Ema neʼebé haraik an hatudu respeitu. Sira la hanoin an deʼit, no sira lakohi ema atu haree sira mak espesiál. Ema neʼebé haraik an hatudu interese ba ema seluk no prontu atu aprende husi ema seluk.

Ema balu hanoin katak haraik an mak hahalok neʼebé fraku. Maibé realidade mak, hahalok neʼe diʼak tanba bele ajuda ema atu rekoñese sira-nia sala no limitadu.

• Haraik an lori buat diʼak ba ita-nia relasaun ho ema seluk. Livru ida hatete: “Dala barak, fasil ba ema neʼebé haraik an atu habelun ho ema seluk.” Livru neʼe mós hatete katak ema hanesan neʼe “fasil atu koʼalia no ransu hamutuk”.—The Narcissism Epidemic.

• Haraik an lori buat diʼak ba oan sira-nia futuru. Se Ita-nia oan aprende atu hatudu haraik an agora, neʼe sei ajuda sira agora no iha futuru. Porezemplu, neʼe sei halo fasil liu atu buka serbisu bainhira sira boot ona. Doutór ida naran Leonard Sax hakerek: “Se joven ida foti an no la haree ba ninia limitadu, neʼe sei halo susar ba nia bainhira halaʼo entrevista atu hetan serbisu. Maibé joven neʼebé rona ho haraik an sei ajuda nia atu hetan serbisu.” *

Ajuda Ita-nia oan atu la hanoin an demais.

BÍBLIA NIA PRINSÍPIU: “Se ema ruma hanoin katak nia ema importante maski tuir loloos lae, nia lohi ninia an rasik.”—Galásia 6:3.

• Labele repete liafuan neʼebé Ita la hatene sei sai loos. Porezemplu, “Ó-nia mehi hotu sei sai realidade” no “Ó bele sai buat naran deʼit neʼebé ó hakarak”. Karik neʼe rona hanesan motivasaun, maibé realidade mak baibain neʼe la akontese iha sira-nia moris. Ita-nia oan sei hetan susesu se sira rasik iha planu no serbisu makaʼas atu bele hetan.

• Gaba hahalok espesífiku ruma. Se Ita hatete deʼit ba oan katak nia “labarik matenek”, neʼe la ajuda nia atu haraik an. Diʼak liu se inan-aman gaba no temi hahalok diʼak ida-idak neʼebé nia hatudu.

• Ajuda Ita-nia oan uza média sosiál ho kuidadu. Dala barak, ema uza média sosiál atu gaba an no fó sai buat diʼak neʼebé sira halo ona. Neʼe la ajuda haburas hahalok haraik an.

•   Ajuda Ita-nia oan atu husu deskulpa kedas. Bainhira Ita-nia oan halo buat neʼebé sala, ajuda nia atu hatene sala neʼebé nia halo no hadiʼa ida-neʼe.

Haburas agradese.

BÍBLIA NIA PRINSÍPIU: “Hatudu agradese bá.”—Koloso 3:15.

• Agradese ba kriasaun. Hanorin oan atu hatudu agradese kona-ba natureza no oinsá mak ita-nia moris depende ba ida-neʼe. Ita presiza anin atu dada iis, bee atu hemu, no hahán atu han. Uza ezemplu sira-neʼe atu bele haburas oan sira-nia agradese kona-ba buat furak sira husi natureza.

• Agradese ba ema. Ajuda Ita-nia oan atu la sai laran-moras ba ema seluk neʼebé iha matenek ka abilidade ruma, maibé ajuda nia atu hatene oinsá nia bele aprende fali husi ema hanesan neʼe.

• Hatudu sai agradese. Hanorin Ita-nia oan atu fó obrigadu, laʼós ho liafuan deʼit maibé husi laran. Hodi halo nuneʼe, sei ajuda oan atu bele haraik an nafatin.

Hanorin Ita-nia oan katak diʼak atu ajuda ema seluk.

BÍBLIA NIA PRINSÍPIU: “Ho haraik an . . . haree ema seluk boot liu fali imi. Keta buka diʼak deʼit ba imi-nia an rasik, maibé buka mós ema seluk nia diʼak.”—Filipe 2:3, 4.

• Husik Ita-nia oan atu halo knaar sira iha uma. Se Ita la fó serbisu ba Ita-nia oan atu halo, karik nia sei hanoin katak nia mak ema importante liu no la presiza halo serbisu. Serbisu iha uma-laran mak importante liu fali halimar. Hatudu oinsá mak knaar sira-neʼe bele ajuda ema seluk no oinsá mak ema seluk sei hafolin no respeitu nia tanba buat neʼebé nia halo.

• Fó sai ho klaru katak ajuda ema seluk mak priviléjiu ida. Hodi ajuda ema seluk bele halo oan sai maduru. Tan neʼe, ajuda Ita-nia oan atu hatene sé mak presiza hetan ajuda. Koʼalia hamutuk ho nia kona-ba saida mak nia bele halo atu ajuda ema seluk. Gaba no apoia Ita-nia oan bainhira nia ajuda ema seluk.