Adorasaun família nian mak importante atu hetan salvasaun!

HANOIN toʼok kona-ba “funu iha loron boot Maromak kbiit waʼin nian”. Loron neʼe, sei halo ema taʼuk tebetebes! (Apok 16:14) Profeta Miquéias hakerek kona-ba loron neʼe: “Foho sei nabeen . . . , no rai-tetuk sei nakfera, hanesan lilin nabeen tanba ahi, hanesan bee neʼebé fui iha fatin kleʼan.” (Miq 1:4) Saida mak sei akontese ba ema neʼebé la adora Maromak Jeová? Maromak nia Liafuan hatete: “Ema sira neʼebé Maromak Jeová oho iha loron neʼebá sei sai barak husi mundu nia rohan ida toʼo mundu nia rohan ida seluk.”—Jer 25:33.

Tanba avizu sira-neʼe, família nia ulun, inklui sira neʼebé mesak atu haboot oan, presiza atu husu sira-nia an: ‘Haʼu-nia oan sira sei hetan salvasaun iha Armajedón ka lae?’ Bíblia hatudu katak sira bele hetan salvasaun se sira iha relasaun neʼebé metin ho Maromak Jeová.—Mt 24:21.

Halaʼo Adorasaun Família nian tuir planu

Nuʼudar aman ka inan, hakaʼas an atu haboot Ita-nia oan tuir “dixiplina no Naʼi nia doutrina loloos”. (Ef 6:4) Estuda Bíblia ho Ita-nia oan mak buat neʼebé importante tebetebes. Ita hakarak Ita-nia oan sira atu sai hanesan ema kristaun iha Filipe, neʼebé Paulo gaba tanba sira halo tuir Maromak Jeová ho laran. Nia hakerek: “Maun-alin sira, nuʼudar imi hotu halo tuir nafatin haʼu-nia liafuan wainhira haʼu sei hela ho imi, ohin, wainhira haʼu dook husi imi, hakaʼas an liután atu buka imi-nia maksoin ho laran-taʼuk no laran nakdedar.”—Flp 2:12.

Kuandu Ita la hamutuk ho Ita-nia oan, sira sei halo tuir Maromak Jeová nia lei ka lae? Oinsá kuandu sira iha eskola? Oinsá mak Ita bele ajuda Ita-nia oan atu fiar katak Maromak nia lei sira mak diʼak duni, hodi nuneʼe sira sei halo tuir maski Ita la hamutuk ho sira?

Buat ida neʼebé bele ajuda oan sira atu iha fiar no halo tuir Maromak nia lei sira mak adorasaun família nian. Tan neʼe, mai ita koʼalia kona-ba buat tolu neʼebé ita presiza halo atu hetan susesu bainhira ita estuda Bíblia nuʼudar família.

Estuda beibeik

Bíblia hatudu katak Maromak konvida ninia oan sira iha lalehan atu halibur iha ninia oin tuir tempu neʼebé nia marka tiha ona. (Jó 1:6) Halo nuneʼe mós ho Ita-nia oan sira. Marka loron no oras neʼebé imi sei halaʼo imi-nia Adorasaun Família nian no halo tuir ida-neʼe. Diʼak mós atu marka tempu seluk atu estuda hamutuk se karik buat ruma akontese hodi Ita la halaʼo estudu tuir tempu.

Labele husik semana ida liu leet deʼit hodi la estuda hamutuk. Hanoin-hetan katak Ita-nia oan mak Ita-nia estudante Bíblia nian neʼebé importante liu hotu. Hanoin-hetan mós katak Satanás hakarak atu Ita-nia oan monu ba nia lasu. (1 Ped 5:8) Se Ita husik loron neʼebé Ita marka ona atu halaʼo Adorasaun Família nian, tanba atu haree televizaun ka atu halo atividade seluk neʼebé ladún importante, Ita halo Satanás kontente.—Ef 5:15, 16; 6:12; Flp 1:10.

Uza informasaun neʼebé kona moris loroloron nian

Ita-nia Adorasaun Família nian mak laʼós atu aprende informasaun deʼit, maibé ita tenke hakaʼas an atu uza mós informasaun neʼebé kona moris loroloron nian. Oinsá mak atu halo ida-neʼe? Dala ruma, diʼak atu hili informasaun neʼebé kona situasaun neʼebé Ita-nia oan sei hasoru. Porezemplu, Ita bele uza minutu balu atu halo drama kiʼik kona-ba oinsá atu haklaken ba ema. Kuandu joven sira hatene diʼak atu halo buat ruma, sira sei gosta atu halo ida-neʼe. Hodi koʼalia kona-ba oinsá atu hatán ba ema neʼebé la simu ita-nia mensajen no halo treinu kona-ba  neʼe, bele ajuda sira atu sai brani atu haklaken iha dalan oioin.—2 Tim 2:15.

Ita mós bele halo treinu atu ajuda labarik sira hasoru tentasaun no susar husi kolega sira. Ita bele koʼalia hamutuk informasaun iha kapítulu 15 husi livru Pertanyaan Kaum Muda—Jawaban yang Praktis, Jilid 2. Atividade ho títulu Rencana Tindakan iha pajína 132 no 133 fó matadalan no mós fó oportunidade oinsá atu oan bele fó resposta neʼebé diʼak ba ninia kolega sira. Iha pájina 133 nia okos fó laran-manas ba labarik sira atu: “Halo treinu ho ita-nia inan-aman ka kolega neʼebé iha esperiénsia kona-ba oinsá mak ita sei hatán.” Entaun, dala ruma bele ka lae, atu halo treinu hanesan neʼe kuandu halaʼo Adorasaun Família nian?

Adorasaun família nian bele fó tempu ba inan-aman atu ajuda oan atu iha planu neʼebé sei ajuda sira atu hakbesik liután ba Maromak Jeová no badinas iha Ninia serbisu. Kona-ba ida-neʼe, livru Pertanyaan Kaum Muda, Jilid 2, iha informasaun neʼebé kapás iha kapítulu 38, ho títulu Apa yang Akan Kukejar dalam Hidupku? Kuandu koʼalia kona-ba kapítulu neʼe, ajuda Ita-nia oan atu sente katak uza ninia moris atu serbí Maromak Jeová mak dalan moris nian neʼebé diʼak liu hotu. Ajuda Ita-nia oan atu iha hakarak atu serbí nuʼudar pioneiru, serbí iha Betel, tuir Eskola Treinu Atan Kristaun, ka atu halo serbisu seluk tan ba Aman Jeová.

Maibé kuidadu: Dala ruma inan-aman hakarak oan sira atu serbí Maromak ba tempu tomak toʼo sira balu koʼalia deʼit kona-ba hakarak neʼe, no haluha atu koʼalia kona-ba buat diʼak neʼebé sira-nia oan halo daudauk. Sin, diʼak atu fó laran-manas ba Ita-nia oan atu halo planu, hanesan serbí iha Betel ka sai misionáriu. Maibé, kuandu halo ida-neʼe, kuidadu atu la hatodan Ita-nia oan ho Ita-nia hakarak, keta sira sai laran-tun. (Kol 3:21) Hanoin-hetan katak Ita-nia oan tenke hadomi Maromak Jeová ho nia rasik nia laran, laʼós ho Ita-nia laran. (Mt 22:37) Nuneʼe, la haluha atu gaba Ita-nia oan kona-ba buat diʼak neʼebé nia halo daudauk, no hakaʼas an atu la koʼalia barak kona-ba buat neʼebé nia ladún halo. No, ajuda oan sira atu hafolin buat neʼebé Maromak Jeová halo tiha ona ba sira. Hodi halo nuneʼe Ita-nia oan sei haburas nia rasik nia domin ba Maromak Jeová.

Halo oan sira kontente ho estudu família nian

Buat ida tan neʼebé inan-aman bele halo atu hetan susesu bainhira estuda Bíblia nuʼudar família mak halo oan sira kontente ho estudu neʼe. Oinsá mak ita bele halo ida-neʼe? Dala ruma ita bele haree drama iha DVD husi Testemuña ba Jeová. Tuirmai koʼalia hamutuk kona-ba drama neʼe. Ka, Ita bele lee hamutuk istória ida husi Bíblia no husu família ida-idak atu lee ema iha istória neʼe nia liafuan.

No mós, Menara Pengawal no Sedarlah! iha informasaun neʼebé diʼak atu uza durante koʼalia hamutuk nuʼudar família. Porezemplu, Ita bele uza lisaun neʼebé mosu beibeik iha pájina 31 iha Sedarlah! ho títulu Apa Jawabannya? Kada fulan rua Menara Pengawal ba públiku iha atividade ba joven sira ho títulu Untuk Kaum Muda hodi sira bele buka-hetan informasaun  husi Bíblia. Iha fulan neʼebé la iha atividade neʼe, Menara Pengawal iha atividade seluk ba labarik kiʼik ho títulu Ajarlah Anak Anda.

Kada fulan rua Sedarlah! mós hatoʼo informasaun oioin ho títulu Kaum Muda Bertanya, neʼebé joven sira gosta. Hanesan mós ho livru Pertanyaan Kaum Muda, Jilid 2. Kuandu uza livru ida-neʼe, la haluha atu uza pergunta sira iha kaixa Menurutmu . . . neʼebé iha kapítulu ida-idak nia rohan. Kaixa neʼe laʼós atu koko Ita-nia oan nia matenek. Ita bele uza pergunta sira-neʼe atu koʼalia hamutuk nuʼudar família.

Maibé, kuidadu atu labele uza pergunta sira atu litik Ita-nia oan. Porezemplu, la diʼak atu obriga Ita-nia oan atu lee ho lian makaʼas saida mak nia hakerek iha livru neʼe nia pájina ruma, inklui pájina neʼebé ho títulu Jornalku. Iha parte Pesan untuk Orang Tua iha pájina 3, livru neʼe hatete: “Atu Ita-nia oan joven hakarak hakerek buat neʼebé sira loloos hanoin iha livru neʼe, keta lee buat neʼebé sira hakerek la ho sira-nia lisensa. Karik, iha tempu seluk, sira sei fó-hatene ba Ita kona-ba saida mak sira hakerek.”

Se ita halaʼo adorasaun família nian beibeik, uza informasaun neʼebé kona moris loroloron nian, no halo oan sira kontente ho estudu família nian, Maromak Jeová sei haraik bensaun barak ba Ita-nia hakaʼas-an. Ita-nia adorasaun nuʼudar família sei sai hanesan tempu espesiál neʼebé ajuda família tomak atu hametin nafatin sira-nia relasaun ho Aman Jeová.

[Kaixa iha pájina 31]

Uza ideia oioin

“Atu estuda ho ami-nia oan-feto sira neʼebé sei kiʼik, haʼu ho haʼu-nia laʼen prepara ba reuniaun kongregasaun nian hamutuk ho sira, tuirmai ami husu sira atu halo gambar kona-ba informasaun neʼebé ami foin estuda. Dala ruma, ami halo drama kiʼik kona-ba istória husi Bíblia ka kona-ba haklaken. Ami sempre estuda kona-ba buat neʼebé oan sira bele komprende, neʼebé sira gosta, no neʼebé halo sira kontente.”—J.M., Estadus Unidus.

“Atu ajuda haʼu-nia estudante Bíblia nia oan-mane atu hatene oinsá mak ema iha tempu uluk uza Maromak nia liafuan, ami hasai ka print livru Isaías la ho kapítulu no versíkulu sira. Ami tau hamutuk pájina sira hodi uza goma no ami lulun sai hanesan rolu ida. Labarik mane neʼe koko atu halo buat neʼebé Jesus halo iha sinagoga ida iha Nazaré. Bíblia hatete iha Lucas 4:16-21 katak Jesus simu rolu no ‘loke tiha, nia hetan fatin ida’ neʼebé nia buka ba iha livru Isaías. (Isa 61:1, 2) Maibé, kuandu labarik neʼe koko atu halo hanesan, susar ba nia atu hetan Isaías 61 hodi uza surat tahan naruk neʼebé lulun tiha, neʼebé la iha kapítulu no versíkulu nia númeru. Tanba labarik neʼe hakfodak ho Jesus nia matenek kona-ba uza Bíblia neʼebé hanesan rolu, nia hatete: ‘Jesus matenek loos!’”—Y.T., Japaun.

[Dezeñu iha pájina 30]

Halo treinu hamutuk bele ajuda Ita-nia oan atu hasoru tentasaun no susar husi sira-nia kolega

[Dezeñu iha pájina 31]

Hakaʼas an atu halo oan sira kontente ho Adorasaun Família nian