Universu no moris hotu mosu mesak deʼit ka Maromak mak kria ida-neʼe? Sientista naʼin-rua nia liafuan neʼebé temi iha leten mak la hanesan duni ho Bíblia nia liafuan iha Génesis 1:1. Ema balu apoia sientista naʼin-rua, no balu fali fiar ba buat neʼebé Bíblia hatete. Maibé ema barak la hatene ho loloos. Ema fó sai ideia oioin kona-ba neʼe liuhusi livru no televizaun.

Karik profesór sira iha eskola hanorin katak universu no moris hotu mosu mesak deʼit, laʼós Maromak mak kria. Maibé sira hatudu ka lae evidénsia ruma katak la iha Kriadór? Karik Ita rona ona ulun-naʼin relijiaun sira hatete katak iha duni Kriadór. Maibé sira hatudu evidénsia kona-ba neʼe ka lae? Ka sira hakarak Ita fiar deʼit tanba neʼe mak parte husi doutrina?

Karik Ita hanoin kona-ba pergunta neʼe no sente katak la iha ema ida mak bele hatene ho loloos katak iha duni Kriadór. Ita mós karik hanoin: Pergunta neʼe nia resposta importante ka lae?

Livru neʼe sei koʼalia uluk liu kona-ba evidénsia balu neʼebé ajuda ona ema barak fiar katak iha duni Kriadór. Tuirmai, sei koʼalia kona-ba tanbasá resposta ba pergunta kona-ba oinsá moris hotu hahú mak importante.