bele kontinua ajuda iha Jeová nia organizasaun?

⁸ Ohin loron, ferik-katuas barak neʼebé laran-metin mak ezemplu diʼak ba joven sira. Hanoin kona-ba irmán Lois Didur nia esperiénsia. Nia tinan 21 deʼit bainhira nia komesa serbí nuʼudar pioneiru tempu-tomak iha rai-Kanadá. Depois neʼe, nia no ninia laʼen John serbí nuʼudar katuas área durante tinan barak. Tuirmai, sira serbí iha Betel iha rai-Kanadá durante tinan 20. Bainhira irmán Lois tinan 58, nia no irmaun John simu konvite atu serbí iha rai-Ukránia. Sira sei deside atu halo saida? Sira hanoin katak sira-nia tinan boot liu ona, tan neʼe la presiza muda ba nasaun seluk ka lae? Sira simu knaar foun neʼe, no irmaun John simu knaar atu serbí nuʼudar membru ba Komisaun ba Sukursál iha neʼebá. Tinan hitu liutiha irmaun John mate, maski nuneʼe irmán Lois deside atu kontinua serbí iha Betel. Agora irmán Lois tinan 81 no nia kontinua halaʼo ninia knaar iha Betel iha rai-Ukránia ho badinas. Irmaun-irmán hotu iha Betel hadomi tebes nia.

⁹ Karik ema seluk ladún hafolin feto-faluk sira hanesan irmán Lois tanba sira-nia laʼen mate ona, maibé sira nafatin folin-boot. Jeová hafolin tebes irmán sira neʼebé apoia sira-nia laʼen durante tinan barak no agora kontinua serbí nia ho laran-metin. (1 Tim 5:3) Sira mós bele anima joven sira.

10. Irmaun Tony hatudu ezemplu diʼak saida?

¹⁰ Irmaun-irmán barak neʼebé labele sai husi uma tanba idade boot mós folin-boot. Porezemplu, irmaun Tony agora hela iha uma ba ferik-katuas sira. Irmaun Tony hetan batizmu iha Pensilvánia, Estadus Unidus iha fulan-Agostu tinan 1942 bainhira nia tinan 20. Lakleur depois nia hetan batizmu, governu haruka nia tama militár. Maibé tanba nia  lakohi, nia tama prizaun ba tinan 2 ho balu. Nia no ninia feen Hilda haboot oan naʼin-rua iha lia-loos. Irmaun Tony serbí ona nuʼudar katuas koordenadór iha kongregasaun tolu (agora knaar neʼe bolu nuʼudar koordenadór ba grupu katuas) no mós serbí nuʼudar koordenadór ba reuniaun boot ba loron ida. Uluk nia vizita beibeik komarka atu dirije reuniaun sira no estuda Bíblia ho ema. Agora irmaun Tony tinan 98 no nia nafatin serbí Jeová. Nia hakaʼas an atu serbí Jeová ho ninia kbiit tomak hamutuk ho irmaun-irmán sira iha ninia kongregasaun.

11. Oinsá ita bele hatudu katak ita hafolin ferik-katuas sira neʼebé labele sai husi uma?

¹¹ Oinsá ita bele hatudu respeitu ba irmaun-irmán sira neʼebé labele sai husi uma tanba idade boot? Bainhira situasaun permite, katuas kongregasaun bele ajuda ferik-katuas sira atu asiste ka rona ba reuniaun no hola parte iha serbisu haklaken. Ita rasik bele hatudu interese ba sira hodi vizita ka vídeo call sira. Ita presiza tau matan didiʼak ba irmaun-irmán sira-neʼe. Ita labele haluha sira. Karik ferik-katuas balu sente susar ka sente la diʼak atu koʼalia kona-ba sira-nia an. Ita bele hetan benefísiu se ita uza tempu atu husu pergunta ba sira no rona bainhira sira konta sira-nia esperiénsia furak kona-ba serbí Jeová.

12. Saida mak ita bele hetan iha ita-nia kongregasaun rasik?

¹² Karik iha ita-nia kongregasaun rasik iha ferik-katuas neʼebé laran-metin no hatudu ezemplu diʼak. Irmán Harriette serbí Jeová ho laran-metin ba tinan barak iha ninia kongregasaun iha New Jersey, Estadus Unidus. Tuirmai, nia muda atu hela ho ninia oan-feto. Irmaun-irmán sira uza tempu atu koñese nia, no sira deskobre katak irmán Harriette mak folin-boot ba kongregasaun. Nia anima sira liuhusi konta istória kona-ba haklaken maizumenus iha tinan 1925 bainhira nia foin aprende lia-loos. Iha tempu neʼebá, bainhira nia bá haklaken, nia sempre lori eskova-nehan tanba karik polísia sei kaer nia no hatama nia ba komarka. Tuir loloos iha tinan 1933, nia tama komarka dala rua ba semana ida. Ninia laʼen laʼós Testemuña, maibé nafatin apoia nia. Bainhira irmán Harriette tama komarka, ninia laʼen mak tau matan ba sira-nia oan naʼin-tolu neʼebé sei kiʼik. Klaru katak ferik-katuas sira hanesan irmán Harriette merese hetan ita-nia respeitu.

13. Saida mak ita aprende ona kona-ba ferik-katuas iha Jeová nia organizasaun?

¹³ Ferik-katuas mak importante tebes ba Jeová no ninia organizasaun. Sira haree ona dalan oioin neʼebé Jeová haraik bensaun ba ninia organizasaun no mós ba sira. Sira mós aprende lisaun importante husi sala neʼebé uluk sira halo. Ferik-katuas iha matenek, tan neʼe ita bele aprende husi sira. (Prov 18:4) Se Ita uza tempu atu koñese sira, neʼe bele hametin Ita-nia fiar no Ita mós sei aprende buat barak.

14. Deuteronómio 32:7 anima joven sira atu halo saida?

¹⁴ Buka oportunidade atu koʼalia ho ferik-katuas sira. (Lee Deuteronómio 32:7.) Karik agora sira labele haree ho momoos, no karik sira koʼalia neineik, maibé iha sira-nia laran, sira sente joven hela. Sira iha ona “naran diʼak” ho  Jeová. (Ecle 7:1) Hanoin-hetan tanbasá Jeová hafolin sira. Kontinua hatudu respeitu ba sira. Ita hakarak banati-tuir Eliseu. Nia hakarak tebes atu besik nafatin ho Elias iha sira-nia loron ikus. Dala tolu Eliseu hatete: “Haʼu sei la husik Ita.”—2 Reis 2:2, 4, 6.

15. Karik ita bele husu pergunta saida deʼit ba ferik-katuas sira?

¹⁵ Hatudu interese ba ferik-katuas sira liuhusi husu pergunta ba sira ho laran-diʼak. (Prov 1:5; 20:5) Ita bele husu pergunta sira hanesan: “Saida mak halo Ita fiar katak Ita hetan ona lia-loos?” “Oinsá buat neʼebé akontese durante Ita-nia moris ajuda Ita hakbesik liután ba Jeová?” “Saida mak ajuda Ita atu kontinua serbí Jeová ho kontente?” (1 Tim 6:6-8) Tuirmai rona bainhira sira konta sira-nia esperiénsia.

16. Oinsá mak koʼalia hamutuk bele lori benefísiu ba ferik-katuas no mós joven?

¹⁶ Bainhira ferik-katuas no joven sira koʼalia hamutuk, ida-neʼe lori benefísiu ba sira. (Rom 1:12) Bainhira Ita halo nuneʼe, neʼe sei hametin liután Ita-nia fiar katak Jeová tau matan ba ninia povu, no ferik-katuas sira sei sente domin. Ferik-katuas sira mós sei sente kontente tanba sira bele konta fali kona-ba oinsá Jeová haraik bensaun ba sira.

17. Tanbasá ita bele dehan katak ferik-katuas sira sai furak liután?

¹⁷ Bainhira ema sai ferik-katuas, baibain sira-nia oin sai namkurut, maibé ba Jeová, ema neʼebé laran-metin nafatin ba nia mak furak liután. (1 Tes 1:2, 3) Tanbasá? Tanba durante tinan barak, Maromak nia espíritu ajuda sira atu haburas hahalok furak. Bainhira ita koñese diʼak liután ferik-katuas sira, respeitu sira no aprende husi sira, ida-neʼe sei ajuda ita atu hafolin sira.

18. Iha lisaun tuirmai, ita sei koʼalia kona-ba saida?

¹⁸ Kongregasaun bele sai metin liután bainhira joven sira hafolin ferik-katuas sira no mós bainhira ferik-katuas sira hafolin joven sira. Iha lisaun tuirmai, ita sei koʼalia kona-ba oinsá ferik-katuas sira bele hatudu katak sira hafolin joven sira iha kongregasaun.