Laran-diʼak book ema nia laran

SEÑORA ferik ida iha rai-Olanda la hatudu laran-diʼak kuandu irmaun George ho ninia feen, irmán Manon, hakbesik nia atu fahe lia-foun diʼak. Señora ferik neʼe hatete katak nia laʼen ida primeiru no segundu mate ona no ninia oan ida mós mate, liután neʼe nia hetan moras artrite ka ruin-siin. Maski señora neʼe sai kalma uitoan, maibé nia nunka hatudu laran-diʼak.

Maski nuneʼe, George dehan ba Manon katak diʼak atu bá vizita fali señora neʼe no lori ai-funan ba nia tanba nia sente mesak no triste. Kuandu sira bá fali, señora neʼe, naran Rie, nia hakfodak tebes. Maibé, tanba nia okupadu, sira halo arranju atu hasoru malu fali iha tempu seluk. Kuandu George no Manon fila hodi tuir tempu neʼebé sira arranja ona, sira la hetan ema ida iha uma. Maski sira koko filafali iha tempu seluk, maibé sira la hetan señora neʼe. Tan neʼe, sira hanoin katak señora neʼe subar an husi sira.

Loron ida, George hetan señora Rie iha uma. Rie husu deskulpa tanba nia la iha kuandu sira mai, no nia dehan katak nia baixa iha ospitál. Rie mós dehan: “Ita hatene saida mak haʼu halo depois imi fila? Haʼu hahú lee Bíblia!” Ikusmai, Rie komesa estuda Bíblia.

Nuʼudar señora Rie estuda Bíblia, nia troka ninia hahalok hirus-teen hodi sai fali ema neʼebé kontente no laran-diʼak. Maski nia la bele sai husi uma tanba idade no saúde la diʼak, maibé nia hahú fahe kedas ninia fiar foun ba ema sira neʼebé vizita nia. Nia mós la bele tuir beibeik reuniaun sira, maibé nia kontente kuandu irmaun-irmán sira vizita nia. Iha loron neʼebé nia halo tinan 82, nia tuir reuniaun boot ba loron rua no hetan batizmu hodi hatudu katak nia dedika an ona ba Jeová.

Depois irmán Rie mate ona ba fulan balu, ema hetan poezia ida neʼebé nia hakerek. Iha poezia neʼe, nia fó sai kona-ba oinsá ema neʼebé idade ona sente mesak, no fó sai katak hahalok laran-diʼak mak importante tebes. Irmán Manon hatete: “Kuandu haʼu lee poezia neʼe, ida-neʼe book duni haʼu-nia laran, no haʼu kontente tebes tanba Jeová ajuda ami atu hatudu laran-diʼak ba nia.”

Sin, Jeová nia ezemplu book duni ita atu hatudu mós domin no laran-diʼak. (Ef 5:1, 2) Ita sei hetan duni rezultadu diʼak iha ita-nia serbisu haklaken kuandu ita ‘nuʼudar Maromak nia ema’ hatudu laran-diʼak.—2 Kor 6:4, 6.