Laran-moos nafatin iha mundu neʼebé aat

HAHALOK la laran-moos haleʼu ita hanesan anin neʼebé iha fatin hotu. Ema bosok, naʼok, la selu fali debe, no gaba an kona-ba halo negósiu hodi lohi ema. Tanba ita hela iha mundu hanesan neʼe, dala barak ita hasoru situasaun neʼebé koko ita-nia hakarak atu hatudu laran-moos. Entaun, oinsá mak ita bele tahan hasoru hakarak atu la hatudu laran-moos? Mai ita haree buat tolu neʼebé bele ajuda ita atu halo ida-neʼe. Neʼe mak taʼuk ba Maromak Jeová, iha konxiénsia ka laran neʼebé moos, no haksolok ho buat neʼebé ita iha ona.

Taʼuk ba Maromak Jeová

Profeta Isaías hakerek: “Jeová mak ita-nia Tesi-Lia Naʼin, Jeová mak Ida neʼebé Fó Ukun-Fuan ba ita, Jeová mak ita-nia Liurai.” (Isa 33:22) Hodi rekoñese Maromak Jeová nia pozisaun neʼebé aas, neʼe sei halo ita taʼuk atu halo nia sente laran-kanek. No ita-nia taʼuk neʼe sei book ita atu hadook an husi hahalok la laran-moos. Provérbios 16:6 dehan: “Hodi taʼuk ba Jeová ema ida sei hasees an husi buat neʼebé aat.” Taʼuk neʼe laʼós tanba ita haree Maromak nuʼudar hirus-teen ka sente katak nia sempre buka atu fó kastigu ba ema, maibé ita taʼuk ba Maromak tanba ita lakohi atu halo ita-nia Aman iha lalehan sente laran-kanek. Ita hatene katak Maromak hanoin ita, no ita lakohi atu hatudu hahalok neʼebé halo nia sente triste.​—1 Ped 3:12.

Esperiénsia husi Ricardo no ninia feen, Fernanda, hatudu katak taʼuk ba Maromak lori rezultadu diʼak. * Kuandu sira hasai osan dolar atus hitu husi banku, Fernanda la sura no tau deʼit iha ninia karteira. Depois sira selu tiha sira-nia tusan no fila fali ona ba uma, sira hakfodak hodi haree katak osan neʼebé iha hela iha Fernanda nia karteira laran sei barak hanesan osan neʼebé sira hasai husi banku. Sira hanoin: “Karik serbisu-naʼin iha banku fó liu osan mai ita.” Foufoun, sira iha hanoin atu rai deʼit osan neʼe tanba iha mós tusan barak neʼebé sira seidauk selu. Ricardo hatete: “Ami halo orasaun ba Maromak Jeová atu ajuda ami atu fó fali osan neʼe. Tanba ami hakarak atu halo Maromak kontente hodi halo tuir buat neʼebé hakerek iha Provérbios 27:11, ida-neʼe book ami atu fó fila fali osan neʼe.”

Laran neʼebé hetan treinu husi Bíblia

Ita bele treinu ita-nia laran ka konxiénsia hodi estuda Bíblia no hakaʼas an atu halo tuir buat neʼebé ita aprende. Hodi halo nuneʼe, ‘Maromak nia liafuan neʼebé moris no book makaʼas’ bele kona ita-nia hanoin no mós laran. Ida-neʼe sei book ita “atu moris ho laran-moos iha buat hotu”.​—Ebr 4:12; 13:18.

Hanoin toʼok kona-ba João nia esperiénsia. Nia debe osan barak, maizumenus dolar rihun lima. Tuirmai, nia muda ba sidade seluk, maski seidauk selu ninia tusan. Tinan ualu depois neʼe, João aprende lia-loos. No tanba ninia laran hetan ona treinu husi Bíblia, ida-neʼe book nia atu bá hasoru ema neʼebé fó-empresta osan ba nia atubele selu fali tusan neʼe! Tanba João manán osan uitoan deʼit no mós presiza tau matan ba ninia feen no ninia oan naʼin-haat, ema neʼebé fó-empresta osan ba nia simu atu João selu fali ninia tusan fulan-fulan.

Haksolok ho buat neʼebé ita iha ona

Apóstolu Paulo hatete: “Laran-haksolok ho buat neʼebé [ita] iha ona. . . . Wainhira ita iha ai-han no hatais, ita haksolok ona ho sira-neʼe.” (1 Tim 6:6-8) Hodi simu konsellu diʼak neʼe ho laran, ida-neʼe sei ajuda ita atu hasees an husi negósiu neʼebé karik kontra lei ka negósiu neʼebé buka deʼit atu manán osan barak atu sai riku lalais. (Prov 28:20) Halo tuir Paulo nia konsellu neʼe sei  ajuda ita atu tau uluk Maromak nia Reinu, ka ukun, hodi fiar katak Maromak sei ajuda ita atu hetan buat neʼebé ita presiza loroloron.​—Mt 6:25-34.

Maibé, tanba “rikusoi mundu neʼe nian” bele lohi ita, entaun diʼak atu nunka sente katak ita sei la monu ba hahalok kaan-teen. (Mt 13:22) Hanoin toʼok kona-ba mane ida naran Acan. Nia haree rasik oinsá Maromak halo milagre atu ema Israel bele hakur mota Jordaun. Maski nuneʼe, hahalok kaan-teen book nia atu naʼok osan-mutin no osan-mean balu no mós hatais neʼebé karun husi sidade Jerikó. Ninia hahalok ikusmai lori mate ba nia. (Jos 7:1, 20-26) Tan neʼe mak tinan atus balu depois neʼe, Jesus fó avizu, hodi dehan: “Imi haree bá, keta kaan rikusoi, basá, laʼós ema nia rikusoi mak halo ema moris liu.”​—Lc 12:15.

Hatudu laran-moos iha serbisu-fatin

Mai ita haree toʼok situasaun balu neʼebé bele koko ita-nia laran-metin atu halo buat hotu ho laran-moos. Hatudu laran-moos iha serbisu-fatin inklui “la bosok” ka la naʼok maski tuir ema barak nia hanoin neʼe la sala. (Tito 2:9, 10) Irmaun ida naran Jurandir serbisu ho governu nia organizasaun ida. Nia hatudu laran-moos kuandu nia fó ninia relatóriu kona-ba osan hira mak nia uza ona atu laʼo ba fatin seluk atu halo serbisu. Maibé, ninia kolega serbisu nian sempre hatama relatóriu neʼebé bosok atu bele hetan osan barak liután. Sira bele halo nuneʼe tanba xefe neʼebé tau matan ba serbisu neʼe husik sira atu halo ida-neʼe. Tuir loloos, tanba Jurandir hatudu laran-moos, xefe neʼe kastigu nia hodi la haruka nia tan atu laʼo ba fatin seluk atu halo serbisu. Maski nuneʼe, ikusmai, kuandu governu haruka ema atu haree didiʼak oinsá organizasaun neʼe gasta nia osan, sira gaba Jurandir tanba nia laran-moos, no tan neʼe nia hetan pozisaun neʼebé aas.

Irmaun ida naran André halo serbisu atu faʼan sasán. Loron ida, ninia patraun haruka nia atu bosok hodi aumenta folin kuandu nia halo nota ba kliente sira. Ita-nia irmaun neʼe halo orasaun ba Maromak Jeová atu husu ajuda hodi bele halo tuir nafatin Bíblia nia matadalan. (Sal 145:18-20) Nia mós koko atu esplika ba ninia patraun kona-ba tansá nia labele halo tuir buat neʼebé patraun haruka, maibé patraun la simu ida-neʼe. Entaun, André deside atu para husi serbisu neʼe maski nia manán osan barak. Maibé, maizumenus tinan ida liu tiha, ninia patraun bolu fali nia atu serbisu, no patraun hatete katak nia la aumenta tan folin ba kliente sira. André mós hetan pozisaun nuʼudar xefe.

Selu fali tusan

Apóstolu Paulo fó konsellu ba ema kristaun, hodi dehan: “Keta halo tusan ho ema ida.” (Rom 13:8) Maski nuneʼe, dala ruma karik ita sente katak la sala atu la selu fali osan neʼebé ita debe tanba ema neʼebé fó-empresta ba ita mak ema neʼebé riku no la presiza osan neʼe. Maibé, Bíblia fó  avizu, hodi dehan: “Ema aat empresta no la selu fali.”​—Sal 37:21.

Maibé, oinsá se ita hasoru “akontesimentu neʼebé mosu derrepente deʼit”, no ida-neʼe hanetik ita atu selu fali buat neʼebé ita debe? (Ecle 9:11) Porezemplu, Francisco empresta osan husi Alfredo maizumenus dolar rihun hitu atu bele selu fali osan neʼebé nia debe husi banku. Maibé, tanba ninia negósiu la laʼo ho diʼak, nia la bele selu fali osan neʼe hodi tuir tempu neʼebé deside ona. Entaun, Francisco halo desizaun atu hakbesik ba Alfredo atu koʼalia kona-ba buat neʼebé akontese, no Alfredo konkorda atu Francisco selu fali osan neʼe uitoan-uitoan.

Fó sai buat neʼebé loos

Ita hanoin-hetan ezemplu aat husi Ananias no Safira, ema kristaun iha apóstolu sira-nia tempu ka lae? Depois faʼan tiha sira-nia toʼos, sira lori deʼit osan balu ba apóstolu sira, maski nuneʼe sira dehan katak neʼe mak osan hotu neʼebé sira hetan hodi faʼan toʼos neʼe. Sira halo ida-neʼe tanba hakarak atu ema seluk gaba sira kona-ba sira-nia laran-luak. Maibé, Maromak haleno apóstolu Pedro liuhusi espíritu santu hodi hatudu sai sira-nia planu aat neʼe, no Maromak Jeová mós oho sira.​—Apos 5:1-11.

La hanesan ho Ananias no Safira neʼebé la hatudu laran-moos, ema sira neʼebé hakerek Bíblia mak ema laran-moos. Moisés ho laran-moos konta kona-ba sala neʼebé nia halo kuandu nia sai hirus, no tanba sala neʼe ikusmai Maromak bandu nia atu la tama rai neʼebé Maromak promete ona. (Núm 20:7-13) Nuneʼe mós, Jonas la taka ninia sala neʼebé nia halo antes no depois nia haklaken ba ema Nínive. Maibé, nia ho laran-moos hakerek kona-ba ninia sala sira-neʼe.​—Jonas 1:1-3; 4:1-3.

Klaru katak ita presiza aten-brani atu bele koʼalia buat neʼebé loos, maski karik ikusmai ida-neʼe lori rezultadu neʼebé ladún diʼak mai ita. Porezemplu, hanoin toʼok kona-ba buat neʼebé akontese ba Nathalia neʼebé tinan 14 iha ninia eskola. Nia haree fali ba rezultadu ezame nian neʼebé nia simu no nia hetan katak resposta ida neʼebé mestre dehan mak loos, tuir loloos neʼe sala. Maski Nathalia hatene katak hodi fó sai ba mestre kona-ba sala neʼe, ida-neʼe sei kona notas neʼebé nia simu, maibé nia la taʼuk atu fó-hatene ba ninia mestre. Nia hatete: “Haʼu-nia inan-aman sempre hanorin haʼu katak atu halo kontente Maromak Jeová, haʼu tenke hatudu laran-moos. Tan neʼe, haʼu-nia laran sei duun haʼu se haʼu la fó-hatene ba mestre.” Mestre neʼe hafolin tebes Nathalia nia laran-moos.

Laran-moos lori hahiʼi ba Maromak Jeová

Giselle, neʼebé tinan 17, hetan karteira ida neʼebé iha dokumentu oioin no iha mós osan dolar 35. Entaun, nia husu ajuda ba mestre sira iha ninia eskola atu bele fó fali karteira neʼe ba ninia naʼin. Fulan ida depois neʼe, visediretór eskola nian lee karta ida ba alunu sira iha Giselle nia klase hodi gaba Giselle tanba ninia laran-moos no gaba mós ninia família tanba treinu nia ho didiʼak tuir Maromak nia matadalan. Ninia “hahalok diʼak sira” lori duni hahiʼi ba Maromak Jeová!​—Mt 5:14-16.

Tanba ita moris hamutuk ho ema sira neʼebé “hanoin deʼit sira an hodi buka osan, loko-an, no foti-an”, ita presiza duni hakaʼas an atu hatudu laran-moos. (2 Tim 3:2) Buat neʼebé bele ajuda ita atu nafatin laran-moos maski mundu neʼe la hatudu laran-moos mak haburas taʼuk ba Maromak Jeová, treinu ita-nia laran tuir Bíblia nia matadalan, no haksolok ho buat neʼebé ita iha ona. Hodi halo buat sira-neʼe, ita sei hametin ita-nia relasaun ho Maromak Jeová, ida neʼebé ‘loos no hadomi hahalok loos sira’.​—Sal 11:7.

[Nota–rodapé]

[Dezeñu iha pájina 7]

Taʼuk ba Maromak Jeová ajuda ita atu hatudu laran-moos

[Dezeñu iha pájina 8]

Ita-nia laran-moos lori hahiʼi ba Maromak Jeová