POLLIA CONDENSATA mak ai-horis espésie ida iha rai-Áfrika, neʼebé ninia fuan nia kór mak azúl neʼebé nabilan tebetebes. Maibé tuir loloos, ai-fuan neʼe rasik la iha sélula ho kór azúl. Oinsá mak ida-neʼe bele akontese?

Hanoin toʼok: Sélula ida-idak iha ai-fuan nia kulit iha buat mihis barak hanesan kabas-rahun, neʼebé tau hamutuk hanesan ai-kose. Kabas sira-neʼe la iha kór, maibé dalan neʼebé kabas sira-neʼe hada malu mak halo ai-fuan neʼe haree hanesan kór azúl neʼebé nabilan makaʼas. Maibé, dala ruma iha mós sélula balu neʼebé haree hanesan kór verde, kinur, ka korderoza. Kuandu ita haree didiʼak ai-fuan neʼe nia kulit, ita bele haree pontu kiʼik barak ho kór oioin.

La hanesan ho ai-fuan seluk, Pollia nia fuan rasik la iha kór. Tan neʼe, ai-fuan Pollia haree nabilan nafatin maski monu husi ninia hun kleur ona. Tuir loloos, ai-fuan Pollia balu neʼebé ema rai hela maizumenus tinan atus ida ona mós nabilan nafatin hanesan foin mak kuʼu! Maski ai-fuan neʼe iha musan deʼit no la iha isin atu han, maibé ninia kór nabilan neʼe dada manu sira-nia atensaun.

Sientista sira fiar katak hodi estuda didiʼak Pollia nia fuan bele ajuda sira atu inventa produtu oioin, hanesan halo kór neʼebé tahan nafatin, ka surat-tahan neʼebé ema la bele kopia hodi halo osan ka dokumentu falsu.

Tuir Ita-nia hanoin oinsá? Pollia nia fuan neʼe mosu mesak deʼit? Ka Maromak mak kria?