Joven sira, oinsá mak imi sei uza imi-nia moris?
Joven sira, oinsá mak imi sei uza imi-nia moris?
“Haʼu la halo funu hanesan tuku deʼit lalatak.”—1 KOR 9:26.
1, 2. Atu hetan susesu nuʼudar imi sai boot ba daudauk, saida deʼit mak imi presiza iha?
SE IMI laʼo ba fatin dook neʼebé imi la hatene, karik imi hakarak atu lori mós mapa no lampra. Mapa neʼe sei ajuda imi atu hatene imi toʼo neʼebé no mós bele ajuda imi atu halo planu kona-ba dalan neʼebé imi sei tuir. Lampra sei leno imi-nia dalan kuandu rai nakukun ona, hodi nuneʼe imi bele haree se imi laʼo tuir hela dalan neʼebé loos ka lae. Maski nuneʼe, se imi la iha planu kona-ba fatin neʼebé imi hakarak atu bá, saugati deʼit atu lori mapa no lampra neʼe. Hodi imi la laʼo arbiru deʼit, imi presiza iha planu nanis kona-ba fatin neʼebé imi atu bá.
2 Nuʼudar imi joven sai boot ba daudauk, imi loloos hasoru situasaun hanesan neʼe. Imi iha duni mapa no lampra neʼebé diʼak. Bíblia mak hanesan mapa neʼebé bele ajuda imi atu hili dalan moris nian neʼebé loos. (Prov 3:5, 6) Laran mak hanesan lampra ida. Se imi treinu didiʼak imi-nia laran ka konxiénsia, ida-neʼe bele ajuda imi atu haree se imi tuir hela dalan neʼebé loos. (Rom 2:15) Maibé, hanesan kuandu imi laʼo rai dook imi presiza hatene fatin neʼebé imi atu bá, nuneʼe mós atu hetan susesu iha imi-nia moris, imi presiza halo planu ruma kona-ba oinsá imi sei uza imi-nia moris.
3. Tuir Paulo nia konsellu iha 1 Korinto 9:26, tanbasá mak diʼak atu halo planu?
3 Apóstolu Paulo hatudu katak importante duni atu halo planu no hakaʼas an atu kumpre planu neʼe. Nia dehan: “Nuneʼe haʼu la halai hodi la hatene atu bá neʼebé; haʼu la halo funu hanesan tuku deʼit lalatak.” (1 Kor 9:26) Se imi iha planu, imi bele halai hodi hatene atu bá neʼebé. Nuʼudar imi sai boot ba daudauk, imi sei hasoru situasaun neʼebé imi tenke halo desizaun boot, porezemplu desizaun kona-ba adorasaun, serbisu, kaben, no harii família. Dala ruma, ida-neʼe karik sei halo imi sente hanesan imi iha ai-laran fuik neʼebé iha dalan kiʼik barak. Maibé se imi halo planu nanis, hodi halo desizaun sira neʼebé tuir lia-loos husi Maromak nia Liafuan, imi bele fiar katak imi sei la laʼo sala dalan.—2 Tim 4:4, 5.
4, 5. (a) Saida mak bele akontese se imi la halo planu ba imi-nia an rasik? (b) Tanbasá mak imi-nia hakarak atu halo kontente Maromak tenke book imi kuandu imi halo desizaun sira iha imi-nia moris?
4 Se imi rasik la halo planu ba imi-nia an, imi-nia kolega no mestre sira karik sei book imi atu tuir dalan neʼebé sira sente katak diʼak ba imi. Tuir loloos, maski imi iha ona planu sira, maibé karik ema balu sei nafatin fó-hatene buat neʼebé sira hanoin diʼak ba imi-nia futuru. Bainhira sira halo nuneʼe, husu ba imi-nia an: ‘Planu neʼe sei ajuda haʼu atu hanoin-hetan haʼu-nia Kriadór kuandu haʼu sei joven ka ida-neʼe sei hanetik haʼu atu halo nuneʼe?’—Lee Eclesiastes 12:1. *
5 Tanbasá mak imi-nia hakarak atu halo kontente Maromak tenke book imi kuandu imi halo desizaun sira iha imi-nia moris? Razaun ida mak Maromak Jeová fó mai ita buat diʼak hotu neʼebé ita iha. (Tgo 1:17) Tuir loloos, ema hotu tenke hatudu agradese ba Maromak Jeová. (Apok 4:11) Dalan diʼak liu atu hatudu katak imi agradese ba Maromak Jeová mak hodi hanoin didiʼak kona-ba ninia hakarak kuandu imi halo planu ba imi-nia moris, loos ka lae? Mai ita koʼalia kona-ba planu diʼak balu, no oinsá imi bele kumpre planu sira-neʼe.
Imi bele halo planu saida deʼit?
6. Planu importante saida mak imi hakarak halo? Tanbasá?
6 Hanesan temi iha lisaun uluk, planu importante ida mak buka atu hatudu ba imi-nia an rasik katak hanorin neʼebé imi hetan husi Bíblia mak lia-loos duni. (Rom 12:2; 2 Kor 13:5) Imi-nia kolega sira karik fiar ba teoria evolusaun ka fiar ba hanorin oioin husi relijiaun falsu, tanba deʼit ema seluk hatete katak neʼe mak loos. Maibé, imi bele sai diʼak liu fali sira, tanba imi rasik bele hatudu ba imi-nia an katak imi-nia fiar mak loos duni. Hanoin-hetan katak Maromak Jeová hakarak atu imi serbí nia ho hanoin tomak. (Lee Lucas 10:25-27.) Ita-nia Aman iha lalehan hakarak imi joven sira atu fiar ba buat neʼebé loos, buat neʼebé iha duni.—Ebr 11:1.
7, 8. (a) Hodi hametin imi-nia fiar, planu diʼak saida deʼit mak imi bele halo neʼebé imi bele kumpre iha tempu badak? (b) Rezultadu diʼak saida deʼit mak imi bele hetan bainhira imi kumpre ona planu sira-neʼe?
7 Imi bele halo planu neʼebé imi bele kumpre iha tempu badak atu hametin imi-nia fiar ka lae? Karik imi bele halo planu atu halo orasaun loron-loron. Diʼak atu la dekor deʼit imi-nia orasaun, maibé koʼalia kona-ba buat oioin. Atu halo nuneʼe, karik loron-loron imi bele hanoin ka hakerek nota kona-ba buat neʼebé akontese, depois temi buat sira-neʼe iha imi-nia orasaun rasik. La haluha atu temi buat neʼebé imi gosta, laʼós deʼit temi susar sira neʼebé imi hasoru. (Flp 4:6) Diʼak mós atu halo planu kona-ba lee Bíblia loron-loron. Hatene ka lae, se loron-loron imi lee pájina haat, imi bele lee Bíblia tomak iha tinan ida nia laran? * Salmo 1:1, 2 hatete: “Ksolok ba ema neʼebé . . . gosta Naʼi Jeová nia ukun-fuan. No ukun-fuan neʼe, nia lee ho lian neineik loron no kalan.”
8 Planu ida tan neʼebé imi bele kumpre iha tempu badak mak prepara resposta atu hatoʼo iha reuniaun ida-idak. Ulukliu, karik imi hakarak lee deʼit imi-nia resposta ka lee eskritura ida. Tuirmai, imi bele halo planu atu fó resposta ho imi-nia liafuan rasik. Tuir loloos, resposta ida-idak neʼebé imi hatoʼo mak hanesan prezente neʼebé imi hasaʼe ba Maromak Jeová. (Ebr 13:15) Bainhira imi kumpre ona planu sira-neʼe, ida-neʼe sei hatudu ba imi-nia an katak imi bele duni laʼo ba oin, no ida-neʼe sei haburas imi-nia domin ba Aman Jeová, no mós imi sei sai prontu atu halo planu seluk neʼebé imi hakarak kumpre iha futuru.
9. Se imi seidauk sai haklaken-naʼin, planu saida deʼit mak imi bele halo atu kumpre iha futuru?
9 Planu saida deʼit mak imi bele halo atu kumpre iha futuru? Se imi seidauk sai haklaken-naʼin, entaun sai haklaken-naʼin mak planu neʼebé diʼak tebes. Kuandu imi kumpre ona planu neʼe, diʼak se imi mós hakaʼas an atu haklaken ho matenek no bá haklaken beibeik, hodi la husik fulan ida liu leet deʼit. Buat ida tan neʼebé imi bele halo mak sai matenek hodi uza Bíblia bainhira imi haklaken no hanorin ema seluk. Baibain, nuʼudar imi halo buat sira-neʼe, imi sei haree katak imi gosta halo serbisu haklaken. Tuirmai, imi bele aumenta tempu neʼebé imi uza atu haklaken uma ba uma no mós hakaʼas an atu halaʼo estudu Bíblia. Nuʼudar haklaken-naʼin neʼebé seidauk batizmu, imi bele halo planu atu kumpre kritériu atu hetan batizmu, hodi imi bele sai Testemuña ba Maromak Jeová neʼebé dedika an no hetan batizmu tiha ona. Neʼe mak planu neʼebé diʼak liu hotu, loos ka lae?
10, 11. Planu saida deʼit mak joven neʼebé hetan ona batizmu bele halo atu kumpre iha futuru?
10 Se imi hetan ona batizmu nuʼudar Maromak Jeová nia atan, iha planu seluk tan neʼebé imi bele halo atu bele kumpre iha futuru. Karik imi hakarak atu ajuda kongregasaun ruma atu haklaken iha área neʼebé ema barak seidauk rona lia-foun diʼak. Karik imi mós hakarak atu uza imi-nia forsa atu serbí nuʼudar pioneiru estra ka pioneiru regulár. Pioneiru naʼin rihun ba rihun bele fó-hatene imi katak serbí Maromak ba tempu-tomak sei halo imi kontente, tanba ida-neʼe mak dalan diʼak tebes atu hanoin imi-nia Kriadór durante imi-nia tempu joven. Neʼe mak planu balu neʼebé imi bele kumpre bainhira imi sei hela ho inan-aman. Imi-nia kongregasaun mós sei simu bensaun barak tanba imi-nia hakaʼas-an atu kumpre planu sira-neʼe.
11 Iha mós planu sira seluk neʼebé imi bele kumpre iha futuru, no planu sira-neʼe laʼós deʼit lori bensaun ba imi-nia kongregasaun maibé bele lori mós bensaun ba Maromak nia povu iha fatin seluk. Porezemplu, imi bele halo planu atu serbí iha kongregasaun seluk ka rai seluk neʼebé presiza tan haklaken-naʼin. Karik imi hakarak atu ajuda harii Reuniaun-Fatin ka uma ba sukursál sira iha rai seluk. Karik imi mós bele kumpre kritériu atu serbí iha Betel ka sai misionáriu ida. Klaru katak, antes imi bele kumpre planu sira hanesan neʼe, hakat importante neʼebé imi presiza halo mak hetan batizmu. Se imi seidauk hetan batizmu, entaun hanoin toʼok kona-ba hakat sira neʼebé lori imi ba hakat importante liu neʼe.
Laʼo ba oin hodi hetan batizmu
12. Tanbasá mak ema balu hakarak hetan batizmu? Tanbasá mak razaun sira-neʼe la toʼo?
12 Tuir imi-nia hanoin, tanbasá mak diʼak atu hetan batizmu? Ema balu hanoin katak hetan batizmu sei proteje sira atu labele monu ba sala. Ema seluk sente katak sira tenke hetan batizmu tanba sira-nia kolega mós halo ona nuneʼe. Joven seluk tan hakarak hetan batizmu hodi bele halo kontente inan-aman. Maibé, batizmu laʼós hanesan kontratu neʼebé imi asina hodi promete atu la halo hahalok sala ruma neʼebé tuir loloos imi hakarak halo. No mós la diʼak atu hetan batizmu tan deʼit ema seluk mak hakaʼas imi atu halo nuneʼe. Imi tenke hetan batizmu kuandu imi hatene ho klaru imi-nia responsabilidade nuʼudar Testemuña ba Jeová, no mós kuandu imi rasik hakarak no sente prontu ona atu halaʼo responsabilidade sira-neʼe.—Ecle 5:4, 5.
13. Tanbasá mak ita tenke hetan batizmu?
13 Razaun ida atu hetan batizmu mak Jesus haruka ninia dixípulu sira atu ‘hanorin ema . . . no sarani [ka, fó batizmu ba] sira’. Nia mós hetan batizmu, neʼe mak ezemplu ba ita atu banati-tuir. (Lee Mateus 28:19, 20; Marcos 1:9.) Liután neʼe, batizmu mak hakat importante ba sira neʼebé hakarak hetan salvasaun. Apóstolu Pedro esplika katak Noé harii ró neʼebé hanesan kaixote boot, neʼebé nia ho nia família tama iha laran hodi sira hetan salvasaun durante Rai-Nabeen. Depois nia hatutan: “Nuneʼe mós, ohin loron batizmu soi [ka, salva] imi, . . . hodi Jesus Kristu nia moris-hiʼas.” (1 Ped 3:20, 21) Maski nuneʼe, batizmu la hanesan osan neʼebé imi rai iha banku hodi bele uza kuandu dezastre mosu. Imi hetan batizmu tanba imi hadomi Aman Jeová no hakarak atu serbí nia ho imi-nia fuan tomak, moris tomak, hanoin tomak, no kbiit tomak.—Mc 12:29, 30, MF.
14. Tanbasá mak ema balu dada an atu hetan batizmu? Maibé, tanbasá mak imi bele fiar katak imi sei hetan susesu?
14 Ema balu dada an atu hetan batizmu tanba sira taʼuk katak iha aban bainrua karik kongregasaun sei hasai sira tanba sira halo sala boot ruma. Imi mós sente hanesan neʼe ka lae? Se nuneʼe, lalika hanoin katak imi-nia sentimentu neʼe mak sala. Karik imi sente hanesan neʼe tanba imi hatene katak sai Testemuña ba Jeová envolve simu responsabilidade boot. Imi mós iha razaun seluk tan neʼebé halo imi sente hanesan neʼe ka lae? Karik imi seidauk fiar katak halo tuir Maromak nia matadalan mak dalan moris nian neʼebé diʼak liu. Se hanesan neʼe, hanoin toʼok kona-ba problema sira neʼebé mosu kuandu ema la halo tuir matadalan husi Bíblia. Hodi halo nuneʼe bele ajuda imi atu hametin imi-nia fiar. Iha parte seluk, karik imi iha fiar ba Maromak nia matadalan no hakarak halo tuir, maibé karik imi mós sente katak imi la iha kbiit atu kontinua nafatin atu halo tuir matadalan sira-neʼe. Tuir loloos, la sala atu sente hanesan neʼe, tanba neʼe hatudu katak imi mak ema haraik-an. Bíblia hatete katak ita ema sala-naʼin iha fuan neʼebé makerek. (Jer 17:9) Maibé imi bele halo tuir duni se imi ‘nafatin matan-moris atu tuir Maromak nia liafuan’. (Lee Salmo 119:9. *) Maski imi sente laran-rua, maibé imi presiza hadiʼa imi-nia hanoin neʼebé hanetik imi atu la hetan batizmu. *
15, 16. Oinsá mak imi bele hatene se imi loloos prontu ona atu hetan batizmu ka seidauk?
15 Maibé, oinsá mak imi bele hatene se imi prontu ona atu hetan batizmu ka seidauk? Dalan ida mak husu ba imi-nia an pergunta sira hanesan tuirmai neʼe: ‘Haʼu bele esplika ba ema seluk hanorin importante husi Bíblia ka lae? Haʼu bá haklaken maski haʼu-nia inan-aman la bá ka lae? Haʼu hakaʼas an atu tuir reuniaun sira hotu ka lae? Haʼu bele hanoin-hetan kona-ba situasaun balu kuandu haʼu la halo tuir deʼit kolega neʼebé hakaʼas haʼu atu halo buat neʼebé sala ka lae? Haʼu sei kontinua serbí Maromak Jeová maski haʼu-nia inan-aman no kolega sira husik tiha lia-loos ka lae? Liuhusi orasaun, haʼu koʼalia ba Maromak kona-ba oinsá mak haʼu bele hametin haʼu-nia relasaun ho nia ka lae? No mós, haʼu halo ona orasaun atu dedika an ba Maromak Jeová ka lae?’
16 Batizmu mak hakat neʼebé kona imi-nia moris tomak. Tan neʼe, imi tenke tetu didiʼak antes halo desizaun neʼe. Imi laʼo ba oin iha lia-loos toʼo imi bele hanoin kona-ba hakat importante neʼe ka lae? Laʼo ba oin la dehan katak imi bele hatoʼo diskursu diʼak, ka fó komentáriu neʼebé diʼak. Laʼo ba oin katak imi bele halo desizaun sira-neʼebé matenek tanba imi hatene no halo tuir Bíblia nia matadalan. (Lee Ebreu 5:14.) Se imi bele ona halo desizaun ho matenek, entaun imi prontu atu halo desizaun kona-ba uza imi-nia moris iha dalan neʼebé furak liu hotu. Neʼe mak serbí Maromak Jeová ho imi-nia laran tomak no hatudu iha imi-nia moris tomak katak imi loloos dedika ona imi-nia an ba nia.
17. Saida deʼit mak bele ajuda imi hasoru susar sira neʼebé karik mosu lakleur depois imi hetan batizmu?
17 Kuandu imi foin hetan batizmu, karik imi sente laran-manas tebes atu serbí Maromak. Maibé, lakleur depois neʼe, karik imi sei hasoru susar neʼebé sei koko imi-nia fiar no imi-nia laran-metin. (2 Tim 3:12) Joven sira, keta sente katak imi hasoru susar sira-neʼe mesak deʼit. Buka konsellu husi imi-nia inan-aman. Husu ajuda ba irmaun-irmán iha kongregasaun neʼebé iha esperiénsia barak. Ransu beibeik ho kolega sira-neʼebé apoia imi. Nunka haluha katak Aman Jeová hanoin imi, no katak nia sei fó kbiit neʼebé imi presiza atu tahan hasoru situasaun naran deʼit neʼebé karik mosu.—1 Ped 5:6, 7.
Oinsá mak imi bele kumpre imi-nia planu sira?
18, 19. Rezultadu diʼak saida mak imi sei hetan kuandu imi tetu didiʼak kona-ba buat neʼebé importante liu iha imi-nia moris?
18 Maski imi hakarak duni atu kumpre imi-nia planu, maibé karik imi sente katak tempu la toʼo atu halo buat hotu neʼebé imi hakarak ka presiza halo? Se nuneʼe, imi tenke tetu didiʼak kona-ba saida mak importante liu iha imi-nia moris. Atu hatene kona-ba neʼe, koko toʼok buat tuirmai neʼe: Foti balde ida no tau uluk fatuk balu neʼebé boot uitoan iha laran. Tau tan rai-henek toʼo balde neʼe nakonu. Agora balde neʼe sai nakonu ho fatuk no rai-henek, loos ka lae? Tuirmai halo mamuk fali balde neʼe, hodi rai hela fatuk no rai-henek neʼe atu bele uza fali. Maibé agora, tau uluk rai-henek ba balde laran, tuirmai tau tan fatuk sira iha balde laran. Fatin toʼo ba fatuk hotu ka lae? Ida-neʼe tanba imi tau uluk rai-henek iha balde laran.
19 Imi mós karik hasoru situasaun hanesan neʼe kuandu imi fahe imi-nia tempu. Se imi tau uluk atividade halimar nian iha imi-nia moris, imi-nia tempu la toʼo atu halo buat neʼebé importante liu, neʼe mak imi-nia atividade sira atu serbí Maromak. Bíblia fó konsellu atu “haree momoos buat hotu-hotu neʼebé diʼak liu”, neʼe katak halo uluk buat neʼebé diʼak liu, ka importante liu. Ida-neʼe sei ajuda imi atu iha tempu atu serbí Maromak no mós iha tempu atu halo atividade halimar nian balu.—Flp 1:10.
20. Se imi sente dúvida no hanoin barak nuʼudar imi hakaʼas an atu kumpre imi-nia planu sira, saida mak imi tenke halo?
20 Nuʼudar imi hakaʼas an atu kumpre imi-nia planu, inklui mós planu atu hetan batizmu, karik dala ruma imi sente dúvida no hanoin barak. Kuandu imi sente nuneʼe, diʼak atu ‘soe imi-nia todan ba Jeová, no nia rasik sei apoia imi’. (Sal 55:22) Ohin loron, imi iha oportunidade atu hola parte iha serbisu ida neʼebé diʼak no importante tebes iha ema nia istória, neʼe mak serbisu haklaken no hanorin iha mundu tomak. (Apos 1:8) Imi bele hili atu tuur no haree deʼit ema seluk halo serbisu neʼe. Ka imi bele hamriik no hola parte iha serbisu neʼe. Keta dada an atu uza imi-nia matenek hodi serbí Maromak no apoia ninia Ukun. Imi ida-idak sei nunka sente katak imi lakon buat ruma kuandu imi serbí ‘imi-nia Kriadór Boot iha imi-nia tempu joven’.—Ecle 12:1.
[Nota–rodapé]
^ par. 4 Eclesiastes 12:1: “Nuneʼe, hanoin bá ó-nia Kriadór Boot iha ó-nia tempu joven, antes loron sira neʼebé lori susar mosu mai, ka tinan sira toʼo mai kuandu ó sei dehan: ‘Haʼu la hetan haksolok iha loron sira-neʼe.’”
^ par. 7 Haree Menara Pengawal, 1 Agustus 2009, pájina 15-18.
^ par. 14 Salmo 119:9: “Oinsá mak mane joven ida sei halo nia dalan moos? Hodi nafatin matan-moris atu tuir Ita-nia liafuan.”
^ par. 14 Atu hetan ajuda, haree livru Pertanyaan Kaum Muda—Jawaban yang Praktis, Jilid 2, kapítulu 34.
Oinsá ita hatán?
• Tanbasá mak imi tenke halo planu sira?
• Imi bele halo planu saida deʼit?
• Oinsá mak imi bele kumpre imi-nia planu atu hetan batizmu?
• Oinsá mak tetu didiʼak kona-ba buat neʼebé importante liu bele ajuda imi atu kumpre imi-nia planu sira?
[Pergunta estudu nian]
[Dezeñu iha pájina 13]
Imi iha planu atu lee Bíblia loron-loron ka lae?
[Dezeñu iha pájina 15]
Saida mak sei ajuda imi atu kumpre imi-nia planu atu hetan batizmu?
[Dezeñu iha pájina 16]
Saida mak imi aprende husi ida-neʼe?