Se feen no laʼen respeitu malu, sira nafatin hatudu domin ba malu maski iha hanoin la hanesan kona-ba buat ruma. Livru Ten Lessons to Transform Your Marriage hatete: “Feen-laʼen neʼebé respeitu malu sei la ulun-toos. Sira prontu atu koʼalia nakloke ba malu kona-ba problema neʼebé sira hasoru. Sira rona didiʼak ba sira-nia kaben nia hanoin no buka solusaun neʼebé diʼak ba sira naʼin-rua.”

BÍBLIA NIA PRINSÍPIU: “Domin . . . la buka diʼak ba ninia an rasik.”​—1 Korinto 13:4, 5.

“Haʼu respeitu haʼu-nia feen hodi hafolin nia no la halo buat ruma neʼebé bele hakanek nia ka sobu ami-nia moris kaben.”​—Micah.

Kuandu feen-laʼen la respeitu malu, sira komesa kritika malu, koʼalia sai liafuan kroʼat no hatún malu. Matenek-naʼin sira hatete katak buat sira-neʼe mak sinál atu halo divórsiu.

“Se Ita soe piadas, hatún ka goza Ita-nia feen, neʼe sei hamoe nia, halo nia la fiar tan Ita, no lori perigu ba Ita-nia moris kaben.”​—Brian.

HUSU BA ITA-NIA AN

Durante semana ida, haree didiʼak ba Ita-nia hahalok no liafuan. Tuirmai husu ba Ita-nia an:

• ‘Dala hira mak haʼu kritika haʼu-nia kaben no dala hira mak haʼu gaba nia?’

• ‘Iha dalan saida deʼit mak haʼu hatudu ona respeitu ba haʼu-nia kaben?’

KOʼALIA HO ITA-NIA KABEN

• Hahalok no liafuan hanesan saida mak bele ajuda ita atu hatudu respeitu ba malu?

• Hahalok no liafuan hanesan saida mak halo Ita sente katak Ita la hetan respeitu?

SUJESTAUN

• Hakerek lista kona-ba dalan tolu oinsá Ita hakarak Ita-nia kaben atu respeitu Ita. Husu mós Ita-nia kaben atu halo nuneʼe. Troka lista ba malu no hakaʼas an atu halo tuir.

• Hakerek lista kona-ba Ita-nia kaben nia hahalok sira neʼebé Ita gosta. Tuirmai fó-hatene nia katak Ita hafolin tebes hahalok sira-neʼe.

“Atu respeitu haʼu-nia laʼen, haʼu hatudu neʼe liuhusi haʼu-nia hahalok katak haʼu hafolin nia no hakarak nia sente kontente. Haʼu halo nuneʼe liuhusi haʼu-nia liafuan ka halo buat kiʼik neʼebé simples deʼit.”​—Megan.

Tuir loloos, importante liu mak Ita-nia kaben sente katak Ita respeitu nia, laʼós Ita mak hanoin katak Ita hatudu respeitu ba nia.

BÍBLIA NIA PRINSÍPIU: “Tau hahalok domin ho laran-sadiʼa, laran-diʼak, haraik an, laran-maus, no pasiénsia nuʼudar imi-nia roupa.”​—Koloso 3:12.