Kontinua buka uluk “buat neʼebé loos tuir Maromak nia haree”
Kontinua buka uluk “buat neʼebé loos tuir Maromak nia haree”
“Kontinua buka uluknanain Maromak nia reinu no buat neʼebé loos tuir Maromak nia haree; buat hirak-neʼe sei fó tan ba imi.”—MT 6:33, MF.
1, 2. Saida mak buat neʼebé loos tuir Maromak nia haree? No ida-neʼe haleno Maromak nia hahalok saida deʼit?
“KONTINUA buka uluknanain Maromak nia reinu.” (Mt 6:33, MF) Testemuña ba Jeová hotu ohin loron hatene kona-ba konsellu neʼe neʼebé Jesus Kristu hatoʼo iha ninia diskursu iha foho. Iha buat hotu neʼebé ita halo iha ita-nia moris, ita hakaʼas an atu hatudu katak ita hafolin Maromak nia Reinu, ka governu, no hakarak atu laran-metin ba governu neʼe. Maibé ita mós presiza hanoin kona-ba parte tuirmai husi versíkulu neʼe neʼebé dehan buka uluk “buat neʼebé loos tuir Maromak nia haree”. Entaun, saida mak buat neʼebé loos tuir Maromak nia haree? No buka uluk buat sira-neʼe katak sá?
2 Liafuan iha lia orijinál neʼebé tradús nuʼudar buat neʼebé loos tuir Maromak nia haree, bele mós tradús nuʼudar justisa. Buat neʼebé loos ka justisa katak buat loos hodi tuir Maromak nia hahalok sira no buat neʼebé nia hafolin. Nuʼudar Kriadór, Maromak Jeová iha direitu atu halo lei kona-ba buat neʼebé diʼak no aat, buat neʼebé loos no sala. (Apok 4:11) Maski nuneʼe Maromak nia matadalan neʼebé loos la hanesan ho lista naruk kona-ba buat neʼebé ita bele halo ka labele halo. Maibé ida-neʼe haleno ninia hahalok sira, liuliu ninia hahalok justisa no hahalok furak seluk hanesan domin, matenek, no kbiit. Sin, Maromak nia matadalan neʼebé loos iha relasaun ho ninia hakarak sira. Ida-neʼe inklui buat neʼebé nia hakarak atu ema neʼebé serbí nia halo tuir.
3. (a) Buka uluk buat neʼebé loos tuir Maromak nia haree katak sá? (b) Tanbasá mak ita halo tuir Maromak Jeová nia matadalan neʼebé perfeitu?
3 Buka uluk buat neʼebé loos tuir Maromak nia haree katak sá? Neʼe katak halo Maromak nia hakarak hodi halo nia kontente. Ida-neʼe mós inklui hakaʼas an atu moris tuir ninia matadalan sira neʼebé perfeitu, laʼós moris tuir ita-nia hakarak rasik. (Lee Roma 12:2.) Ita halo tuir Maromak Jeová nia lei sira laʼós deʼit tanba ita taʼuk atu hetan kastigu, maibé tanba ita hakarak atu iha relasaun diʼak ho nia. Ita-nia domin ba Maromak mak book ita atu hakaʼas an atu halo nia kontente hodi moris tuir ninia matadalan sira, laʼós moris tuir deʼit buat neʼebé ita hanoin mak loos. Ita hatene katak halo tuir Maromak mak buat neʼebé loos no Maromak kria ita atu halo nuneʼe. Ita mós tenke hadomi justisa ka buat neʼebé loos, hanesan Jesus Kristu, Liurai ba Maromak nia Reinu.—Ebr 1:8, 9.
4. Tanbasá mak importante atu buka uluk buat neʼebé loos tuir Maromak nia haree?
4 Tanbasá mak importante atu buka uluk buat neʼebé loos tuir Maromak nia haree? Hanoin toʼok ida-neʼe: Maromak Jeová fó ukun-fuan ba Adão no Eva atu la han ai-fuan husi ai-hun ida. Nia halo ida-neʼe atu haree se sira simu ka la simu Maromak nia direitu atu halo ukun-fuan ba sira. (Gên 2:17; 3:5) Tanba sira la halo tuir, ida-neʼe lori susar no mate ba sira no ba ita hotu nuʼudar sira-nia bei-oan. (Rom 5:12) Maibé, Maromak nia Liafuan hatete: “Nia neʼebé buka buat loos no buka laran-diʼak neʼebé nakonu ho domin sei hetan moris, justisa no glória.” (Prov 21:21) Sin, hodi buka uluk buat neʼebé loos tuir Maromak nia haree, ida-neʼe sei ajuda ita atu iha relasaun diʼak ho Maromak Jeová, no ikusmai ita sei hetan salvasaun.—Rom 3:23, 24.
Perigu atu fiar an demais
5. Ita presiza hasees an husi perigu saida?
5 Iha apóstolu Paulo nia karta ba ema kristaun iha Roma, nia fó avizu kona-ba perigu ida. Ita hotu presiza hasees an husi perigu neʼe se ita hakarak hetan susesu atu buka uluk buat neʼebé loos tuir Maromak nia haree. Paulo koʼalia kona-ba ema judeu hodi dehan: “Haʼu fó sasin ba sira-nia laran-manas kona-ba Maromak, maibé sira-nia laran-manas neʼe nakukun hela. Basá, sira la hatene katak justisa mai husi Maromak; maibé sira hakaʼas an atu hetan justisa tuir sira dalan, sira la simu Maromak nia justisa.” (Rom 10:2, 3) Tuir Paulo, ema judeu sira-neʼe la hatene Maromak nia justisa ka buat neʼebé loos tuir Maromak nia haree tanba sira sempre buka atu hatudu sira-nia an nuʼudar ema loos tuir sira rasik nia hanoin. *
6. Ita tenke hasees an husi hahalok saida? Tanbasá?
6 Dalan ida neʼebé bele halo ita monu ba perigu neʼe mak hodi kompara ita-nia serbisu ba Maromak ho ema seluk nian. Se ita iha hanoin hanesan neʼe, ida-neʼe bele book ita atu sai fiar an demais kona-ba ita rasik nia matenek no kona-ba ita-nia hahalok sira. Maibé, se ita fiar an demais, ita hatudu katak ita la hanoin kona-ba buat neʼebé loos tuir Maromak nia haree. (Gal 6:3, 4) Tuir loloos, buat neʼebé book ita atu halo buat neʼebé loos mak ita-nia domin ba Maromak Jeová. Se ita fiar an demais katak ita-nia hahalok sira mak loos, ida-neʼe bele halo ita-nia domin ba Maromak la iha folin.—Lee Lucas 16:15.
7. Iha dalan saida mak Jesus fó konsellu kona-ba hahalok fiar an demais?
7 Jesus hanoin sira neʼebé sente “katak sira ema santu, no hakribi ema seluk” no tan neʼe nia fó konsellu ba ema hanesan neʼe, neʼebé fiar an demais. Nia fó ai-knanoik ida-neʼe: “Ema naʼin-rua saʼe ba templu atu harohan: ida farizeu, ida seluk publikanu. Farizeu neʼe hamriik tiha, hodi harohan nuneʼe: ‘Naʼi Maromak, haʼu agradese Ita-Boot, basá haʼu laʼós hanesan ema seluk: sira mesak ema naʼok-teen, kaan-teen, laran-foʼer; haʼu la hanesan mós ema publikanu neʼe. Haʼu hadera an semana ida dala rua. Haʼu selu impostu husi haʼu-nia rikusoi tomak.’ Publikanu fali hamriik dook, la brani atu foti matan, maibé baku deʼit nia hirus-matan dehan: ‘Naʼi Maromak, sadiʼa atan haʼu, ema maksalak!’” Jesus ramata ninia ai-knanoik hodi dehan: “Tebes, haʼu dehan ba imi katak ema neʼe fila ba uma loos ona, ida seluk lae. Basá ema neʼebé foti-an, Naʼi sei hatún nia; no ema neʼebé haraik-an, Naʼi sei foti nia.”—Lc 18:9-14.
Perigu atu “hanoin an nuʼudar ema neʼebé loos liu hotu”
8, 9. “Hanoin an nuʼudar ema neʼebé loos liu hotu” katak sá? Ida-neʼe bele book ita atu halo saida?
8 Iha perigu ida tan neʼebé ita presiza hasees an. Ida-neʼe temi iha Eclesiastes 7:16, eskritura neʼe hatete: “Keta hanoin an nuʼudar ema neʼebé loos liu hotu, ka keta hatudu ó-nia an nuʼudar ema neʼebé matenek liu. Tanbasá mak ó hakarak estraga ó-nia an rasik?” Iha versíkulu 20 husi eskritura neʼe, fó razaun kona-ba tansá mak diʼak atu hasees an husi hahalok neʼe, versíkulu neʼe dehan: “Tanba la iha ema loos iha rai tomak neʼebé nafatin halo buat diʼak no la halo sala.” Ema neʼebé “hanoin an nuʼudar ema neʼebé loos liu hotu” dala barak buka atu deside rasik buat neʼebé nia hanoin mak loos no tesi lia ba ema seluk tuir ninia hanoin rasik. Tuir loloos, ema neʼebé halo nuneʼe sente katak ninia hanoin aas liu fali Maromak nian, maibé klaru katak hahalok hanesan neʼe mak buat neʼebé la loos iha Maromak nia haree.
9 Kuandu ita “hanoin an nuʼudar ema neʼebé loos liu hotu”, ida-neʼe bele book ita atu iha dúvida kona-ba Maromak Jeová nia dalan atu rezolve problema sira. Maibé, se ita iha dúvida katak buat neʼebé Maromak Jeová halo mak la justisa ka la loos, ita komesa atu halo ita-nia hanoin kona-ba buat neʼebé loos ka sala sai aas liu fali Maromak Jeová nian. Ida-neʼe hanesan ita tau Maromak iha tribunál no tesi lia ba nia tuir ita rasik nia hanoin kona-ba buat neʼebé loos no la loos. Maibé, tuir loloos Maromak Jeová deʼit mak iha direitu atu deside matadalan neʼebé loos, laʼós ita, loos ka lae?—Rom 14:10.
10. Hanesan ho Job, saida mak bele book ita atu tesi lia ba Maromak?
10 Maski ita hotu lakohi tesi lia ba Maromak ho neon, maibé tanba ita mak ema sala-naʼin ita bele monu ba lasu neʼe. Ita bele hanoin hanesan neʼe liuliu kuandu ita haree buat ida neʼebé ita sente katak la justisa ka la loos no kuandu ita rasik monu ba susar ruma. Mane laran-metin ida naran Job mós monu ba lasu atu tesi lia ba Maromak. Bíblia temi katak Job mak “ema neʼebé iha hahalok loos no laran-moos, no taʼuk ba Maromak no hadook an husi hahalok aat”. (Jó 1:1) Maibé kuandu Job hetan susar oioin nia hanoin katak situasaun neʼe mak la justisa ka la loos. Ida-neʼe book Job atu hatete katak “ninia an mak loos liu fali Maromak”. (Jó 32:1, 2) Ikusmai Maromak tenke hadiʼa Job nia hanoin neʼe. Dala ruma ita mós hasoru situasaun neʼebé hanesan. Se nuneʼe, saida mak bele ajuda ita atu hadiʼa ita-nia hanoin?
Ita la iha informasaun hotu
11, 12. (a) Se ita hanoin katak situasaun ruma mak la justisa, saida mak ita presiza hanoin-hetan? (b) Tanbasá mak ema balu sente katak Jesus nia ai-knanoik kona-ba serbisu-naʼin iha toʼos-uvas nian hatudu kona-ba situasaun neʼebé la iha justisa?
11 Importante atu hanoin-hetan katak dala barak ita la hatene informasaun hotu kona-ba situasaun ida. Ida-neʼe hanesan mós ho Job. Nia la hatene kona-ba Maromak nia anju sira-nia reuniaun iha lalehan, iha neʼebé Satanás duun matak Job. (Jó 1:7-12; 2:1-6) Job la hatene katak problema neʼebé nia hasoru mak mai husi Satanás. Tuir loloos, karik Job mós la hatene loos kona-ba Satanás. Tan neʼe, nia duun katak Maromak mak hamosu problema sira-neʼe ba nia. Sin, fasil duni atu hanoin sala kuandu ita la hatene informasaun hotu.
12 Hanoin toʼok Jesus nia ai-knanoik kona-ba serbisu-naʼin sira iha toʼos-uvas nian. (Lee Mateus 20:8-16.) Iha ai-knanoik neʼe Jesus fó sai katak toʼos-naʼin selu osan neʼebé hanesan ba serbisu-naʼin hotu, maski sira serbisu loron tomak ka serbisu oras ida deʼit. Oinsá mak ita sente kona-ba neʼe? Ita sente katak neʼe mak buat loos? Karik ita sente kasian ba serbisu-naʼin sira neʼebé serbisu loron tomak iha loron manas nia laran. Sira merese duni atu simu osan barak liu, loos ka lae? Hodi iha hanoin hanesan neʼe, ita bele sente katak toʼos-naʼin neʼe mak ema neʼebé la hatudu domin no justisa. Husi ninia resposta ba serbisu-naʼin sira, ita mós bele sente katak toʼos-naʼin neʼe uza sala ninia kbiit. Maibé, ita hatene informasaun hotu kona-ba situasaun neʼe ka lae?
13. Oinsá mak ita bele hanoin iha dalan seluk Jesus nia ai-knanoik kona-ba serbisu-naʼin iha toʼos-uvas nian?
13 Mai ita hanoin kona-ba ai-knanoik neʼe iha dalan seluk. Klaru katak toʼos-naʼin iha ai-knanoik neʼe hatene katak serbisu-naʼin hotu presiza osan atu bele sosa ai-han ba sira-nia família. Iha Jesus nia tempu, ema sempre selu serbisu-naʼin sira iha loron ida-idak. Sira-nia família sadere ba osan neʼebé sira hetan loroloron. Hodi hanoin-hetan kona-ba neʼe, hanoin toʼok kona-ba serbisu-naʼin sira neʼebé toʼos-naʼin neʼe hetan iha lokraik no tan neʼe sira serbisu ba oras ida deʼit. Karik sira la bele sosa hahán neʼebé toʼo ba sira-nia família se sira simu deʼit osan ba oras ida nian; maibé sira iha hakarak atu serbisu no sira hein loron tomak atu hetan serbisu. (Mt 20:1-7) Tuir loloos, laʼós katak sira mak lakohi atu serbisu ba loron tomak. Bíblia mós la hatudu katak sira koko atu subar an hodi la halo serbisu. Hanoin toʼok se Ita rasik mak hein loron tomak atu hetan serbisu, no Ita mós hatene katak ema seluk sadere ba osan neʼebé Ita hetan iha loron neʼe. Ita sei agradese tebes atu hetan serbisu. Liután neʼe, Ita mós karik sei sente kontente tebes se Ita simu osan neʼebé toʼo atu bele sosa ai-han ba Ita-nia família!
14. Lisaun diʼak saida mak ita aprende husi Jesus nia ai-knanoik kona-ba toʼos-naʼin uvas nian?
14 Mai ita hanoin fali kona-ba toʼos-naʼin nia hahalok. Nia la halo sala ida hodi selu osan neʼebé hanesan. Toʼos-naʼin neʼe sente katak serbisu-naʼin hotu iha direitu atu hetan osan hodi bele tau matan ba sira-nia an no sira-nia família. Maski iha serbisu-naʼin barak, maibé toʼos-naʼin la aproveita situasaun neʼe hodi buka deʼit serbisu-naʼin neʼebé prontu atu simu osan uitoan deʼit. Ninia serbisu-naʼin hotu fila ba uma ho osan neʼebé toʼo atu sosa hahán ba sira-nia família. Hodi hanoin kona-ba informasaun sira-neʼe, ida-neʼe bele ajuda ita atu troka ita-nia hanoin kona-ba ninia hahalok. Desizaun neʼebé nia halo hatudu ninia domin no nia mós la uza sala ninia kbiit. Saida mak ita bele aprende husi neʼe? Ita aprende katak se ita iha informasaun uitoan deʼit, ida-neʼe bele book ita atu hanoin sala kona-ba situasaun ruma. Tuir loloos, ai-knanoik neʼe hatudu katak Maromak nia haree kona-ba buat neʼebé loos mak diʼak liu fali ema nia haree tanba Maromak la haree deʼit ba lei sira no ba buat neʼebé ema merese atu simu.
Ita bele hanoin iha dalan neʼebé la loos
15. Saida deʼit mak bele book ita-nia hanoin kona-ba justisa?
15 Nuʼudar ema ita bele hanoin iha dalan neʼebé la loos. Tan neʼe, diʼak atu keta haluha ida-neʼe kuandu ita sente katak situasaun ruma mak la justisa ka la loos. Buat balu neʼebé bele book ita atu hanoin iha dalan neʼebé la loos mak ita-nia kultura, ka ita ema sala-naʼin. Ita mós la iha kbiit atu hatene ema nia hakarak no ema nia laran. Maibé Maromak Jeová no Jesus la hanesan ita, sira hatene ema nia laran.—Prov 24:12; Mt 9:4; Lc 5:22.
16, 17. Karik tanbasá mak Maromak Jeová la tesi lia tuir Moisés nia Ukun-Fuan kuandu David halo sala ho Batseba?
16 Mai ita hanoin toʼok kona-ba David nia sala ho Batseba. (2 Sam 11:2-5) Tuir Moisés nia Ukun-Fuan, sira tenke mate. (Lev 20:10; Deut 22:22) Maski Maromak Jeová fó kastigu ba sira, maibé nia la fó kastigu-mate ba sira tuir ukun-fuan neʼebé nia rasik mak fó. Ida-neʼe katak Maromak Jeová la hatudu justisa? Nia hafolin liu David no tan neʼe nia la halo tuir ninia matadalan neʼebé loos? Ema balu sente hanesan neʼe.
17 Maibé, Maromak Jeová fó ukun-fuan kona-ba halo sala-foʼer ba juis sira neʼebé sala-naʼin, no neʼebé la bele lee ema nia laran. Hodi nuneʼe, maski sira sala-naʼin, lei ida-neʼe ajuda sira atu tesi lia iha dalan neʼebé hanesan ba ema hotu neʼebé halo sala. Maibé, Maromak Jeová deʼit mak bele lee ema nia laran. (Gên 18:25; 1 Crôn 29:17) Tan neʼe ita labele hanoin katak Maromak Jeová tenke hakruʼuk ba ukun-fuan neʼebé nia fó ba juis sira neʼebé sala-naʼin. Se nia halo nuneʼe, ida-neʼe hanesan ita obriga ema ida neʼebé sei matan diʼak atu uza ókulu matan-aat nian. Maromak Jeová bele lee David no Batseba nia laran no haree katak sira arrepende an duni. Tan neʼe, nia tesi lia ba sira iha dalan loos hodi hatudu laran-sadiʼa no domin.
Kontinua buka uluk buat neʼebé loos tuir Maromak nia haree
18, 19. Saida mak bele ajuda ita atu la tesi lia ba Maromak Jeová hodi tuir deʼit buat neʼebé ita hanoin mak loos?
18 Entaun, ita sei halo saida se ita sente katak Maromak Jeová la hatudu justisa? Porezemplu, kuandu susar ruma akontese ba ita ka kuandu ita lee istória ruma iha Bíblia laran neʼebé ita sente katak la justisa, saida mak ita sei halo? Diʼak atu ita nunka tesi lia ba Maromak hodi tuir deʼit buat neʼebé ita hanoin mak loos. Hanoin-hetan katak dala barak ita la hatene informasaun hotu ka ita bele hanoin iha dalan neʼebé la loos. Nunka haluha katak “ema nia hirus la hetan Maromak nia justisa”. (Tgo 1:19, 20) Hodi halo nuneʼe, ita-nia laran sei la sai “hirus hasoru Maromak Jeová rasik”.—Prov 19:3.
19 Hanesan Jesus, mai ita sempre rekoñese katak Maromak Jeová deʼit mak iha direitu atu halo desizaun kona-ba buat neʼebé loos no diʼak. (Mc 10:17, 18) Hakaʼas an atu “hetan matenek lia-loos nian”. (2 Tim 3:7) Hodi simu Maromak Jeová nia hanoin kona-ba buat neʼebé loos no moris tuir ninia hakarak, ita hatudu katak ita buka uluk “buat neʼebé loos tuir Maromak nia haree”.—Mt 6:33, MF.
[Nota–rodapé]
^ par. 5 Tuir matenek-naʼin ida, liafuan orijinál neʼebé tradús nuʼudar “hetan justisa” bele mós katak ema ‘harii buat ruma’, hanesan estátua ida. Ida-neʼe hanesan ema judeu sira harii buat ruma neʼebé fó glória ba sira rasik nia hanoin kona-ba buat neʼebé loos, laʼós fó glória ba Maromak.
Ita hanoin-hetan?
• Tanbasá mak importante atu buka buat neʼebé loos tuir Maromak Jeová nia haree?
• Ita presiza hasees an husi perigu rua saida?
• Oinsá mak ita bele buka uluk buat neʼebé loos tuir Maromak nia haree?
[Pergunta estudu nian]
[Dezeñu iha pájina 9]
Lisaun saida mak ita aprende husi Jesus nia ai-knanoik kona-ba mane naʼin-rua neʼebé halo orasaun iha templu?
[Dezeñu iha pájina 10]
Justisa ka lae kuandu selu serbisu-naʼin hotu ho osan neʼebé hanesan maski sira-nia oras serbisu nian la hanesan?