Hanorin husi Maromak mak iha folin boot
Hanorin husi Maromak mak iha folin boot
“Wainhira haʼu hatene ona Kristu, haʼu-nia Naʼi, haʼu hahú haree buat hotu nuʼudar folin-laek.”—FLP 3:8.
1, 2. Ema kristaun balu hili atu halo saida? Tanbasá?
HUSI tempu neʼebé Robert komesa tama eskola, nia mak estudante ida neʼebé matenek tebes. Kuandu nia tinan ualu deʼit, nia mestra bá nia uma no koʼalia ho nia hodi hatete ba nia katak ninia matenek bele ajuda nia atu hetan buat hotu neʼebé nia hakarak. Mestra neʼe mós hatete katak loron ida nia bele sai doutór ida. Ninia matenek neʼebé nia hatudu iha eskola sekundária, bele ajuda nia atu tama iha universidade neʼebé iha naran-boot iha nia rai. Maski ema barak hatete katak oportunidade diʼak neʼe mosu dala ida deʼit, maibé Robert husik ida-neʼe hodi hili atu serbí nuʼudar pioneiru regulár.
2 Hanesan Robert, ema kristaun barak iha oportunidade atu sai naran-boot ka riku iha mundu agora neʼe nian. Maibé, duké buka oportunidade sira-neʼe, ema kristaun balu hili atu aumenta liután sira-nia serbisu ba Maromak. (1 Kor 7:29-31) Saida mak book ema kristaun hanesan Robert atu hakaʼas an liután atu haklaken? Primeiru mak sira hadomi Maromak Jeová, maibé liután ida-neʼe sira hatene katak simu hanorin husi Maromak mak folin boot liu hotu. Hanoin toʼok, ita-nia moris sei sai oinsá se ita la hatene kona-ba lia-loos? Hodi hanoin didiʼak kona-ba bensaun sira neʼebé ita hetan ona tanba ita simu hanorin husi Maromak Jeová, sei ajuda ita atu hafolin nafatin lia-foun diʼak no sai badinas atu fahe ba ema seluk.
Simu hanorin husi Maromak mak oportunidade diʼak liu
3. Tanbasá mak ita bele fiar katak Maromak Jeová prontu atu hanorin ema neʼebé sala-naʼin?
3 Tanba Maromak Jeová laran-diʼak, nia prontu atu hanorin ema sala-naʼin. Isaías 54:13 fó-hatene nanis kona-ba ema kose-mina sira, hodi dehan: “Imi-nia oan hotu sei sai ema neʼebé simu hanorin husi Maromak Jeová, no imi-nia oan sira-nia dame sei sai barak.” Liafuan sira-neʼe bele mós aplika ba Kristu nia “bibi seluk”. (Joao 10:16) Ita hatene ida-neʼe tanba profesia ida neʼebé sai loos daudauk ohin loron. Profeta Isaías haree iha vizaun ida, ema husi nasaun hotu laʼo nadodon ba adorasaun neʼebé loos. Isaías hatete katak ema sira-neʼe koʼalia ba malu hodi dehan: “Mai ita saʼe ba Jeová nia foho, ba Jacob nia Maromak nia uma, no nia sei hanorin ita kona-ba nia dalan sira, no ita sei laʼo iha ninia dalan sira.” (Isa 2:1-3) Simu hanorin husi Maromak mak oportunidade neʼebé diʼak liu!
4. Maromak Jeová hanorin ema neʼebé hatudu hahalok saida?
4 Saida mak ita presiza halo atubele simu hanorin husi Maromak Jeová? Buat neʼebé importante liu mak hatudu haraik-an. David hatete: “Laran-diʼak no laran-loos mak Jeová. . . . Nia sei hanorin ninia dalan ba ema neʼebé haraik-an.” (Sal 25:8, 9) No Jesus hatete: “Haʼu hahiʼi Ita, Aman, lalehan no rai nia Naʼin, basá Ita subar tiha buat sira-neʼe husi ema matenek sira hodi fó-hatene fali ba sira neʼebé kiʼik.” (Lc 10:21) Hodi hatene katak Maromak “fó grasa ba ema haraik-an”, ida-neʼe halo ita hadomi nia, loos ka lae?—1 Ped 5:5.
5. Oinsá mak ita bele hatene lia-loos kona-ba Maromak?
5 Nuʼudar Maromak Jeová nia atan, ita hatene lia-loos tanba ita rasik nia matenek ka lae? Lae. Tuir loloos ho ita-nia matenek rasik, ita la bele hatene lia-loos kona-ba Maromak. Jesus hatete: “Ema ida la bele hakbesik haʼu wainhira haʼu Aman neʼebé haruka haʼu mai la dada nia.” (Joao 6:44) Liuhusi serbisu haklaken no espíritu santu, Maromak Jeová dada ema neʼebé haraik-an, neʼebé nuʼudar “buat folin-boot husi nasaun hotu”. (Ageu 2:7) Ita kontente tebes atu sai ema neʼebé Maromak Jeová dada ba ninia Oan-Mane, loos ka lae?—Lee Jeremias 9:23, 24.
Forsa atu hadiʼa ema nia moris
6. Hetan “koñesimentu kona-ba Jeová” book ema atu halo saida?
6 Hodi uza liafuan kapás, Isaías iha ninia profesia koʼalia kona-ba oinsá ohin loron ema troka sira-nia hahalok. Ema neʼebé uluk halo violénsia sai ema neʼebé buka dame. (Lee Isaías 11:6-9.) Sira neʼebé uluk odi malu tanba rasa, nasaun, suku, ka kultura la hanesan aprende ona atu moris hamutuk ho unidade. Ida-neʼe hanesan sira “tuku sira-nia surik sai ai-suak”. (Isa 2:4) Saida mak ema sira-neʼe halo atu troka sira-nia hahalok? Sira hetan “koñesimentu kona-ba Jeová” no halo tuir iha sira-nia moris. Maski Maromak nia atan sira ema sala-naʼin, maibé sira sai nuʼudar maun-alin iha mundu tomak. Iha mundu tomak ema barak simu tiha ona lia-foun diʼak, no rezultadu diʼak neʼebé mosu hatudu katak hanorin husi Maromak mak iha folin boot tebes.—Mt 11:19.
7, 8. (a) Saida deʼit mak toos hanesan “uma fatuk nian”? (b) Saida mak hatudu katak hanorin husi Maromak Jeová lori hahiʼi ba nia?
7 Apóstolu Paulo kompara serbisu haklaken hanesan ho halo funu ho buat neʼebé matan la bele haree. Nia hakerek: “Kilat neʼebé ami uza iha funu neʼe laʼós isin nian, maibé makaʼas liután neʼebé bele sobu rahun uma fatuk nian. Ami halakon liafuan no hanorin hotu-hotu neʼebé foti-an hasoru Maromak nia matenek.” (2 Kor 10:4, 5) Saida deʼit mak toos hanesan “uma fatuk nian” neʼebé Maromak nia hanorin sobu rahun hodi bele halo ema sai livre? Buat sira-neʼe balu mak hanesan hanorin falsu, fiar iha buat lulik nian no matan-dook, no ema nia matenek. (Kol 2:8) Hanorin husi Maromak ajuda ema atu husik hahalok aat no haburas hahalok neʼebé halo Maromak kontente. (1 Kor 6:9-11) Hanorin husi Maromak mós hadiʼa moris família nian, no ajuda ema atu hatene saida mak importante liu iha sira-nia moris. Ida-neʼe mak hanorin neʼebé ema hotu presiza duni ohin loron.
8 Maromak Jeová ajuda ema atu hatudu hahalok laran-moos, hanesan esperiénsia tuirmai neʼe hatudu. (Ebr 13:18) Feto ida iha rai-Índia estuda Bíblia no ikusmai nia sai haklaken-naʼin neʼebé seidauk hetan batizmu. Loron ida, kuandu nia fila fali ba uma husi serbisu atu harii Salaun Reinu, no kuandu nia besik fatin atu hein bís nia hetan korrente osan-mean neʼebé iha folin dolar 800. Maski feto neʼe nia moris susar, nia lori korrente neʼe no entrega ba polísia. Polísia ida iha neʼebá hakfodak tebes! No polísia ida seluk husu nia: “Tanbasá mak Ita-Boot la rai deʼit korrente neʼe?” Feto neʼe hatán: “Bíblia nia hanorin book haʼu atu troka haʼu-nia hahalok, agora haʼu ema laran-moos.” Tanba hakfodak, polísia neʼe hatete ba katuas kristaun neʼebé akompaña feto neʼe: “Iha distritu neʼe, iha ema naʼin-38.000.000 liu. Se imi bele ajuda ema naʼin-sanulu atu sai hanesan feto neʼe, ida-neʼe sei fó rezultadu neʼebé diʼak.” Kuandu ita hanoin kona-ba ema rihun ba rihun neʼebé hadiʼa ona sira-nia moris tanba simu hanorin husi Maromak, ida-neʼe book ita atu hahiʼi Maromak Jeová, loos ka lae?
9. Saida deʼit mak bele fó kbiit ba ema atu hadiʼa sira-nia moris?
9 Forsa husi Maromak nia Liafuan, no mós ajuda neʼebé Maromak Jeová fó liuhusi ninia espíritu santu bele fó kbiit ba ema atu hadiʼa sira-nia moris. (Rom 12:2; Gal 5:22, 23) Koloso 3:10 hatete: “Tau fali ema foun, neʼebé hafoun an nafatin atu nia bele toʼo ba matenek loloos tuir Maromak nia ilas.” Bíblia nia hanorin iha forsa atu fó sai saida mak iha ema ida nia laran, no bele troka dalan neʼebé nia hanoin no mós oinsá nia sente kona-ba buat ruma. (Lee Ebreu 4:12.) Hodi hatene didiʼak kona-ba Bíblia no hodi moris tuir Maromak Jeová nia matadalan sira, ema ida bele sai Maromak nia belun, no bele iha esperansa atu moris ba nafatin.
Maromak prepara ita ba futuru
10. (a) Tanbasá mak Maromak Jeová deʼit mak bele ajuda ita atu prepara ba futuru? (b) Saida deʼit mak sei troka iha mundu neʼe, neʼebé sei kona ema hotu?
10 Tanba Maromak Jeová deʼit mak hatene kona-ba ema nia futuru, nia deʼit mak bele ajuda ita atu prepara ba buat neʼebé sei akontese lakleur tan. (Isa 46:9, 10) Profesia husi Bíblia hatudu katak “Maromak Jeová nia loron boot besik ona”. (Sof 1:14) Kona-ba loron neʼe, liafuan neʼebé hakerek iha Provérbios 11:4 sei sai loos: “Buat neʼebé folin-boot sei la iha folin iha loron hirus nian, maibé justisa mak sei salva sira husi mate.” Kuandu toʼo ona tempu ba Maromak Jeová atu tesi lia ba Satanás nia mundu neʼe, buat neʼebé importante liu mak atu Maromak simu ita. Osan sei la iha folin iha tempu neʼebá. Tuir loloos, Ezekiel 7:19 hatete: “Sira sei soe sira-nia osan-mutin iha dalan, sira sei hakribi sira rasik nia osan-mean.” Hatene nanis kona-ba buat neʼebé sei akontese, bele ajuda ita atu halo desizaun neʼebé diʼak agora.
11. Saida mak dalan ida neʼebé Maromak nia hanorin ajuda ita atu prepara ba futuru?
11 Dalan ida neʼebé Maromak Jeová nia hanorin bele prepara ita ba ninia loron mak hodi ajuda ita atu hatene saida mak importante liu iha ita-nia moris. Apóstolu Paulo hakerek ba Timóteo: “Fó-hatene sai ba sira neʼebé riku ho sasán mundu neʼe nian atu labele haree la diʼak ema seluk sira; sira keta tau sira-nia esperansa iha osan, neʼebé ema la bele fiar, maibé iha Maromak.” Maski ita la iha osan barak, maibé se halo tuir konsellu neʼe sei ajuda ita. Konsellu neʼe kona-ba saida loos? Duké hakaʼas an atu hetan rikusoin, ita tenke “halo hahalok diʼak” no “sai riku ho hahalok diʼak”. Hodi tau uluk Maromak nia serbisu iha ita-nia moris, ita “rai-hela rikusoin barak ba aban-bainrua nian”. (1 Tim 6:17-19) Hahalok sira-neʼe hatudu katak ita iha matenek, tanba Jesus hatete: “Ema ida manán loos sá wainhira nia manán mundu tomak, maibé lakon nia moris?” (Mt 16:26, 27) Tanba Maromak Jeová nia loron besik ona atu mai, diʼak atu ita ida-idak husu ba ita-nia an: ‘Iha neʼebé mak haʼu rai-hela haʼu-nia rikusoin? Haʼu atan ba Maromak ka ba rikusoin?’—Mt 6:19, 20, 24.
12. Tanbasá mak ita labele para maski ema la hatudu respeitu ba ita-nia serbisu haklaken?
12 Maromak nia Liafuan hatudu katak “hahalok diʼak” ida neʼebé importante liu mak halo serbisu atu salva ema nia moris hodi haklaken Maromak nia Reinu no hanorin ema atu sai dixípulu. (Mt 24:14; 28:19, 20) Hanesan akontese iha apóstolu sira-nia tempu, ohin loron mós ema balu la hatudu respeitu ba ita-nia serbisu haklaken. (1 Kor 1:18-21) Maibé ida-neʼe la dehan katak mensajen neʼebé ita hatoʼo mak la iha folin, no ida-neʼe mós la dehan katak ita la presiza ona atu fó oportunidade ba ema atu tau fiar ba mensajen neʼe bainhira sei iha tempu. (Rom 10:13, 14) Nuʼudar ita ajuda ema atu hetan buat diʼak husi Maromak nia hanorin, ita sei simu bensaun barak.
Iha bensaun barak maski husik buat ruma
13. Apóstolu Paulo husik buat saida deʼit tanba lia-foun diʼak?
13 Antes apóstolu Paulo sai ema kristaun, nia hetan treinu atu sai ema-boot iha relijiaun judeu sira-nian. Kuandu nia karik tinan 13, nia husik sidade Tarsu neʼebé nia moris bá no muda ba Jeruzalein atu simu hanorin husi Gamaliel, mestre boot Ukun-Fuan nian. (Apos 22:3) Lakleur, Paulo hatudu katak nia matenek liu ninia kolega sira seluk, no se nia kontinua ninia treinu nia bele sai ema-boot iha relijiaun judeu sira-nian. (Gal 1:13, 14) Maibé, kuandu nia simu lia-foun diʼak, nia husik buat hotu ba kotuk. Paulo triste kona-ba ninia desizaun neʼe ka lae? Lae. Tuir loloos, nia hatete: “Wainhira haʼu hatene ona Kristu, haʼu-nia Naʼi, haʼu hahú haree buat hotu nuʼudar folin-laek. Tan nia, haʼu husik lakon deʼit buat hotu, hodi haree buat seluk hotu hanesan buat mesak foʼer.”—Flp 3:8.
14, 15. Bensaun saida deʼit mak ita hetan tanba ita sai “maluk nuʼudar Maromak nia serbisu-naʼin”?
14 Hanesan Paulo, ema kristaun ohin loron mós husik buat barak tanba lia-foun diʼak. (Mc 10:29, 30) Ita sente lakon buat ruma tanba ita halo ida-neʼe ka lae? Robert, neʼebé ita temi uluk, hatudu katak nia sente hanesan ema kristaun barak seluk hodi hatete: “Haʼu la sente lakon buat ida. Halo serbisu haklaken tempu tomak halo haʼu sente kontente tebes, no ida-neʼe fó oportunidade mai haʼu atu ‘koko no haree katak Maromak Jeová mak diʼak’. Kuandu haʼu tau ba kotuk oportunidade atu hetan osan barak, atu haʼu bele aumenta haʼu-nia serbisu ba Maromak Jeová, nia sempre haraik bensaun mai haʼu barak liu fali buat neʼebé haʼu husik. Neʼe hanesan haʼu la lakon buat ida. Haʼu hetan mak buat barak liután!”—Sal 34:8; Prov 10:22.
15 Se ita halo serbisu haklaken no hanorin ba tempu kleur ona, ita mós hetan oportunidade ona atu koko no haree katak Maromak Jeová mak diʼak. Dala barak kuandu Ita haklaken, Ita sente ka lae, katak Maromak nia espíritu ajuda Ita? Ita haree tiha ona oinsá ema nia oin kontente kuandu Maromak Jeová loke sira-nia laran hodi see tilun ba mensajen neʼebé Ita hatoʼo? (Apos 16:14) Maromak Jeová ajuda tiha ona Ita hodi loke dalan atu Ita bele aumenta Ita-nia serbisu ba nia? Nia ajuda Ita ona iha tempu susar nia laran atu Ita bele kontinua serbí nia maski Ita sente katak Ita la iha forsa ona? (Flp 4:13) Kuandu ita haree rasik oinsá Maromak Jeová ajuda ita nuʼudar ita halaʼo serbisu haklaken, ita sente katak nia hamutuk ho ita no ita sei hakbesik liután ba nia. (Isa 41:10) Neʼe mak bensaun neʼebé furak tebes atu sai “maluk nuʼudar Maromak nia serbisu-naʼin” hodi halo serbisu atu fahe ba ema seluk hanorin neʼebé ita simu husi Maromak!—1 Kor 3:9.
16. Ita sente oinsá kona-ba oportunidade atu simu no fahe ba ema seluk hanorin husi Maromak?
16 Ema barak buka atu hetan buat neʼebé diʼak ba sira-nia moris. Ita haree tiha ona katak ema neʼebé sai naran-boot iha mundu neʼe lakleur deʼit ema haluha ona sira. Maibé, serbisu neʼebé Maromak Jeová nia povu halo ohin loron atu halo santu nia naran sei nafatin rai-hela iha sira-nia istória. No ida-neʼe sei nunka atu haluha. (Prov 10:7; Ebr 6:10) Mai ita hotu hafolin oportunidade atu simu no mós fahe ba ema seluk hanorin husi Maromak.
Oinsá Ita hatán?
• Saida mak Maromak Jeová hakarak husi sira neʼebé nia hanorin?
• Oinsá mak simu hanorin husi Maromak hadiʼa ema nia moris?
• Bensaun saida deʼit mak ita hetan hodi ajuda ema seluk atu simu hanorin husi Maromak?
[Pergunta estudu nian]
[Dezeñu iha pájina 23]
Sira neʼebé simu hanorin husi Maromak Jeová sai nuʼudar maun-alin iha mundu tomak
[Dezeñu iha pájina 24]
Bensaun furak tebes atu sai “maluk nuʼudar Maromak nia serbisu-naʼin”