‘Sé loos mak atan laran-metin no matenek?ʼ
“Sé loos mak emar laran-metin no matenek neʼebé naʼi haruka atu tau matan ba nia atan sira?”—MT 24:45.
1, 2. Ohin loron, Jesus uza sé atu fó ai-han espirituál mai ita? Tanbasá mak hatene kona-ba ida-neʼe importante?
IRMÁN ida haruka karta ba ita-nia sede-jerál, hodi dehan: “Haʼu la bele sura dala hira ona mak haʼu hetan informasaun neʼebé haʼu presiza duni iha tempu neʼebé loos.” Ita mós sente hanesan neʼe, loos ka lae? Maibé tanbasá?
2 Ita hetan ai-han espirituál iha tempu neʼebé loos tanba Jesus nuʼudar Ulun ba kongregasaun mak kumpre ninia promesa atu tau matan ba ita. Nia uza sé atu halo ida-neʼe? Bainhira Jesus fó sai sinál oioin kona-ba tempu neʼebé nia sei komesa ninia ukun iha lalehan, nia hatete katak nia sei uza “emar [atan, MF] laran-metin no matenek” atu “tau matan ba nia atan sira hodi fó han sira iha tempu loloos”. a (Lee Mateus 24:45-47.) Iha loron ikus sira-neʼe, Jesus uza “atan laran-metin” atu fó ai-han espirituál ba ninia dixípulu sira. Ida-neʼe importante mai ita tanba hodi simu ai-han espirituál liuhusi “atan laran-metin” mak ita bele hametin ita-nia relasaun ho Maromak.—Mt 4:4; Joao 17:3.
3. Iha tempu uluk, oinsá mak ita-nia livru sira esplika Jesus nia ai-knanoik kona-ba “atan laran-metin”?
3 Entaun, Jesus nia ai-knanoik kona-ba “atan laran-metin” hatudu saida mai ita? Uluk ita-nia livru sira esplika hanesan neʼe: Iha loron Pentekostes iha tinan 33, Jesus haruka “atan laran-metin” atu tau matan ba ninia “atan sira”. “Atan laran-metin” reprezenta ema kristaun kose-mina iha rai nuʼudar grupu ida, no Jesus nia “atan sira” mak ema kose-mina sira nuʼudar ema ida-idak. Ikusmai, iha tinan 1919, Jesus foti “atan laran-metin” neʼe hodi entrega ninia “rikusoi tomak”, ka buat hotu iha mundu neʼe neʼebé uza atu haklaken ninia Ukun. Maibé, kuandu ita estuda didiʼak Jesus nia ai-knanoik neʼe hodi husu Jeová nia ajuda, ita haree katak ita presiza halo mudansa ba dalan neʼebé ita komprende kona-ba “atan laran-metin no matenek”. (Prov 4:18) Mai ita aprende hamutuk ai-knanoik neʼe no hanoin oinsá mak ida-neʼe sei kona ita hotu maski iha esperansa atu bá lalehan ka moris ba nafatin iha rai.
BAINHIRA MAK AI-KNANOIK NEʼE SAI LOOS?
4-6. Oinsá mak ita bele hatene katak depois tinan 1914 mak ai-knanoik kona-ba “atan laran-metin” komesa sai loos?
4 Eskritura sira antes no depois Jesus nia ai-knanoik kona-ba “atan laran-metin” hatudu katak ai-knanoik neʼe komesa sai loos laʼós iha loron Pentekostes iha tinan 33, maibé iha loron ikus sira. Mai ita haree hamutuk.
5 Jesus konta ai-knanoik kona-ba “atan laran-metin” nuʼudar profesia kona-ba tempu neʼebé nia sei “hiʼit an mai” no “mundu neʼe atu hotu”. (Mt 24:3) Jesus nia liafuan iha Mateus 24:4-22 sai loos ba dala rua, ulukliu, husi tinan 33 toʼo tinan 70 no depois iha ita-nia tempu. Maibé oinsá ho ai-knanoik kona-ba “atan laran-metin”? Ida-neʼe mós sai loos ba dala rua ka lae? Lae.
6 Komesa husi Mateus 24:49, Jesus koʼalia liuliu kona-ba ita-nia tempu. (Lee Mateus 24:30, 42, 44.) Kona-ba buat neʼebé sei akontese durante terus boot, Jesus hatete katak ema “sei haree Oan-Mane mai husi kalohan leten.” Tuirmai, Jesus koʼalia kona-ba ema neʼebé sei moris iha loron ikus sira no katak sira tenke matan-moris, hodi dehan: “Imi la hatene iha loron neʼebé mak imi-nia Naʼi hiʼit an mai”, no “imi la hatene iha sá oras Oan-Mane sei mai”. b Fó tiha avizu hanesan neʼe, Jesus konta ai-knanoik kona-ba “atan laran-metin”. Ida-neʼe hatudu katak ai-knanoik neʼe sai loos iha loron ikus sira, neʼebé hahú husi tinan 1914. Tanbasá mak ita bele fiar hanesan neʼe?
7. Kuandu tempu koʼa nian hahú, pergunta importante saida mak mosu?
7 Hanoin toʼok kona-ba pergunta neʼe: “Sé loos mak atan laran-metin no matenek?” Iha apóstolu sira-nia tempu, ema la husu pergunta hanesan neʼe. Iha lisaun uluk, ita aprende katak apóstolu sira halo milagre oioin no sira mós fahe kmanek atu halo milagre ba ema kristaun seluk. Ida-neʼe hatudu katak Maromak mak apoia apóstolu sira. (Apos 5:12) Tan neʼe, ema la duvida katak Jesus uza apóstolu sira atu tau matan ba kongregasaun. Maibé, situasaun iha tinan 1914 la hanesan duni. Iha tinan neʼe mak foin komesa tempu koʼa nian atu haketak duʼut aat husi trigu. (Mt 13:36-43) Bainhira tempu neʼe hahú, iha ema kristaun falsu barak neʼebé bolu an nuʼudar kristaun neʼebé loos. Entaun, pergunta importante ida mosu: Oinsá mak bele hatene ema kristaun kose-mina neʼebé loos? Tuir ai-knanoik kona-ba “atan laran-metin”, ema kristaun kose-mina mak ema neʼebé hetan ai-han espirituál neʼebé sira presiza.
SÉ MAK “ATAN LARAN-METIN NO MATENEK”?
8. Tanbasá mak “atan laran-metin” tenkesér husi ema kristaun kose-mina sira?
8 “Atan laran-metin” tenkesér husi ema kristaun kose-mina sira neʼebé sei iha mundu. Ita fiar hanesan neʼe tanba sira hetan knaar nuʼudar “amlulik sira neʼebé serbí nuʼudar liurai” atu haklaken kona-ba Jeová nia kmanek. (1 Ped 2:9, MF) Loos duni, sira mak iha knaar atu hanorin lia-loos ba sira-nia maluk fiar-naʼin sira.—Mal 2:7; Apok 12:17.
9. Ema kristaun kose-mina hotu iha mundu neʼe mak “atan laran-metin no matenek” ka lae? Esplika toʼok.
9 Entaun, ema kose-mina hotu iha mundu neʼe mak “atan laran-metin no matenek” ka lae? Lae. Laʼós ema kose-mina hotu mak iha knaar atu prepara no fahe ai-han espirituál ba maluk kristaun iha mundu tomak. Porezemplu, hanoin toʼok kona-ba irmaun kose-mina balu neʼebé serbí nuʼudar atan ba kongregasaun ka katuas kongregasaun nian. Sira hanorin lia-loos iha serbisu haklaken husi uma ba uma no iha sira-nia kongregasaun, no sira ho laran-metin apoia matadalan husi sede-jerál. Maibé, sira la halo serbisu atu prepara no fahe ai-han espirituál ba maluk kristaun sira iha mundu tomak. Liután neʼe, ema kose-mina balu mak feto, no sira nunka hanorin ema seluk iha kongregasaun.—1 Kor 11:3; 14:34.
10. Sé loos mak “atan laran-metin no matenek”?
10 Entaun, sé loos mak “atan laran-metin no matenek”? Iha tempu uluk, Jesus uza grupu kiʼik ho ema uitoan deʼit atu fó ai-han ba ema barak, tan neʼe, ita bele hatene katak atan neʼe mak grupu kiʼik ida ho irmaun kose-mina sira neʼebé halo serbisu atu prepara no fahe ai-han espirituál durante tempu neʼebé Jesus ukun iha lalehan. Durante loron ikus sira-neʼe, irmaun kose-mina sira neʼebé serbí nuʼudar “atan laran-metin” serbisu hamutuk iha sede-jerál, no durante tinan barak nia laran, atan neʼe serbí nuʼudar Grupu Administradór husi Testemuña ba Jeová. Maski Jesus nia ai-knanoik koʼalia kona-ba grupu ida, maibé nia bolu grupu neʼe nuʼudar atan ida. Tan neʼe, kuandu Grupu Administradór halo desizaun oioin, irmaun sira sei halo ida-neʼe hamutuk nuʼudar atan ida.
SÉ MAK “ATAN SIRA” NEʼEBÉ SIMU AI-HAN?
11, 12. (a) Knaar oin rua saida mak “atan laran-metin no matenek” simu? (b) Bainhira mak Jesus foti atan laran-metin atu tau matan ba ninia “atan sira”? Nia hili sé?
11 Iha Jesus nia ai-knanoik, “atan laran-metin no matenek” simu knaar oin rua. Knaar primeiru mak atu tau matan ba naʼi nia “atan sira”. Knaar segundu mak atu tau matan ba naʼi nia “rikusoi tomak”. Tanba ai-knanoik neʼe kona-ba loron ikus sira neʼebé Jesus halaʼo daudauk ninia ukun iha lalehan, ita bele fiar katak liutiha tinan 1914 mak “atan laran-metin” simu knaar rua neʼe.
12 Bainhira mak Jesus foti “atan laran-metin” hodi fó knaar atu tau matan ba ninia “atan sira”? Atu hatán ba pergunta neʼe, ita presiza hanoin kona-ba tinan 1914. Iha lisaun uluk, ita aprende katak kuandu tempu koʼa nian foin hahú iha tinan neʼe, iha grupu barak neʼebé temi sira-nia an nuʼudar ema kristaun neʼebé loos. Husi grupu ida-neʼebé mak Jesus sei hili “atan laran-metin”? Ulukliu Jesus ho ninia Aman haree didiʼak templu espirituál husi tinan 1914 toʼo tinan 1919 foin hahú. c (Mal 3:1) Rezultadu mak sira kontente ho grupu kiʼik ida husi Estudante Bíblia neʼebé fó sira-nia laran ba Jeová no ninia Liafuan. Maski grupu neʼe presiza hadiʼa buat balu, maibé sira ho haraik-an simu dixiplina no halo mudansa. (Mal 3:2-4) Sin, Estudante Bíblia sira-neʼe mak grupu trigu nian. Ikusmai, iha tinan 1919, Jesus hili irmaun kose-mina balu husi grupu neʼe atu sai “atan laran-metin no matenek” hodi fó knaar atu tau matan ba ninia “atan sira” hotu.
13. “Atan sira” neʼebé simu ai-han espirituál inklui sé deʼit? Tanbasá?
13 Sé mak “atan sira”? Atan sira-neʼe mak sira neʼebé simu ai-han espirituál. Ulukliu, Jesus nia “atan sira” hotu mak ema kristaun kose-mina sira. Maibé ikusmai, atan sira-neʼe inklui mós ema-lubun boot husi bibi seluk. No ohin loron, bibi seluk mak barak liu fali ema kose-mina sira, no sira hamutuk iha Jesus nia “bibi luhan ida deʼit”. (Joao 10:16) Grupu rua neʼe sei simu ai-han espirituál neʼebé hanesan husi “atan laran-metin” iha tempu neʼebé loos. Maibé oinsá ho irmaun sira husi Grupu Administradór neʼebé halaʼo serbisu nuʼudar “atan laran-metin no matenek”? Sira mós presiza simu ai-han espirituál. Tan neʼe, sira ho haraik-an rekoñese katak kuandu sira ketaketak, sira mós “atan sira” hanesan deʼit ho maluk kristaun sira hotu.
Maski ita hein atu bá lalehan ka moris ba nafatin iha rai, ita hotu nuʼudar “atan sira” presiza ai-han espirituál
14. (a) “Atan laran-metin” iha responsabilidade saida? Ninia serbisu inklui saida deʼit? (b) Jesus fó avizu saida ba “atan laran-metin no matenek”? (Haree kaixa ‘Atan aat neʼe dehan karik . . .’.)
14 Jesus fó responsabilidade boot ba “atan laran-metin no matenek”. Iha tempu Bíblia, atan ida hetan knaar atu toma konta ba buat hotu iha naʼi nia uma. (Lc 12:42) “Atan laran-metin no matenek” mós hetan responsabilidade atu tau matan ba Jesus nia dixípulu sira hotu nuʼudar família ida. Sira-nia serbisu neʼe inklui toma konta ba osan, organiza serbisu haklaken no reuniaun boot sira. Sira mós halo livru sira neʼebé ita bele estuda mesak, fahe iha serbisu haklaken no mós uza iha kongregasaun. Loos duni, Jesus nia atan sira hotu sadere deʼit ba ai-han espirituál husi “atan laran-metin” neʼe.
BAINHIRA MAK TAU MATAN BA NAʼI NIA RIKUSOIN TOMAK?
15, 16. Bainhira mak Jesus sei tau ninia rikusoin tomak iha “atan laran-metin” nia liman?
15 Bainhira mak “atan laran-metin” simu knaar segundu atu tau matan ba Jesus nia “rikusoi tomak”? Jesus hatete: “Ksolok ba atan neʼebé, wainhira naʼi fila mai, nia sei hetan nia badinas nuneʼe. Tebes, haʼu dehan ba imi katak naʼi sei tau nia rikusoi tomak iha nia liman.” (Mt 24:46, 47) Jesus sei fila mai no haree ninia atan neʼe serbisu badinas hodi fó ai-han espirituál ba “atan sira”. Depois neʼe mak nia sei fó knaar segundu atu tau matan ba ninia rikusoin tomak. Tan neʼe, depois “atan laran-metin” neʼe simu tiha knaar primeiru, liutiha tempu kleur uitoan mak nia hetan knaar segundu. Atu komprende liután oinsá no bainhira mak Jesus sei “tau nia rikusoi tomak iha [atan] nia liman”, ita presiza hatene: Bainhira mak Jesus sei “fila mai”? Ninia “rikusoi tomak” inklui saida?
16 Bainhira mak Jesus sei “fila mai”? Mai ita haree eskritura balu antes no depois ai-knanoik neʼe. Antes atu konta ai-knanoik neʼe, Jesus koʼalia kona-ba tempu neʼebé nia sei “mai”, no ida-neʼe mak kona-ba tempu neʼebé nia sei mai atu tesi lia no halakon mundu aat neʼe. d (Mt 24:30, 42, 44) Tan neʼe, Jesus nia liafuan “naʼi fila mai” iha ai-knanoik neʼe mós sei akontese durante terus boot.
17. Jesus nia “rikusoi tomak” inklui saida?
17 Jesus nia “rikusoi tomak” inklui saida? Neʼe laʼós deʼit ninia rikusoin iha rai, maibé mós buat neʼebé iha lalehan tanba Jesus dehan: “Kbiit tomak iha lalehan no rai fó tiha ona mai haʼu.” (Mt 28:18; Ef 1:20-23) Agora, Jesus nia rikusoin neʼe inklui mós ninia Ukun nuʼudar Mesias, neʼebé nia simu iha tinan 1914, no nia sei halaʼo ukun neʼe hamutuk ho ninia dixípulu kose-mina sira.—Apok 11:15.
18. Tanbasá mak Jesus sei entrega ninia rikusoin tomak ba “atan laran-metin”?
18 Entaun, bainhira Jesus sei mai atu halakon buat aat hotu durante terus boot, nia sei haree katak “atan laran-metin” sei badinas fó ai-han espirituál ba ninia “atan sira” iha tempu neʼebé loos. Tan neʼe, ho laran-haksolok, Jesus sei fó knaar segundu hodi entrega ninia rikusoin tomak ba “atan laran-metin”. Sira neʼebé serbí nuʼudar “atan laran-metin” sei hetan knaar segundu neʼe bainhira sira saʼe ba lalehan hodi ukun hamutuk ho Kristu.
19. “Atan laran-metin” mak sei simu kolen neʼebé boot liu fali ema kose-mina seluk ka lae? Esplika toʼok.
19 Neʼe katak “atan laran-metin” mak sei simu kolen neʼebé boot liu fali ema kose-mina seluk ka lae? Lae. Sira simu kolen neʼebé hanesan. Porezemplu, hanoin toʼok kona-ba Jesus nia liafuan ba apóstolu naʼin-11 iha kalan antes nia mate. (Lee Lucas 22:28-30.) Jesus promete ba grupu kiʼik neʼe neʼebé laran-metin, katak sira sei simu kolen hodi ukun hamutuk ho Jesus nuʼudar liurai iha lalehan. Maibé liutiha tempu balu, Jesus hatete katak ema naʼin-144.000 hotu mak sei tuur iha kadunan nuʼudar liurai. (Apok 1:1; 3:21) Nuneʼe mós ho Mateus 24:47. Maski Jesus promete katak grupu kiʼik neʼebé serbí nuʼudar “atan laran-metin” mak sei hetan knaar atu tau matan ba ninia rikusoi tomak, maibé tuir loloos, naʼin-144.000 hotu mak sei hola parte iha knaar neʼe hodi simu kbiit boot iha lalehan.—Apok 20:4, 6.
Ema naʼin-144.000 hotu sei simu kbiit boot atu tau matan ba Kristu nia rikusoin tomak (Haree parágrafu 19)
20. Tanbasá mak Jesus fó knaar boot ba “atan laran-metin no matenek”? Oinsá mak ita bele hatudu katak ita hafolin arranju neʼe?
20 Hanesan Jesus uza grupu kiʼik ida ho ema uitoan deʼit atu fó ai-han ba ema barak iha tempu uluk, ohin loron mós Jesus uza “atan laran-metin no matenek” atu fó ai-han espirituál ba ninia “atan sira”. Jesus fó knaar boot ba “atan laran-metin” tanba nia hakarak ema kose-mina no bibi seluk atu nafatin simu ai-han espirituál iha tempu neʼebé loos durante loron ikus sira-neʼe. Entaun, mai ita hatudu katak ita hafolin Jesus nia arranju neʼe hodi apoia nafatin irmaun kose-mina sira neʼebé serbí nuʼudar “atan laran-metin no matenek”.—Ebr 13:7, 17.
a Parágrafu 2: Tempu balu antes Jesus konta ai-knanoik neʼe, nia konta ai-knanoik ida neʼebé atu hanesan kona-ba naʼi haruka ninia “atan laran-metin” atu tau matan ba ninia “família”.—Lc 12:42-44.
b Parágrafu 6: Liafuan “hiʼit an mai” iha versíkulu neʼe tradús husi lia-gregu erʹkho·mai. Liafuan neʼe la hanesan ho liafuan “hiʼit an mai” neʼebé temi iha Mateus 24:3, 27, 37, 39, neʼebé tradús husi liafuan pa·rou·siʹa. Jesus nia “hiʼit an mai” (pa·rou·siʹa) komesa ona no durante tempu neʼe mak nia sei mai (erʹkho·mai) atu halakon ema aat hotu.
c Parágrafu 12: Haree parágrafu 5-8 husi lisaun “Haʼu sei hela nafatin hamutuk ho imi” iha pájina 10-12 husi livru ida-neʼe.
d Parágrafu 16: Haree parágrafu 14-18 husi lisaun ‘Wainhira mak buat neʼe hotu sei mosu?’ iha pájina 7-8 husi livru ida-neʼe.
