Erasmus komprende lia-gregu no lia-latín, tan neʼe nia kompara tradusaun Bíblia iha lia-latín, hanesan Vulgata, ho manuskritu sira husi Testamentu Foun, neʼebé hakerek iha lia-gregu. Neʼe halo nia fiar katak ema hotu tenke hatene didiʼak Bíblia, no ikusmai nia fó sai katak Bíblia tenkesér tradús ba povu baibain nia língua sira.

Erasmus hakarak hadiʼa situasaun iha Igreja Katólika, tanba nia fiar katak ema tenke halo tuir Jesus nia hanorin iha sira-nia moris loron-loron, laʼós deʼit tuir misa no halo selebrasaun oioin. Rezultadu mak bainhira reformadór sira komesa protesta Igreja Roma, ulun-naʼin igreja sira deskonfia katak Erasmus mós reformadór ida.

Liuhusi livru sira, Erasmus fó sai oinsá mak ulun-naʼin igreja sira moris riku no hanehan ema. Nia mós fó sai katak amu-papa sira apoia funu tanba sira buka sira rasik nia diʼak. Erasmus la hanesan duni ho ninia maluk ulun-naʼin igreja sira neʼebé halibur rikusoin husi povu liuhusi igreja nia kostume oioin, hanesan konfesa sala, adora santu-santa, halo jejún, no mós halo viajen ba fatin santu sira. Erasmus mós kritika sira neʼebé faʼan billete atu kasu povu nia sala no bandu padre-madre atu la kaben.

Iha tinan 1516, Erasmus fó sai ninia versaun Testamentu Foun Lia-Gregu. Neʼe mak livru Testamentu Foun primeiru neʼebé fó sai ba públiku. Ninia versaun neʼe inklui ninia komentáriu no ninia tradusaun ba lia-latín hodi tuir manuskritu lia-gregu nian. Tradusaun neʼe la hanesan ho Bíblia Vulgata. Erasmus kontinua hadiʼa ninia versaun, no ikusmai ninia tradusaun neʼe sai la hanesan liután ho Bíblia Vulgata.

Ezemplu ida mak 1 João 5:7. Atu apoia doutrina Trindade, bainhira igreja halo Bíblia Vulgata, sira aumenta liafuan tuirmai neʼe: “Iha lalehan, iha Aman, Liafuan, no Espíritu Santu: no buat tolu neʼe mak ida deʼit.” Maibé Erasmus hasai liafuan sira-neʼe husi ninia Testamentu Foun edisaun primeiru no segundu, tanba iha manuskritu lia-gregu hotu neʼebé nia estuda, nia la hetan liafuan sira-neʼe. Maibé, tanba igreja obriga nia, ikusmai Erasmus tau fali liafuan sira-neʼe iha ninia edisaun terseiru.

Erasmus nia edisaun Testamentu Foun Lia-Gregu neʼebé bazeia ba manuskritu sira ajuda duni ema seluk atu tradús Bíblia ba língua oioin iha rai Europa. Porezemplu, Martin Luther, William Tyndale, Antonio Brucioli no Francisco de Enzinas uza Erasmus nia edisaun sira atu tradús Testamentu Foun ba lia-alemaun, inglés, italianu, no españól.

Erasmus moris iha tempu neʼebé iha mudansa boot ba relijiaun, no ninia Testamentu Foun Lia-Gregu ajuda duni reformadór protestante sira. Foufoun, ema balu hanoin katak Erasmus mós reformadór ida. Maibé bainhira protestante no ulun-naʼin igreja katólika sira komesa halo debate oioin kona-ba hanorin teolojia, Erasmus lakohi apoia sorin ida. Tuir matenek-naʼin ida naran David Schaff, bainhira Erasmus mate, “ema katólika sira lakohi rekoñese nia nuʼudar sira-nia maluk, no ema protestante sira la bele dehan katak nia mak sira-nia maluk”.