Uza ho matenek “surik neʼebé espíritu fó”
Uza ho matenek “surik neʼebé espíritu fó”
“Simu . . . Maromak futar-lia nuʼudar surik neʼebé espíritu fó ba imi.”—EF 6:17.
1, 2. Tanba presiza ema barak tan atu haklaken Maromak nia Reinu, saida mak ita bele halo?
TANBA Jesus haree katak ema barak hakarak hatene lia-loos, nia hatete ba nia dixípulu sira: “Toʼos boot duni, maibé serbisu-naʼin uitoan. Neʼe duni imi harohan ba toʼos-naʼin atu haruka serbisu-naʼin sira ba nia toʼos.” Jesus la hatete deʼit liafuan sira-neʼe, maibé “nia bolu nia eskolante sira naʼin sanulu-resin-rua” no haruka sira atu bá haklaken. (Mt 9:35-38; 10:1, 5) Tuirmai, nia mós “fihir eskolante hitunulu-resin-rua tan, hodi haruka sira rua-rua” atu halo serbisu neʼebé hanesan.—Lc 10:1, 2.
2 Ohin loron mós presiza ema barak tan atu haklaken Maromak nia Reinu. Iha tinan 2009, iha mundu tomak ema neʼebé tuir Memoriál hamutuk naʼin-18.168.323. Husi ema sira-neʼe, ema naʼin-10.000.000 seidauk sai Testemuña ba Jeová. Ida-neʼe hatudu duni katak toʼos tasak ona no prontu atu koʼa. (Joao 4:34, 35) Tan neʼe, ita tenke halo orasaun hodi husu serbisu-naʼin barak tan. Maibé, oinsá mak ita bele halo tuir buat neʼebé ita husu? Ita bele halo ida-neʼe hodi hakaʼas an atu hetan rezultadu diʼak nuʼudar ita hola parte ho laran-manas iha serbisu atu haklaken no hanorin.—Mt 28:19, 20; Mc 13:10.
3. Oinsá mak Maromak nia espíritu santu bele ajuda ita atu hetan rezultadu diʼak kuandu haklaken?
3 Iha lisaun uluk ita estuda kona-ba oinsá mak Maromak nia espíritu santu ajuda ita atu “haklaken Maromak futar-lia ho aten-barani”. (Apos 4:31) Espíritu neʼe mós bele ajuda ita atubele haklaken ho matenek. Dalan ida atu ita bele hetan rezultadu diʼak iha serbisu haklaken mak hodi uza didiʼak Maromak Jeová nia Liafuan, Bíblia. Maromak mak leno mensajen iha Bíblia laran liuhusi nia espíritu santu. (2 Tim 3:16) Tan neʼe, kuandu ita uza Bíblia ho matenek atu hanorin, ita hatudu katak ita husik espíritu santu hatudu dalan mai ita. Antes ita haree kona-ba oinsá mak ita bele halo ida-neʼe, ulukliu mai ita haree oinsá mak Bíblia iha kbiit.
‘Maromak nia liafuan book makaʼas’
4. Maromak nia liafuan iha kbiit atu halo saida ba ema?
4 Maromak nia liafuan ka mensajen iha kbiit duni! (Ebr 4:12) Mensajen iha Bíblia laran kroʼat liu fali surik neʼebé ema mak halo, tanba nia bele tesi ketak ruin no bokur. Lia-loos husi Bíblia bele tama toʼo ema nia laran no book ema nia hanoin ka sentimentu, no hatudu sai saida mak iha ema nia laran. Lia-loos husi Bíblia iha kbiit no bele troka ema nia hanoin no hahalok. (Lee Koloso 3:10.) Sin, Maromak nia Liafuan bele duni troka ema nia moris!
5. Iha dalan saida deʼit mak Bíblia bele ajuda ita?
5 Liután neʼe, Bíblia mak livru neʼebé nakonu ho matenek neʼebé ita la bele hetan iha livru sira seluk. Bíblia iha informasaun diʼak neʼebé bele ajuda ema atu hatene oinsá atu halaʼo moris iha mundu neʼebé nakonu ho problema. Maromak nia Liafuan laʼós deʼit fó naroman ba ita-nia moris agora nian, maibé mós ba ita-nia moris iha futuru. (Sal 119:105) Bíblia bele ajuda ita kuandu ita hasoru problema ka kuandu ita halo desizaun sira kona-ba hili belun, hili atividade halimar nian, hili serbisu, hili roupa, no buat seluk tan. (Sal 37:25; Prov 13:20; Joao 15:14; 1 Tim 2:9) Halo tuir matadalan sira iha Maromak nia Liafuan bele ajuda ita atu iha relasaun diʼak ho ema seluk. (Mt 7:12; Flp 2:3, 4) Kuandu ita husik Maromak nia liafuan fó naroman ba ita-nia dalan, ita bele hatene oinsá mak ita-nia desizaun sei kona ita-nia futuru. (1 Tim 6:9) Bíblia mós fó-hatene nanis kona-ba Maromak nia hakarak ba futuru, ida-neʼe ajuda ita atu halaʼo ita-nia moris tuir Maromak nia hakarak neʼe. (Mt 6:33; 1 Joao 2:17, 18) Ita bele duni halaʼo moris neʼebé kontente se ita husik Maromak nia matadalan atu hatudu dalan ba ita-nia moris!
6. Tanbasá mak Bíblia iha kbiit atu ajuda ita atu halo funu hasoru Satanás?
6 Hanoin mós kona-ba oinsá mak Bíblia iha kbiit atu ajuda ita atu luta hasoru Satanás. Paulo bolu Bíblia nia mensajen “nuʼudar surik neʼebé espíritu fó”. (Lee Efeso 6:12, 17.) Kuandu ita hatoʼo mensajen neʼe ho didiʼak, mensajen neʼe bele halo ema la atan tan ba Satanás. Mensajen husi Bíblia mak hanesan surik neʼebé bele salva ema nia moris. Nuneʼe, ita tenke hakaʼas an atu uza Bíblia ho matenek!
Uza Bíblia ho didiʼak
7. Tanbasá mak importante atu aprende atu uza ho didiʼak “surik neʼebé espíritu fó”?
7 Soldadu ida bele uza nia surik ho didiʼak iha funu se nia aprende no treinu beibeik oinsá atu uza surik neʼe ho didiʼak. Nuneʼe mós ho uza “surik neʼebé espíritu fó” atu luta hasoru Satanás. Paulo hatete: “Halo buat hotu-hotu atu hamriik iha Maromak futar oin nuʼudar ema neʼebé susar oioin koko ona, no nuʼudar ema neʼebé labele moe kona-ba nia hahalok sira iha nia moris tomak, maibé . . . [“uza ho didiʼak”, MF] lia-menon lia-loos nian.”—2 Tim 2:15.
8, 9. Saida mak ajuda ita atu komprende buat neʼebé Bíblia hatete? Fó toʼok ezemplu.
8 Saida mak sei ajuda ita atu ‘uza ho didiʼak lia-menon lia-loos nian’ iha serbisu haklaken? Antes atu hatoʼo mensajen iha Bíblia ba ema seluk, ita rasik presiza komprende uluk kona-ba neʼe. Atubele halo ida-neʼe ita presiza haree ba versíkulu sira antes no depois versíkulu neʼebé ita hakarak uza ka ita presiza haree ba kapítulu tomak ka kapítulu seluk.
9 Atu ita bele komprende didiʼak eskritura ruma husi Bíblia, ita presiza haree informasaun neʼebé haleʼu eskritura neʼe. Paulo nia liafuan iha Galasia 5:13 hatudu ezemplu kona-ba neʼe. Nia hatete: “Kona-ba imi, maun-alin sira, Maromak bolu imi atu labele sai atan. Maibé keta husik moris laʼós atan nian halo imi-nia hakarak aat sira ukun imi. Imi-nia domin sei halo imi serbí malu.” Kuandu Paulo koʼalia kona-ba “labele sai atan”, neʼe katak sá? Nia koʼalia kona-ba la sai atan ba sala no mate, la sai atan ba hanorin falsu, ka la sai atan ba buat seluk? Informasaun sira iha livru neʼe hatudu katak Paulo koʼalia kona-ba rezultadu husi la sai atan tan ba “malisan neʼebé Ukun-Fuan lori mai”. (Gal 3:13, 19-24; 4:1-5) Nia koʼalia kona-ba la sai atan ba Ukun-Fuan Moisés nian tanba halo tuir Kristu. Ema sira neʼebé hafolin ida-neʼe, sira sai atan ba malu, ka serbí malu tanba domin. Maibé ema neʼebé la hatudu domin, sira koʼalia aat no halo aat ba malu.—Gal 5:15.
10. Atu komprende didiʼak eskritura ruma, ita presiza hanoin kona-ba informasaun saida deʼit? Iha neʼebé mak ita bele hetan informasaun sira-neʼe?
10 Atu komprende didiʼak eskritura ruma, ita mós presiza hanoin kona-ba informasaun seluk tan, hanesan sé mak hakerek livru husi Bíblia, horibainhira mak ida-neʼe hakerek, no iha situasaun saida. Diʼak mós atu hatene tansá mak hakerek livru neʼe no, se bele, buka-hatene kona-ba oinsá mak ema nia moris ka sira-nia tradisaun, sira-nia hahalok no morál, no sira-nia relijiaun iha tempu neʼebá. *
11. Ita tenke kuidadu atu la halo saida kuandu ita esplika lia-loos husi Bíblia?
11 ‘Uza ho didiʼak lia-menon lia-loos nian’, laʼós deʼit katak esplika lia-loos husi Bíblia iha dalan neʼebé loos. Maski ita bele uza Bíblia atu defende lia-loos, hanesan Jesus halo kuandu Diabu tenta nia, maibé ita tenke kuidadu atu la uza Bíblia atu hamoe ka hatún ema. (Deut 6:16; 8:3; 10:20; Mt 4:4, 7, 10) Ita tenke halo tuir apóstolu Pedro nia konsellu neʼebé hatete: “Iha imi-nia laran, hamtaʼuk Kristu, ita Naʼi. Hadiʼa an nafatin atu hatán ba ema neʼebé husu kona-ba imi-nia esperansa, maibé halo nia ho laran-kmaus no hamtaʼuk Maromak.”—1 Ped 3:15.
12, 13. Saida mak Maromak nia Liafuan bele “sobu rahun”? Fó toʼok ezemplu.
12 Rezultadu saida mak bele mosu kuandu uza ho didiʼak lia-loos husi Maromak nia Liafuan? (Lee 2 Korinto 10:4, 5.) Lia-loos husi Bíblia bele “sobu rahun uma fatuk nian”, neʼe katak harahun hanorin falsu, halakon hahalok aat, no filozofia neʼebé haleno ema nia matenek. Ita bele uza Bíblia atu halakon “hanorin hotu-hotu neʼebé foti-an hasoru Maromak nia matenek”. Ita bele uza Bíblia nia hanorin atu ajuda ema seluk atu hadiʼa sira-nia hanoin hodi tuir lia-loos.
13 Hanoin toʼok ezemplu ida husi feto neʼebé tinan 93, neʼebé hela iha rai-Índia. Husi kiʼik kedas nia fiar kona-ba reenkarnasaun. Kuandu nia komesa estuda Bíblia liuhusi karta ho nia oan-mane neʼebé hela iha rai seluk, nia simu kedas buat neʼebé nia aprende kona-ba Maromak Jeová no ninia promesa sira. Maibé, tanba ninia fiar kona-ba reenkarnasaun metin tebes iha nia laran, nia la simu buat neʼebé nia oan hakerek ba nia kona-ba saida mak akontese kuandu ema mate. Nia hatete: “Haʼu la komprende hanorin husi Bíblia neʼebé ó hatoʼo. Relijiaun hotu hanorin katak iha parte ida husi ema neʼebé la mate. Haʼu sempre fiar katak kuandu buat ida mate iha parte ida neʼebé la bele haree neʼebé sai husi isin, no parte neʼe moris nafatin hodi muda fali ba isin seluk, ida-neʼe akontese beibeik toʼo maizumenus dala 8.400.000. Tansá mak hanorin neʼe la loos? Ida-neʼe katak relijiaun hotu sala?” Iha situasaun neʼe, “surik neʼebé espíritu fó” bele sobu rahun fiar la loos neʼebé metin iha ema nia laran ka lae? Depois nia estuda liután kona-ba ida-neʼe husi Bíblia ba semana balu, nia hakerek: “Agora haʼu komesa ona atu komprende lia-loos kona-ba mate. Haʼu sente haksolok tebes atu hatene katak bainhira ema mate sira moris hiʼas fali, ita sei bele hasoru fali sira neʼebé ita hadomi. Haʼu hein atu Maromak nia Reinu mai lalais.”
Buka atu halo ema fiar
14. Halo ema fiar katak sá?
14 Uza Bíblia ho didiʼak laʼós deʼit katak temi eskritura sira. Paulo ‘buka atu halo ema fiar’, entaun ita mós presiza halo hanesan nia. (Lee Apostolu 28:23.) ‘Buka atu halo ema fiar’ mós katak buka atu manán sira. Kuandu ita halo ema fiar hanorin husi Bíblia, neʼe hanesan ita manán nia atu nia tau ninia fiar ba hanorin neʼe. Atu halo ida-neʼe ita presiza halo ita-nia rona-naʼin fiar katak buat neʼebé ita hatoʼo mak loos duni. Ita bele halo ida-neʼe iha dalan balu tuirmai.
15. Oinsá mak ita bele ajuda ema atu hafolin Maromak nia Liafuan?
15 Ajuda ema atu hafolin Maromak nia Liafuan. Kuandu ita lee eskritura ida ba ema, diʼak atu halo sira hatene tansá mak importante atu hatene Maromak nia hanoin kona-ba buat neʼebé ita koʼalia. Depois ita husu tiha pergunta ba uma-naʼin no hetan ninia resposta, karik ita bele hatete: ‘Mai ita haree saida mak Maromak nia hanoin kona-ba ida-neʼe.’ Ka ita bele husu: ‘Saida mak Maromak hatete kona-ba situasaun neʼe?’ Kuandu ita halo ida-neʼe, ita hatudu ba ema katak Bíblia mak husi Maromak no bele ajuda sira atu hafolin Maromak nia Liafuan. Halo ida-neʼe importante, liuliu kuandu ita haklaken ba ema neʼebé fiar Maromak maibé ladún hatene saida mak Bíblia hanorin.—Sal 19:7-10.
16. Saida mak bele ajuda ita atu esplika eskritura ho didiʼak?
16 Kuandu lee eskritura diʼak mós atu esplika. Paulo iha toman atu esplika no “hatudu” husi eskritura seluk katak buat neʼebé nia hanorin mak loos. (Apos 17:3) Baibain eskritura ida iha informasaun barak, tan neʼe karik ita presiza hatudu sai liafuan neʼebé kona buat neʼebé ita koʼalia. Ita bele halo ida-neʼe hodi temi fali liafuan neʼebé importante ka hodi husu pergunta atu ajuda rona-naʼin hatene liafuan neʼebé importante. Depois, esplika liafuan sira-neʼe katak sá. Tuirmai, ajuda ita-nia rona-naʼin atu hatene oinsá mak nia rasik bele uza eskritura neʼe iha nia moris.
17. Oinsá mak ita bele hatoʼo eskritura iha dalan neʼebé halo ema fiar?
17 Hatoʼo eskritura iha dalan neʼebé halo ema fiar. Paulo hatudu interese ba ema hodi koʼalia “ho sira husi Eskritura sira”. (Apos 17:2, 4) Hanesan Paulo, ita mós hakarak hakaʼas an atu hatoʼo informasaun hodi book ema nia laran. Kuandu ita husu pergunta neʼebé hatudu katak ita iha interese ba sira, ita bele “kuru” buat neʼebé iha sira-nia laran. (Prov 20:5) Maibé kuidadu atu ita la koʼalia makaʼas liu. Hatoʼo informasaun iha dalan neʼebé fasil atu komprende. Ita presiza fó ezemplu neʼebé hatudu katak buat neʼebé ita hatoʼo mak loos. Informasaun neʼebé ita hatoʼo tenke tuir buat neʼebé Maromak nia Liafuan hatete. Diʼak liu atu ita lee no esplika eskritura ida no fó ezemplu ka ilustrasaun ruma kona-ba ida-neʼe duké lee deʼit eskritura rua ka tolu tuituir malu. Kuandu ita fó informasaun ruma neʼebé hatudu katak buat neʼebé ita koʼalia mak loos, ita ‘aumenta liafuan iha ita-nia ibun atu halo ema fiar’. (Prov 16:23) Dala ruma karik ita mós presiza atu buka informasaun seluk tan. Ferik neʼebé tinan 93, neʼebé temi uluk, hakarak hatene tansá mak ema barak fiar katak klamar sei la mate. Tan neʼe kuandu ferik neʼe hatene hanorin neʼe nia hun no oinsá mak hanorin neʼe tama iha relijiaun barak iha mundu, ferik neʼe simu saida mak Bíblia nia hanorin kona-ba neʼe. *
Kontinua atu uza Bíblia ho matenek
18, 19. Tanbasá mak ita tenke kontinua atu uza ho matenek “surik neʼebé espíritu fó”?
18 Bíblia hatete: “Mundu neʼe nuʼudar ohin sei mohu.” Ema aat sira laʼo husi aat ba aat liu. (1 Kor 7:31; 2 Tim 3:13) Tan neʼe, importante tebes atu ita kontinua atu “sobu rahun uma fatuk nian” hodi uza “surik neʼebé espíritu fó”, neʼe mak Maromak nia liafuan.
19 Ita kontente tebes tanba ita iha Maromak nia Liafuan, Bíblia, no uza ninia mensajen atu halakon hanorin neʼebé falsu no ajuda ema neʼebé laran-moos! Klaru katak mensajen neʼe iha forsa atu harahun buat naran deʼit. Tan neʼe, mai ita hakaʼas an atu uza ho matenek “surik neʼebé espíritu fó” kuandu ita halaʼo serbisu neʼebé Maromak fó mai ita, neʼe mak haklaken ninia Reinu.
[Nota–rodapé]
^ par. 10 Ita bele hetan informasaun seluk tan kona-ba livru ida-idak iha Bíblia laran hodi lee iha livru “Segenap Alkitab Diilhamkan Allah dan Bermanfaat”, “Pemahaman Alkitab”, no mós informasaun iha Menara Pengawal ho títulu ‘Firman Yehuwa Itu Hidup’.
^ par. 17 Haree broxura Jiwa yang Tidak Berkematian—Lahirnya Doktrin Itu
Saida mak Ita aprende?
• Maromak nia Liafuan iha kbiit atu halo saida?
• Oinsá mak ita bele uza Bíblia ho didiʼak?
• Saida mak mensajen husi Bíblia bele halo kona-ba hanorin falsu neʼebé metin hanesan “uma fatuk”?
• Kuandu ita haklaken, ita bele halo saida deʼit atu halo ema fiar?
[Pergunta estudu nian]
[Kaixa/Dezeñu iha pájina 12]
Oinsá atu uza Maromak nia Liafuan hodi halo ema fiar
▪ Ajuda ema atu hafolin Bíblia
▪ Esplika eskritura sira
▪ Hatoʼo informasaun hodi book ema nia laran
[Dezeñu iha pájina 11]
Ita tenke aprende oinsá atu uza ho didiʼak “surik neʼebé espíritu fó”