“BUAT sira-neʼe uza atu halo saida?” Irmaun George Naish husu hanesan neʼe kuandu nia haree ai-lolon barak neʼebé naruk metru 18 iha armazein ida iha sidade Saskatoon, Saskatchewan, iha rai-Kanadá. Ema hatete katak ai sira-neʼe uluk uza nuʼudar ai-riin ba komunikasaun durante Funu Mundiál Primeiru. Kona-ba tempu neʼebá, irmaun Naish hatete: “Haʼu-nia hanoin kona katak ami bele uza ai-lolon sira-neʼe atu harii antena rádiu nian, no hanesan neʼe mak ami komesa hanoin atu loke estasaun rádiu ba atividade kristaun.” Liutiha tinan ida deʼit, iha tinan 1924, irmaun sira loke estasaun rádiu naran CHUC. Iha tempu neʼebá, iha rai-Kanadá seidauk iha estasaun rádiu barak neʼebé hatoʼo informasaun kona-ba relijiaun.

Tanba Kanadá mak rai neʼebé luan hanesan ho Europa, entaun haklaken liuhusi rádiu mak dalan diʼak. Irmán Florence Johnson, neʼebé uluk serbisu iha estasaun rádiu iha Saskatoon, hatete: “Liuhusi ami-nia estasaun rádiu, lia-loos habelar ba ema barak neʼebé susar ba ami atu bá hasoru. Liután neʼe, tanba iha tempu neʼebá rádiu mak buat neʼebé foun ba ema hotu, sira laran-manas atu rona buat naran deʼit neʼebé fó sai iha rádiu.” Iha tinan 1926, Estudante Bíblia (naran uluk nian ba Testemuña ba Jeová) iha ona sira rasik nia estasaun rádiu iha sidade haat iha rai-Kanadá. *

Entaun, se ema loke rádiu atu rona programa Estudante Bíblia nian, sira bele rona saida deʼit? Sira bele rona irmaun-irmán sira husi kongregasaun iha sidade neʼebá kanta no toka múzika no dala ruma mós irmaun sira fó sai múzika orkestra nian. Klaru katak ema mós rona beibeik irmaun sira hatoʼo diskursu no iha mós programa neʼebé irmaun-irmán balu koʼalia hamutuk kona-ba Bíblia. Irmán Amy Jones, neʼebé uluk hola parte iha programa hanesan neʼe, hatete: “Kuandu haʼu bá haklaken no haʼu fó-hatene haʼu-nia naran ba uma-naʼin, dala ruma sira dehan: ‘Oh, haʼu rona Ita koʼalia iha rádiu.’”

Estudante Bíblia iha sidade Halifax, Nova Scotia, sira komesa programa ida iha dalan neʼebé uluk estasaun rádiu sira seluk seidauk halo, neʼe mak konvida  rona-naʼin atu telefone ba estasaun rádiu hodi husu pergunta kona-ba Bíblia. Irmaun ida hatete: “Ema gosta tebes programa hanesan neʼe. No ema barak telefone ba estasaun rádiu toʼo ami la bele simu hotu.”

Hanesan ho apóstolu Paulo, ema balu simu Estudante Bíblia nia mensajen maibé balu la simu. (Apos 17:1-5) Porezemplu, kuandu Hector Marshall rona kona-ba livru Studies in the Scriptures husi Estudante Bíblia, nia hameno livru sira-neʼe ho volume neen. Nia hatete: “Haʼu hanoin katak livru sira-neʼe sei ajuda haʼu atu hanorin iha igreja domingu-domingu.” Maibé, kuandu Hector lee tiha volume primeiru, nia deside atu husik ninia igreja. Ikusmai, nia sai haklaken-naʼin neʼebé laran-manas, no serbí Jeová ho laran-metin toʼo nia mate iha tinan 1998. Iha Nova Scotia, kuandu Estudante Bíblia fó sai diskursu ho tema “Maromak nia Ukun, Esperansa ba Mundu neʼe”, ema-boot militár ida naran John A. MacDonald hatete ba irmaun ida: “Horisehik, ema iha Illa Cape Breton rona mensajen neʼebé diʼak liu fali buat seluk hotu neʼebé ami rona iha área neʼe.”

Maibé, ulun-naʼin igreja sira sai hirus. Ema katóliku balu iha sidade Halifax ameasa Estudante Bíblia katak sira sei sobu estasaun rádiu. Ikusmai, iha tinan 1928, tanba ulun-naʼin igreja sira mak book governu, derrepente deʼit governu fó sai katak Estudante Bíblia sei la hetan lisensa tan atu halaʼo sira-nia estasaun rádiu. Tan neʼe, irmaun-irmán sira fahe mensajen iha surat-tahan (Who Owns the Air?) hodi protesta desizaun laloos neʼe. Maski nuneʼe, governu sira la fó lisensa tan atu Estudante Bíblia kontinua halaʼo estasaun rádiu.

Iha tempu neʼebá, Jeová nia atan sira neʼebé ladún barak iha Kanadá, sira husik desizaun neʼe atu halo sira laran-tun ka lae? Lae. Irmán Isabel Wainwright hatete: “Foufoun, ami sente katak inimigu sira mak manán. Maibé haʼu hatene katak se Jeová hakarak, nia bele hapara ida-neʼe. Tan neʼe, haʼu hanoin katak ida-neʼe mak tempu neʼebé ami presiza buka dalan neʼebé diʼak liután atu haklaken lia-foun kona-ba Maromak nia Ukun.” Duké sadere deʼit ba estasaun rádiu atu haklaken, Estudante Bíblia iha Kanadá komesa hakaʼas an atu bá haklaken no vizita ema iha sira-nia uma. Maski nuneʼe, durante tempu balu, rádiu mak dalan ida neʼebé diʼak tebes atu ema barak ‘rona mensajen neʼebé diʼak liu hotu’.—Husi ita-nia arkivu iha Kanadá.