OHIN loron, ema koʼalia língua oioin, toʼo maizumenus língua 7.000 iha mundu tomak. Ida-neʼe halo susar ba ita atu bá rai seluk, halo negósiu, ka hetan edukasaun, no dala ruma neʼe mós lori susar ba governu sira. Maibé problema neʼe laʼós foin mak mosu. Porezemplu, maizumenus tinan 2.500 liubá, Liurai Assuero iha rai-Pérsia hatoʼo lia-menon ida ba fatin hotu iha ninia ukun okos, “husi rai-Índia toʼo rai-Etiópia, hamutuk distritu 127, hodi hakerek ba distritu ida-idak tuir sira-nia letra rasik no ba povu ida-idak tuir sira-nia língua rasik”. *

Ohin loron, organizasaun no governu barak la iha vontade atu halo buat neʼebé hanesan ho Liurai Assuero halo. Maibé iha organizasaun ida neʼebé mak konsege hasoru susar neʼe ho susesu. Ami, Testemuña ba Jeová, halo vídeo no livru oioin, inklui mós Bíblia, iha língua 750 liu. Neʼe inklui língua liman nian hamutuk maizumenus 80. Ami mós halo livru barak iha língua oioin ba ema matan-delek sira.

Maibé organizasaun Testemuña ba Jeová halo buat hirak-neʼe laʼós atu manán osan. Tuir loloos, ema neʼebé tradús no halo ami-nia livru no vídeo sira mós halo serbisu hodi la manán osan. Tansá mak sira hakaʼas an atu tradús ba língua barak hanesan neʼe? Oinsá mak sira tradús ami-nia livru sira? Mai ita haree hamutuk.