3 Tanbasá mak ema diʼak hetan terus?
Tanbasá importante atu hatene resposta?
Ita sente la justisa bainhira ita haree ema diʼak hetan terus. No se ema diʼak mós hetan terus, karik ita bele hanoin katak ita la presiza sai ema neʼebé diʼak.
Hanoin toʼok
Ema balu fiar katak ita hetan terus tanba destinu. Balu dehan Maromak uza terus atu fó kastigu ba ema aat no atu koko ema diʼak. Ema seluk tan dehan katak ita la hatene loloos tanbasá ema diʼak sira tenke terus. Maibé ideia sira-neʼe hamosu pergunta hanesan . . .
Se destinu mak determina ita-nia futuru, entaun tanbasá hakaʼas an atu iha saúde neʼebé diʼak no la halo hahalok neʼebé aat?
Se Maromak hanoin ema, oinsá mak nia bele hatudu laran-aat hodi uza terus atu koko ema?
APRENDE LIUTÁN
Haree vídeo Tanbasá mak Maromak husik terus akontese? iha jw.org/tdt.
Saida mak Bíblia hatete?
Terus neʼebé ita hetan laʼós kastigu husi Maromak.
Tuir loloos, terus barak akontese tanba ita iha fatin neʼebé sala no tempu neʼebé sala.
“Laʼós ema neʼebé halai lalais mak sempre manán halai-taru, no laʼós asuwaʼin mak sempre manán funu, no laʼós ema matenek mak sempre iha ai-han, no laʼós ema neʼebé iha kbiit atu hanoin mak sempre iha rikusoin, no laʼós ema neʼebé iha koñesimentu mak sempre hetan susesu, tanba tempu susar no situasaun neʼebé mosu derrepente deʼit kona sira hotu.”—ECLESIASTES 9:11.
Ita mós hetan terus tanba ita hotu sala-naʼin.
Baibain ema uza liafuan “sala” atu koʼalia kona-ba hahalok aat neʼebé ema halo. Maibé Bíblia mós uza liafuan neʼe atu koʼalia kona-ba kondisaun neʼebé ema hotu simu, maski ema diʼak ka la diʼak.
“Haʼu moris mai ho sala, no haʼu sala ona bainhira haʼu iha haʼu-nia inan nia knotak.”—SALMO 51:5.
Ita-nia kondisaun nuʼudar sala-naʼin lori rezultadu aat tebes.
Ita-nia kondisaun nuʼudar sala-naʼin laʼós deʼit estraga ita-nia relasaun ho ita-nia Kriadór, maibé estraga mós ita-nia relasaun ho ema seluk, ita-nia saúde no buat seluk tan. Rezultadu mak ita ida-idak hasoru terus barak.
“Bainhira haʼu hakarak halo buat neʼebé loos, buat neʼebé aat mós hamutuk ho haʼu.”—ROMA 7:21.
“Kriasaun hotu kontinua halerik hamutuk no sente moras hamutuk toʼo agora.”—ROMA 8:22.
