Universu iha ninia hahú ka lae?

Génesis 1:1 dehan: “Horiuluk kedas Maromak kria lalehan no rai.”

Antes maizumenus tinan 1950, sientista barak fiar katak universu sempre iha no la iha ninia hahú. Maibé liuhusi peskiza oioin, agora sientista barak rekoñese katak universu iha ninia hahú.

Foufoun planeta mundu nia kondisaun oinsá?

Génesis 1:2, 9 fó sai katak foufoun planeta mundu “la iha buat ida no mamuk” no bee mak taka mundu tomak.

Sientista sira mós konkorda ho ida-neʼe. Biolojista ida naran Patrick Shih dehan katak foufoun ita-nia planeta mundu “la iha oksijéniu . . . fatin neʼe maizumenus mamuk no fuik.” Livru Astronomy mós dehan: “Peskiza foin lalais neʼe hatudu katak foufoun planeta mundu nakonu ho bee, ho rai maran uitoan deʼit, ka la iha.”

 Oinsá mak atmosfera troka?

Génesis 1:3-5 hatudu katak foufoun bainhira naroman tama borus atmosfera toʼo mundu, susar atu haree ho klaru naroman neʼe mai husi neʼebé. Maibé liutiha tempu balu mak bele haree-hetan loro-matan no fulan ho momoos husi mundu.—Génesis 1:14-18.

Organizasaun The Smithsonian Environmental Research Center dehan katak foufoun atmosfera halo naroman uitoan deʼit mak tama toʼo mundu. Organizasaun neʼe dehan: “Komponente metano mak taka planeta mundu hanesan abuabu.” Tuirmai, “abuabu metano lakon no lalehan nia kór komesa sai azúl”.

Oinsá mak kriatura sira mosu tuituir malu iha mundu?

Génesis 1:20-27 dehan katak, ikan, manu, no animál iha rai, no ikusmai mak ema. Sientista sira fiar katak ikan sira iha uluk antes animál mamíferu, no ikusliu mak ema.

Ema balu dehan katak Bíblia kontra malu ho siénsia. Maibé dala barak sira dehan hanesan neʼe tanba sira komprende sala kona-ba Bíblia nia liafuan.

Bíblia la dehan katak universu ka planeta mundu mak tinan 6.000 deʼit. Duké dehan hanesan neʼe, Bíblia dehan katak Maromak kria mundu no universu “horiuluk kedas”. (Génesis 1:1) Bíblia la dehan “horiuluk kedas” mak tinan hira.

Bíblia la dehan katak buat hotu iha mundu kria iha loron neen no loron ida mak oras 24. Bíblia uza liafuan “loron” atu refere ba tempu naruk. Porezemplu, kona-ba tempu neʼebé Maromak kria ita-nia planeta mundu no moris hotu iha mundu durante “loron” neen neʼebé temi iha Génesis kapítulu 1, Bíblia bolu tempu naruk neʼe nuʼudar “loron” neʼebé Maromak Jeová * halo mundu no lalehan. (Génesis 2:4, Bíblia Kadi Kapasidade) Tan neʼe, “loron” neen neʼebé Maromak prepara mundu no kria buat moris oioin iha mundu neʼe mós bele reprezenta tempu neʼebé kleur tebes.

Bíblia la dehan katak animál sira nunka bele iha mudansa. Livru Génesis dehan katak Maromak kria animál sira “tuir sira ida-idak nia modelu”. (Génesis 1:24, 25) Bíblia nia liafuan “modelu” laʼós liafuan kona-ba siénsia, maibé karik liafuan neʼe refere ba grupu husi animál sira. Tan neʼe, “modelu” ida bele inklui espésie ka rasa oioin. Liafuan neʼe hatudu katak karik nuʼudar tempu liu daudaun, animál sira iha “modelu” ida nia laran bele iha mudansa no sai espésie oioin.

 Ita hanoin oinsá?

Hanesan ita haree ona, Bíblia uza liafuan neʼebé simples atu esplika ho loloos kona-ba oinsá mak universu hahú, planeta mundu nia kondisaun, no mós oinsá mak kriatura sira moris tuituir malu. Se nuneʼe, Bíblia mós bele esplika ho loloos kona-ba ida neʼebé kria buat sira-neʼe, loos ka lae? Livru Encyclopædia Britannica dehan katak koñesimentu kona-ba siénsia modernu nian la kontra malu ho Bíblia nia esplikasaun kona-ba oinsá mak moris hahú liuhusi forsa neʼebé la baibain. *