1. Oinsá mak koʼalia ba malu ho didiʼak bele ajuda moris kaben nian?

 IRMAUN ida iha rai-Kanadá hatete: “Haʼu gosta liu hamutuk ho haʼu-nia feen duké ho ema seluk, haʼu-nia haksolok aumenta ba dala rua no haʼu-nia triste sai menus kuandu haʼu hamutuk ho nia.” Laʼen ida iha rai-Austrália hatete: “Durante tinan 11 neʼebé ami kaben, ami nunka husik loron ida atu la koʼalia ba malu. Ami nunka sente laran-rua kona-ba ami-nia relasaun neʼebé metin tanba ami koʼalia ba malu beibeik.” Irmán ida iha rai-Kostarrika mós hatete katak nia ho ninia laʼen koʼalia ba malu beibeik, no nia hatete: “Ida-neʼe ajuda ami atu hakbesik liután ba Maromak Jeová, sees husi tentasaun sira, hametin liután ami-nia unidade, no haburas domin ba malu.”

2. Tanbasá mak dala ruma susar ba feen-laʼen atu koʼalia ba malu?

² Ita ho Ita-nia kaben mós gosta atu koʼalia ba malu ka lae? Klaru katak dala ruma susar atu koʼalia ba malu ho didiʼak, tanba feen-laʼen hotu mak sala-naʼin, iha hahalok la hanesan ho fraku oioin, no situasaun moris nian no kultura la hanesan. (Rom 3:23) Liután neʼe, mane no feto koʼalia iha dalan neʼebé la hanesan. Tan neʼe, matenek-naʼin sira neʼebé estuda kona-ba moris kaben nian hatete katak feen-laʼen presiza hakaʼas an duni atu bele iha relasaun neʼebé bele tahan ba nafatin no koʼalia ba malu ho didiʼak.

3. Saida mak ajuda feen-laʼen atu hametin sira-nia moris kaben nian?

³ Loos duni, atu hetan susesu iha moris kaben nian, ita presiza hakaʼas an. Maibé rezultadu mak ita bele moris haksolok hamutuk hodi hadomi malu ho laran. (Ecle 9:9) Hanoin toʼok kona-ba Isaac ho Rebeca. (Gên 24:67) Bíblia la hatete katak sira-nia domin ba malu ikusmai sai fraku bainhira sira sai idade ona. Nuneʼe mós ho feen-laʼen ohin loron,  ema barak haksolok nafatin ho sira-nia moris kaben nian. Maibé oinsá mak sira hametin sira-nia moris kaben nian? Tanba sira aprende atu koʼalia ba malu hodi fó sai sira-nia hanoin no sentimentu ho matenek, domin, respeitu, no haraik-an. Tan neʼe, mai ita haree oinsá mak hahalok hirak-neʼe bele halo fasil ba feen-laʼen atu koʼalia ba malu ho didiʼak.

4, 5. Oinsá mak matenek bele ajuda feen-laʼen atu komprende malu? Fó toʼok ezemplu.

⁴ Iha Provérbios 16:20 hatete: “Ema neʼebé hatudu matenek . . . sei hetan buat diʼak.” Liafuan neʼe sai loos liuliu iha moris kaben nian. (Lee Provérbios 24:3. a) Matenek nia hun mak Maromak nia Liafuan. Porezemplu, tuir Gênesis 2:18, Maromak kria feto nuʼudar ajuda-naʼin ba mane, laʼós nuʼudar ema neʼebé hanesan deʼit ho mane. Tan neʼe, dalan neʼebé feto sira koʼalia mós la hanesan ho mane sira. Maski ema ida-idak la hanesan, maibé baibain feto sira gosta atu koʼalia kona-ba sira-nia sentimentu no kona-ba ema seluk. Feto sira mós kontente atu koʼalia nakloke kona-ba sira-nia hanoin hodi bele sente domin. Maibé, mane barak gosta liu atu koʼalia kona-ba atividade, problema, no oinsá atu rezolve problema sira-neʼe duké koʼalia kona-ba sira-nia sentimentu. Liután neʼe, mane sira hakarak simu respeitu.

⁵ Irmán ida iha rai-Bretaña hatete: ‘Haʼu-nia laʼen gosta atu rezolve kedas problema duké rona ba haʼu. Ida-neʼe halo haʼu la kontente tanba haʼu-nia hakarak mak atu nia tuur no rona didiʼak ba buat neʼebé haʼu koʼalia.’ Laʼen ida hatete: “Kuandu foin kaben, haʼu-nia toman mak koʼalia kedas kona-ba oinsá atu rezolve problema neʼebé haʼu-nia feen hasoru. Maibé lakleur, haʼu aprende katak nia hakarak deʼit atu haʼu rona nia.” (Prov 18:13; Tgo 1:19) Laʼen neʼebé matenek hatene ninia feen nia sentimentu no hatudu laran-diʼak ba nia hodi nia bele sente domin. Nia mós hafolin ninia feen nia hanoin no sentimentu. (1 Ped 3:7) Nuneʼe mós ho feen neʼebé matenek, sira hakaʼas an atu komprende laʼen nia hanoin. Kuandu feen ho laʼen hafolin malu no halaʼo sira ida-idak nia knaar tuir Bíblia nia matadalan, sira-nia relasaun nuʼudar feen-laʼen sai metin liután, no sira mós bele apoia malu atu halo desizaun neʼebé diʼak.

6, 7. (a) Oinsá mak Eclesiastes 3:7 ajuda feen-laʼen atu hatudu matenek? (b) Oinsá mak feen bele hatudu matenek? No laʼen mós presiza hakaʼas an atu halo saida?

⁶ Feen-laʼen neʼebé matenek mós hatene tempu atu nonook no tempu atu koʼalia. (Ecle 3:1, 7) Irmán ida neʼebé kaben ba tinan sanulu ona hatete: “Haʼu aprende katak dala ruma iha tempu neʼebé la diʼak atu fó sai problema. Kuandu haʼu-nia laʼen okupadu hela ho serbisu ka responsabilidade seluk, haʼu buka tempu seluk atu koʼalia kona-ba problema. Hodi halo nuneʼe, ami bele koʼalia ba malu ho didiʼak.” Kuandu feen sira koʼalia ho kalma no laran-maus “iha tempu neʼebé loos”, ida-neʼe bele halo fasil ba sira-nia laʼen atu rona.—Lee Provérbios 25:11. b

⁷ Laʼen kristaun mós presiza hakaʼas an atu fó sai sira rasik nia sentimentu ba feen duké rona deʼit ba buat neʼebé sira-nia feen koʼalia. Katuas kristaun ida neʼebé kaben ba tinan 27 ona hatete: “Haʼu presiza hakaʼas an atu koʼalia ba haʼu-nia feen kona-ba buat neʼebé haʼu sente iha laran.” Irmaun ida neʼebé kaben ba tinan 24 ona mós hatete: “Haʼu-nia toman uluk mak rai hela deʼit haʼu-nia estrese iha laran hodi hanoin katak se haʼu nonook deʼit, neineik-neineik problema sei lakon. Maibé ikusmai, haʼu komprende katak hodi fó sai haʼu-nia sentimentu, neʼe la dehan katak haʼu mak ema fraku. Kuandu haʼu sente susar atu fó sai sentimentu, haʼu halo orasaun hodi husu ajuda atu bele koʼalia hodi uza  liafuan neʼebé loos no iha dalan neʼebé diʼak. Tuirmai, haʼu dada iis naruk no komesa koʼalia.” Liután neʼe, importante mós ba feen-laʼen atu buka tempu neʼebé diʼak atu koʼalia ba malu, hanesan sira naʼin-rua tuur mesak hodi lee hamutuk eskritura loron-loron ka lee Bíblia.

8. Saida mak book feen-laʼen atu hakarak hadiʼa dalan neʼebé sira koʼalia ba malu?

⁸ Klaru katak la fasil ba feen-laʼen atu troka sira-nia toman neʼebé ladiʼak. Maibé buat neʼebé importante mak halo orasaun hodi husu Maromak nia espíritu santu no sira naʼin-rua iha hakarak atu hadiʼa dalan neʼebé sira koʼalia ba malu. Kuandu ita hadomi Jeová no hakarak halo nia kontente, no mós haree moris kaben nian nuʼudar buat neʼebé sagradu, ita iha hanoin neʼebé loos, la hanesan ho ema barak iha mundu neʼe. Irmán ida neʼebé kaben ba tinan 26 ona hatete: “Haʼu ho haʼu-nia laʼen simu ho laran Jeová nia hanoin kona-ba moris kaben nian, tan neʼe ami nunka hanoin atu fahe malu, maibé hakaʼas an atu rezolve problema sira hodi koʼalia ba malu ho didiʼak.” Ita bele fiar katak Maromak sei fó bensaun ba ema hanesan neʼe, neʼebé laran-metin ba nia no hakaʼas an atu halo nia kontente.—Sal 127:1.

9, 10. Hodi halo saida deʼit mak feen-laʼen bele haburas sira-nia domin ba malu?

⁹ Hahalok neʼebé importante liu mak domin, neʼebé “kesi metin” feen-laʼen atu sai “ida deʼit”. (Kol 3:14) Nuʼudar feen-laʼen hatudu laran-metin ba malu iha tempu diʼak no tempu susar, sira-nia domin sei sai buras ba beibeik no sira naʼin-rua bele sai belun neʼebé besik liután. Buat neʼebé ajuda sira atu haburas sira-nia domin mak laʼós hahalok espesiál oioin, hanesan hatudu iha filme sira, maibé hahalok sira neʼebé ita hatudu ba malu iha moris loroloron nian, hanesan hakoʼak, koʼalia ho diʼak, hateke ba malu ho oin-midar, no husu ba malu kona-ba buat neʼebé akontese iha loron neʼe. Maski hahalok sira-neʼe haree hanesan buat neʼebé baibain deʼit, maibé buat sira-neʼe iha folin boot iha moris kaben nian. Feen-laʼen ida neʼebé kaben ba tinan 19 ona hatete katak sira iha toman atu telefone ka haruka mensajen ba malu atu buka-hatene se sira-nia situasaun diʼak hela ka lae.

¹⁰ Domin mós book feen-laʼen atu koñese malu ho diʼak liután. (Flp 2:4) No nuʼudar sira koñese malu ho didiʼak liután, sira-nia domin sei sai buras liután maski sira ida-idak iha fraku  oioin, no sira-nia relasaun nuʼudar feen-laʼen sai metin liután ba nafatin. Tan neʼe, se Ita mak kaben-naʼin, husu ba Ita-nia an: ‘Haʼu hatene didiʼak haʼu-nia kaben toʼo iha neʼebé? Haʼu hatene didiʼak ninia sentimentu no ninia hanoin ka lae? Haʼu hanoin beibeik kona-ba haʼu-nia kaben nia hahalok diʼak neʼebé uluk liu halo haʼu laran monu ba nia ka lae?’

11. Tanbasá mak importante ba feen-laʼen atu hatudu respeitu ba malu? Esplika toʼok.

¹¹ Maski ita halaʼo moris kaben nian ho kontente, maibé dala ruma ita mós bele iha hanoin neʼebé la hanesan ba malu. Abraão ho Sara mós iha hanoin la hanesan bainhira hasoru situasaun ida. (Gên 21:9-11) Maski nuneʼe, sira la husik ida-neʼe atu haketak sira. Tanbasá? Tanba sira hatudu respeitu ba malu. Porezemplu, Abraão hatete ba Sara: “Favór ida.” (Gên 12:11, 13) Sara mós halo tuir Abraão hodi simu nia nuʼudar ninia “naʼi”. (1 Ped 3:6) Kuandu feen-laʼen la respeitu ba malu, baibain sira hatudu ida-neʼe liuhusi dalan neʼebé sira koʼalia ba malu. (Prov 12:18) No se sira la hadiʼa problema neʼe, ikusmai sira-nia moris kaben nian bele naksobu.—Lee Tiago 3:7-10, 17, 18.

12. Tanbasá mak sira neʼebé foin kaben presiza hakaʼas an atu koʼalia ba malu ho respeitu?

¹² Liuliu, sira neʼebé foin kaben presiza hakaʼas an atu koʼalia ba malu ho laran-diʼak no respeitu, hodi halo fasil ba sira atu koʼalia nakloke ho laran-moos. Laʼen ida hatete katak durante tinan primeiru ba sira-nia moris nuʼudar kaben-naʼin, sira sente estrese tanba susar atu komprende ba malu, hanesan kaben nia sentimentu, toman no presiza. Maibé hodi koʼalia ho didiʼak, koʼalia halimar, no hatudu haraik-an, pasiénsia no tau fiar ba Jeová, sira bele hametin sira-nia relasaun nuʼudar kaben-naʼin. Diʼak mós ba ita hotu atu halo tuir sira-nia ezemplu neʼe!

13. Tanbasá mak importante atu hatudu haraik-an?

¹³ Atu feen-laʼen bele koʼalia ba malu ho laran-diʼak no kalma, sira presiza duni hatudu “haraik-an”. (1 Ped 3:8) Irmaun ida neʼebé  kaben ba tinan 11 ona hatete: “Haraik-an mak hahalok ida neʼebé ajuda ita atu rezolve problema lalais tanba hahalok neʼe bele book ita atu hatete: ‘Deskulpa.’” Katuas kristaun ida neʼebé kaben ba tinan 20 ona hatete: “Dala ruma liafuan ‘Deskulpa’ mak importante liu fali liafuan ‘Haʼu hadomi ó’. Buat ida neʼebé ajuda ami atu hatudu haraik-an mak orasaun. Kuandu ami hakbesik ba Jeová hamutuk, ida-neʼe fó-hanoin ami-nia sala no Maromak nia laran-luak. Ida-neʼe ajuda ami atu iha hanoin neʼebé loos kona-ba ami-nia an rasik.”

14. Oinsá mak hahalok foti-an bele kona moris kaben nian?

¹⁴ Maibé, hahalok foti-an bele hanetik feen-laʼen atu la koʼalia ba malu no lakohi rezolve problema. Ema neʼebé foti-an la iha hakarak no la brani atu hatete: “Deskulpa, haʼu mak sala”, maibé buka razaun oioin atu la husu deskulpa. Ema hanesan neʼe buka deʼit atu duun ema seluk duké rekoñese ninia sala rasik no buka dame. Kuandu nia sente laran-kanek, nia sai hirus kedas hodi koʼalia fali liafuan neʼebé hakanek ema seluk nia laran ka sai nonook deʼit ho ulun-toos. (Ecle 7:9) Sin, foti-an mak hahalok neʼebé estraga moris kaben nian. Tan neʼe, ita labele haluha katak “Maromak la gosta ema loko-an, maibé fó grasa ba ema neʼebé haraik-an”.—Tgo 4:6.

15. Oinsá mak Efeso 4:26, 27 ajuda feen-laʼen atu rezolve problema lalais?

¹⁵ Kuandu feen-laʼen iha hanoin neʼebé la hanesan kona-ba buat ruma, sira presiza hakaʼas an atu rezolve problema lalais duké sai foti-an. Apóstolu Paulo hatete: “Keta husik loron monu ba imi-nia laran-nakali. Keta fó fatin ba Diabu.” (Ef 4:26, 27) Se ita la halo tuir Bíblia nia matadalan neʼe, saida mak bele akontese? Irmán ida hatete: “Rezultadu mak haʼu la bele toba-dukur!” Duké sai hanesan neʼe, diʼak liu atu koʼalia ba malu hodi buka dame, loos ka lae? Klaru katak dala ruma ita presiza tempu atu tuur mesak hodi halo ita-nia laran sai kalma fali antes atu koʼalia. No ita mós presiza halo orasaun ba Jeová hodi husu ninia ajuda atu bele hatudu haraik-an. Ida-neʼe sei ajuda ita la hanoin demais kona-ba ita-nia an, maibé buka dalan atu rezolve problema.—Lee Koloso 3:12, 13.

16. Oinsá mak hahalok haraik-an ajuda feen-laʼen atu iha hanoin neʼebé loos?

¹⁶ Hahalok haraik-an mós ajuda ita atu hafolin ita-nia kaben nia matenek ka ninia hahalok diʼak oioin. Porezemplu hanoin toʼok feen ida neʼebé matenek tebes kona-ba buat ruma no uza ninia matenek neʼe ba família nia diʼak. Se ninia laʼen mak ema haraik-an, nia la hanoin katak nia mak tenkesér diʼak liu fali ninia feen, maibé fó laran-manas ba ninia feen atu kontinua uza ninia matenek neʼe ho didiʼak. (Prov 31:10, 28; Ef 5:28, 29) Iha tempu hanesan, feen neʼebé haraik-an la sai foti an kona-ba ninia matenek no nia mós la hatún ninia laʼen. Afinál, tanba feen ho laʼen mak “isin ida deʼit”, bainhira sira ida hatudu hahalok foti-an, ida-neʼe bele hakanek sira naʼin-rua nia laran.—Mt 19:4, 5.

17. Saida deʼit mak bele ajuda ita atu halaʼo moris kaben nian neʼebé kontente no lori hahiʼi ba Maromak?

¹⁷ Karik ita mós hakarak halaʼo moris kaben nian hanesan Abraão ho Sara ka Isaac ho Rebeca. Ita hakarak halaʼo moris kaben nian neʼebé kontente, laran-metin ba malu, no lori hahiʼi ba Jeová. Se nuneʼe, buka uluk Maromak nia hanoin kona-ba moris kaben nian. Buka matenek husi ninia Liafuan. Hanoin no hafolin malu hodi bele haburas domin neʼebé loos. (Cân 8:6) Hakaʼas an atu hatudu hahalok haraik-an. Hatudu respeitu ba malu. Se ita halo buat hirak-neʼe, ita-nia moris kaben nian sei lori haksolok ba ita no ita-nia Aman Jeová. (Prov 27:11) Irmaun ida neʼebé kaben ba tinan 27 ona hatete: “Haʼu labele imajina haʼu-nia moris neʼebé la iha haʼu-nia feen. Ami-nia relasaun nuʼudar feen-laʼen sai metin liután ba beibeik loroloron. Ida-neʼe tanba ami hadomi Jeová no koʼalia ba malu beibeik.” Sin, ita-nia moris kaben nian mós sei sai hanesan neʼe!