Siénsia prova ona ka lae oinsá universu no moris hahú? Resposta simples mak lae. Ema balu dehan katak siénsia bele esplika oinsá mak universu hahú. Maibé profesór astronomia ida iha universidade Dartmouth naran Marcelo Gleiser dehan: “Ita seidauk hatene ho loloos oinsá mak universu hahú.”

Nuneʼe mós kona-ba oinsá moris hahú. Informasaun ida husi Science News hatete: “Ita labele keʼe kleʼan kona-ba oinsá mak moris hahú iha mundu: Ita la iha ona fatuk no fosil sira husi tempu antigu neʼebé ajuda ita atu hatene saida mak akontese bainhira mundu neʼe foin hahú.” Liafuan sira-neʼe hatudu katak siénsia seidauk bele hatán ba pergunta: Oinsá mak universu no moris hahú?

Maibé karik Ita hanoin: ‘Se iha ida mak kria moris iha mundu, entaun sé mak kriadór neʼe?’ Karik Ita mós husu pergunta hanesan: ‘Se iha Kriadór ida neʼebé matenek no domin, tanbasá mak nia husik ema neʼebé nia kria hetan terus? Tanbasá iha relijiaun barak tebes? Tanbasá ema neʼebé dehan sira adora Maromak halo buat aat barak?’

Siénsia labele fó resposta ba pergunta sira-neʼe. Maibé neʼe la dehan katak Ita labele hetan ninia resposta. Tuir loloos, ema barak sente kontente tanba hetan ona resposta husi Bíblia.

Se Ita hakarak haree tanbasá sientista balu neʼebé estuda Bíblia ikusmai fiar katak iha duni Kriadór ida, loke jw.org/tdt no buka “Ema nia hanoin kona-ba oinsá moris hahú”.