Hetan kbiit atu tahan susar naran deʼit
Hetan kbiit atu tahan susar naran deʼit
“Haʼu bele halo buat hotu iha Nia neʼebé fó kbiit mai haʼu.”—FLP 4:13.
1. Tanbasá mak Maromak nia povu hasoru susar oioin?
MAROMAK JEOVÁ nia atan sira hasoru susar oioin. Susar balu neʼebé sira hasoru mosu tanba sira mak ema sala-naʼin ka tanba mundu aat neʼe hanehan ita hotu. Susar seluk mosu tanba sira neʼebé la serbí Maromak odi fiar-naʼin sira nuʼudar sira-nia inimigu. (Gên 3:15) Husi tempu uluk kedas, Maromak ajuda ninia atan sira neʼebé laran-metin ba nia. Nia ajuda sira atu tahan kuandu ema fó-terus ba sira tanba sira-nia fiar, atu tahan kuandu hetan tentasaun atu halo tuir deʼit ema seluk, no atu tahan susar sira seluk tan. Ohin loron mós Maromak nia espíritu santu bele fó ita kbiit atu tahan hasoru susar oioin.
Hetan ajuda kuandu ema fó-terus
2. Tanbasá mak ema fó-terus ba ema husi relijiaun seluk? Sira fó-terus hodi uza dalan saida deʼit?
2 Kuandu ema fó-terus ba ema husi relijiaun seluk, baibain sira halo violénsia oioin no koʼalia buat aat oioin kona-ba relijiaun neʼe. Tanbasá mak sira halo nuneʼe? Tanba sira hakarak atu halakon ema seluk nia relijiaun, ka hapara relijiaun neʼe atu labele sai belar, ka halakon ema fiar-naʼin nia laran-metin. Terus no susar neʼebé ema fó dala barak la hanesan. Sira balu fó-terus kedas ba ema seluk, maibé balu seluk uza dalan neʼebé subasubar atu halakon ema husi relijiaun seluk nia fiar. Bíblia kompara Satanás nia ataka hanesan ho leaun nurak no samea-kobra nia ataka.—Lee Salmo 91:13. *
3. Oinsá mak Satanás ataka hanesan leaun no hanesan samea-kobra?
3 Hanesan leaun neʼebé siʼak, dala barak Satanás ataka Maromak nia povu liuhusi violénsia, hatama ba komarka, ka bandu Maromak nia atan nia serbisu. (Sal 94:20) Buku Tahunan konta kona-ba esperiénsia barak husi Jeová nia Testemuña sira neʼebé hasoru Satanás nia ataka neʼe. Iha rai barak, ema-lubun fó-terus ba Maromak nia povu. Dala ruma ulun-naʼin relijiaun nian ka ema polítiku-naʼin mak lori ema-lubun neʼe atu halo arbiru deʼit. Dala ruma sira-nia ataka neʼe, neʼebé hanesan leaun, halo ema balu husik sira-nia fiar. Hanesan samea-kobra, Diabu mós ataka Maromak nia povu husi fatin neʼebé subar. Neʼe katak nia koko atu halo ema halo hahalok foʼer oioin no lohi sira atu halo tuir ninia hakarak. Satanás uza ataka hanesan neʼe hodi halo ita-nia fiar sai fraku ka halo ita nega ita-nia fiar. Maibé, liuhusi Maromak nia espíritu santu, ita bele hamriik metin hodi tahan hasoru terus no la husik Satanás lohi ita.
4, 5. Dalan saida mak diʼak liu atu prepara an hodi hasoru susar sira? Tanbasá? Fó toʼok ezemplu.
4 Hodi mehi kona-ba situasaun susar neʼebé ita bele hasoru iha futuru mak laʼós dalan neʼebé diʼak atu prepara an atu tahan buat sira-neʼe. Tuir loloos, ita la hatene susar saida mak ita sei hetan iha futuru, tan neʼe ita la manán buat ida se ita hanoin demais kona-ba buat neʼebé karik sei nunka akontese. Maibé, iha buat seluk neʼebé ita bele halo. Ema barak tahan ona susar sira, no sira bele halo ida-neʼe tanba sira hanoin kleʼan kona-ba hahalok laran-metin neʼebé Maromak nia atan sira hatudu neʼebé hakerek iha Bíblia laran. No sira mós hanoin kleʼan kona-ba Jesus nia hanorin no ninia ezemplu. Hanoin kleʼan kona-ba buat sira-neʼe ajuda sira atu hametin liután sira-nia domin ba Maromak Jeová. Ikusmai, domin neʼe, ajuda sira atu tahan hasoru terus naran deʼit neʼebé mosu ba sira.
5 Hanoin toʼok kona-ba ezemplu husi irmán naʼin-rua husi rai-Malaui. Tanba ema-lubun ida hakarak atu irmán naʼin-rua neʼe sosa kartaun partidu nian, sira baku irmán sira-neʼe, hasai irmán sira-nia hatais, no ameasa atu estraga irmán sira-neʼe. Ema-lubun neʼe mós fó sai informasaun bosok hodi dehan katak ema sira neʼebé serbí iha Betel sosa ona kartaun partidu nian. Oinsá mak irmán sira hatán? Irmán sira dehan: “Ami serbí Maromak Jeová deʼit. Tan neʼe, maski irmaun sira iha sukursál sosa ona kartaun partidu nian ka lae, maibé ida-neʼe la troka ami-nia desizaun. Ami sei nunka nega ami-nia fiar, maski imi oho ami!” Bainhira irmán sira-neʼe hatudu tiha aten-brani hanesan neʼe, ema-lubun neʼe husik sira.
6, 7. Oinsá mak Maromak Jeová fó kbiit ba ninia atan sira atu tahan susar?
6 Apóstolu Paulo hakerek katak ema kristaun iha Tesalónika simu tiha mensajen lia-loos nian maski “hetan terus barak”, maibé sira iha “ksolok neʼebé mai husi espíritu santu”. (1 Tes 1:6) Tuir loloos, ema kristaun barak, iha tempu uluk no ohin loron, neʼebé hasoru no manán ona susar sira, hatete katak maski sira hasoru susar neʼebé boot liu, maibé sira sente dame iha laran. Dame neʼe mak buat neʼebé espíritu lori mai. (Gal 5:22) Sentimentu neʼe, ajuda sira atu proteje sira-nia laran no sira-nia kbiit atu hanoin. Sin, Maromak Jeová uza ninia espíritu atu fó kbiit ba ninia atan sira atu bele tahan hasoru susar no atu hatudu matenek kuandu problema mosu. *
7 Ema sente hakfodak no dala ruma gaba kuandu sira haree Maromak nia atan sira ho hakarak rasik laran-metin nafatin maski hasoru terus neʼebé makaʼas tebes. Testemuña sira haree hanesan sira nakonu ho forsa neʼebé boot liu fali ema nian, no ida-neʼe loos duni. Apóstolu Pedro hatete: “Rahun-diʼak ba imi wainhira ema hasara imi tanba Kristu nia naran, basá iha oras neʼebá Maromak nia espíritu horik ona iha imi.” (1 Ped 4:14) Sin, se ita hasoru terus tanba ita kaʼer metin ba Maromak nia matadalan, ida-neʼe hatudu katak Maromak simu ita. (Mt 5:10-12; Joao 15:20) Ita haksolok duni hodi hatene ho klaru katak Maromak simu ita no fó bensaun mai ita!
Ajuda atu la halo tuir deʼit ema seluk
8. (a) Saida mak ajuda Josué no Caleb atu la halo tuir deʼit ema seluk? (b) Saida mak ita bele aprende husi Josué no Caleb nia ezemplu?
8 Satanás mós uza dalan sira neʼebé subasubar no matenek atu tenta Maromak nia povu. Tentasaun ida mak hakarak atu halo tuir deʼit ema seluk. Maski tentasaun neʼe susar atu hasoru, maibé Maromak Jeová nia espíritu mak forsa neʼebé boot liu fali mundu nia espíritu, no ajuda ita atu bele tahan kuandu ema goza ita, habelar lia-bosok kona-ba ita, ka koko atu obriga ita atu halo tuir deʼit buat neʼebé sira hanoin mak loos. Porezemplu, saida mak ajuda Josué no Caleb atu koʼalia buat neʼebé la hanesan ho espiaun naʼin-10 seluk neʼebé Moisés haruka atu hafuhu rai-Kanaan? Espíritu santu mak book sira-nia laran atu iha “espíritu” ka hanoin neʼebé la hanesan sira-nia maluk sira.—Lee Números 14:6-10, 24. *
9. Tanbasá mak ema kristaun hakarak duni atu la halo tuir deʼit ema seluk?
9 Espíritu santu mós fó kbiit ba Jesus nia apóstolu sira atu halo tuir Maromak duké halo tuir mestre sira neʼebé ema seluk gaba nuʼudar mestre husi relijiaun loos. (Apos 4:21, 31; 5:29, 32) Baibain, ema barak hakarak atu halo tuir deʼit ema-lubun tanba sira hakarak atu hasees an husi problema. Maibé, ema kristaun loos, dala barak presiza atu hamriik metin ba buat neʼebé sira hatene mak loos. Sira hafolin tebes kbiit neʼebé sira hetan liuhusi Maromak nia espíritu, no sira la taʼuk atu sai la hanesan ho ema seluk. (2 Tim 1:7) Hanoin toʼok kona-ba situasaun ida neʼebé ita labele halo tuir deʼit ema seluk.
10. Situasaun susar saida mak dala ruma ema kristaun hasoru?
10 Joven balu dala ruma bilán no taʼuk atu foti desizaun ruma kuandu sira hatene sira-nia belun ida iha kongregasaun laran halo hahalok neʼebé kontra Bíblia. Karik sira sente katak hodi husu katuas sira atu ajuda sira-nia kolega, ida-neʼe hatudu katak sira la laran-metin tan ba kolega neʼe. Karik kolega neʼebé halo sala mós obriga ninia maluk neʼe atu rai metin hodi la fó sai ba ema kona-ba sala neʼebé nia halo. Klaru katak problema hanesan neʼe laʼós deʼit mosu ba joven sira. Ema boot mós dala ruma sente susar atu fó-hatene katuas sira kona-ba sala neʼebé sira-nia kolega ka família halo. Maibé oinsá mak ema kristaun loos tenke hasoru situasaun neʼe?
11, 12. Saida mak ita tenke halo se ema ida iha kongregasaun laran obriga ita atu la fó sai ninia sala? Tanbasá?
11 Hanoin toʼok kona-ba situasaun tuirmai neʼe. Irmaun klosan ida naran Alex, hatene katak ninia kolega ida iha kongregasaun naran Filomeno, iha toman atu haree pornografia. Alex hatete ba Filomeno katak nia triste tebes ho buat neʼebé Filomeno halo. Maski nuneʼe, Filomeno hatete katak problema neʼe ladún boot. Kuandu Alex hakaʼas ninia kolega atu fó-hatene katuas sira, Filomeno hatán katak se sira naʼin-rua mak belun neʼebé diʼak, entaun Alex sei la fó sai sala neʼe ba katuas sira. Iha situasaun neʼe, Alex presiza taʼuk atu lakon ninia relasaun nuʼudar belun ka lae? Alex karik hanoin se Filomeno nega buat neʼebé nia hatete, katuas sira sei hanoin katak nia bosok-teen. Klaru katak situasaun sei la sai diʼak fali se Alex nonook deʼit, loos ka lae? Tuir loloos, ikusmai Filomeno bele lakon ninia relasaun ho Maromak Jeová. Entaun diʼak ba Alex atu hanoin-hetan konsellu tuirmai neʼe: “Nakdedar tanba ema mak hanesan tau lasu ida, maibé nia neʼebé tau fiar ba Maromak Jeová sei hetan protesaun.” (Prov 29:25) Saida tan mak Alex bele halo? Nia bele hakbesik fali ba Filomeno hodi esplika ho laran-diʼak katak Filomeno nia hanoin neʼe loloos sala. Atu halo ida-neʼe presiza duni aten-brani. Karik hodi halo nuneʼe, Filomeno sei simu buat neʼebé Alex hatete no prontu atu koʼalia kona-ba ninia problema. Dala ida tan Alex presiza fó laran-manas ba Filomeno atu koʼalia ho katuas sira, no Alex mós presiza hatete katak se nia la halo ida-neʼe iha loron balu nia laran, entaun Alex rasik mak sei fó-hatene katuas sira.—Lev 5:1.
12 Se ita rasik hasoru situasaun hanesan neʼe, foufoun karik ita-nia kolega ladún hafolin ita-nia hakaʼas-an atu ajuda nia. Maibé karik ikusmai, nia sei hatene katak buat neʼebé ita halo mak ba ninia diʼak. Se ema neʼebé halo sala simu ajuda husi katuas sira, entaun nia karik sei hafolin ba nafatin ita-nia hahalok aten-brani no laran-metin. Iha parte seluk, se nia sai hirus ka la fó oin ba ita, ita hakarak ema hanesan neʼe atu sai ita-nia kolega ka lae? Sempre halo kontente Maromak Jeová, ita-nia Belun neʼebé boot liu, mak importante tebes. Kuandu ita tau uluk ninia hakarak, ema seluk neʼebé hadomi Maromak sei respeitu ita tanba ita-nia laran-metin, no sira sei sai ita-nia belun diʼak. Ita nunka hakarak fó fatin ba Diabu atu tama iha kongregasaun kristaun laran. Tanba se ita fó fatin ba Diabu, ita sei halo duni Maromak Jeová nia espíritu santu laran-susar. Maibé, hodi laʼo tuir espíritu, ita hola parte atu halo kongregasaun kristaun moos nafatin.—Ef 4:27, 30.
Kbiit atu tahan susar naran deʼit
13. Susar saida deʼit mak Maromak Jeová nia atan sira hasoru? Tanbasá mak susar sira akontese beibeik?
13 Ema hasoru susar oioin, hanesan osan la iha, lakon serbisu, dezastre naturál, família ka belun ida mate, moras, no buat seluk tan. Tanba ita moris iha tempu neʼebé iha “susar barak”, husi tempu ba tempu ita hotu sei hasoru susar ruma. (2 Tim 3:1) Kuandu ita hasoru susar, ita lalika lakon aten-brani. Espíritu santu bele fó ita kbiit atu tahan hasoru susar naran deʼit.
14. Saida mak fó kbiit ba Job atu tahan susar sira?
14 Job hasoru susar barak neʼebé mosu tuituir malu. Nia lakon ninia rikusoin, nia lakon ninia oan sira no kolega sira, nia mós hetan moras, no ninia feen lakon fiar ba Maromak Jeová. (Jó 1:13-19; 2:7-9) Maibé, Job hetan laran-kmaan kuandu rona konsellu husi Eliú no mós husi Maromak Jeová. Konsellu neʼe inklui liafuan tuirmai neʼe: “Keta book an bá, hateke didiʼak ba Maromak nia serbisu neʼebé furak.” (Jó 37:14) Saida mak ajuda Job atu tahan hasoru susar neʼebé mosu ba nia? No saida mak bele ajuda ita kuandu ita rasik hasoru susar? Buat neʼebé ajuda Job no bele ajuda ita mak hanoin fali kona-ba oinsá Maromak Jeová uza ninia espíritu santu no kbiit, no mós hanoin kleʼan kona-ba buat sira-neʼe. (Jó 38:1-41; 42:1, 2) Dala ruma ita hanoin-hetan fali situasaun balu neʼebé Maromak ajuda ita iha ita-nia moris rasik ka lae? Tuir loloos, nia nafatin hakarak atu ajuda ita ida-idak.
15. Oinsá mak Paulo hetan kbiit atu tahan susar?
15 Tanba apóstolu Paulo hakarak fiar metin nafatin, nia tahan hasoru susar oioin neʼebé bele halakon nia moris. (2 Kor 11:23-28) Oinsá mak nia bele kontrola ninia sentimentu no bele iha hanoin neʼebé loos iha situasaun susar sira-neʼe? Nia sadere ba Maromak Jeová liuhusi orasaun. Durante tempu susar neʼebé Paulo hasoru no neʼebé ikusmai ramata ho ninia mate, nia hakerek: “Naʼi hamriik metin ho haʼu hodi fó kbiit mai haʼu, nuneʼe husi haʼu, lia-menon tomak bele toʼo ba jentiu sira hotu nia tilun; nuneʼe Maromak hasai haʼu husi leaun nia ibun.” (2 Tim 4:17) Tan neʼe, husi ninia esperiénsia rasik nia bele hametin ninia maluk fiar-naʼin sira katak la presiza atu “laran-taridu kona-ba buat ruma”.—Lee Filipe 4:6, 7, 13.
16, 17. Fó toʼok ezemplu ida kona-ba oinsá mak Maromak Jeová fó kbiit ba ninia povu hodi tahan hasoru susar sira iha tempu agora.
16 Irmán Roxana neʼebé serbí nuʼudar pioneiru mós haree ona oinsá Maromak Jeová tau matan ba ninia povu. Kuandu nia husu lisensa loron balu ba ninia patraun atu bele tuir reuniaun boot ba loron tolu, ninia patraun ho hirus hatán katak se nia bá atu tuir reuniaun neʼe, neʼe katak nia tenke sai husi serbisu. Maski nuneʼe, Roxana harohan ho laran hodi husu tulun atu nia la lakon serbisu neʼe, no Roxana bá duni. Depois halo tiha orasaun, nia sente dame iha laran. Iha loron-segunda depois reuniaun neʼe ramata, ninia patraun hasai duni nia husi serbisu. Roxana komesa hanoin barak tanba nia presiza serbisu neʼe. Maski serbisu neʼe ho osan kiʼik, maibé ida-neʼe ajuda atu apoia ninia família. Dala ida tan nia halo orasaun, no nia hanoin katak se Maromak fó ona hahán espirituál ba nia iha reuniaun boot neʼe, Maromak mós sei fó ba nia buat neʼebé nia presiza ba moris loroloron nian. Nuʼudar nia laʼo ba uma, Roxana haree avizu ida neʼebé dehan: “Presiza serbisu-naʼin.” Iha fatin neʼe sira buka daudauk ema neʼebé iha esperiénsia atu bele uza mákina suku roupa nian neʼebé boot, no Roxana bá atu husu kona-ba serbisu neʼe. Patraun iha fatin neʼe haree katak Roxana la iha esperiénsia kona-ba mákina neʼe, maski nuneʼe patraun neʼe fó serbisu ba nia, no ho osan neʼebé barak liu fali ninia serbisu uluk. Roxana sente katak Maromak hatán ninia orasaun sira. No bensaun neʼebé boot liu mak nia bele fahe lia-loos ba ema barak iha ninia serbisu-fatin foun neʼe. Sira naʼin-lima simu lia-loos no hetan ona batizmu, neʼe inklui mós ninia patraun.
17 Dala ruma karik ita sente katak Maromak la hatán kedas ita-nia orasaun ka la hatán tuir dalan neʼebé ita hakarak. Maski nuneʼe, ita bele fiar katak Maromak Jeová iha razaun neʼebé loos atu halo nuneʼe, no karik iha futuru ita sei hatene kona-ba neʼe. Ita mós bele fiar katak Maromak sei nunka husik ninia atan sira neʼebé laran-metin ba nia.—Ebr 6:10.
Hetan kbiit atu tahan susar no tentasaun
18, 19. (a) Tanbasá mak ita la hakfodak kuandu hetan susar no tentasaun sira? (b) Oinsá mak ita bele tahan hasoru susar sira?
18 Maromak Jeová nia povu la hakfodak kuandu sira hetan tentasaun, sente laran-tun, ema fó-terus sira, no hetan koko atu halo tuir deʼit ema seluk. Tuir loloos, mundu neʼe odi ita. (Joao 15:17-19) Maibé, espíritu santu fó kbiit ba ita atu tahan hasoru susar naran deʼit neʼebé ita hetan nuʼudar ita halo Maromak nia serbisu. Maromak Jeová sei la husik ita atu hetan tentasaun neʼebé ita la bele tahan. (1 Kor 10:13, MF) Nia sei nunka husik ita ka hadook an husi ita. (Ebr 13:5) Hodi halo tuir ninia Liafuan neʼebé nia leno liuhusi espíritu santu, ida-neʼe sei proteje no hametin ita. Liután neʼe, Maromak nia espíritu bele book ita-nia maluk fiar-naʼin sira atu ajuda ita.
19 Mai ita hotu kontinua buka espíritu santu hodi halo orasaun no estuda Bíblia. Mai ita halo tuir liafuan tuirmai neʼe: “Hetan kbiit bá ho Maromak nia kbiit tomak neʼebé Maromak haraik ba imi iha nia glória; metin toʼo rohan iha ksolok.”—Kol 1:11.
[Nota–rodapé]
^ par. 2 Salmo 91:13: “Leaun nurak no samea-kobra mak ó sei sama; ó sei hanehan leaun nurak no samea boot.”
^ par. 6 Porezemplu, haree Menara Pengawal, 1 Mei 2001, pájina 16; no Sedarlah! 8 Februari 1993, pájina 21 no 22.
^ par. 8 Números 14:6: “Josué . . . no Caleb . . . , neʼebé hola parte hamutuk ho sira neʼebé bá atu hafuhu rai neʼe . . . 7 . . . dehan nuneʼe ba Israel nia oan sira hotu neʼebé halibur: ‘. . . 8 Se Maromak Jeová kontente ho ita, nia sei lori duni ita atu tama ba rai neʼe no sei fó neʼe ba ita, rai neʼebé nakonu ho susubeen no bani-been. 9 Maibé keta kontra hasoru Jeová rasik; no imi, imi la bele taʼuk ba povu husi rai neʼe . . . Jeová mak hamutuk ho ita.’ . . . 10 Maski nuneʼe, ema-lubun neʼe koʼalia atu tuda sira ho fatuk. . . . 24 ‘Kona-ba haʼu-nia atan Caleb, tanba nia iha espíritu neʼebé la hanesan no nia kontinua atu halo tuir haʼu ho laran, haʼu sei lori duni nia atu tama ba rai neʼebé nia tama uluk.’”
Oinsá ita hatán?
• Oinsá mak ita bele prepara an hodi tahan kuandu ema fó-terus ita?
• Saida mak ita sei halo kuandu ita-nia maluk ida obriga ita atu la fó sai ninia hahalok sala?
• Saida mak ita bele fiar maski ita hasoru susar naran deʼit?
[Pergunta estudu nian]
[Dezeñu iha pájina 28]
Saida mak ita bele aprende husi Josué no Caleb?
[Dezeñu iha pájina 29]
Oinsá mak ita bele ajuda belun ida neʼebé halo sala ruma?
