Kriatura moris hatudu katak iha ida neʼebé kria. Hanesan bloku neʼebé forma hamutuk hodi sai uma ida, sélula kiʼik sira forma hamutuk hodi sai kriatura neʼebé moris. Hanesan fábrika kiʼik, sélula sira halaʼo sira-nia funsaun neʼebé komplikadu atu kontinua moris no reprodús fali. Buat hotu neʼebé moris iha funsaun komplikadu hanesan neʼe. Porezemplu, sélula husi fermentu neʼebé ita uza atu halo paun mak buat moris ida neʼebé haree hanesan simples se kompara ho ema nia sélula sira, maibé tuir loloos neʼe komplikadu. Sélula fermentu nian ida-idak iha DNA neʼebé dirije sélula atu kumpre ninia funsaun. Sélula ida-idak iha funsaun atu modifika matéria seluk hodi sai fali hahán ba sira atu bele kontinua moris. Kuandu sélula fermentu nian falta buat neʼebé presiza atu bele ativu, sélula neʼe hapara ninia prosesu kímiku no halo ninia an la ativu maibé moris hela. Tan neʼe ita bele rai fermentu, maibé bainhira ita uza fali atu tunu paun, fermentu neʼe nia sélula sira sai ativu fali.

Sientista sira estuda fermentu nia sélula ba tinan barak ona atu bele komprende liután ema nia sélula. Maibé nafatin iha buat barak neʼebé sira seidauk komprende. Profesór ida naran Ross King husi universidade iha Suésia hatete: “Ladún iha sientista biolojia barak neʼebé halo esperimentu oioin neʼebé ami hakarak halo atu komprende fermentu nia funsaun maski neʼe mak buat simples deʼit.”

 Ita hanoin oinsá? Fermentu nia sélula neʼebé simples maibé iha funsaun komplikadu bele mosu mesak deʼit ka lae? Ka neʼe mak evidénsia neʼebé hatudu katak iha duni ida neʼebé kria?

Moris hotu iha ninia DNA. DNA mak forma husi molékula sira neʼebé bolu nuʼudar nukleotidu. Ema nia sélula ida-idak iha nukleotidu biliaun 3,2. Nukleotidu sira-neʼe organiza iha dalan neʼebé loos atu sélula bele prodús enzima no proteína.

Sientista sira hatete katak posibilidade kona-ba nukleotidu bele forma rasik tuir orden mak hanesan dala 1 husi 10¹⁵⁰ (númeru 1 ho zero dala 150). Entaun, neʼe hanesan nunka bele akontese.

Tuir loloos, sientista sira seidauk hetan evidénsia neʼebé prova katak moris bele mosu derrepente deʼit husi buat neʼebé la moris.

Ema nia moris mak úniku. Ita ema iha abilidade oioin neʼebé ajuda ita atu goza moris iha dalan neʼebé la hanesan ho kriatura seluk. Ita iha abilidade atu kria buat oioin, habelun ho ema seluk no hatudu sentimentu. Ita mós bele sente hahán nia gostu, horon, rona lian furak, haree kór no buat furak oioin. Ita bele halo planu ba futuru no buka atu halaʼo moris neʼebé iha objetivu.

Ita hanoin oinsá? Abilidade sira-neʼe mak rezultadu husi evolusaun tanba ita ema presiza buat sira-neʼe atu moris ka lae? Ka neʼe hatudu katak moris mak prezente husi Kriadór neʼebé hadomi ita?