Ema millaun ba millaun aplika ona prinsípiu sira husi informasaun sira antes neʼe no halo mudansa barak hodi halakon diskriminasaun husi sira-nia laran. Maibé realidade mak, ita labele halakon diskriminasaun hotu husi mundu neʼe liuhusi ita-nia kbiit rasik. Se nuneʼe, diskriminasaun sei lakon ka lae?

Toʼo agora, ema nia governu labele halakon hahalok diskriminasaun. Maibé neʼe katak la iha governu ida neʼebé bele halakon diskriminasaun ka lae?

Atu governu ida bele halakon diskriminasaun, governu neʼe presiza

1. 1. Motiva ema atu troka sira-nia hanoin no sentimentu kona-ba ema seluk.

2. 2. Kura sentimentu laran-kanek neʼebé halo ema ida susar atu trata ema seluk ho justisa.

3. 3. Iha ulun-naʼin sira neʼebé diʼak no la halo diskriminasaun ba povu.

4. 4. Halo ema iha mundu tomak sai unidade.

Bíblia fó fiar mai ita katak Maromak harii ona governu ida hanesan neʼe iha lalehan. Neʼe bolu nuʼudar “Maromak nia Ukun”.—Lucas 4:43.

Haree kona-ba saida mak governu neʼe sei halo.

“Ema neʼebé hela iha rai [sei] aprende kona-ba hahalok loos.”​—ISAIAS 26:9.

“Rezultadu husi hahalok loos mak dame, no rezultadu husi hahalok loos mak hakmatek no seguru ba nafatin.”​—ISAIAS 32:17.

Neʼe katak sá? Maromak nia governu sei hanorin ema kona-ba hahalok neʼebé loos. Kuandu ema aprende buat neʼebé loos no sala, buat neʼebé justisa no la justisa, neʼe sei troka dalan neʼebé sira hanoin kona-ba ema seluk. Ema hotu sei rekoñese katak buat neʼebé loos mak atu hadomi ema oioin.

Maromak “sei hamaran sira-nia matan-been hotu husi sira-nia matan, mate sei la iha tan, no ema sei la triste tan ka tanis ka sente moras. Buat sira neʼebé uluk nian lakon tiha ona”.​—APOKALIPSE 21:4.

Neʼe katak sá? Maromak nia Ukun sei halakon hotu laran-kanek neʼebé ema sente tanba la iha justisa. Sira neʼebé ema trata la diʼak sei la iha tan razaun atu rai odi.

“Nia sei la tesi-lia tuir deʼit buat neʼebé ninia matan haree, no nia sei la fó dixiplina tuir deʼit buat neʼebé ninia tilun rona. Nia sei tesi-lia ba ema kiʼik sira ho loloos, no ho laran-loos nia sei fó dixiplina ba ema hodi apoia ema laran-maus sira iha rai.”​—ISAIAS 11:3, 4.

Neʼe katak sá? Jesus Kristu, Liurai ba Maromak nia Governu iha lalehan sei ukun ho justisa no la halo diskriminasaun ba ema iha mundu neʼe. Jesus sei la haree nasaun ida diʼak liu fali nasaun seluk, no nia sei halo ema hotu atu moris tuir ninia lei sira neʼebé loos.

Maromak nia Ukun hanorin ema atu “iha hanoin ida deʼit no hadomi malu, no . . . sai ida deʼit, iha neon ida”.​—FILIPE 2:2.

Neʼe katak sá? Povu ba Maromak nia Ukun “sei sai ida deʼit” no iha unidade neʼebé loos tanba sira hadomi malu ho loloos.