Bainhira ita husu ema neʼebé kaer responsabilidade atu halo buat ruma, fasil atu tau fiar katak nia sei halo duni.

Maski sei kiʼik, labarik sira bele aprende oinsá atu kaer responsabilidade. Livru ida hatete: “Kuandu oan fulan 15, sira komesa halo tuir buat neʼebé inan-aman husu sira atu halo. Kuandu sira maizumenus fulan 18, sira rasik mak hakarak halo tuir buat naran deʼit neʼebé inan-aman halo. Iha rai balu, kuandu oan tinan entre 5 ka 7, inan-aman komesa hanorin sira oinsá atu halo serbisu iha uma-laran. Maski sira sei kiʼik, sira bele halo serbisu balu ho didiʼak.”—Parenting Without Borders.

Labarik balu neʼebé boot ona koko atu moris ketak no sai husi uma, maibé ikusmai fila fali ba inan-aman. Karik ida-neʼe akontese tanba inan-aman seidauk hanorin sira kona-ba uza osan ho didiʼak, tau matan uma, ka kaer responsabilidade iha sira-nia moris.

Tan neʼe, diʼak atu treinu oan sira kaer responsabilidade atu nuneʼe sira bele hatene saida mak sira tenke halo kuandu sira boot. Livru ida hatete: “Ita lakohi Ita-nia oan kontinua sadere deʼit ba Ita toʼo sira tinan 18 mak foin husik sira atu foti rasik desizaun iha sira-nia moris.”—How to Raise an Adult.

Fó serbisu uma-laran ba oan sira.

BÍBLIA NIA PRINSÍPIU: “Serbisu makaʼas hotu sei lori buat diʼak.”—Provérbios 14:23.

Oan neʼebé sei kiʼik sempre hakarak ajuda sira-nia inan-aman atu halo buat naran deʼit. Ita bele uza sira-nia hakarak neʼe hodi fó serbisu ruma neʼebé sira bele halo iha uma.

Inan-aman balu lakohi halo nuneʼe. Sira-nia razaun mak tanba oan sira iha TPC barak husi eskola, entaun la presiza halo serbisu seluk.

Maibé tuir loloos, kuandu oan sira halo serbisu iha uma, neʼe sei ajuda sira hetan susesu iha eskola, tanba sira simu ona treinu atu kaer serbisu ho didiʼak. Livru ida hatete: “Se ita la halo toman oan sira atu ajuda ita iha uma bainhira sira sei kiʼik no hakarak atu ajuda, neʼe sei halo sira hanoin katak ajuda ema seluk mak buat neʼebé la importante.  No sira sei hanoin ema seluk sei halo buat hotu ba sira.”—Parenting Without Borders.

Kuandu oan toman halo serbisu iha uma-laran, sira aprende oinsá atu ajuda ema seluk no la hanoin an deʼit. Sira sei sente katak sira mós sai parte importante iha família laran no sira presiza halo buat ruma atu ajuda.

Ajuda oan sira atu hatudu responsabilidade kona-ba sala neʼebé sira halo.

BÍBLIA NIA PRINSÍPIU: “Rona ba konsellu no simu dixiplina, atu nuneʼe ó bele sai matenek iha aban-bainrua.”—Provérbios 19:20.

Kuandu Ita-nia oan halo sala ruma, porezemplu halo aat ema seluk nia sasán la ho neon, keta subar sira-nia sala. Maski sei kiʼik, sira bele simu konsekuénsia husi sira-nia sala, husu deskulpa no koko hadiʼa fali situasaun neʼe.

Bainhira oan komprende kona-ba sira-nia responsabilidade ba sala neʼebé sira halo, neʼe sei ajuda sira

• laran-moos no fó sai sira-nia sala

• la fó sala ba ema seluk

• la fó razaun oioin

• husu deskulpa