Ita hanoin-hetan ka lae?

Ita gosta lee Livru Haklaken husi fulan balu liubá ka lae? Se nuneʼe, haree toʼok se Ita bele hatán pergunta sira tuirmai neʼe:

• Buat importante haat saida mak ema tenke halo atu Maromak rona sira-nia orasaun?

Atu Maromak rona orasaun, tenke hatoʼo ida-neʼe ba Maromak Jeová deʼit. Halo orasaun tuir Maromak nia hakarak, hatoʼo hodi fiar, no liuhusi Jesus nia naran.​—1/1, pájina 6-7.

• Bíblia fó ukun-fuan kona-ba oras no fatin atu halo orasaun ka lae?

Bíblia hatudu duni katak iha tempu neʼebé diʼak atu halo orasaun. Porezemplu, Jesus halo orasaun atu fó-agradese ba Maromak antes nia han ho ninia dixípulu sira. (Lc 22:17) No kuandu ninia dixípulu sira halibur malu atu adora Maromak, sira halo orasaun hamutuk. Maibé, tuir loloos Bíblia la fó ukun-fuan kona-ba oras no fatin atu halo orasaun. Bíblia konta istória barak kona-ba Maromak nia atan sira neʼebé halo orasaun iha tempu naran deʼit no iha fatin oioin.​—1/1, pájina 9.

• Anju sira iha interese ba ita ka lae?

Anju sira iha interese duni ba ema. Jesus hatete: “Maromak nia anju sira . . . sei haksolok tanba ema maksalak ida neʼebé hakribi sala.” (Lc 15:10) Anju sira iha knaar atu ajuda Maromak nia atan sira atu hakbesik nafatin ba Maromak. Tan neʼe, kuandu nia hatete ba nia dixípulu sira kona-ba labele halo buat ruma neʼebé lori sira-nia maluk ba sala, nia hatete: “Keta hewai kiʼikoan sira-neʼe ida, basá haʼu dehan ba imi katak sira-nia anju sira fihir nafatin haʼu Aman lalehan nia futar oin.” (Mt 18:10) Liafuan neʼe la dehan katak ema kristaun ida-idak iha nia rasik nia anju neʼebé iha responsabilidade atu tau matan ba ema neʼe. Maibé Jesus hatudu katak anju sira neʼebé serbisu hamutuk ho Maromak iha interese duni ba ema kristaun sira-nia diʼak.​—1/1, pájina 16.

• Iha apóstolu sira-nia tempu, oinsá ema uza ró atu halo viajen?

Ema uza ró kiʼik neʼebé halai tuir tasi-ninin atu lori ema no sasán ba fatin ruma, ka atu hakur Tasi Galileia. (Joao 6:1, 2, 16, 17, 22-24) Ema uza ró neʼebé boot liu atu lori sasán husi portu ida ba portu seluk neʼebé dook iha Tasi Mediterraneu. Ró-naʼin sira uza buat neʼebé sira bele haree, hanesan fitun sira, nuʼudar sinál atu bá fatin ruma. Tan neʼe, sira bele hodi ró husi fulan-Maiu toʼo fulan-Setembru nia klaran deʼit, kuandu tasi hakmatek no sira bele haree momoos. Maski nuneʼe, dala barak ró sira bele mout. (Apos 27:39-44; 2 Kor 11:25) Pasajeiru sira tenke hela no toba iha ró andár-leten, maski kona loro-manas ka udan, sira han hahán neʼebé sira lori rasik. Sira bele hetan bee-hemu deʼit.​—1/1, pájina 26.

• Tanbasá mak iha 1 Korinto apóstolu Paulo koʼalia kona-ba naʼan neʼebé hasaʼe ona ba lulik sira?

Ema Grésia no ema Roma antigu iha toman atu hasaʼe animál nuʼudar sakrifísiu iha sira-nia templu. Maibé ema jentiu sira-neʼe la han naʼan hotu neʼebé koʼa tiha durante serimónia neʼe. Entaun, sira faʼan naʼan restu iha merkadu. Ema kristaun la hola parte iha adorasaun falsu, maibé ida-neʼe la dehan katak naʼan neʼebé hasaʼe tiha nuʼudar sakrifísiu iha templu foʼer no la bele han. Apóstolu Paulo hakerek: “Han buat hotu neʼebé faʼan iha pasar hodi la husu hodi hanoin ó-nia konxiénsia, basá ‘rai no buat hotu iha nia Naʼi nian.’” (1 Kor 10:25, 26)​—1/1, pájina 32.

• Ema kristaun loos uza Maromak nia naran nuʼudar buat lulik ka lae?

Ema balu haree sasán ka símbolu ruma nuʼudar buat lulik ka maninga neʼebé proteje sira, maibé Maromak nia povu la haree Maromak nia naran nuʼudar buat lulik. Sira tau fiar iha Maromak Jeová no buka atu halo tuir ninia hakarak, nuneʼe sira hetan protesaun iha ninia naran. (Sof 3:12, 13)—15/1, pájina 5-6.

• Tanbasá mak Maromak Jeová la simu tan Liurai Saul?

Tuir loloos, Saul tenke hein ba Maromak nia profeta atu hasaʼe sakrifísiu, maibé nia la halo tuir hodi hasaʼe sakrifísiu rasik. Tuirmai, nia la halo tuir Maromak nia ukun-fuan atu halakon inimigu sira.​—15/2, pájina 22-23.

• Oinsá mak ita bele hatudu katak ita odi buat neʼebé aat?

Ita tenke iha hanoin neʼebé loos kona-ba hemu tua, hasees an husi matan-dook nia atividade, no halo tuir Jesus nia avizu kona-ba labele simu hahalok foʼer. Porezemplu, ita sei hasees an husi pornografia no hahalok foʼer neʼebé ida-neʼe hamosu iha ita-nia neon. (Mt 5:27, 28) No mós, ita sei la ransu malu ho ema neʼebé kongregasaun hasai tiha ona.​—15/2, pájina 28-32.

• Oinsá mak Jeremias hanesan ai-hun neʼebé “kuda besik bee, neʼebé hasai ninia abut”? (Jer 17:7, 8)

Nia “nunka para atu fó fuan”, no nia la husik ema aat kona ninia hanoin. Nia kaer metin ba Ida neʼebé Hun ba “bee” moris nian, no nia simu ho laran buat hotu neʼebé Maromak hatete ba nia.​—15/3, pájina 14.