Maizumenus tinan 30 liubá, inan-aman sira mak ema primeiru neʼebé baibain esplika ba sira-nia oan kona-ba relasaun seksuál. Sira bele esplika ida-neʼe tuir oan ida-idak nia idade.

Agora la hanesan ona. Livru ida (The Lolita Effect) esplika katak ohin loron labarik sira hetan informasaun barak demais kona-ba buat seksuál, no labarik nia programa sira neʼebé fó sai buat seksuál nian mós aumenta ba beibeik. Situasaun hanesan neʼe diʼak ba labarik sira ka lae?

Informasaun sira nakonu ho buat seksuál nian. Livru ida (Talk to Me First) dehan katak: “Tanba iklan, filme, livru, múzika, programa televizaun nian, game, telemovel no komputadór sempre nakonu ho dezeñu no liafuan komik oioin kona-ba buat seksuál nian, neʼe halo joven no labarik sira hanoin katak relasaun seksuál mak buat ida neʼebé importante liu hotu.”

Iklan sira fó influénsia makaʼas ba labarik. Kompañia no loja-naʼin sira sempre halo iklan ka promosaun hodi faʼan labarik nia roupa neʼebé seksi, ida-neʼe hanorin labarik atu hanoin demais kona-ba dalan neʼebé sira hatais. Livru ida tan (So Sexy So Soon) esplika katak kompañia sira hatene katak buat neʼebé importante ba labarik sira mak sira-nia kolega gosta sira. Tan neʼe, kompañia sira halo iklan ho mensajen seksuál tanba neʼe bele book labarik sira atu hakarak hola sira-nia roupa ka sasán.

Koñesimentu deʼit la toʼo. Karik labarik no joven sira iha ona koñesimentu kona-ba relasaun seksuál. Maibé neʼe deʼit la toʼo atu ajuda sira halo desizaun neʼebé matenek kona-ba relasaun seksuál.

Buat neʼebé importante: Ohin loron ita presiza treinu ita-nia oan sira-nia “kbiit atu hanoin” hodi ajuda sira “hatene buat diʼak husi buat aat”.—Ebreu 5:14.

Presiza esplika. Inan-aman iha responsabilidade atu esplika ba sira-nia oan kona-ba relasaun seksuál. Maski neʼe bele halo ita sente moe, maibé ita presiza duni halo ida-neʼe.—Bíblia nia matadalan: Provérbios (Amsal) 22:6.

Koʼalia badak maibé beibeik. Duké koʼalia naruk, diʼak atu inan-aman sira koʼalia ho sira-nia oan bainhira laʼo halimar ka halo serbisu ruma hamutuk. Husu pergunta neʼebé bele book sira atu koʼalia nakloke ba Ita. Porezemplu duké husu: “Ó gosta haree iklan sira neʼebé iha dezeñu seksi ka lae?”, karik diʼak liu husu: “Tuir ó-nia hanoin, tanbasá mak iklan sira-neʼe uza dezeñu hanesan neʼe atu faʼan sira-nia sasán?” Depois sira hatán, Ita bele husu tan: “Ó rasik sente oinsá kona ba dezeñu sira-neʼe?”—Bíblia nia matadalan: Deuteronômio (Ulangan) 6:6, 7.

Koʼalia tuir oan sira-nia tinan. Esplika ba ita-nia oan neʼebé preprimária hela kona-ba naran loos ba parte oin-lulik no mós oinsá atu bele proteje sira-nia an husi ema aat. Bainhira sira boot ba daudaun, esplika ba sira kona-ba sistema reprodusaun. Bainhira joven, sira presiza komprende ona saida mak relasaun seksuál, no oinsá mak ida-neʼe liga ho ema nia sentimentu no morál.

Hanorin morál neʼebé diʼak. Ita presiza hanorin ita-nia oan husi kiʼik kedas kona-ba oinsá atu hatudu laran-moos, laran-metin no respeitu. Hodi nuneʼe bainhira ita esplika kona-ba relasaun seksuál, sira iha ona hahalok diʼak sira-neʼe. Fó sai Ita-nia hanoin. Porezemplu, se Ita fiar katak sala atu halo relasaun seksuál antes kaben, diʼak atu fó sai ida-neʼe no esplika tanbasá. Livru ida (Beyond the Big Talk) dehan katak ba joven neʼebé hatene ona sira-nia inan-aman nia hanoin kona-ba relasaun seksuál antes kaben, karik sira sei halo tuir.

Hatudu ezemplu diʼak. Moris tuir matadalan neʼebé Ita hanorin ona ba Ita-nia oan. Porezemplu, se Ita hamnasa ba liafuan komik neʼebé foʼer, ka hatais roupa neʼebé seksi, hahalok sira-neʼe sei estraga morál neʼebé Ita hanorin ona ba Ita-nia oan.—Bíblia nia matadalan: Roma 2:21.

Koʼalia pozitivu. Relasaun seksuál mak prezente furak husi Maromak neʼebé bele lori ksolok ba kaben-naʼin sira. (Provérbios [Amsal] 5:18, 19) Fó-hatene ba ita-nia oan katak depois sira kaben, sira mós bele halo ida-neʼe ho laran-kontente. No sira sei la hanoin barak no la arrepende an, hanesan ema neʼebé halo ona relasaun seksuál antes kaben.—1 Timóteo 1:18, 19.