Ajuda oan sira atu hatene Maromak Jeová nia organizasaun

LABARIK sira gosta atu aprende buat foun. Hanoin toʼok kona-ba pergunta sira neʼebé karik ema Izraél nia oan sira husu kuandu halaʼo Páskua primeiru iha rai-Ejitu: ‘Tansá mak ita tenke oho bibi-oan?’ ‘Tansá mak apá tenke tau bibi-oan nia raan iha odamatan leten?’ ‘Ita atu bá neʼebé?’ Husi buat neʼebé Maromak Jeová haruka aman sira iha nasaun Izraél atu hatete ba oan sira, ita hatene katak nia gosta atu labarik sira husu pergunta hanesan neʼe. Hodi koʼalia kona-ba selebrasaun Páskua nian neʼebé sei halaʼo iha tempu oin mai Maromak Jeová haruka sira hodi dehan: “Kuandu ó-nia oan hatete ba ó, ‘Festa neʼe katak sá ba ita?’ Se nuneʼe ó tenke hatete, ‘Ida-neʼe mak sakrifísiu páskua nian ba Maromak Jeová, ida neʼebé laʼo liu Israel nia oan sira-nia uma iha rai-Ejitu kuandu nia fó malisan ba ema Ejitu sira, maibé nia salva ita iha ita-nia uma.’” (Êx 12:24-27) Maromak Jeová mós fó-hanoin ba inan-aman sira iha nasaun Izraél katak importante atu hatán pergunta sira neʼebé oan husu kona-ba “ukun-fuan no lei sira” neʼebé Maromak Jeová fó ba sira.—Deut 6:20-25.

 Klaru katak Maromak Jeová hakarak atu oan sira hetan resposta neʼebé diʼak ba sira-nia pergunta kona-ba adorasaun loos. Resposta neʼebé diʼak bele book oan atu hadomi Jeová nuʼudar sira-nia Maromak no Salvadór. Ohin loron, Maromak Jeová hakarak buat neʼebé hanesan ba labarik no joven sira. Dalan ida atu inan-aman bele haburas oan sira-nia domin ba Maromak no ninia povu mak hodi ajuda sira atu hatene didiʼak kona-ba Maromak Jeová nia organizasaun no oinsá organizasaun neʼe ajuda ita. Entaun, mai ita haree oinsá mak ita bele ajuda oan sira atu hatene diʼak liután kona-ba Maromak nia organizasaun.

Ita-nia kongregasaun

Oan sira presiza hatene didiʼak kona-ba sira-nia família nia kongregasaun. Atu halo ida-neʼe, importante ba inan-aman sira atu lori oan ba reuniaun sira hotu. Hodi halo nuneʼe, ita sei halo tuir matadalan neʼebé Maromak Jeová fó ba ema Izraél sira, neʼebé dehan: “Halibur povu hamutuk, mane no feto no labarik sira . . . , atu sira bele rona no aprende, tanba sira tenke taʼuk ba Jeová ita-nia Maromak no halo tuir liafuan hotu husi lei neʼe. No sira-nia oan neʼebé seidauk hatene presiza rona, no sira tenke aprende atu taʼuk ba Jeová ita-nia Maromak.”—Deut 31:12, 13.

Husi kiʼik kedas labarik sira bele hahú atu aprende kona-ba Maromak Jeová nia Liafuan. Apóstolu Paulo koʼalia kona-ba Timóteo hodi dehan: “Hori kiʼik kedas, ó hatene Sagrada Eskritura.” (2 Tim 3:15) Iha reuniaun sira iha Reuniaun-Fatin, labarik sira neʼebé tinan kiʼik mós bele hahú atu komprende informasaun neʼebé hatoʼo no karik bele hatene knananuk sira. Iha Reuniaun-Fatin, sira bele aprende atu uza no hafolin Bíblia no livru sira neʼebé koʼalia kona-ba Bíblia. Liután neʼe, iha Reuniaun-Fatin,  sira bele haree rasik hahalok neʼebé hatudu kona-ba Kristu nia dixípulu loos, neʼe mak domin loos neʼebé ema hatudu ba malu. Jesus hatete: “Haʼu fó ba imi ukun-fuan foun: imi sei hadomi malu; nuʼudar haʼu hadomi imi, nuneʼe mós imi sei hadomi malu. Nuneʼe mak ema hotu sei hatene katak imi haʼu-nia eskolante sira: wainhira imi hadomi malu.” (Joao 13:34, 35) Domin no dame neʼebé oan sira haree iha Reuniaun-Fatin sei book sira no sei ajuda sira atu haree reuniaun nuʼudar parte importante iha sira-nia moris tomak.

Kuandu ita iha toman atu toʼo sedu iha Reuniaun-Fatin no la fila kedas kuandu reuniaun ramata, ida-neʼe fó oportunidade ba oan sira atu bele halo belun ho ema seluk. Duké husik deʼit oan sira atu ransu malu ho labarik seluk, diʼak atu ita ajuda sira atu koñese irmaun-irmán sira ho idade oioin. Se oan sira koñese ema neʼebé idade liu sira, ida-neʼe bele ajuda sira atu aprende katak ferik-katuas sira iha matenek no iha esperiénsia barak neʼebé diʼak. Bíblia dehan katak Zacarias mak hanesan “mestre kona-ba taʼuk ba Maromak neʼebé loos”. Zacarias book liurai joven ida naran Uzias, liurai husi Judá, hodi serbí Maromak ho laran-metin. Nuneʼe mós ho Maromak Jeová nia atan sira ohin loron neʼebé serbí Maromak ba tinan barak ona, sira bele book joven sira atu serbí Maromak ho laran-manas. (2 Crôn 26:1, 4, 5) Iha Reuniaun-Fatin, ita mós bele esplika ba oan sira kona-ba biblioteka, kuadru avizu, no buat seluk.

Organizasaun iha mundu tomak

Importante ba oan sira atu komprende katak sira-nia kongregasaun mak parte husi organizasaun boot ida neʼebé iha kongregasaun 100.000 liu iha mundu tomak. Ita bele esplika buat oioin kona-ba organizasaun neʼe, no oinsá organizasaun neʼe laʼo, no mós saida mak labarik sira bele halo atu apoia organizasaun neʼe. Ajuda sira atu hatene tanbasá mak ita gosta atu tuir reuniaun boot sira, no mós gosta atu simu vizita husi katuas área nian.—Haree kaixa “Tópiku sira neʼebé Ita bele koʼalia hamutuk durante Adorasaun Família nian,” iha pájina 28.

Se ita iha oportunidade, diʼak atu konvida irmaun sira neʼebé vizita kongregasaun sira, misionáriu sira, ema neʼebé serbí iha Betel, no irmaun-irmán seluk neʼebé serbí Maromak ba tempu-tomak atu han hamutuk ita iha ita-nia uma. Keta hanoin katak sira la iha tempu atu koʼalia ho ita-nia oan sira. Sira hakaʼas an atu halo tuir ezemplu husi Jesus, neʼebé gosta atu simu labarik sira no koʼalia ho sira. (Mc 10:13-16) Hodi rona ema sira-neʼe konta esperiénsia no konta kona-ba ksolok neʼebé sira hetan tanba serbí Maromak, ida-neʼe karik bele ajuda labarik sira atu halo planu atu serbí Maromak tempu-tomak.

Saida tan mak ita bele halo nuʼudar família atu ajuda ita-nia oan hodi bele hatene diʼak liután kona-ba Maromak Jeová nia organizasaun? Karik ita bele halo programa atu estuda hamutuk nuʼudar família hodi uza livru ho títulu Saksi-Saksi Yehuwa—Pemberita Kerajaan Allah. Fó sai hahalok sira neʼebé Maromak Jeová nia atan sira hatudu, hanesan laran-metin, haraik-an, no hahalok seluk tan. Hatudu kona-ba oinsá mak Maromak Jeová uza sira atu habelar lia-foun diʼak ba mundu tomak. Uza DVD sira husi Maromak Jeová nia organizasaun atu hanorin oan sira informasaun importante husi tempu uluk no agora. Se ita bele, diʼak atu vizita sukursál ka uma Betel iha ita-nia rai ka iha rai seluk. Halo vizita hanesan neʼe bele book ita-nia oan atu hafolin dalan neʼebé grupu atan laran-metin tau matan ba Maromak nia organizasaun, hodi bele fó ai-han espirituál ba sira-nia irmaun-irmán iha mundu tomak, hanesan iha apóstolu sira-nia tempu.—Mt 24:45-47; Apos 15:22-31.

Hatoʼo informasaun neʼebé oan sira bele komprende

Kuandu ita hanorin ita-nia oan sira, hanoin nafatin kona-ba dalan neʼebé Jesus hanorin ninia apóstolu sira. Nia dehan ba sira: “Haʼu sei iha tan buat barak atu hateten ba imi, maibé oras neʼe imi la bele simu hotu.” (Joao 16:12) Jesus la hatoʼo informasaun barak demais ba ninia dixípulu sira. Maibé, nia hanorin sira  neineik-neineik lia-loos neʼebé importante atu nuneʼe sira bele komprende ho didiʼak. Hanesan neʼe mós ho inan-aman, diʼak atu la hatoʼo informasaun neʼebé barak demais ba oan sira. Hodi hanorin sira neineik-neineik kona-ba Maromak nia organizasaun, ida-neʼe sei halo sira gosta no hakarak atu aprende kona-ba kongregasaun kristaun. Nuʼudar ita-nia oan sai boot, ita bele repete fali informasaun neʼebé sira aprende ona no esplika liután informasaun seluk tuir buat neʼebé sira bele komprende.

Kongregasaun kristaun mak parte importante ida neʼebé bele ajuda ita atu bele iha relasaun neʼebé metin ho Maromak Jeová. Joven sira neʼebé hola parte ho laran-manas iha atividade kongregasaun nian bele iha forsa atubele tahan hasoru Satanás nia mundu aat neʼe. (Rom 12:2) Ami fiar katak ita sei haksolok duni atu ajuda ita-nia oan atu hatene diʼak liután Maromak Jeová nia organizasaun. Ho Maromak nia bensaun, ami hein katak ita-nia oan sira bele laran-metin ba nia organizasaun no ba ita-nia Aman neʼebé hadomi ita hotu.

[Kaixa/Dezeñu iha pájina 28]

Tópiku sira neʼebé Ita bele koʼalia hamutuk durante Adorasaun Família nian

Iha kraik iha tópiku balu kona-ba Maromak nia organizasaun neʼebé Ita bele uza kuandu halaʼo Adorasaun Família nian.

▪ Hanoin fali kona-ba Ita-nia kongregasaun nia istória. Bainhira no oinsá mak kongregasaun neʼe harii? Iha tempu uluk kongregasaun neʼe halaʼo reuniaun sira iha fatin neʼebé deʼit? Diʼak mós atu konvida ema neʼebé kleur ona iha kongregasaun neʼe ba Ita-nia uma hodi hatán Ita-nia oan nia pergunta sira.

▪ Esplika kona-ba tansá mak kongregasaun iha reuniaun oioin no mós iha reuniaun boot sira. Esplika mós kona-ba oinsá mak reuniaun sira-neʼe bele lori buat diʼak ba oan sira.

▪ Koʼalia hamutuk kona-ba eskola oioin neʼebé halaʼo iha Maromak Jeová nia organizasaun. Konta esperiénsia balu neʼebé hatudu oinsá mak eskola sira-neʼe ajuda ona irmaun-irmán sira atu hetan rezultadu diʼak iha sira-nia serbisu ba Maromak.

▪ Ajuda oan sira atu komprende katak haklaken beibeik lia-foun diʼak mak buat ida neʼebé importante. Hatudu ba oan sira kona-ba oinsá mak sira-nia serbisu haklaken mós bele inklui iha relatóriu neʼebé fó sai iha livru tinan-tinan nian husi Testemuña ba Jeová.

▪ Koʼalia hamutuk kona-ba dalan oioin neʼebé Ita-nia oan sira bele serbí Maromak ba tempu-tomak iha ninia organizasaun. Iha informasaun diʼak iha livru Diorganisasi untuk Melakukan Kehendak Yehuwa, kapítulu 10.

▪ Ajuda joven sira atu komprende tanbasá mak presiza halo tuir matadalan sira iha kongregasaun. Esplika kona-ba tansá mak la diʼak atu oan sira kontra Maromak Jeová nia organizasaun maski iha dalan neʼebé kiʼik. Hatudu ba sira kona-ba oinsá mak sira bele apoia kongregasaun nia unidade liuhusi halo tuir matadalan husi katuas sira.

Dezeñu

Ita-nia oan sei aprende buat diʼak kuandu sira habelun ho ema neʼebé serbí Maromak kleur ona

[Dezeñu iha pájina 26]

Hanesan iha Izraél antigu, ohin loron inan-aman sira hakaʼas an atu fó resposta neʼebé diʼak kuandu oan sira husu kona-ba Maromak Jeová nia organizasaun