Fó perdua laʼós finje katak sala ruma neʼebé ema halo ba Ita nunka akontese. Maibé fó perdua katak la rai hirus ka odi.

BÍBLIA NIA PRINSÍPIU: “Kontinua hatudu pasiénsia ba malu no prontu atu fó perdua ba malu ho laran tomak maski ema halo buat ruma neʼebé hakanek imi-nia laran.”​—Koloso 3:13.

“Se ita hadomi ema ruma, ita sei la fokus ba ninia fraku sira, maibé haree liu ba ninia hakaʼas an atu hadiʼa ninia hahalok.”​—Aaron.

Se Ita rai hirus, neʼe bele fó impaktu ba Ita-nia saúde no emosaun, no mós bele estraga Ita-nia moris kaben.

“Loron ida, haʼu-nia laʼen husu deskulpa tanba nia hakanek tebes haʼu-nia laran. Susar ba haʼu atu fó perdua, maibé ikusmai haʼu fó perdua duni. Maski nuneʼe haʼu rekoñese katak durante tempu neʼebé haʼu demora atu fó perdua, neʼe halo ami dook ba malu.”​—Julia.

HUSU BA ITA-NIA AN

Kuandu Ita sente laran-kanek tanba Ita-nia kaben nia liafuan ka hahalok, husu ba Ita-nia an:

• ‘Haʼu sente an demais ka lae?’

• ‘Sala neʼe mak sériu duni toʼo nia tenke husu deskulpa, ka haʼu bele haluha deʼit?’

KOʼALIA HO ITA-NIA KABEN

• Baibain, presiza tempu hira atu fó perdua ba malu?

• Saida mak ita bele halo atu fó perdua lalais?

SUJESTAUN

• Bainhira Ita sente laran-kanek, labele hanoin katak Ita-nia kaben mak laran-aat.

• Koko atu fó perdua ba Ita-nia kaben nia hahalok sira, no hanoin-hetan katak “ita hotu halo sala dala barak”.​—Tiago 3:2.

“Kuandu Ita rekoñese Ita rasik nia sala, neʼe halo fasil ba Ita atu fó perdua, maibé se Ita hanoin katak Ita mak loos no Ita-nia kaben deʼit mak sala, neʼe halo susar ba Ita atu fó perdua. Presiza haraik an atu bele fó perdua.”​—Kimberly.

BÍBLIA NIA PRINSÍPIU: “Hadiʼa lalais problema.”​—Mateus 5:25.