Ita hotu fiar katak Jesus mak Mestre neʼebé diʼak liu iha mundu neʼe, loos ka lae? Karik ita mós koko ona atu halo tuir Jesus nia ezemplu, hanesan uza pergunta oioin ka konta ai-knanoik ruma. Maibé dala ruma Jesus mós hanorin ema hodi uza komparasaun sira.

Ita barak uza komparasaun kuandu ita koʼalia. Karik ita halo ida-neʼe la ho neon. Porezemplu, ita dehan: “Sira hatete katak ai-fuan neʼe tasak, maibé tuir loloos neʼe sei mangál”, ka: “Uluk nia moedór, maibé agora nia la moe ona.”

Kuandu ita hatete hanesan neʼe, ita esplika uluk buat ruma, depois ita kompara ida-neʼe ho buat seluk hodi uza liafuan maibé, ka maski nuneʼe. Dala ruma, ita mós aumenta informasaun balu hodi halo klaru liután liafuan neʼebé ita foin hatoʼo. Hodi koʼalia hanesan neʼe sei ajuda ema atu komprende buat neʼebé ita hakarak hatete.

Maski iha língua balu ka kultura balu ladún koʼalia hanesan neʼe, diʼak ba ita hotu atu hanoin oinsá mak komparasaun bele ajuda ita. Tanbasá? Tanba Maromak nia Liafuan uza beibeik komparasaun. Jesus mós uza ida-neʼe bainhira nia hanorin ema. Porezemplu, nia dehan: “Ema la sunu lakan ahi-oan hodi tau iha okos, maibé tau iha ahi-oan fatin.” “Haʼu mai laʼós atu halakon [ukun-fuan], maibé atu halo tuir loloos.” “Imi rona ema dehan: ‘Ó keta sala ho ema nia kaben.’ Maibé haʼu dehan ba imi: ‘Ema neʼebé hateke ba feto ida . . . ’” “Imi rona ema uluk dehan: ‘Matan selu ho matan, nehan selu ho nehan.’ Maibé haʼu dehan ba imi: ‘Keta simu hasoru ema aat. Ema ruma basa karik ó-nia hasan loos, see tan ó-nia hasan karuk ba nia.’”—Mateus 5:15, 17, 27, 28, 38, 39.

Bíblia uza komparasaun oioin hodi ajuda ita hatene ho klaru hanorin neʼebé importante. Porezemplu, se ita mak inan-aman, hanoin toʼok komparasaun tuirmai neʼe: “Aman inan sira, keta halo imi-nia oan sira laran-susar. Maibé hanorin sira dixiplina no Naʼi nia doutrina loloos.” (Efeso 6:4) Karik apóstolu Paulo bele hatete deʼit katak inan-aman presiza hanorin oan sira hodi tuir Jeová nia matadalan. Maibé, Paulo halo ninia hanorin sai klaru liután hodi hatete: “Keta halo imi-nia oan sira laran-susar. Maibé hanorin sira dixiplina no Naʼi nia doutrina loloos.”

Paulo mós hatutan tan: “Ita la luta hasoru raan no isin, maibé hasoru . . . grupu espíritu neʼebé aat iha lalehan.” (Efeso 6:12) Komparasaun neʼe ajuda ita atu komprende didiʼak kona-ba sé mak ita-nia inimigu. Sin, tuir loloos, ita luta hasoru anju aat sira, laʼós ema.

Iha livru Efeso neʼe, ita bele hetan eskritura barak neʼebé Paulo uza komparasaun. Kuandu ita hanoin oinsá mak nia uza komparasaun atu hanorin lia-loos, ida-neʼe sei ajuda ita hatene ho klaru kona-ba buat neʼebé ita tenke halo.

Porezemplu, iha pájina 4 no 5 iha lista kona-ba eskritura balu husi Efeso kapítulu 4 no 5. Kuandu ita lee eskritura ida-idak, ita sei aprende oinsá mak Paulo uza komparasaun sira. Tuirmai, hanoin didiʼak kona-ba ita rasik nia moris. Husu ba ita-nia an: ‘Haʼu-nia hahalok mak oinsá? Se haʼu mak hasoru situasaun neʼe, saida mak haʼu sei halo?’ No se ita haree katak ita presiza hadiʼa ita-nia hahalok ruma, hakaʼas an atu halo tuir Bíblia nia matadalan.

Karik, ita mós bele uza lista husi pájina 4 no 5 iha ita-nia adorasaun família nian. Oinsá? Ulukliu, ita hotu lee lista hamutuk. Tuirmai, família ida sei lee parte primeiru iha sorin ida, no ema seluk bele koko atu siʼik parte segundu neʼebé hakerek iha sorin seluk. Ita bele kadi kakutak hamutuk no koʼalia ba malu kona-ba oinsá atu halo tuir eskritura neʼe iha ita rasik nia moris. Sin, hodi uza komparasaun iha dalan hanesan neʼe sei ajuda joven no ema boot hotu atu haburas hahalok kristaun iha família laran no mós iha fatin seluk.

Hodi hatene didiʼak oinsá mak komparasaun sira bele ajuda ita hodi bele komprende lia-loos, ita sei hetan lalais komparasaun sira iha Bíblia laran no ita mós sei toman atu uza komparasaun iha serbisu haklaken. Porezemplu, ita bele hatete: “Ema barak dehan katak ita iha klamar, maibé haree saida mak Maromak nia Liafuan hatete kona-ba neʼe.” Ita mós bele husu ba ita-nia estudante Bíblia: “Ema barak fiar katak Aman ho Oan Jesus mak Maromak ida deʼit, maibé tuir loloos Bíblia hanorin saida ba ita? No ita fiar saida?”

Loos duni, Bíblia uza komparasaun barak, no ida-neʼe ajuda ita atu laʼo tuir Maromak nia dalan. No ita bele uza komparasaun oioin atu ajuda ema seluk hatene lia-loos husi Bíblia.