Haksolok nafatin iha tempu neʼebé susar
Haksolok nafatin iha tempu neʼebé susar
“Ema hotu neʼebé buka protesaun iha [Maromak Jeová] sei haksolok; sira sei haklalak ho haksolok toʼo tempu neʼebé la bele sura.”—SAL 5:11.
1, 2. (a) Ohin loron, saida deʼit mak halo ema sente laran-susar? (b) Ema kristaun loos hasoru susar seluk saida?
HANESAN ema hotu, Testemuña ba Jeová mós hasoru susar barak. Maromak nia atan barak hetan terus tanba krime, funu, no buat aat seluk tan. Dezastre naturál, kiak, moras, no mate halo ema sente laran-susar. Apóstolu Paulo hatete: “Ita hatene katak ohin neʼe mós mundu tomak hakilar tanis hanesan feto neʼebé atu tuur ahi.” (Rom 8:22) Ita mós dala ruma hetan susar tanba ita rasik nia sala. Hanesan Liurai David, ita mós karik hatete: “Haʼu rasik nia sala sai barak toʼo haʼu-nia ulun leten; hanesan naha neʼebé todan, sira todan liu ba haʼu.”—Sal 38:4.
2 Ema kristaun loos mós hasoru susar seluk tan. Susar neʼe mak ema odi no haterus sira hanesan Kristu. (Mt 10:22, 23; Joao 15:20; 16:2) Sin, ida-neʼe hanesan sira lori ai-riin terus nian. (Lc 14:27) Tan neʼe, atu halo tuir Kristu, ita presiza hakaʼas an no tahan hodi hein ba bensaun neʼebé ita sei hetan iha mundu foun.—Mt 7:13, 14; Lc 13:24.
3. Saida mak hatudu katak ita nuʼudar ema kristaun la presiza moris iha susar laran hodi bele halo kontente Maromak?
3 Ida-neʼe katak ita nuʼudar ema kristaun loos labele halaʼo moris neʼebé kontente ka lae? Iha ita-nia moris tenkesér nakonu ho susar deʼit toʼo mundu neʼe ramata ka lae? Tuir loloos, Maromak Jeová hakarak atu ita sente kontente nuʼudar ita hein atu buat hotu neʼebé nia promete sai loos. Dala barak Bíblia hatudu katak Maromak nia povu mak ema neʼebé kontente. (Lee Isaías 65:13, 14.) Salmo 5:11 hatete: “Ema hotu neʼebé buka protesaun iha [Maromak Jeová] sei haksolok; sira sei haklalak ho haksolok toʼo tempu neʼebé la bele sura.” Sin, ita bele duni atu sente haksolok no sente dame iha laran maski ita moris iha susar nia laran. Mai ita haree toʼok oinsá mak Bíblia bele ajuda ita atu tahan hasoru susar sira no atu haksolok nafatin.
Jeová mak “Maromak neʼebé kontente”
4. Oinsá mak Maromak sente kuandu ninia kriasaun sira la halo tuir ninia hakarak?
4 Porezemplu, hanoin toʼok kona-ba Maromak Jeová. Nuʼudar Maromak forsa boot liu hotu, nia mak iha kbiit atu ukun lalehan no rai. Nia la kuran buat ida no nia mós la presiza ema ida. Maski Maromak Jeová iha forsa boot, maibé nia sente triste kuandu ninia oan ida iha lalehan kontra nia no sai fali Satanás. Maromak sai triste liután kuandu anju balu seluk hamutuk ho Satanás kontra hasoru nia. No mós, hanoin toʼok Maromak Jeová nia sentimentu kuandu Adão no Eva, kriasaun iha rai neʼebé furak liu hotu, fila kotuk ba nia. Husi tempu neʼebá toʼo agora, ema rihun ba rihun lakohi simu Maromak Jeová nia ukun.—Rom 3:23.
5. Liuliu, saida mak hakanek Maromak Jeová nia laran?
5 Toʼo agora, Satanás nafatin kontra Maromak Jeová. Durante tinan 6.000 liu, Maromak Jeová haree ema halo hahalok aat, hanesan adora buat seluk liu fali nia, halo violénsia, oho ema seluk, no halo hahalok seksuál neʼebé aat. (Gên 6:5, 6, 11, 12) Liután neʼe, nia rona lia-bosok no koʼalia aat kona-ba nia. No Maromak nia povu rasik mós dala ruma hakanek nia laran. Bíblia hakerek kona-ba situasaun ida, hodi dehan: “Dala hira ona mak sira kontra nia iha rai-fuik maran, sira hakanek nia laran iha rai-fuik maran! Dala barak sira koko Maromak, no sira hakanek Ida neʼebé Santu ba Izraél.” (Sal 78:40, 41) Laran-kanek neʼebé Maromak Jeová sente kuandu ninia povu rasik la simu nia mak boot tebetebes. (Jer 3:1-10) Ida-neʼe hatudu katak kuandu buat aat akontese, Maromak Jeová sente laran-susar tebetebes.—Lee Isaías 63:9, 10.
6. Saida mak Maromak halo kuandu mosu situasaun neʼebé halo nia laran-susar?
6 Maski nuneʼe, Maromak Jeová la husik deʼit ninia laran-susar atu hapara nia atu halo buat ruma kona-ba situasaun aat. Kuandu problema mosu, Maromak Jeová halo kedas buat ruma atu hamenus rezultadu aat husi buat neʼebé mosu. Nia mós halo buat barak hodi ikusmai nia bele halo nia hakarak sai loos. Tanba buat diʼak neʼebé Maromak Jeová halo, nia haksolok hodi hein ba tempu neʼebé ninia kriatura hotu simu nia direitu atu ukun, no neʼebé ninia atan sira neʼebé laran-metin sei simu bensaun barak. (Sal 104:31) Sin, maski Maromak Jeová rona lia-bosok kona-ba nia, nia nafatin “Maromak neʼebé kontente”.—1 Tim 1:11, MF; Sal 16:11.
7, 8. Kuandu hasoru problema, oinsá mak ita bele halo tuir Maromak Jeová?
7 Loloos, ita la bele kompara ita-nia kbiit atu rezolve problema sira ho Maromak Jeová nian. Maibé, ita bele halo tuir Maromak Jeová kuandu ita hasoru susar ruma. Ita hotu sempre sente triste kuandu hasoru susar, maibé ita la presiza sente hanesan neʼe nafatin. Tanba Maromak Jeová kria ita tuir nia ilas, ita iha kbiit atu uza ita-nia hanoin no ita iha matenek neʼebé bele ajuda ita atu hatene didiʼak kona-ba ita-nia problema no buka dalan atu hadiʼa situasaun.
8 Buat importante ida neʼebé ajuda ita atu tahan kuandu hasoru problema iha moris mak rekoñese katak dala ruma ita la bele halo buat ida ka la bele kontrola situasaun ruma. Hanoin demais kona-ba problema ruma, ida-neʼe sei halo ita estrese no halakon ita-nia ksolok neʼebé ita hetan husi adorasaun neʼebé loos. Kuandu ita buka tiha ona dalan balu atu hadiʼa problema, diʼak atu la hanoin tan kona-ba neʼe, maibé hanoin fali kona-ba halo buat neʼebé diʼak. Istória husi Bíblia tuirmai sei hatudu kona-ba neʼe.
Importante atu simu situasaun
9. Oinsá mak Ana hatudu katak nia simu situasaun neʼebé mosu ba nia?
9 Hanoin toʼok ezemplu kona-ba Ana, neʼebé ikusmai sai nuʼudar inan ba profeta Samuel. Nia sai laran-tun tanba nia la bele hetan oan. Ema goza nia no koʼalia aat nia tanba nia la iha oan. Dala ruma, Ana sente triste tebes toʼo tanis no lakohi atu han. (1 Sam 1:2-7) Loron ida kuandu Ana vizita Maromak Jeová nia santuáriu nia sai triste tebetebes “no komesa harohan ba Maromak Jeová no tanis makaʼas”. (1 Sam 1:10) Depois Ana fó sai ninia sentimentu ba Maromak Jeová, amlulik boot Eli hakbesik nia no hatete: “Bá ho dame, haʼu hein katak Maromak Izraél nian fó ba ó buat neʼebé ó husu ona ba nia.” (1 Sam 1:17) Klaru katak Ana rekoñese nia la bele halo buat ida tan kona-ba ninia situasaun. No nia mós hatudu katak nia simu situasaun neʼe. Tan neʼe, “nia sai husi neʼebá no komesa atu han, no nia la hatudu tan oin triste”.—1 Sam 1:18.
10. Kuandu Paulo hasoru susar neʼebé nia la bele halakon, oinsá mak nia hatudu katak nia simu situasaun neʼe?
10 Kuandu apóstolu Paulo hasoru susar, nia mós hatudu katak nia simu situasaun neʼebé mosu ba nia. Nia iha susar ida neʼebé halo nia laran-tun. Nia bolu ida-neʼe nuʼudar “ai-tarak ba [ninia] isin”. (2 Kor 12:7) Maski ita ladún hatene saida mak susar neʼe, maibé Paulo hakaʼas an atu halo buat neʼebé nia bele atu halakon susar neʼe, no nia halo orasaun ba Maromak Jeová atu hasai susar neʼe. Dala hira mak Paulo husu Maromak Jeová kona-ba neʼe? Dala tolu! Ba dala ikus, Maromak hatete ba Paulo katak “ai-tarak iha [ninia] isin” sei la halakon ho milagre. Paulo simu situasaun neʼe no kontinua serbí Maromak Jeová liután.—Lee 2 Korinto 12:8-10.
11. Tanbasá mak orasaun no harohan mak importante kuandu ita hasoru susar ruma?
11 Ezemplu sira-neʼe laʼós atu hatudu katak ita la presiza tan atu harohan ba Maromak kona-ba susar ruma neʼebé ita hasoru. (Sal 86:7) Tuir loloos, Maromak nia Liafuan fó laran-manas mai ita atu: “Keta laran-taridu kona-ba buat ruma. Iha buat hotu, harohan no hamulak bá hodi fó-agradese; hatoʼo imi-nia harohan ba Maromak.” Oinsá mak Maromak hatán ita-nia harohan neʼe? Bíblia hatete: “Nuneʼe, Maromak dame nian sei rai hela iha imi-nia fuan no laran iha Kristu Jesus.” (Flp 4:6, 7) Sin, Maromak Jeová karik la halakon ita-nia susar, maibé nia bele hatán ita-nia orasaun hodi halo ita-nia fuan no laran sente dame. Depois ita harohan ba Maromak kona-ba susar ruma, ida-neʼe halo ita sente kalma no bele ajuda ita atu hatene katak perigu atu hanoin demais kona-ba susar ruma.
Haksolok hodi halo Maromak nia hakarak
12. Tanbasá mak nafatin sente laran-tun bele aumenta liután ita-nia susar?
12 Provérbios 24:10 hatete: “Ó sente ona laran-tun iha tempu neʼebé susar ka lae? Ó-nia kbiit sei sai menus.” Eskritura seluk iha livru Provérbios mós hatete: “Tanba laran neʼebé kanek mak hamosu laran-kraik.” (Prov 15:13) Ema kristaun balu husik sira-nia laran-kraik hapara sira atu kontinua atu lee Bíblia no atu hanoin kleʼan kona-ba Maromak nia Liafuan. Maski sira halo orasaun, maibé dala ruma la ho laran, no karik sira mós hadook an husi maluk kristaun. Ida-neʼe hatudu katak perigu atu sente nafatin laran-tun tanba bele aumenta liután ita-nia susar.—Prov 18:1, 14.
13. Atividade balu saida mak bele ajuda ita atu hamenus laran-triste no fó ita ksolok?
13 Iha parte seluk, se ita hanoin nafatin kona-ba buat diʼak neʼebé ita hetan ona iha ita-nia moris, ida-neʼe bele halo ita sente kontente. David hakerek: “Atu halo Ita-nia hakarak, oh, haʼu-nia Maromak, mak buat neʼebé halo haʼu haksolok.” (Sal 40:8) Kuandu ita hasoru susar ruma iha ita-nia moris, buat neʼebé importante liu mak atu la para atu halaʼo ita-nia atividade atu adora Maromak. Tuir loloos, dalan neʼebé diʼak liu hotu atu hamenus laran-triste mak hodi halo atividade neʼebé halo ita kontente. Maromak Jeová hatete katak ita bele hetan ksolok hodi lee no estuda ninia Liafuan beibeik. (Sal 1:1, 2; Tgo 1:25) Sin, iha Bíblia laran no mós iha reuniaun kristaun sira, ita simu “liafuan neʼebé furak” neʼebé bele fó laran-manas mai ita no halo ita laran-haksolok.—Prov 12:25; 16:24.
14. Saida mak Maromak Jeová promete neʼebé halo ita sente kontente?
14 Maromak fó ita buat barak neʼebé halo ita sente kontente. Ninia promesa atu salva ita mak buat ida neʼebé halo ita sente kontente duni. (Sal 13:5) Ita hatene katak maski ita hasoru susar barak ohin loron, maibé nuʼudar ita hakaʼas an atu buka Maromak, ikusmai nia sei haraik bensaun mai ita. (Lee Eclesiastes 8:12.) Profeta Habacuc mós hatudu fiar hanesan neʼe hodi hatete: “Maski ai-figueira la fó fuan tan, no uvas hun la fó tan fuan, no ai-oliveira la fó tan rezultadu diʼak, no toos sira la fó tan ai-han; bibi sira la iha luhan, no la iha tan luhan ba animál sira; maibé ba haʼu, haʼu sei haksolok iha Maromak Jeová; haʼu sei haksolok iha Maromak haʼu-nia salvasaun nian.”—Hab 3:17, 18.
“Ksolok ba povu neʼebé nia Maromak mak Jeová!”
15, 16. Buat furak saida deʼit mak Maromak fó atu halo ita haksolok nuʼudar ita hein ba bensaun iha futuru?
15 Nuʼudar ita hein ba futuru furak neʼebé Maromak Jeová hakarak fó mai ita, nia mós hakarak ita atu haksolok ho buat diʼak neʼebé nia fó mai ita agora. Bíblia hatete: “Ikusmai haʼu hatene katak la iha buat ida neʼebé diʼak liu duké haksolok hodi halo buat neʼebé diʼak durante ema ida nia moris; no mós katak ema ida-idak sei han no hemu no haksolok ho buat diʼak husi ninia serbisu makaʼas hotu. Neʼe mak prezente husi Maromak.” (Ecle 3:12, 13) Liafuan “halo buat neʼebé diʼak”, neʼe inklui halo hahalok diʼak ba ema seluk. Jesus hatete katak diʼak liu fó duké simu. Tan neʼe, hatudu laran-diʼak ba ita-nia kaben, oan, inan-aman, no família seluk bele halo ita sente kontente. (Prov 3:27) Hatudu domin, laran-luak, no perdua ita-nia maluk kristaun mós bele halo ita haksolok, no hahalok sira-neʼe halo kontente Maromak Jeová. (Gal 6:10; Kol 3:12-14; 1 Ped 4:8, 9) No mós, kuandu ita halo sakrifísiu atu halaʼo ita-nia serbisu haklaken, ida-neʼe halo ita sente kontente tebes.
16 Liafuan sira husi livru Eclesiastes hatudu kona-ba ksolok neʼebé ita iha loroloron, hanesan han no hemu. Sin, maski ita hasoru susar, ita bele haksolok ho buat neʼebé Maromak Jeová fó nuʼudar prezente ba ita-nia moris. Liután neʼe, iha mós buat seluk tan neʼebé halo ita kontente neʼebé ita la selu atu hetan, hanesan furak husi loro-matan neʼebé monu iha lokraik, foho neʼebé haree kapás, no animál kiʼik nia hahalok neʼebé halo ita hamnasa, no buat barak seluk tan neʼebé furak. Nuʼudar ita hanoin kona-ba buat hirak-neʼe, ita-nia domin ba Maromak Jeová sai boot liután, tanba nia mak Ida neʼebé fó buat diʼak hotu.
17. Oinsá mak ita sei sai livre husi susar? Antes neʼe, saida mak bele halo ita haksolok?
17 Ikusmai, rezultadu husi ita-nia domin ba Maromak, tuir ninia lei sira, no fiar ba Jesus nia sakrifísiu mak ita sei sai livre husi susar neʼebé mosu tanba sala no ita sei hetan ksolok ba nafatin. (1 Joao 5:3) Maibé antes neʼe, ita bele haksolok tanba hatene katak Maromak Jeová komprende susar neʼebé ita ida-idak hasoru. David hakerek: “Haʼu sei haksolok no kontente iha Ita-nia laran-diʼak neʼebé nakonu ho domin, tanba Ita haree haʼu-nia terus; Ita hatene kona-ba haʼu-nia laran-susar.” (Sal 31:7) Tanba Maromak Jeová hadomi ita, ida-neʼe sei book nia atu salva ita husi susar sira.—Sal 34:19.
18. Tanbasá mak Maromak nia povu sente kontente?
18 Nuʼudar ita hein atu Maromak nia promesa sai loos, mai ita halo tuir Maromak Jeová neʼebé kontente. Keta husik ita-nia laran-kraik atu hapara ita atu serbí Maromak. Kuandu problema mosu, mai ita uza ita-nia kbiit atu hanoin no uza ita-nia matenek atubele fó matadalan mai ita. Maromak Jeová sei ajuda ita atu kontrola ita-nia sentimentu no ajuda ita atu halo buat hotu neʼebé ita bele atu hamenus rezultadu aat husi susar ruma. Mai ita haksolok ho buat diʼak hotu neʼebé Maromak Jeová fó mai ita, neʼe mak buat neʼebé ba isin no ba ninia adorasaun. Hodi nafatin hakbesik ba Maromak, ita sei bele sente haksolok, tanba Bíblia hatete: “Ksolok ba povu neʼebé nia Maromak mak Jeová!”—Sal 144:15.
Saida mak Ita aprende?
• Kuandu hasoru susar, oinsá mak ita bele halo tuir Maromak Jeová?
• Oinsá mak simu situasaun ruma bele ajuda ita atu tahan hasoru susar?
• Iha tempu susar, oinsá mak ita bele haksolok hodi halo Maromak nia hakarak?
[Pergunta estudu nian]
[Dezeñu iha pájina 16]
Maromak Jeová sente laran-susar tebetebes kona-ba buat aat neʼebé akontese
[Credit Line]
© G.M.B. Akash/Panos Pictures
[Dezeñu iha pájina 18]
Maromak Jeová fó buat neʼebé ita presiza atu haksolok nafatin