Jesus fó glória ba Maromak nia ukun neʼebé loos
Jesus fó glória ba Maromak nia ukun neʼebé loos
‘Maromak tau nuʼudar buat karan hodi Kristu nia raan. [Maromak halo ida-neʼe] . . . atu hatudu iha tempu neʼe katak nia loos.’—ROM 3:25, 26.
1, 2. (a) Saida mak Bíblia hanorin mai ita kona-ba ema hotu nia situasaun? (b) Iha lisaun neʼe ita sei koʼalia kona-ba pergunta saida deʼit?
EMA barak hatene Bíblia nia istória kona-ba oinsá mak ema primeiru iha jardín Eden kontra hasoru Maromak. Adão nia sala lori rezultadu aat ba ita hotu, hanesan eskritura tuirmai neʼe esplika: “Nuʼudar husi ema ida deʼit mak sala tama iha mundu, no tan sala, mate; nuneʼe mate toʼo ba ema hotu, basá ema hotu sala.” (Rom 5:12) Maski ita hakaʼas an atu halo buat neʼebé loos, maibé ita hotu halo sala, tan neʼe ita presiza Maromak nia perdua. Apóstolu Paulo mós hatene kona-ba neʼe hodi dehan: “Basá haʼu la halo hahalok diʼak neʼebé haʼu hakarak halo, maibé halo hahalok aat neʼebé haʼu lakohi. Haʼu kasian loos duni!”—Rom 7:19, 24.
2 Tanba ita hotu moris mai nuʼudar ema sala-naʼin, diʼak atu buka-hatene resposta ba pergunta sira tuirmai neʼe: Oinsá mak Jesus husi Nazaré moris mai nuʼudar ema neʼebé la iha sala? Tanbasá mak nia hetan batizmu? Oinsá mak Jesus uza nia moris atu fó glória ba Maromak nia ukun neʼebé loos? Pergunta neʼebé importante liu mak Jesus nia mate kumpre buat saida deʼit?
Satanás duun katak Maromak la ukun iha dalan loos
3. Oinsá mak Satanás lohi Eva?
3 Ita-nia beiʼala primeiru, Adão no Eva, la simu Maromak nia ukun hodi hili fali ukun husi “samea uluk nian, neʼebé ema hanaran Diabu eh Satanás”. (Apok 12:9) Haree toʼok oinsá mak ida-neʼe akontese. Satanás duun katak Maromak Jeová ukun iha dalan neʼebé la loos. Nia hatudu ida-neʼe husi pergunta neʼebé nia husu ba Eva: “Maromak hatete katak imi labele han ai-fuan husi ai-hun hotu-hotu iha jardín laran, neʼe tebes duni ka lae?” Eva temi fali Maromak nia ukun-fuan kona-ba labele book ai-hun ida deʼit, hodi sira la mate. Tuirmai Satanás duun katak Maromak bosok. Diabu hatete: “Imi sei la mate.” Nia koʼalia tan hodi lohi Eva atu fiar katak Maromak subar hela buat neʼebé diʼak no katak hodi han ai-fuan neʼe, nia sei sai hanesan Maromak, hodi iha kbiit atu foti desizaun rasik kona-ba buat neʼebé loos no la loos.—Gên 3:1-5.
4. Oinsá mak Satanás sai fali ema nia ukun-naʼin?
4 Tuir loloos, Satanás nia liafuan hatudu katak ema sei sai kontente liu se sira livre husi Maromak nia ukun. Duké apoia Maromak nia ukun neʼebé loos, Adão rona ba nia feen no nia mós han ai-fuan neʼebé Maromak bandu. Nuneʼe Adão lakon nia relasaun diʼak ho Maromak Jeová no halo ema hotu sai atan ba sala no mate. Iha tempu neʼebá Satanás, “maromak mundu neʼe nian” mak sai fali ema nia ukun-naʼin.—2 Kor 4:4; Rom 7:14.
5. (a) Oinsá mak Maromak Jeová halo tuir buat neʼebé nia hatete ona? (b) Esperansa saida mak Maromak fó ba Adão no Eva nia bei-oan sira?
5 Maromak Jeová nunka bosok, tan neʼe nia halo tuir buat neʼebé nia hatete ona hodi fó kastigu-mate ba Adão no Eva. (Gên 3:16-19) Maibé neʼe dehan katak Maromak nia hakarak uluk nian sei la sai loos, ka lae? Lae duni! Iha tempu neʼebé Maromak Jeová tesi lia ba Adão no Eva, nia mós fó sai katak sira-nia bei-oan bele iha esperansa kapás. Nia halo ida-neʼe hodi fó-hatene katak nia sei hamosu “bei-oan” ida, no Satanás sei hakanek ninia ain-tuban. Maibé, Bei-Oan neʼebé Maromak promete nanis ona sei sai diʼak fali husi nia kanek no sei “harahun [Satanás] nia ulun”. (Gên 3:15) Bíblia esplika liután kona-ba ida-neʼe hodi dehan liafuan tuirmai neʼe kona-ba Jesus Kristu: “Tan neʼe mak Mane Maksoin mosu mai: atu halakon buat neʼebé Diabu halo tiha.” (1 Joao 3:8) Maibé oinsá mak Jesus nia hahalok no ninia mate fó glória ba Maromak nia dalan loos atu ukun?
Jesus nia batizmu hatudu saida
6. Oinsá mak ita hatene katak Adão nia sala la hadaʼet ba Jesus?
6 Maromak hakarak katak Jesus moris mai nuʼudar ema perfeitu hanesan ho Adão antes nia halo sala. (Rom 5:14; 1 Kor 15:45) Maibé oinsá? Anju Gabriel ho klaru esplika ba Jesus nia inan, Maria: “Espíritu santu sei tun ba ó no Naʼi Aas Liu Hotu nia kbiit sei hamahan ó. Tan neʼe santu neʼebé atu moris sei hanaran an ‘Maromak nia Oan.’” (Lc 1:35) Kuandu Jesus sei kiʼik, karik Maria esplika ba nia kona-ba oinsá nia moris. Nuneʼe, kuandu Maria no Jesus nia aman-hakiak, José, hetan nia iha Maromak nia templu, labarik neʼe hatete: “Imi la hatene katak haʼu sei hela iha haʼu Aman nia uma?” (Lc 2:49) Klaru katak husi kiʼik, Jesus hatene ona nia mak Maromak nia Oan. Tan neʼe atu fó glória ba Maromak nia dalan loos atu ukun mak buat neʼebé importante ba nia.
7. Buat folin-boot saida deʼit mak Jesus iha?
7 Jesus hatudu katak nia gosta atu aprende kona-ba Maromak hodi tuir beibeik reuniaun atu halaʼo adorasaun. Tanba nia neon perfeitu, ita bele fiar katak nia komprende buat hotu neʼebé nia rona no lee husi Eskritura Lia-Ebraiku. (Lc 4:16) Jesus mós iha buat ida tan neʼebé folin-boot, neʼe mak ninia isin perfeitu, neʼebé bele saran nuʼudar sakrifísiu atu salva ema. Kuandu Jesus hetan batizmu, nia halo orasaun no karik nia mós hanoin kona-ba liafuan neʼebé hakerek nanis iha Salmo 40:6-8.—Lc 3:21; lee Ebreu 10:5-10. *
8. Tanbasá mak João Batista hakarak hapara Jesus atu hetan batizmu?
8 Foufoun João Batista hakarak hapara Jesus atu hetan batizmu. Tanbasá? Tanba João fó batizmu ba ema judeu sira atu hatudu katak sira hakribi sira-nia sala hasoru ukun-fuan Moisés nian. Nuʼudar Jesus nia família, João hatene katak Jesus mak ema loos no tan neʼe la presiza atu hakribi sala. Maibé Jesus esplika ba João katak importante ba nia atu hetan batizmu. Jesus hatete: “Husik lai bá, diʼak duni katak ita halo nuneʼe atu halo tuir justisa tomak.”—Mt 3:15.
9. Jesus nia batizmu hatudu saida?
9 Nuʼudar ema neʼebé perfeitu, Jesus hatene katak hanesan ho Adão, nia mós bele iha oan sira neʼebé perfeitu. Maibé, Jesus nunka hakarak buat sira-neʼe tanba neʼe laʼós buat neʼebé Maromak Jeová hakarak nia atu halo. Maromak haruka Jesus mai mundu atu kumpre nia knaar nuʼudar Bei-Oan ka Mesias, neʼebé promete nanis ona. Knaar neʼe inklui saran nia moris neʼebé perfeitu nuʼudar sakrifísiu. (Lee Isaías 53:5. *) Klaru katak Jesus nia batizmu la hanesan ho ita-nian. Jesus la presiza dedika nia an ba Maromak Jeová tanba nia mós parte ba nasaun Izraél neʼebé dedika tiha ona ba Maromak. Jesus nia batizmu hatudu katak nia fó nia an atu halo Maromak nia hakarak hodi tuir buat hotu neʼebé hakerek nanis ona iha Eskritura sira kona-ba Mesias.
10. Maromak nia hakarak ba Jesus nuʼudar Mesias inklui saida deʼit? Oinsá mak Jesus sente kona-ba neʼe?
10 Maromak Jeová nia hakarak ba Jesus inklui haklaken lia-foun diʼak kona-ba Maromak nia Reinu, halo dixípulu, no treinu sira atu halaʼo serbisu haklaken. Hodi fó nia an ba Maromak, Jesus mós hatudu katak nia ho hakarak rasik prontu atu tahan kuandu ema fó terus no ikusmai mate. Nia halo nuneʼe atu hatudu katak nia apoia Maromak Jeová nia ukun neʼebé loos. Tanba Jesus hadomi tebes ninia Aman iha lalehan, nia kontente atu halo Maromak nia hakarak no kontente mós atu saran nia isin nuʼudar sakrifísiu. (Joao 14:31) Nia mós haksolok atu hatene katak nia bele oferese ba Maromak folin husi ninia moris neʼebé perfeitu atu sosa fali ita ema husi sala no mate. Kuandu Jesus fó nia an atu halaʼo knaar importante sira-neʼe, Maromak simu ka lae? Nia simu duni!
11. Oinsá mak Maromak Jeová hatudu katak nia simu Jesus nuʼudar Mesias ka Kristu, neʼebé promete nanis ona?
11 Evanjellu haat hatudu ho klaru katak Maromak Jeová fó sai ninia laran-kontente kuandu Jesus hetan batizmu iha Mota-Jordaun. João Batista fó sasin dehan: “Haʼu haree espíritu santu tun mai husi lalehan hanesan manu-falur ida, . . . hodi hela iha [Jesus], . . . Haʼu haree duni, hodi fó sasin katak nia mak Maromak nia Oan-Mane.” (Joao 1:32-34) Liután neʼe, iha tempu neʼebá Maromak Jeová rasik fó sai ninia laran-kontente hodi dehan: “Ida-neʼe mak haʼu-nia Oan doben, neʼebé fó ksolok mai haʼu.”—Mt 3:17; Mc 1:11; Lc 3:22.
Laran-metin nafatin toʼo mate
12. Saida mak Jesus halo durante tinan tolu ho balu depois ninia batizmu?
12 Tinan tolu ho balu tuirmai, Jesus ho laran tomak halo serbisu atu hanorin ema kona-ba ninia Aman no kona-ba Maromak nia ukun neʼebé loos. Jesus laʼo-ain deʼit ba fatin dook no fatin barak iha rai neʼebé promete, no ida-neʼe halo nia sente kole. Maski nuneʼe la iha buat ida neʼebé bele hapara nia atu fó sasin ho didiʼak kona-ba lia-loos. (Joao 4:6, 34; 18:37) Jesus hanorin ema seluk kona-ba Maromak nia Reinu. Hodi halo milagre atu kura ema moras, fó hahán ba ema-lubun neʼebé hamlaha, no mós halo ema mate moris fali, Jesus hatudu sai buat neʼebé Maromak nia Reinu sei halo ba ema iha futuru.—Mt 11:4, 5.
13. Saida mak Jesus hanorin kona-ba orasaun?
13 Jesus la buka glória ba nia an kuandu nia hanorin no halo milagre atu kura ema, maibé nia hatudu ezemplu kapás kona-ba haraik-an hodi fó glória hotu ba Maromak Jeová. (Joao 5:19; 11:41-44) Jesus mós hanorin kona-ba buat neʼebé importante liu atu temi iha orasaun. Iha ita-nia orasaun ita presiza husu Maromak atu halo nia naran, Jeová, “sai santu” no atu ninia ukun neʼebé loos sei troka Satanás nia ukun neʼebé aat, atu nuneʼe ninia hakarak “iha rai nuʼudar iha lalehan” sei akontese. (Mt 6:9, 10) Ita hatudu katak ita apoia buat neʼebé ita husu iha ita-nia orasaun hodi halo tuir Jesus nia konsellu atu “buka uluknanain Maromak nia reinu ho nia justisa”.—Mt 6:33.
14. Maski Jesus ema perfeitu, tanbasá mak nia presiza hakaʼas an atu kumpre ninia knaar atu halo Maromak nia hakarak?
14 Kuandu Jesus nia mate besik ona, nia komesa sente laran-taridu kona-ba responsabilidade boot neʼebé nia lori. Ninia Aman nia hakarak uluk nian no mós nia naran-diʼak depende ba Jesus atu tahan kuandu ema duun matak no tesi lia falsu ba nia, no mós kuandu nia hetan terus toʼo mate. Loron lima antes nia mate, Jesus harohan hodi dehan: “Oras neʼe haʼu laran-taridu: Haʼu sei dehan sá loos? ‘Aman, hasai tiha haʼu husi oras neʼe?’ Lae; tan neʼe duni mak haʼu mai toʼo oras neʼe.” Depois koʼalia tiha kona-ba buat neʼebé nia sente nuʼudar ema, Jesus hanoin fali kona-ba buat neʼebé importante liu no nia harohan: “Aman hahiʼi Ita-nia naran!” Maromak Jeová hatán kedas hodi dehan: “Haʼu hahiʼi tiha ona nia, no haʼu sei hahiʼi tan nia!” (Joao 12:27, 28) Klaru katak Jesus hatene Satanás sei koko ninia laran-metin iha dalan neʼebé ema seluk nunka hasoru. Maski nuneʼe, ita bele fiar katak hodi rona ninia Aman nia liafuan sira-neʼe, Jesus sente laran-manas katak nia bele apoia no fó glória ba Maromak nia ukun. No nia hetan duni susesu!
Jesus nia mate kumpre buat saida deʼit
15. Foin antes Jesus mate, tanbasá mak nia hatete: “Buat hotu tuir loos ona”?
15 Kuandu ema tara Jesus iha ai-riin terus nian no nia iis besik ona atu kotu, nia hatete: “Buat hotu tuir loos ona.” (Joao 19:30) Ho Maromak nia ajuda, Jesus bele kumpre duni buat barak iha tinan tolu ho balu nia laran, hahú husi ninia batizmu toʼo nia mate! Kuandu Jesus mate, akontese rai-nakdoko makaʼas, no xefe ida husi tropa Roma nian neʼebé toma konta atu fó kastigu hatete: “Loos duni, ida-neʼe Maromak Oan.” (Mt 27:54) Xefe neʼe karik haree oinsá ema goza Jesus tanba Jesus dehan katak nia mak Maromak nia Oan. Maski Jesus hasoru susar barak, nia nafatin laran-metin no hatudu katak Satanás mak bosok-teen boot. Kona-ba ema sira neʼebé apoia Maromak nia ukun, Satanás duun hodi dehan: “Buat hotu neʼebé ema iha, nia sei fó atu salva nia moris.” (Jó 2:4) Hodi laran-metin toʼo rohan, Jesus hatudu katak Adão no Eva bele mós laran-metin kuandu hasoru tentasaun neʼebé kiʼik. Buat neʼebé importante liu hotu mak, Jesus nia moris no mate apoia no fó glória ba Maromak Jeová nia ukun nuʼudar ukun neʼebé loos. (Lee Provérbios 27:11. *) Jesus nia mate kumpre buat seluk tan ka lae? Sin, loos duni!
16, 17. (a) Oinsá mak Maromak nia atan sira neʼebé mate ona antes Jesus mai rai bele iha relasaun diʼak ho Maromak? (b) Oinsá mak Maromak Jeová fó kolen ba ninia Oan neʼebé laran-metin? Saida mak Naʼi Jesus Kristu kontinua atu halo?
16 Maromak Jeová nia atan barak mate ona antes Jesus mai toʼo rai. Atan sira-neʼe iha relasaun diʼak ho Maromak no nia fó sira esperansa atu hetan moris-hiʼas. (Isa 25:8; Dan 12:13) Oinsá mak Jeová, Maromak neʼebé santu, bele kumpre buat loos no justisa hodi fó bensaun furak hanesan neʼe ba ema sala-naʼin sira? Bíblia esplika katak ema presiza tau fiar ba Jesus nia sakrifísiu, tanba “Maromak tau nuʼudar buat karan hodi [Jesus Kristu] nia raan, . . . neʼe atu hatudu Maromak nia justisa, basá tan Maromak nia laran-luak, nia fó perdua ba sala sira neʼebé ema halo tiha ona, atu hatudu iha tempu neʼe katak nia loos no nia halo loos sira neʼebé fiar iha Jesus Kristu”.—Rom 3:25, 26. *
17 Maromak Jeová fó kolen ba Jesus hodi halo nia moris-hiʼas no tuur iha pozisaun neʼebé aas liu fali pozisaun neʼebé nia iha antes nia tun mai rai. Agora Jesus mak nuʼudar kriatura espíritu ida neʼebé la bele mate ona ka iha moris neʼebé la iha rohan. (Ebr 1:3) Nuʼudar Amlulik Boot no Liurai, Naʼi Jesus Kristu kontinua ajuda ninia dixípulu sira atu fó glória ba Maromak nia justisa. Ita agradese tebes ba ita-nia Aman Jeová iha lalehan, Ida neʼebé Fó Kolen ba sira hotu neʼebé halo nuneʼe no banati-tuir nia Oan hodi serbí Maromak ho laran-metin!—Lee Salmo 34:3; * Ebreu 11:6.
18. Ita sei aprende saida iha lisaun tuirmai?
18 Ema laran-metin hotu komesa husi Abel nia tempu, bele iha relasaun diʼak ho Maromak Jeová tanba sira hatudu fiar ba Maromak no ba buat hotu neʼebé nia promete kona-ba Bei-Oan. Maromak Jeová hatene katak ninia Oan sei laran-metin duni ba nia no katak ninia Oan nia mate nuʼudar sakrifísiu neʼebé perfeitu bele “kasu mundu nia sala”. (Joao 1:29) Jesus nia mate mós fó bensaun ba ema sira neʼebé moris ohin loron. (Rom 3:26) Entaun, bensaun saida deʼit mak Kristu nia sakrifísiu lori mai ita ida-idak? Ita sei aprende kona-ba neʼe iha lisaun tuirmai.
[Nota–rodapé]
^ par. 7 Iha neʼe apóstolu Paulo temi liafuan husi Salmo 40:6-8 tuir tradusaun Septuaginta iha lia-gregu, neʼebé inklui liafuan “Ita prepara isin mai haʼu”. Liafuan sira-neʼe la mosu iha tradusaun Eskritura Lia-Ebraiku antigu nian neʼebé agora iha hela.
^ par. 9 Isaías 53:5: “Maibé nia hetan sona ba ita-nia sala; nia harahun tiha ba ita-nia hahalok la loos. Nia simu kastigu atu ita hetan dame, no tan ninia kanek ita hetan kura.”
^ par. 15 Provérbios 27:11: “Haʼu-nia oan, sai matenek bá, no halo haʼu-nia laran kontente, atu haʼu bele hatán ba ida neʼebé koʼalia aat mai haʼu.”
^ par. 16 Haree “Pergunta husi lee-naʼin” iha pájina 6 no 7.
^ par. 17 Salmo 34:3: “Mai imi hotu, mai fó glória ba Jeová hamutuk ho haʼu, no mai ita hamutuk hahiʼi nia naran.”
Oinsá ita hatán?
• Oinsá mak Satanás duun katak Maromak la ukun iha dalan loos?
• Jesus nia batizmu hatudu saida?
• Jesus nia mate kumpre buat saida deʼit?
[Pergunta estudu nian]
[Dezeñu iha pájina 9]
Jesus nia batizmu hatudu saida?