Ita hetan koko bainhira buat ruma dada ita-nia atensaun liuliu atu halo buat neʼebé sala. Hanoin toʼok kona-ba ezemplu ida. Bainhira bá loja, Ita haree sasán neʼebé Ita hakarak tebes. Tuirmai Ita hanoin katak fasil deʼit atu naʼok no ema sei la hatene. Maibé, Ita-nia laran dehan labele! Entaun, Ita la hanoin tan kona-ba naʼok sasán, no kontinua laʼo. Ita manán hasoru tentasaun neʼe.

SAIDA MAK BÍBLIA HANORIN?

Bíblia hatete katak ema hotu hetan tentasaun, tan neʼe bainhira Ita hetan tentasaun, neʼe la dehan katak Ita mak ema aat. (1 Korinto 10:13) Importante mak buat neʼebé Ita halo bainhira hetan tentasaun. Ema balu hanoin beibeik kona-ba hakarak neʼebé sala, no ikusmai sira monu ba sala neʼe. Ema seluk halakon kedas hanoin neʼebé sala.

“Ema ida-idak hetan koko liuhusi ninia hakarak rasik neʼebé dada nia no lohi nia.”​—Tiago 1:14.

Bíblia fó sai hakat sira neʼebé lori ita ba sala. Tiago 1:15 dehan: “Kuandu hakarak [laloos] sai buras, neʼe sei hamosu sala.” Esplikasaun simples mak se ita kontinua hanoin kona-ba ita-nia hakarak neʼebé sala, neʼe sei sai buras ba beibeik toʼo ikusmai ita halo sala. Maibé ita bele kontrola ita-nia hakarak neʼe.

OINSÁ MAK BÍBLIA BELE AJUDA?

Ita-nia neon iha kbiit atu halakon hanoin neʼebé laloos. Oinsá? Hodi halo buat seluk, porezemplu halo atividade ruma, koʼalia ho kolega, ka hanoin kona-ba buat neʼebé diʼak. (Filipe 4:8) Hanoin mós kona-ba rezultadu oioin se ita monu ba tentasaun. Porezemplu, ita bele hetan problema ho ita-nia saúde, emosaun, no mós bele estraga ita-nia relasaun ho Maromak. (Deuteronômio [Ulangan] 32:29) Halo orasaun mós bele ajuda tebes ita. Jesus Kristu hatete: “Harohan beibeik, atu imi la monu ba tentasaun.”​—Mateus 26:41.

“Keta lohi imi-nia an: Ita la bele bosok Maromak. Tanba buat naran deʼit neʼebé ema kari, nia mós sei koʼa ida-neʼe.”​—Galásia 6:7.

REALIDADE

Diʼak atu rekoñese katak tentasaun mak hanesan deʼit ho iska neʼebé dada ema neʼebé hanoin badak no la iha esperiénsia. Ikusmai iska neʼe lori sira ba perigu. (Tiago 1:14) Liuliu se tentasaun neʼe mak atu halo sala seksuál, neʼe bele lori rezultadu neʼebé aat tebes.​—Provérbios (Amsal) 7:22, 23.

OINSÁ MAK BÍBLIA BELE AJUDA?

Jesus Kristu dehan: “Se ó-nia matan sorin loos halo ó sidi, losu sai nia no soe dook tiha.” (Mateus 5:29) Jesus la haruka ita atu estraga ita-nia matan! Maibé ninia liafuan sira-neʼe katak, se ita hakarak halo Maromak kontente no moris ba nafatin, ita presiza kontrola ita-nia isin-lolon atu la halo sala. (Koloso 3:5) Tan neʼe, ita presiza hasees an husi tentasaun naran deʼit. Fiar-naʼin ida iha tempu antigu halo orasaun ba Maromak, hodi dehan: “Keta husik haʼu-nia matan hateke ba buat neʼebé folin-laek.”​—Salmo (Mazmur) 119:37.

La fasil atu kontrola ita-nia an tanba ita hotu sala-naʼin. (Mateus 26:41) Tan neʼe, dala ruma ita monu ba tentasaun. Maski nuneʼe, se ita arrepende an ho laran no hakaʼas an atu la halo tan sala neʼe, ita-nia Kriadór, Maromak Jeová sei hatudu “laran-sadiʼa no laran-diʼak” ba ita. (Salmo [Mazmur] 103:8) Neʼe halo ita sente kmaan tebes!

“Oh Jah, se Ita hateke deʼit ba sala sira, oh Jeová, sé mak bele tahan?”​—Salmo (Mazmur) 130:3.